Gu Kekeapai Du Tipa Wisigoho 33
Bangiri Yekova du ti Gako Aboro
“Bangiri Yekova du ti agu yo nagunde ti ko.”—TAM. 33:18.
BIA 4 “Yekova Nga Babandare”
AGU APAI DU ROGO GI KEKEAPAI RE *
1. Tipagine Yesu asana Yekova ti ni bangiri ko du ti apefuoko?
ROGO gu yuru naadu mbata fu kpio Yesu, ko asana gu Bako du ngbangbaturũ yo tipa kparakparapai. Ko asana Yekova tipa ko banda apefuoko. (Yo. 17:15, 20) Rengo ngaha nga, bangiri Yekova ti aregbo dũ ti gako aboro—ko nangerafuo yo na kini bandayo. Ono tie, Yesu aima ino gupai nga apefuoko nika gbiatiyo na kere sogote be Satana. Yesu aima ino gupai a nga i nika ida aida na ga Yekova undo tipa ka ne ga Bakitingbanga gbegberẽ azubohe.
2. Ringbisihe kuti Atambuahe 33:18-20, tipagine si aidanga ani gunde ti ni be agu arungosiro ani nikaa gbiatirani na ni ya?
2 Gi zegino nga gu du ni zogozogoho kutiibe Satana re naye na badungu akpakarapai fu ndikidi aKristano areme. Ani nagbia tirani na arungosiro nga gu niima rengba ka ba gberãrago tirani na zavura ki asadi gaani padu niruruse fu Yekova. Ono a wa ani nika bihe rogo gi kekeapai re, pai ho si aida ani gunde behe te. Bangiri Yekova du ti rani—ko nabi agu akpakarapai abi ani agbiatirani na ni, na ko nga regerege ka undo rani ani dibehe. Ani wisigingo akpiapai ue nga ga Baibiri nga gu nayugopa wai du “bangiri Yekova . . . ti agu yo nagunde ti ko.”—Oni gedi Atambuahe 33:18-20.
YEKOVA NAUNDO RANI AUNDO HO ANI ABIHE NI NGA ANI NISARANI
3. Gini aregbo rengbe ani kaa bi tirani nga ani nisarani?
3 Wa vura duhe nga ani na badungu awirina rogo dungurati, ani ima rengba kaa bi tirani ti kura aregbo nga ani nisarani. Ni kpiapai, paranga aboro ima rengba kaa bi tiyo nga i nisayo ho i asakapa gayo aida ni barabangiri akurayo sukuru yo watadu ho i aga ni kurogo vovo dungurati. Agu akura rani ima rengba kadu na gberãrago watadu kini sota na iraira bipai, kini berẽ gupai nga ani ima rengba ka mangapai kutini ngba gaani ome. Ani ima rengba kaa tiko ka fura fu kura aboro tipa wai du ani bambiko ani nabakabangirani nga i arengbanga ka rugatiyo na ani te. Na ti kura aregbo, ani ima rengba ka bakabangirani singia boro ho nzunzu naberãpa rani. Pa bi ani tirani nga ani nisarani—ka si vura dunga tipa kina gini ndupai—ima rengba ka sarani ani naabihe nga gene berewe te na ani kini bakibangirani. Yekova aidanga ani naabi tirani ngba gu gene re te. Tipagine rengbe ani ka pehe ti ni wo?
4. Tipagine gu nebi nangia Eriya aya ti ni wẽ: “Kina re sa nye”?
4 Oni bingo gu kpiapai nangia ga gu ruru kumba nangia Eriya. Izebere aima kidohe nga ri nika imoko, na sidu, ko aoro tipa arame naima susa 40 tipa ka batasa ungako. (1 Aba. 19:1-9) Ni yangaraha tie, ho ko adu ni nisako simbia yo, ko akpari na fugoko kuari fu Yekova ki ya: “Kina re sa [nga nebi] nye.” (1 Aba. 19:10) Ni kpiapai, Obadaya abatasi anebi 100 be Izebere tipa ka ri imingo yo ya. (1 Aba. 18:7, 13) Tipagine tie Eriya, aabi tiko ti ni nga ko adu nisako? Ya mo ko aaberãha nga agu anebi Obadaya abatasiyo aima kpiko dunduko awere? Ya mo ko aabi tiko nisako isoke, mbiko kura boro aadunga ho natona kaa iriso Yekova wa sa na ko zavura tifuo Yekova yugu gupai nga ko nangia ndikidi Mbori vurũ te? Ko aabi tiko nga boro ho naini gupai nga avurako aasada ka imoko te, watadu boro ho zaatu naaberã pako te? Gi pangbanga re asakanga pai dunduko tipa wai Eriya adu te. Ono gupai ani nainihe nirengo nga, Yekova aima rugatiko na ndu gupai Eriya aabi ti ko ti ni wa gure na Ko aima ino wai nzunzu ko nika undo ko.
Ho ani abihe ni nga ani nisarani, gini apai nga gu nafu wasa rengbe ani ka wirikaha ti gu gene Yekova aundo Eriya ngbaha? (Oni bi genewaraga 5-6)
5. Waigu Yekova akido Eriya nga ko aadunga nisako te?
5 Yekova amangi dungu apai tipa ka undo Eriya. Ko angarasi Eriya tipa ko fura. Ko asana Eriya bara ue nga: “Gini he mo amanga erẽ?” (1 Aba. 19:9, 13) Ti aregbo dunduko, Yekova aadegatuko wenengai wa Eriya aakusuko kpotoko yo fuko. Yekova akaragapai fu Eriya ni yugoko gupai fuko nga Ko adu kinaho na Ko na bakere ome tiko. Ko akido Eriya na gupai a nga badungu aYisaraere adu kinaho naairiso Ko kindi. (1 Aba. 19:11, 12, 18) Zanga kapa, Eriya aima gbia wasa tingbafuo ko kusuko kpotoko yo fu Yekova na ki gi ga Yekova karagapai. Yekova aima fu badungu nyanyakipa asunge fu Eriya. Ko aya fuko ko moi Azaere ni bakindo kurii Suria na ki moi Yeu ni bakindo kurii aYisaraere na ki moi Erisa ni nebi. (1 Aba. 19:15, 16) Pa fu Yekova agi asunge re fu Eriya, Yekova aundo ko ko berẽ gbe kurii weneapai. Mbori afu mbembedi bakure fuko a nangia Erisa. Waigu rengbe mo ka gbia ga Yekova undo ho mo abi tiro ni nga mo nisaro?
6. Ginipai rengbe mo ka manga kparakpee tipaha ho mo abi tiro ni nga mo nisaro? (Atambuahe 62:8)
6 Yekova nayambaro nga mo kpari fuko. Ko nabi agu akpakarapai abi du mo rogoho, na ko nakido ro nga ko nika degatuko adega kuti gamo akparakpee ti ai regbo. (1 Tesa. 5:17) Ko nagbia ngbarago ti dega tuko fu airisiko. (Snz. 15:8) Ginipai rengbe mo ka manga kparakpee tipaha ho mo abi tiro ni nga mo nisaro? Mo kusuko kpotoro yo fu Yekova kina wai Eriya amangihe. (Oni gedi Atambuahe 62:8.) Mo pekepa agu apai fuko mo abakabangiro tipaha na pa wai si asa ro mo du. Mo sana Yekova ko undo ro mo ini gupai si aida mo mangihe ho mo abi tiro ni nga mo nisaro watadu na gberãrago. Ni kpiapai, ka mo aabihe nga mo nisaro na kini gunde agunde ho agude sukuru asana ro ni na asanahe tipa gamo aida, mo sana Yekova ko fu gu wingbaduse foro si aidaha mo ini wai nitiro ka fura wenengai. Mo ima rengba a ka sanako tipa tatamana ka sakapai tipa gamo aida rogo birĩ yo. (Rk. 21:14, 15) Ka singia mo ni fudifudi ro watadu na bakere gberãrago, mo sana Yekova ko undo ro mo fura fu gu Kristano du na inohe tipa gupai re. Mo ima rengba ka sana Yekova ko undo gu boro mo andu ka fura na ni re tipa ni degetuni na ki rugu tini na gupai re. Mo kusuko kpotoro yo fu Yekova, ki bi wai ko nika karagapai kuti gamo akparakpee na ki di gu undo kugume kura aboro afuhe; ka mo mangi agi apai re, mo abingo tiro berewe gbe nga mo nisaro te.
Ya mo oni nangera tipa agene ka kiiso gaoni sunge tungusapai ngbaha na kini mangihe na kura aboro? (Oni bi genewaraga 7)
7. Ginipai oni awirikaha ti ga Mauricio kpiapai?
7 Yekova ima fu agu asunge furani dunduko du na rogoyo ti ni. Mo ima rengba kadu na gu kido nga ko nabi agu apai dunduko mo amangaha tipa ka manga gamo sunge rogo dungurati na sunge tungusapai na ko na tambuahe tipaha. (Tam. 110:3) Waigu padu mo zaaza ti ngba gi sunge re narengbe ka undo ro ho mo abi tiro ni nga mo nisaro? Oni bingo kpiapai nga ga paranga wirina du rimoko nga Mauricio. * Ngbutuko tifuo zio Mauricio bapatiza, bakureako sa atona ka mbu rengo yeeye. Mauricio aya: “Ho mi abi gupai ni nga ko mbu Yekova, mi aadunga berewe na kido kuti tire te. Mi aabaka bangire abaka singia mi rengbe ka digiso gu kidohe mi amangihe ka iriso Yekova na singia mi anye ni papara ga Yekova aborokporo. Mi aabihe nga mi nisare na kini berẽ gupai nga boro ho narengbe ka rugatini na gimi abipai te.” Ginipai naundo Mauricio? Ko aya: “Mi akiisi gimi sunge tungusapai. Gipai re aundo re ka mi naaberãnga kina pa tire ya, na ka mi naaberãnga kina kurii pa gu gbegberẽ apai sa nadu re a ya. Ho mi anaatungusapai ni na kura aboro, mi adu na ngbarago na mi abi tire nga mi nisare gbe te.” Nirengo, zavura ho ani arengbanga ka tungusapai ni na akuarani aidipase kina sa ya, ani ima rengba ka gbia ome ni manga ani apai na yo wa gu nga keka awaraga na manga dezirepai rogo yambahe na terefuni. Gini kurapai berewe naundo Mauricio? Ko agbia kurapai kuti ni nga: “Mi aamanga dungu asunge rogo dungurati. Mi anaamanga ome ka mbakada gu paparaha nga ga agude sukuru na ki mangihe ti regbo adunguratise. Agi asunge re asa re mi bi tire nga Yekova nabi re abi na nyanyakipa re na zavura kura aboro a.”
YEKOVA NAUNDO RANI HO DU ANI NI NA GBERÃRAGO MBIKO KERE AˈASADA
8. Waigu kere aˈasada narengbe ka sarani ani du?
8 Ani ima ino gupai nga ani nika gbia tirani agbia na aˈasada ti regbo gi yangara areme re. (2 Tim. 3:1) Ono tie, si rengbe kadu nga ani aaberãnga pa kura ngbatunga asada te watadu kina ngbarani rengbe ka zera ho si amanga ni. Si rengbe kadu nga zingo marã ti kurirani niipo, watadu munganga pe gupai furani nga ani na kere kaza, watadu gaani boro kpi. Ti ngbatunga aregbo wa gure, ani ima rengba kadu na bakere gberãrago, na kini bihe nga ome apai ima fu rirani, gbe ka si dunga ani nagbia tirani na asada gu tifuo kuraha watadu badungu aˈasada ti bangisa regbo sa. Oni tingidi gupai nga, wa vura duhe wo, bangiri Yekova du tirani, na gako undo, ani ima rengba ka hi ai asada kidu na kido.
9. Oni sakingo pai tipa gu bete aˈasada Eyobo agbiatiko na ni.
9 Oni berẽnga pa gu kpiapai nangia ga gu ruru kumba nangia Eyobo. Ko agbiatiko na badungu kere aˈasada vuru wiri guru regbo yo gbua. Rogo uru yo sa gbua, i agumba gupai fu Eyobo nga, i ima dĩ gako anya dunduko watadu ki imira na i ima imo gako amoyambu gbiati awiriko. (Eyo. 1:13-19) Nibasa tifuo gure, ho Eyobo adu ni kindi rogo bakere rungo yo, ko ati na kere kaza nga gu nakuru ti kpotoko. (Eyo. 2:7) Agu apai nadu tipa Eyobo agberẽ nikerehe si ki sako ko kpari nga: “Mi mbu pa ungare, mi akpi nga nyemu ka du ni ungare kindi te.”—Eyo. 7:16.
Yekova apepa wai fu Eyobo Ko angerafuo ai guhe Ko akusihe tipa ka sa Eyobo ko idi kuti gupai nga Ko ima kpinyemuko na ko nika ngera angera fuo ko (Oni bi genewaraga 10)
10. Waigu du Yekova afu guhe Eyobo aaidaha tipa ko hi gako aˈasada? (Oni bi gu sura duti kpotoho.)
10 Bangiri Yekova adu kina ti Eyobo. Bambiko gupai nga Yekova aima kpinyemu Eyobo, Ko afu guhe fuko si aaidaha tipa ko hi gako aˈasada na ki nye ni ruruko. Yekova afura fu Eyobo, ki tingidi ko na pa Gako bakere tatamana na nyemuse tipa Gako kusikusiahe. Ko afura tipa badungu iiriwo anya. (Eyo. 38:1, 2; 39:9, 13, 19, 27; 40:15; 41:1, 2) Yekova amangisunge a na gu ruru paranga kumba rimoko angia Eriu ko nyakasi Eyobo na ki fu wasa fuko. Eriu akido ko nga Yekova ti aregbo dunduko nafu mosoro fu airisi Ko tipa gayo hipai. Ono Yekova afõngbadu Eriu yo ko fu arugute nga ga nyemuse fu Eyobo. Eriu aundo Eyobo ko mbu berã kina patiko ni bakerehe gbe ni tingida ko ko na gupai nga ani gbua tooni ka i ringbisi rani kuti Yekova nga Bakusi haurago. (Eyo. 37:14) Yekova afu sunge a fu Eyobo, ko aya fuko ko kpari tipa agu abakureako nadu biata nga aguyo naingipai. (Eyo. 42:8-10) Waigu Yekova aundo rani areme ho ani agbia tirani ni na kpakarakpakara aˈasada?
11. Waigu Baibiri aundo rani ho ani agbia tirani ni na aˈasada?
11 Yekova afuranga furani gbaiga wa gu ko afura na Eyobo te, ono ko nafura furani vurube Fugoko nga Baibiri. (Rom. 15:4) Ko nafu wasa furani nifu ko maabangirise tipa kumbatayo. Ani wisigingo bete aberãpai rogo Baibiri yo nga gu rengbe kafu wasa furani ho ani agbiatirani ni na aˈasada. Rogo Ziazia Kekeapai yo, Yekova nakido rani nga, pai ho—kodihe na kere aˈasada—ka ‘kpara rani ti [gako] nyemuse’ te. (Rom. 8:38, 39) Ko nakido rani a nga ko “du mbembedi na agu yo dunduko nakpara fu ko.” (Tam. 145:18) Yekova nape gupai furani nga ka ani kido kutiko, ani ima rengba ka hi ai asada na zavura ani kidu na bete ngbarago ho ani arungo ni. (1 Kor. 10:13; Yak. 1:2, 12) Fugo Mbori natingida rani a na gupai nga gaani aˈasada tipa wiri bete regbo na ni guruhe ka i ringbisihe na gu nyenye mosoro ko nika fuhe furani. (2 Kor. 4:16-18) Yekova nafu gu ndikidi kido furani nga ko nika gberesa gu boro nga mburu gaani akpakarapai dunduko nga Satana Bakitingbanga—gbiati gu gbegberẽ aboro du wakina ko. (Tam. 37:10) Ya mo mo iningo bete agu averesi nga gu nafu wasa nga gu rengbe ka undo ro mo hi akpakarapai kumbatayo?
12. Ginipai Yekova aida ani mangihe ka si du nga ani naida ka gbia undo wenengai rogo Fugoko yo?
12 Yekova naida gupai berani nga ani kpara regbo tipa kaa wisigo Baibiri dedede na kini berẽ dudunguro kurii gupai ani agedaha. Ho ani amangapai ni kuti gupai ani awirikaha, gaani idapase nanyaka na ani kidu mbedi gbe na gu Barani du ngbangbaturũ yo. Ni sangbanaha, ani nagbia ngarasaro gbe tipa ka hi aˈasada. Yekova nafu gako ziazia toro a fu agu aboro nakido kuti Fugoko. Na gu toro re rengbe kafu “gu bakere tandu susi” fu rani tipa ani hi ai asada.—2 Kor. 4:7-10.
13. Waigu agu ariahe nga ga toro ‘ruru kangara moyambu’ afuhe aundo rani ani hi aˈasada?
13 Na ga Yekova undo, ‘ruru kangara moyambu’ nakusa badungu kekeapai, avidio, na amanzigo nga gu rengbe ka undo rani ani sonosi nyanyaki idapase na ki nye mbembedi na Yekova. (Mt. 24:45) Si naida ani mangisunge wenengai na agu ahe dunduko Yekova afuhe furani. Wirina du Amerika ape gupai barambeda nga ri na bakere tambuahe tipa agu ariahe dunduko nga ga toro. Ri aya: “Vuru agu agarã yo 40 mi nadihe kuti ngba mangasunge fu Yekova, gimi padu niruruse nidu ni asadiasadi dedede.” Ri agbia tiri na kere asada—bakama tarambiri nakpibuda aimi titari, avunguri ati na kere kaza ki kpi na kansa amangi ri bara ue. Ginipai naundo ri tipa ri hi agi apai? Ri aya: “Yekova ninaangera fuore ti aregbo dunduko. Agu ariahe nga ga toro ko afuhe vurube gako ruru kangara moyambu ima undo re mi hipai. Mbiko gipai re, mi ima rengba kadu kina wai Eyobo adu, nga guko naya: ‘Daho mi ka kpi ni mi ambu nga pa gi du ni irarengo te!’”—Eyo. 27:5.
Waigu rengbe ani kadu nga pa maku fu kura aboro rogo dungurati? (Oni bi genewaraga 14)
14. Waigu Yekova amangasunge na awirinarani tipa i songodi rani ti regbo gaani aasada? (1 ATesaroniko 4:9)
14 Yekova ima raba gako aboro tipa i kpinyemu akurayo na kini fu wasa fuyo ti gi kpakarakpakara aregbo re. (2 Kor. 1:3, 4; oni gedi 1 ATesaroniko 4:9.) Awirina nawirika Eriu nidu yo na nyemu ka undo rani ani nye niruru rani ho ani agbiatirani ni na akpakarapai. (Amo. 14:22) Ni kpiapai, oni bingo wai ga Diane dungurati angarasi ri na ki undo ri tipa ri nye mbembedi na Yekova ho kumbari arungo ni be kere kaza kpotose. Ri aya: “Si aima kpakara. Ono ani abi nyanyaki be Yekova nga ga nyemuse rogo gu kpakarakpakara adiwi re. Gaani dungurati aima manga dungu apai tipa ka undo rani. I aaye kaa bi rani, kini yambu rani, na kini dungo rani, agi apai re dunduko aima undo rani ani hipai. Wa duhe nga mi ainongo wai ka kama tarambiri te, awirina anaabi gupai nga i ima diare ki ndu na mi ku pati adunguratise na tipa tungusapai a ho rengba anidu ni bere.” Si nasarani ani du na bakere ngbarago bambiko ani na agu awirina rogo dungurati du na nyemuse!
ANI NA TAMBUAHE TIPA WAI YEKOVA ANGERAFUO RANI ROGO NYEMUSE YO
15. Tipagine du ani ti ni na gu kido nga ani ima rengba ka hi aˈasada?
15 Ani dunduko nika gbiatirani agbia na kura ngbatunga asada. Ono tie, ani adunga nisarani ho ani nikaa gbiatirani ni na asada te. Bangiri Yekova tirani ti aregbo dunduko wakina gu bagude du na nyemuse. Ko mbembedi na ani, regerege tipa ka gia gaani zungoditise tipa undo na kidu na nyemu ka songoda rani. (Yes. 43:2) Ani na gu kido nga ani ima rengba ka hi arungosiro bambiko ko ima fu agu ahe dunduko ani aidaha tipa ka hipai. Ko ima fu gu gamahe furani nga ga kparakpee, Baibiri, agu ariahe nga ga toro kpaima, na awirinarani nga ga nyemuse yo tipa i undo rani ti regbo zingo.
16. Waigu rengbe ani ka nye tii ga Yekova bandahe nga ga nyemuse?
16 Nairiwo gu tambuahe du ani na ni nga ani na gu Barani du ngbangbaturũ yo du bangiriko tirani! “Kpotorani yo nangi rogo ko yo.” (Tam. 33:21) Ani ima rengba ka yugo gupai fu Yekova nga ani na bakere tambuahe tipa wai ko angerafuo rani rogo nyemuse yo ni manga ani sunge wenengai na agu ahe dunduko ko afuhe tipa si undo rani. Ani ima rengba a ka manga gaani paparaha tipa ka nye tii ga Mbori bandahe. Ka pepai ngba kura gene, ka ani aandu kindi kina kumbatayo kaa manga ome tipa ka giasangba Yekova na ka manga gupai du niruru he bangiriko, bangiriko nika du tirani nyeanye kindi!—1 Pet. 3:12.
BIA 30 Buba, gi Mbori na Bakureami
^ Ani naida na ga Yekova undo tipa ka dia be agu arungosiro ani agbia tirani na ni areme. Gi kekeapai re nakido rani nga bangiri Yekova du ti gako aboro. Ko nabi agu akpakarapai abi ani agbia tirani na ni wa du ani ni basasa, na ko nafu agu ahe ani aidaha tipa ka diabe he.
^ I aima aria bete agu arimo keke yó ho ane re.