BADUNGU aboro ima ino gu pangbanga du tipa wai i aimi Yesu na ki asi ko dagba abatuka ue. (Mt. 27:35-38) Ono tie, kura aboro idi kuti gupai nga Baibiri agumbanga rengo te ho si aya ni we i ambakadi kangba Yesu tipa kpisidoho rogo murö.​—Mk. 15:42-46.

Kura ababisirapa aKitabu Wene Pangbanga ima du na gu kapa nga, ka i mbunga gu boro i naimi ni ti ngua i kpisidi ni ngba wene gene wa ka kpisido ni murö yo te. Kuba gure, i idi kuti gupai nga, si nawiraha wa agu aboro i anaaimo yo ti ngua wa amangi gbegberẽ apai, i anaamangapai na yo kia. Gu bake apangbanga nga Ariel Sabar, nga gu ko nake agu amagazini nga ga Smithsonian, asaki ndu gupai du kura aboro ti ni na gi bipai re, ko aya: “Imo boro ti ngua aningia gu kere mbusa i anaafuhe fu kere gbegberẽ aboro rogo dagbarago, na kura abawetekepai ape gupai nga, aRomo anaarengbanga ka kpisido agu aboro re ngba wene gene te.” ARomo anaaida kaa wasi amangi gbegberẽ apai, sidu, dedede, i anaambu akangbayo ti ngua tipa anyanvuo rihe. Na i anaaba gu yangada he naninye ti kangba ku rogo kungbo murö.

Ono tie, abawirikipai tipa kuru ahe ima yugo kurapai berewe kia, tipa gu bete aYudo i anaaimo yo. Rogo 1968, i abi yangara meme kumba nga gu ko i aasi ko ti ngua rogo bambata kama agarã. I abihe rogo murö nga ga aYudo mbembedi na Yerusarema. I abi yangara meme gu boro re rogo sanduki nga gu i naabanda kangba aboro rogoho. I abi meme gidose dagba gu yangara ameme nanye. I abanga ha na anaari kuti ngua, bagizo agu anaari re adu wa bagizo wiribe biama na beberehe. Sabar aya, “Gido gu kumba rimoko angia Yehochanan re aundo ka dia gu kere kango kusayo nadu riipa gu pangbanga du rogo Kitabu Wene Pangbanga nibipa kpisido Yesu murö yo.” Ni rengo, “Gido Yehochanan nga gu kpiapai nga ga gu kumba i aimi ko ti ngua ti regbo Yesu nga gu ko aRomo ambu aYudo i kpisidi ko.”

Sidu, ga aboro bipai kindi ni bakiakia tipa wai i aasi Yesu ti ngua nibi gupai meme gido Yehochanan ayugoho. Ono gupai du ziazia nga, agu abamangi gbegberẽ apai i aanaaimo yo ti ngua, i anakpisido kangbayo akpisido na i anaabanga ha aba gbua ku rogo kungbo murö te. Si tie ziazia nga, gupai Baibiri apehe tipa kpisido yo kangba Yesu rogo murö ni kina ruruhe. Agu agopai duho nasongoda gupai Baibiri apehe.

Gu nyakipaha gbe nga, Yekova aima gumba gupai kumbatayo nga, i nika kpisido kangba Yesu rogo gu murö nga ga kumukokumuko kumba, na boro ho ka ká na Fugo Mbori ti digisoho tihe te.​—Yes. 53:9; 55:11.