1. Ginipai si aida ani mangihe tipa ka bata rogo ga Yekova uru?

 HO BAIBIRI afura ni tipa “rago Gbia,” watadu ga Yekova uru, si nayugopa gu regbo Yekova nika gbarasa avurako ti ni na ki ye na bata fu gako aboro. Mbata kusayo, Yekova afu mbusa fu bete rikaaboro. (Yes. 13:1, 6; Yeze. 13:5; Zef. 1:8) Ti gi gaani regbo re, “rago Gbia” watadu ga Yekova uru nika tona ho abangbembatayo rogo birĩ-zogarago nika gbarasa Babera Du na Bakere Ome Ti Ni ni, na i nika diaha kusayo ti regbo gu vura nga Aramegido. Tipa ka bata rogo gu “uru” re, si naida ani mbakadi tirani awere. Yesu ayugu gupai nga si aidanga ani du gbua kina regerege tipa “bakere gberãngbi” te, ono ani ‘mbákadi tirani’ a tipaha.​—Mt. 24:21; Rk. 12:40.

2. Waigu rengbe ani ka gbia undo ti 1 ATesaroniko?

² Rogo gu bambata waraga nangia ga gu mokedi nangia Pauro ga Mbori toro adu kugiiko ko kehe fu ATesaroniko, ko amangisunge na badungu akpiapai tipa ka undo aKristano i mbakadi tiyo tipa gu bakere uru nga ga ga Yekova sapangbanga. Pauro aima ino gupai nga ga Yekova uru ayengo ti gu regbo re ni basa te. (2 Tesa. 2:1-3) Wa si avura du wo, ko angarasi awirinako i mbakadi tiyo tipa gu uru re si kidu wa ka i ya si ni ka ye kina gba, ani ima rengba a ka mangapai kuti gi gako rugute re. Ani bingo gako sakarogopai yo tipa agi apai du kusende re: (1) wai ga Yekova uru nika ye, (2) ada nikaa batanga rogo gu uru re ya, na (3) wai rengbe ani ka mbakada tirani tipa ka bata.

3. Waigu ga Yekova uru nika ye wa iradĩ yuru? (Oni bi sura.)

³ “Wa iradĩ naye.” (1 Tesa. 5:2) Gere nga bambata kpiapai dagba agu akpiapai yo du biata nga gu nasakapa ye ga Yekova uru. Dedede, airadĩ naamangapai ni kina wiri ipo na i naamanga gipai re yuru ho aboro ainongo gupai ni nga i nika ye ya. Ga Yekova uru nika ye a ni kina boro wiri ipo, si ki tunguo badungu  aboro atunguo. Zavura ndikidi aKristano, ngbayo ima rengba ka zera be wai apai nika manga ni kina boro ipo. Ono i agbarasanga rani wa gbegberẽ aboro te.

4. Rogo gini gene du ga Yekova uru wakina imisiri vungu?

⁴ “Wa imisiri pai sa gu de du na gude.” (1 Tesa. 5:3) Gu dee niima mbeda ka vunga, ka ri iningo gu ndikidi regbo ri nika vunga ti ni te. Ri ima ino gupai nga zanga kapa nga ri nika vunga avunga. Ho regbo vungu nika da ni, si nawiraha wa si nika ye ni tunguotunguoho, ni iigirã ha, na ni gupai ka boro aarugusanga ha ya. Wakina gure a, ani ainongo gu uru na gu saa ga Yekova uru nika tona ti ni te. Wa vura duhe wo, ani ima du na gu kido nga si nika ye aye, na ga Mbori sapangbanga kurii gbegberẽ aboro nika ye wa ikpirogumba na ni gupai ka boro aanengaha ya.

5. Rogo gini gene du bakere gberãngbi wa ho rago naagira ni?

⁵ Wa ho rago naagira ni. Ga Pauro biata kpiapai fura berewe tipa airadĩ nga aguyo nadĩhe yuru. Ono bara gere, si nawira wa Pauro naringbisa ga Yekova uru kuti girarago. (1 Tesa. 5:4) Si nawiraha wa agu airadĩ ninaaye yuru ni naainongo gupai nga regbo nasusa te. Rago ima rengba ka giro yo na si ki sa gupai nga i du gbaiga. Kina wo bakere gberãngbi nika kusa agu aboro gbaiga du wa airadĩ nga aguyo nye rogo bitimo nimanga agu apai nasa gberãrago ti Mbori. Si aidanga ani du wa yo te, si naida ani du regerege ka ká gu mangaapai nasa gberãrago ti Yekova na kini pekefuo ‘wenepai dunduko na rurupai na rengo.’ (Ef. 5:8-12) Pauro amangisunge fuo gure na akpiapai ue tipa ka sakapai tipa agu aboro nikaabatanga ya.

6. Rogo gini gene dungu aboro ara ara ngbaha? (1 ATesaroniko 5:6, 7)

⁶ “Agu yo nara.” (Oni gedi 1 ATesaroniko 5:6, 7.) Pauro aringbisipa agu aboro nikaabata nga rogo ga Yekova uru ya kuti agu aboro nara.  I aruganga tiyo na pa agu apai namanga patiyo watadu pa wai regbo asusa te. Sidu, i ainongo gu regbo nyanyakipa pai namangi ti ni na ka i mangingo pai a kuti ni te. Badungu aboro areme wakina agu aboro nara ara rogo toro yo. (Rom. 11:8) I aidanga kuti gu gopai nayugo gupai nga ani naraka rogo “kusa rago” na bakere gberãngbi ima mbeda ka ye te. Ho bakere aariapai amanga ni rogo zegino, nyemu gaani pangbanga nga ga Kindo nazio bete kura aboro azio. Wa vura duhe wo, dungu aboro nandu andu kaa ra berewe kuba gupai nga i naangera angera. Zavura agu aboro niima ida kuti uru sapangbanga naberã gupai nga si kindi ni tuturũ he. (2 Pet. 3:3, 4) Ono tie, si ni nyanyakipa pai furani ani naangera angera kindi na aˈuru dunduko.

7. Waigu du agu aboro Mbori nika gbarasa yo wakina akpibuda?

⁷ “Agu yo nakpi buda.” Gu mokedi re aringbisipa agu aboro Mbori nika gbarasa yo kuti akpibuda. Agu aboro niima kpibuda, i arengbanga ka mangapai niipo kuti agu apai namanga patiyo te, na i namanga gbegberẽ adiaberã. Wakina gure a, gbegberẽ aboro amanganga pai kuti ga Mbori azahe te. I sia gu gene raka nandu sa gbarasa yo. Ono tipa aKristano tigayo, i nape gupai fuyo nga i naaberã wenengai. (1 Tesa. 5:6) Wene bawiriki Baibiri sa nga Richard C.H. Lenski aya, “gu boro naberã wenengai, ni nasungo zezeredi na zanga gunde, na ni na rengba ka berã wenengai na ki mangi wene diaberã.” Tipagine si aida ani du ti ni zezeredi na ki zanga wo? Si wo tipa gupai nga ka ani rimisingo tirani kurogo agu apai yo nabipa birĩ-zogarago areme watadu ka berãpa mbakada agu akpakarapai namanga rogo zegino ya. Gu soapai nga ga ngbe na birĩ-zogarago watadu ka songoda agu akpakarapai namanga rogo zegino nikaa kio kina kumbatayo wa ga Yekova uru ambeda. Wa vura duhe wo, si aidanga ani naabaka bangirani tipa wai ani nika mangapai kuti ni te. Ga Mbori toro naundo rani ani du zezeredi ki zanga wo berãrani yo na kini mangi agu adiaberã nga ga tatamana.​—Rk. 12:11, 12.

8. Waigu 1 ATesaroniko 5:8 ayugopa agu asino nika undo rani ani naangera angera kindi? (Oni bi sura a.)

⁸ “Niukadi . . . marã ngbaduse . . . na kpakpari vura.” Pauro naringbisa rani kuti abanzengere nga aguyo niima du regerege na ki ima vo tiyo tipa vura. (Oni gedi 1 ATesaroniko 5:8.) Aboro naaida gupai be banzengere nga ni du regerege tipa ka sovura ti ai gu regbo du vura. Kina gu bangisapai re du tipa rani. Ani nadu regerege tipa ga Yekova uru nivo ani marã ngbaduse nga ga idapase na nyemuse na kpakpari nga ga maabangirise. Agi asino re ima rengba ka undo rani ni bakerehe.

9. Waigu gaani idapase abanda rani?

⁹ Marã ngbaduse anaabanda ngbadu banzengere. Idapase na nyemuse nabanda gu ngbaduraniyo narukuba kurapai. Si nika undo rani ani naairiso Mbori na kini pekefuo Yesu. Idapase nafu gu kido furani nga Yekova nika fu mosoro afu furani tipa gbata ani ko na ngbaduraniyo dunduko. (Eb. 11:6) Si nafõngbadurani yo ani nye niruru rani fu gaani Bangbembatayo nga Yesu, zavura ka ani vura kaa gbiatirani na arungosiro vurũ. Ani ima rengba ka nyakasa gaani idapase tipa wa ka ani rengbe ka hi akpakarapai ni wirika ani pai ti ga agu aboro akpiapai du ti gi gaani regbo re nga aguyo nabanda gayo padu ni ruruse arungosiro watadu zingo mosoro ki vura du vurũ. Na ani ima rengba ka ne gu kerepai nga ga kpinyemu marã na nyemu ahe ni bakerehe ka ani wiriki agu aboro nasa gayo raka taata tipa ka peresa pa agu apai nga ga Kindo mbatayo rogo gayo raka. b

10. Waigu nyemuse tipa Mbori na tipa aboro aundo rani ani hipai?

 ¹⁰ Nyemuse a na nyanyakipaha tipa kaa ngera angera kindi na kini banda gaani regbo. (Mt. 22:37-39) Nyemuse naundo rani ani hipai ti ngba tungusapai ka si vura du nga si nika ye na kina gini kpakarapai furani vurũ. (2 Tim. 1:7, 8) Bambiko ani nayugo nyemuse fu agu aboro airisongo Yekova ya, ani natungusapai kindi na kini mangisunge kindi rogo gaani dagbarago, zavura kini mangi dezirepai rogo terefuni na rogo keka awaraga. Ani ambunga du na gu maabangirise nga, rogo kura uru sa, gaani amurakporo nika manga ariapai na ki tona ka manga gupai du ni ruruhe te.​—Yeze. 18:27, 28.

11. Waigu nyemuse tipa awirinarani aundo rani? (1 ATesaroniko 5:11)

¹¹ Ani ima kpinyemu awirinarani a. Ani nayugo ngbatunga gu nyemuse re ‘nizúngadi tirani na akuarani, ki ninyakasa tirani dagba rani.’ (Oni gedi 1 ATesaroniko 5:11.) Kina wai abanzengere naamangapai sa kube kube ba vura yo, kina wo a ani anyakasa akuarani. Rengo nga ha nga, banzengere ima rengba ka õga gu kurani du yo na ni basovura yo zanga ni ini aino, ono ni ata inongo aino kini mangi gipai re te. Wakina gure a, ka ani ta inongo aino kini imisi awirinarani watadu ka karaga gbegberẽpai fu yo kuba gbegberẽpai te. (1 Tesa. 5:13, 15) Ani nayugo gaani nyemuse a ni yugo ani irisa fu agu awirina nangbembatayo rogo apai yo rogo dungurati. (1 Tesa. 5:12) Ho Pauro ake gi waraga re ni, gu dungurati i azakihe Tesaronike yo aadianga garã sa te. Si nawiraha wa agu akumba i asiayo i naangera kurii apai aadunga na inohe gbe te na i aima manga dungu aingahe. Wa si avura du wo, si aaida aida i naayugo irisa fuyo. Wa bakere gberãngbi ambeda, si ima rengba ka ida ani naangera kina koyo du agu abaakumba ni du rogo gaani dagbarago tipa arugapai zavura susi wai ani angera koyo du yo ni awere. Si ima rengba kadu nga ani adunga na rengba kaa gbia arugapai be awirina rogo riibasunge nga ga zegino na rogo abe-basunge te; sidu, si ni nyanyakipa pai ka kpinyemu gaani abaakumba awere na kini irisi yo. Ka kina gini apai vura kaa manga, ani du na rubangirise, ka zanga maaberãrani kina kuti gayo aingahe,  ono ani moiberãrani kuti gupai nga Yekova vurube Kristo nanungusa gi ruru akumba re.

12. Waigu gaani maabangirise abanda gaani aberã?

¹² Kina wai kpakpari naabanda rii banzengere, gaani maabangirise tipa bata nabanda berãrani na kini undo rani ani berẽ wenengai. Ni du ani na nyanyaki maabangirise, ani ima ino gupai nga guhe gi zegino re narengbe ka fuhe sunge ti ni te. (Frp. 3:8) Gaani maabangirise naundo rani ani nye zezeredi na ki zanga wo. Gipai re angia rengo tipa Wallace na Laurinda, nga aguyo namanga sunge vuru Afirika. Rogo aposo yo biata, i dunduko azanga avunguyo. Mbiko gu ririkaza nga Korona, i aadunga na rengba ka karaga tiyo ku kpuyo yo tipa kadu na gayo aborokporo te. Wallace akepai nga: “Gu maabangirise du tipa zinga be kpio naundo re mi naaberãpa yo, angianga pa wai i adu rogo gu yangara uru i adu ni unga yo rogo gi zegino re ya, ono wai i nika du rogo gayo bambata uru rogo vovo zegino. Gi maabangirise re nasa re mi du zezeredi ho mi asota ni na gberãrago watadu pa zanga biyo.”

13. Ginipai rengbe ani ka mangaha tipa ka gbia ziazia toro?

¹³ “Ka oni bísi nga ‘gu we nga ga,’ Toro ya.” (1 Tesa. 5:19, NW) Pauro aringbisi ziazia toro kuti we ngbaduraniyo. Ho du ga Mbori toro ni tirani, ani nadu zaaza na kidu na nyemu manga gupai du ni ruruhe na ani nadu na ome tipa ka mangasunge fu Yekova. (Rom. 12:11) Ginipai rengbe ani ka mangaha tipa ka gbia ziazia toro? Ani ima rengba ka kparakpee tipaha, kini wisigi Fugo Mbori, na kini kodi tirani na gako riigbu gako toro angbe fuhe kumbatayo. Pa mangaha wo nika undo rani ani sonosi “zuzu Toro.”​—Gara. 5:22, 23.

14. Ka ani aaida kaa ndu kindi kumbatayo kaa gbia ga Mbori toro, ginipai si aida ani nehe? (Oni bi sura a.)

¹⁴ Tingbafuo Mbori fu gako ziazia toro furani, si naida ani du na rubangirise ka zanga ‘bísa gu we nga ga, Toro.’ Mbori nafu gako toro sa fu kina agu aboro nabanda gayo aberã na mangaapai ni gigirihe. Ko arengbanga ka fu gako toro furani ka si du nga ani nandu kindi kumbatayo kaa berã tipa agu apai adunga ni gigirihe ya na kini mangipai kuti ni te. (1 Tesa. 4:7, 8) Tipa kaa gbia ga Mbori toro kindi, si naida a ka ani  ‘páyasi nga agu apai i nagumbaha ni sangba Mbori ya.’ (1 Tesa. 5:20) Gi “sangba Mbori” du ane re nafura tipa agu apangbanga ga Mbori toro adu kugiihe nga gu nakoda agu apai nabi pa ga Yekova uru na pa wai ga Yekova uru ambeda gbe ti gi gaani regbo re. Si aidanga ani berẽ gupai nga ga Yekova uru watadu Aramegido ayengo ti gaani regbo te te. Kuba gure, ani nayugo gupai nga ani naberãpa ha aberã si ye bambeda​—watadu paha kina berãrani yo ni du ani zaaza ti ngba manga agu apai nga ga “sinombori” na aˈuru dunduko.​—2 Pet. 3:11, 12.

15. Waigu rengbe ani ka banda tirani tipa ka ziree apangbanga gbiati agu aziree nga ga adaimona nangingo rani ya? (1 ATesaroniko 5:21)

¹⁵ Barambeda kumbatayo, avura Mbori nika ya: “Zereda, ngba barani angba!” (1 Tesa. 5:3) Agu aziree nga ga adaimona nika hii kpotosende na kini ingisi dungu aboro. (Yugo. 16:13, 14) Ginipai nika du tipa rani? Ka si du nga ani “ásadi apai dunduko,” i ananganga rani te. (Oni gedi 1 ATesaroniko 5:21.) Gu fugo Giriki i namangisunge na ni nga “ásadi apai,” i amangisunge na ni nipa asada pa nyanyakipa amarã. Ngba gi gene re, si naida ani asadi agu apai ani agiaha watadu ani agedaha tipa ka diaberã tipa gu du ni wenehe. Gipai re adu na nyanyakipaha fu aTesaroniko, na zavura si nika du na nyanyakipaha furani wa bakere gberãngbi ambeda. Kuba gupai nga ka ida kuti agu apai dunduko kura aboro apehe, ani mangisunge na gaani tandu berãpai tipa ka ringbisa gupai ani agedaha watadu gupai ani agiaha na gupai Baibiri gbiati ga Yekova riigbu apehe. Ka ani mangihe wo, agu aziree nga ga adaimona aingisanga rani watadu ka biriko rani te.​—Snz. 14:15; 1 Tim. 4:1.

16. Gini kidohe du ani na maabangirise tipaha, na ginipai ani nadiberã tipa ka mangaha?

¹⁶ Ani ima ino gupai nga ga Yekova aboro nika bata abata ti regbo bakere gberãngbi. Ono tie, wa du ani dunduko ni basasa, ani ainongo ginipai nika manga gba te. (Yak. 4:14) Wa vura duhe wo, singia ani nika raka ti regbo bakere gberãngbi watadu ani nika kpi mbata fuhe, ani nika gbia mosoro agbia nga ka raka nyeanye kindi ka ani nye niruru rani. Mbedimbedi aKristano nika du na Kristo ngbangbaturũ yo. Kura akandoro nika du rogo paradizo auru kpotosende. Ani dunduko moingo berãrani amaa tipa gu wene maabangirise du furani kumbatayo na ki mbakadi tirani tipa ga Yekova uru!