1-2. Wakina Roto, gini kpakarapai aKristano agbiatiyo na ni areme?

 HO ANI abi gu wasiwasi mangaapai ni nga ga aboro areme, si nasarani ani du kina wai Roto adu. Ko “arungo bakere be gu wasiwasi mangaapai nangia ga gbegberẽ aboro”, bambiko ko aima ino gupai nga, gu Barani du ngbangbaturũ yo ima soga gbegberẽ mangaapai. (2 Pet. 2:7, 8) Bambiko gupai nga Roto anaagunde ti Mbori na kini kpinyemuko, ko aima soga gu wasiwasi mangaapai nangia ga agu aboro naadu pati ko. Agu aboro ke rani kirikiri a na kina wiri bete irisa gbua tipa gu ga Yekova arugute du tipa wene mangapai watadu i na irisa tipaha te. Wa vura duhe wo, ani ima rengbe ka nye ni gigiri rani rogo gaani mangapai yo na ki banda gaani nyemuse gbiati wene gunde ti Mbori.​—Snz. 14:2.

² Yekova naundo rani ani mangi gipai re vurube gu ngarasaro ani agbiaha rogo gu buku nga ga Asanza. AKristano dunduko nga akumba, adee, paranga aboro na sosono aboro ima rengba ka gbia undo nzunzu ti wisigo yo agu arugute nga ga tatamana du rogoho.

3. Ringbisihe kuti Asanza 17:3, gini ndupai sa si aida ani banda kpotorani yo ti ni? (Oni bi sura a.)

³ Gu nyanyakipa ndupai si aida ti ni ani banda gu kpotorani yo narukuba kurapai nga, Yekova nawisigo kpotorani yo. Gipai re nayugo gupai nga, ko nabi dungu apai kisusi gu rengbe aboro ka bihe, ko ima ino gu ngbatunga aboro nzunzu nga ani. (Oni gedi Asanza 17:3.) Ko nika kpinyemu rani akpi ka si du nga ani naberãkurii gako arugute, nga gu rengbe ka undo rani ani raki nyeanye kindi. (Yo. 4:14) Sidu, ani ambunga gu gbegberẽ mangaapai gbiati  aziree nga ga Satana gbiati gu gbegberẽ aboro du rogo gako zegino i imisi rani te. (1 Yo. 5:18, 19) A wa ani nikaa mbeda gbe na Yekova, gaani nyemuse na gaani irisa tipa ko nikaa sona gbe. Bambiko ani aidanga ka imisa Barani te, ani nika soga gu berãpai nga ga manga ingaapai. Ho ani nika du ni ni asadiasadi rani ka manga gupai du ni irairaha, ani nika sana tirani nga, ‘Waigu rengbe mi ki ta ino aino kini imisi gu boro naima yugo bakere nyemuse fere?’​—1 Yo. 4:9, 10.

4. Waigu gunde ti Yekova abanda wirina ka ri mangingo gupai du ni irairaha ya?

⁴ Marta, nga wirina rogo gu ringara nga Croatia nga gu ri naadu rogo gu asada nga ga manga wasiwasi kodaba akepai nga: “Si adu fere ni kere kpakarakpakaraha tipa ka berã wenengai na ka sovura kuti nyemu manga gupai du ni irairaha. Ono gunde ti Yekova aima banda re.” b Waigu gunde ti Mbori abanda ri? Marta aya, ri aberẽkurii gu sangbanapai rengbe gbegberẽ diaberã ka ye na ni. Ani ima rengba ka manga kina gu bangisapai re. Gu gbegberẽ sangbanapai kisusi rengbe ka manga nga ani nika ba gberãrago ti Yekova na ani adunga na rengba ka irisoko nyeanye kindi te.​—Bam. P. 6:5, 6.

5. Ginipai rengbe oni ka wirikaha ti ga Leo kpiapai?

⁵ Ho ani agunde ni ti Yekova, ani nadu na rubangirise ka zanga zio bakure na agu aboro namanga gbegberẽ apai. Leo, nga gu ko naraka Congo yo, aima wirikapai ti gipai re. Agarã biama fuo zioko bapatiza, ko azi bakure na agu aboro naamanga gbegberẽ apai. Ko aberẽ gupai nga, gbegberẽpai nga gipai re te, bambiko ko nitiko aamanganga gbegberẽ apai te. Ono si aaturõngo te, gako abakure kidu na maapai kuriko ko ki tona mbira buda ni bakerehe na ko ki mangi wasiwasi kodaba. Ko atona ka berãkuriipa agu apai avunguko nga aKristano ayuguhe fuko na wai ko adu na ngbarago ho ko anaairiso Yekova ni. Sangbanaha angia gine? Ko atona ka manga gupai du ni ruruhe. Na gu undo  nga ga abaakumba, ko akaraga tiko fuo Yekova. Areme, ko namangasunge ni bakumba na ni kparakpara bazakigene.

6. Gini kpiapai nga ga adee ue ani nika sakapai tipaha awere?

⁶ Ani sakingo pai tipa Asanza kapita 9, yo ani agedapai ni tipa adee ue, gu kura ri narukuba tatamana na gu kura ri kini rukuba mungo. (Oni ringbisinga ha na ARomo 5:14; AGaratio 4:24.) Wa ani nikaa wisigo gipai re, mo moi gupai ku berãro yo nga, ga Satana zegino ima kpinyemu wasiwasi kodaba gbiati biko agu ahe nazingisa nyemu kodaba. (Ef. 4:19) Sidu, si ni nyanyakipa pai tie mo naandu kindi kumbatayo kaa sonosa gunde ti Mbori na kini ne gbegberẽpai. (Snz. 16:6) Si kita du wa gere tie, ani dunduko singia kumba watadu dee rengbe ka gbia undo ti agi apai du rogo gi kapita re. Agi adee dunduko du ue re, i asakipai tipa yo nga, i nayamba agu​—aboro “zanga rugatinapai.” Ka pepai ngba kura gene, si wa ka i ya, i dunduko naya, ‘Mo yé ku kpure yo, mo ri gi riahe.’ (Snz. 9:1, 5, 6, 13, 16, 17) Ono gu sangbanapai namangi agu aboro naidi na gu yambahe re ni basasa dunduko adu ni bakiakia.

7. Ringbisihe kuti Asanza 9:13-18, ginipai namanga agu aboro naida na yambahe be mumungo de? (Oni bi sura a.)

⁷ Oni bingo gu yambahe nga ga “de abiatise” watadu mumungo de. (Oni gedi Asanza 9:13-18.) Zee ti ri tipa yamba agu aboro adunga na rugatinapai ya tipa i ye ku kpuri yo ka rihe na ri te. Sangbanaha nga gine fu agu aboro nadia gari yambahe? “Kpikpi aboro” kina yo. Oni ima rengba ka tingidapa gu kura fugo i nimangisunge na ni mbata kusayo rogo Asanza. I ima za rani ti “kungba de” watadu ti wasiwasi dee. I nape gupai furani nga: “Gari kporo nandu sa kpio.” (Snz. 2:11-19) Asanza 5:3-10 na zahe rogoho berewe tipa gu kura “kungba de” nga guri “nduri nandu ngba gene sa kpio.”

8. Gini siapai si aida ani mangihe?

⁸ Agu aboro nadegatuyo fu “de abiatise” watadu mumungo dee nagbiatiyo na siapai: Ya mo i adia gari yambahe kugume watadu i nika ká ha? Si ima rengba ka ida a ani mangi ngbatunga diaberã wakina gure. Ginipai rengbe ani ka mangaha ka si dunga boro naasada ka sarani ani mangi wasiwasi kodaba watadu ka si du nga kpia kundiri boro kuru furani rogo internet ni tunguotunguo?

9-10. Gini bete nduapai duho si aida ani ne gu mangaapai ti ni nga ga wasiwasi kodaba?

⁹ Wene nduapai kinaho si aida ani ne gu mangaapai nga ga wasiwasi kodaba ti ni. I fura tipa “de abiatise” watadu mumungo dee nga ri naya: “Dĩdĩ ime nziri ki susi.” Ginihe nga “dĩdĩ ime”? Baibiri naringbisa gu kodaba arogotise narengbe kaa gbia ngbarago ti ni kuti wene ime  nazambuasi boro. (Snz. 5:15-18) Gu kumba na dee niima manga rogatise kuti andiko ima rengba ka gbia ngbarago ti kodaba. Ono gipai re kia gbe na “dĩdĩ ime.” Nga gu i narengbe ka ya ti ni wasiwasi kodaba. Agu aboro ninaamanga wasiwasi kodaba dedede ni naaõkaha aõka ti kura aboro, wakina wai iradĩ ninaagbu ka dĩ ahe. “Dĩdĩ ime” ima rengba kaa ngera wa gupai du ni wenehe ka si du nga agu aboro namanga gipai re naberã ha nga boro ho nika inopai tipa gupai i amangaha te. Nga gu riko gbegberẽ pa nangahe! Yekova nabi apai dunduko. Ka si du nga Yekova aidanga na gaani pai berewe te, si nga gu riko gbegberẽpai kisusi nga gu rengbe ka manga rani, si ni ‘nzinziri he’ watadu ni wenepai te. (1 Kor. 6:9, 10) Ono kura dungu apai kinaho berewe.

¹⁰ Wasiwasi kodaba ima rengba ka ye na zee, boro kini bi ti ni nga sunge ti ni te, boro kidu na vuse nga gu ni ambakadanga ti ni ambakada tipaha ya, na si ki sa gupai nga ramukporo gberẽ. Si tie ziazia nga, si nipa tatamana ka ne gu “bambu” gbiati riahe nga ga mumungo dee. Kurii gure, agu aboro namanga wasiwasi kodaba nazanga gayo pa bakure na Yekova na dungu agu akurayo kini di akaza nga gu i naima rengba ka kpi behe. (Snz. 7:23, 26) Veresi 18 rogo kapita 9 nadigo na agu afugo nga: “Gari agino du kina rogo dudungura Baatoro kpikpi aboro yo.” Tipagine dungu aboro adia gari yambahe ti ni tie kugume nga gu nandu kina kuti kerepai?​—Snz. 9:13-18.

11. Tipagine du bi agu ahe ti ni nazingisa nyemu kodaba ni kere gbegberẽpai?

¹¹ Gbina sa nga gu niima nge nga, bi agu ahe nazingisa nyemu kodaba. Gu kura aboro naberã gupai nga, gbegberẽpai ho ti bi kpia kundiri aboro te. Ono tie, bi kpia kundiri aboro naimisa aboro aimisa, si kini sa gupai nga ka i dunga na irisa tipa tiyo na tipa kura aboro ya, na si ima rengba ka kpakara tipa ka mbu gu gbegberẽ mangapai nga ga bi agu ahe nazingisa nyemu kodaba. Ka aboro bi agu asura du ni wasiwasihe, si ima kpakara bangiriyo go ti ni. Na gu kurapai berewe nga, bi kpia kundiri aboro aundongo aboro i di iraira nyemuapai kusayo te; ono si nasa gu nyemupai re si du ni nyanyakihe gbe. (Koro. 3:5; Yak. 1:14, 15) Ni rengo, dungu agu aboro ninaabi kpia kundiri aboro ni naandu andu ki mangi wasiwasi mangaapai.

12. Waigu ani ayugo gupai nga, ani naasada ka ne agu asura rengbe ka sarani ani du na wasiwasi aberã?

¹² Wangia ani aKristano, ginipai si aida ani mangihe ka si du nga sura kundiri boro kuru ni tunguotunguoho rogo gaani aterefuni na ataburet? Si naida ani mbu ngana gu sura re niipo. Si rengbe kadu furani taata ani mangi gupai re ka si du nga ani tingidi gupai nga gu nyanyakipa ũkumuko du berani nga gaani pagume na Yekova. Ono gu kura asura kinaho naima rengba ka zanga du ni ndikidi kpia kundiri boro, ono si ima rengba ka sarani ani du na wasiwasi nyemuapai. Tipagine si aida ani nehe ti ni? Bambiko ani aidanga ka manga diandue kandara tooni kuti manga bari kpotorani yo te. (Mt. 5:28, 29) Bakumba rogo gu ringara nga Thailand du rimoko nga David aya: “Mi naasana tire nga: ‘Ka si vura du nga, agi asura re arengbanga nzunzu kadu ni kpia kundiri aboro te, ono ya mo Yekova adu na ngbarago ka mi aangana agu asura re?’ Ngbatunga gi berãkuriipai re ninaaundo re mi naamangapai ni tatamana.”

13. Ginipai naundo rani ani mangipai ni tatamana?

¹³ Ka ani aagunde be manga gupai nga gu rengbe ka sa Yekova ka ko du nga na ngbarago ya, si nika undo rani ani naamangapai ni tatamana. Gunde ti Mbori nga “tonatona mburu tatamana.” (Snz. 9:10) Ani nabi gipai re rogo tonatona Asanza kapita 9, yo ani ageda pa gu kura dee ni nga gu ri narukuba kurapai, i fura tipa gi dee re nga ri nga ndikidi “tatamana.”

14. Gini kura yambahe ani agedapai tipaha rogo Asanza 9:1-6?

¹⁴ Oni gedi Asanza 9:1-6. Herẽ, ani nagedapai tipa gu yambahe naye be Yekova nga Bakusirani na ki ngia mburu tatamana dunduko. (Snz. 2:6; Rom. 16:27) Nibipa gipai re, ani nagedapai yo tipa bakiki bambu du na adangba ha saba. Gipai re nayugo gupai nga, Yekova nga boro gamahe na agu aboro dunduko naida ka mangapai kuti gako tatamana si aida i wiriki wai kadu ni airatatamana.

15. Ginipai Mbori aida ani mangihe?

¹⁵ Yekova nga Boro gamahe na ko nafu ahe kpaima. Agi asino re nga ga ndikidi “tatamana,” nga gu i nafura tipaha rogo Asanza kapita 9 wa dee. Gi pangbanga nga gi nafura tipa gu dee narukuba kurapai kia re nape gupai nga, gi dee re imi gari anya, ki piri gari imekakue, na ki mbakadi gari mbisa kpuri yo. (Snz. 9:2) Kurii gure, ringbisihe kuti veresi 4 na 5: Ri “[Nga ndikidi tatamana] ki ya fu gu ni adu nga na rugatinapai ti ni ya, ‘Mo yé, mo ri gi riahe.’” Tipagine si aida ani ndu ti ni ku rogo gu bambu yo nga ga ndikidi tatamana na ki ri gu riahe ri nambakadihe? Yekova naida gupai nga awiriko du ni airatatamana na ki du ni bandabanda yo. Ko aidanga ani mangi agu aingahe nika imisa rani te. Si du nga ndu gupai ‘ko naiga ndikidi tatamana tini tipa ruru aboro.’ (Snz. 2:7) Ho du ani ni na wene gunde ti Yekova, si nika sa gupai nga ani idi ka sa ngbarago tiko. Si nika sa gupai nga ani gi gako arugute nga ga tatamana na kidu na ngbarago ka mangapai kuti ni.​—Yak. 1:25.

16. Waigu gunde ti Mbori aundo Alain tipa ko mangi gu diaberã nga ga tatamana, na sangbanaha angia gine?

¹⁶ Oni bingo wai gunde ti Mbori aundo Alain ko mangi gu diaberã nga ga tatamana. Alain nga bakumba rogo dungurati na kidu ni bayugupai sukuru yo aya, “Badungu agu akuare mi aamangasunge na yo aabi agu avidio nga ga kundiri aboro ni gupai naundo boro ni wirikipai tipa kodaba.” Ono Alain aima ino gupai nga, gipai re nga rengo te. Ko aya, “Mbiko gupai nga, mi ima kpinyemu Yekova na kidu na irisa tipa ko mi aru nyanyaki na ki ká ka bi agu avidio re. Mi asaki ndu gupai a fu gu gimi abadiasunge re mi aaidanga ka bi agu avidio re ti ni ya.” Ko aamangapai kuti gu rugute naye be ndikidi “tatamana” na “ki nita ngba gene rugatinapai.” (Snz. 9:6) Gipai Alain amangihe re aima zio ngbadu gu kura gako abadiasunge yo si ki sa gupai nga i tona wirika Baibiri na kini ndu tipa adunguratise.

17-18. Gini wene apai aboro agbiaha ho i adia gu yambahe ni kugume naye be ndikidi “tatamana,” na ginipai rengbe yo ka ngera kumbatayo tipaha? (Oni bi sura a.)

¹⁷ Yekova namangasunge na agi akpiapai nga ga adee ue narukuba kurapai re tipa ka yugo  wai furani rengbe ani kadu na ngbarago kumbatayo. Agu aboro nadia yambahe be “de abiatise” watadu be mumungo dee naasada ka gbia ngbarago ti wasiwasi kodaba. Ono ka pe guhe nga rengo, i ainongo gupai nga gupai i amangaha awere nika du na sangbanaha kurii gupai nika manga tipa yo kumbatayo te. Gayo sangbanapai rogo “dudungura Baatoro kpikpi aboro.”​—Snz. 9:13, 17, 18.

¹⁸ Ono gupai nika du tipa agu aboro naida na yambahe be ndikidi “tatamana” nika du kia! Na i na ngbarago mbiko i na agu ahe beyo dunduko i aidaha tipa ka nye mbembedi na Yekova. (Yes. 65:13) Yekova ape gupai vurube gu nebi nangia Yesaya nga: “Oni dége turoni kono du mi ni wenengaĩ, ki ri gu he ngba angba, mbisimoroni ki du na ngbarago ti he be nzeme.” (Yes. 55:1, 2) Ani nawirika wai ka kpinyemu gupai Yekova akpinyemuhe na kini sogo gupai ko asogaha. (Tam. 97:10) Na ani na ngbarago mbiko ani nayamba gu kura aboro i wirikipai be ndikidi “tatamana.” Ani wakina agu amoyambu nayambahe “ri gu tumbatumba arago nga ga bakporo: ‘Gu ni zanga inahe, ni yé kono!’” Agu aundo ani agbiaha gbiati agu aboro naida na gi yambahe re tipa kina awere te. Agu aundo re nika sa rani ani, ‘raki’ nyeanye kindi “ki nita ngba gene rugatinapai.”​—Snz. 9:3, 4, 6.

19. Ringbisihe kuti Batungusipai 12:13, 14, ginipai si aida ani diberã ka mangaha? (Oni bi gu sanduki a nga, “ Ani Nagbia Undo Agbia ti Gunde ti Mbori.”)

¹⁹ Oni gedi Batungusipai 12:13, 14. Gunde ti Mbori ninaabandanga kpotoraniyo abanda kindi na kini undo rani ani du gigiri rogo mangaapai yo na ki nye mbembedi na ko rogo gi gbegberẽ yangara arame re. Gu wene gunde ti Mbori re nika fõngbaduraniyo ani naandu kindi kumbatayo kaa yamba aboro tipa i ye ka gbata ndikidi “tatamana” na kini gbia undo ti ni.