Baibiri afuranga tipaha te. Ono si nape bawene futufutuapai furani nga gu rengbe ka yugo ndu gupai i arengbe ka sia ka zanga ga ti ni ku Nazareta yo ti gu regbo re.

Maraika aya fu Maria wẽ ri nika du na vuse na ki vungu. Ho Maraika agumba gi pangbanga re ni, aMaria na Yosefa aaraka Nazareta yo nga gu gbata Yosefa asono rogoho Gariraya yo. (Rk. 1:26-31; 2:4) Kusa, ho i ayego ni Ezipeta yo, i akaraga tiyo berewe ku Nazareta yo. Yesu asono Nazareta yo na ki da ni boro Nazareta. (Mt. 2:19-23) Si du nga ndu gupai ani ninaaberã pa Nazareta ti ni ho ani ayamba rimo Yesu, Yosefa, na Maria ni.

Gume Maria adu kinaho rimori angia Erizabeta naaraka Yuda yo. Erizabeta angia dia gu boromotumo nangia Zekaraya na ri ki da ni na Yoane Bafu Bapatiza. (Rk. 1:5, 9, 13, 36) Maria andu ka bi Erizabeta Yuda yo na ki sungu yo tipa adiwi biata. Sidu, Maria kini karaga tiri ku Nazareta yo. (Rk. 1:39, 40, 56) Si du nga ndu gupai Maria aini bete arago ti ni Yuda yo.

Fuo regbo kusa, Yosefa amangipai kuti gu ndiko nakuru tipa “i ke rimo aboro dunduko.” Sidu, Yosefa aguari Nazareta yo ki ndu ku Betereme yo nangia gu gbata nangia “ga Dawidi” na si angia gu ba sangbaanebi ape gupai nga i nika vunga Masiya rogoho. (Rk. 2:3, 4; 1 Sam. 17:15; 20:6; Mika 5:2) Tifuo Maria vungu Yesu, Yosefa aasanga ri ri ndu gbanga nunguro na fogo gude ku Nazareta yo te. I anye kina Betereme yo baturoho adu wa akirometere ribua (amairo 6) ti Yerusarema. Si adu fuyo taata i ndu ku yekaru yo ka fu motumo kuti wai Ndiko anaaidaha.​—Pa Mot. 12:2, 6-8; Rk. 2:22-24.

Ga Mbori maraika aima pe gupai mbata kusayo fu Maria nga, i nika maa wiiri “ni bakindo a wa, . . . Dawidi” adu na ko ‘ki zogorago’ ni Bakindo. Si nawiraha wa, aMaria na Yosefa aberẽ gupai nga si angia nyanyakipa pai tipa i vungu Yesu kina rogo ga Davide gbata. (Rk. 1:32, 33; 2:11, 17) Si rengbe kadu nga i aberẽ gupai nga si adu ni patatamana ka sungo yo mbata na ka pido gupai Mbori nika ida i mangihe fuo gure.

Ani ainongo bagizo regbo wai i adihe ku Betereme yo ho gu kura abinza akerekuru andu ni ka bi yo te. Ono tie, ti gu regbo re, agu aborokporo re aaraka tii gayo bambu na wiriyo angia “toni gude,” angianga fogo gude ya. (Mt. 2:11) Si nawiraha wa, kuba gupai nga i ga berewe ku Nazareta yo, i araki Betereme yo tipa gbanga regbo, na ki sa Betereme ni kpuyo.

Erode afu gu zinahe nga, agu “akumbagude dunduko naadu Betereme yo . . . agu yo garãyo adu ue na agu yo garãyo ata du nga ue ya” i imi yo kusayo. (Mt. 2:16) Maraika ape gipai re fu aYosefa na Maria na i ki zubo ku Ezipeta yo na Yesu na ki nye yo daho Erode akpi ni. Kusa, Yosefa adi gako aborokporo ki ga na yo ku Nazareta yo. Tipagine i aakaraganga tiyo ti ni ku Betereme yo ya? Mbiko ti gu regbo re, wiri Erode nangia Arukerao naazogarago Yuda yo, na ko angia gbegberẽ sino kumba kisusi. Na berewe a, maraika apepa gu kerepai nadu ti gupai nga aYosefa karagatiyo koyo. Nazareta yo nangia wene ba tipa Yosefa sonosi Yesu ko du ni ndikidi irisimbori.​—Mt. 2:19-22; 13:55; Rk. 2:39, 52.

Si nawira gupai tie nga, Yosefa aima kpi mbata fu Yesu kpi ka zaka gene fu kura aboro i ga ku ngbangbaturũ yo. Sidu, i nika zingisa Yosefa be kpio ku auru kpotosende. Badungu aboro nika du na rengba ka bi ko na ki wiriki dungu futufutuapai be ko tipa ndu gupai ko gbiati Maria anye ti ni kina Betereme yo tifuo vunga Yesu.