1. Waigu ani agbia undo ti fura ani tipa wai ani aye kurogo “rengo” yo?

 “WAIGU mo aye kurogo rengo yo?” Zanga kapa, mo aima karagapai kuti gu sanahe re bara dunguhe. Si nga gu sanahe ani naasana awirinarani na ni ho ani aida ka ino yo ni wenengai. Ani naakpinyemu ka gia wai awirinarani aye ka ino Yekova na kini kpinyemuko, na ani nidu na nyemu ka pepa ndu gupai fuyo ani nakpinyemu kadu ti ni nga aDezire Yekova. (Rom. 1:11) Gi fugodagbase re a naundo rani ani naaberãpa bakio wai kindi ani nakpinyemu kadu nga aDezire Yekova ni bakerehe. Ani naye kadu a na bakere nyemu kaa ‘ta rogo rengo’ yo—naida ka ya, kaa raka ngba gu gene nika sa gupai nga Yekova fu maku furani na ki idi na ani.—3 Yo. 4.

2. Gini apai ani nika sakapai tipaha rogo gi kekeapai re?

² Rogo gi kekeapai re, ani nika fugö bete nduapai nga gu ani akpinyemu rengo ti ni. Na tifuo gure, ani nika wisigopa wai a rengbe ani kindi kaa ndu kumbatayo kaa yugo nyemuse tipa gi nyanyakipa gamahe re. Zanga kapa, gi fugöpai re nika sarani ani du na bakere tambuahe tipa gupai Yekova amangihe nga ka gberani kurogo rengo yo. (Yo. 6:44) Si a nika nyakasa gaani nyemupai tipa ka yugo gu rengo nga ga Baibiri fu kura aboro.

3. Gini nyanyakipa ndupai du ho gbe ani akpinyemu rengo ti ni?

³ Ani nakpinyemu rengo mbiko dungu nduapai. Gu nyakipaha gbe nga, ani nakpinyemu Yekova Mbori nga Mburu rengo. Rogo Fugoko yo nga Baibiri, ani ima ye ka inoko angianga wa gu Bakusi ngbangbaturũ na kpotosende gbua du na ome sa ya, ono wa gu Barani nga boro nyemuse du ngbangbaturũ yo nangerafuo rani wenengai. (1 Pet. 5:7) Ani ima ino gupai nga gaani Mbori “du adu na nunga aboro na undahe ti ko, du ni bayee ko tipa zinga, ki du na inapai kpaima na rengo.” (Gate 34:6) Yekova nakpinyemu ruru sarangbanga. (Yes. 61:8) Ko na bakere  gberãrago ka bi rani ani nirungo, na ko nangera tipa gu regbo kumbatayo ko nika rugusa arungo dunduko. (Yere. 29:11) Nairiwo wai gu regbo re nika ngba! Si nga ndupai sa dagba agu andu apai yo ani nakpinyemu Yekova ti ni ni bakerehe gbe!

4-5. Tipagine gu mokedi nangia Pauro aringbisi gaani maabangirise ti ni kuti ũzada he?

⁴ Gini kura ndupai berewe ani nakpinyemu rengo ti ni? Rengo naye na badungu aundo. Ani bingo kpiapai. Gu rengo nga ga Baibiri nakoda gaani maabangirise tipa kumbatayo. Tipa ka yugo nyakapa gu maabangirise re, gu mokedi nangia Pauro akepai ki ya: “Gi du be rani re wa ũzada mbisimo, nga maabangirise du ni nyanyaki he nganganga.” (Eb. 6:19) Kina wai ũzada he narengbe ka sa kurungba ka si naawonga ya, gu gaani maabangirise du mburuhe rii Baibiri ima rengba ka undo rani a ani du zezeredi ho du ani ni rogo akpakarapai.

⁵ Rogo gi bangiriba re, Pauro aasakapai tipa gu maabangirise du mbedimbedi aKristano na ni nga ga ngbangbaturũ. Ono agi afugoko re ima rengba a kadu tipa agu aKristano nangera kumbatayo ka raka nyeanye kindi rogo paradizo auru kpotosende. (Yo. 3:16) Nirengo, pa wirika ani pai tipa gu maabangirise du tipa raka nyeanye kindi ima sa gaani raka si du na rogoyo ti ni.

6-7. Waigu Yvonne nagbia undo ti wirika ri pai tipa gu rengo du tipa kumbatayo?

⁶ Oni wisigingo kpiapai nga ga wirina du rimori nga Yvonne. Ri aasonanga rogo rengo yo te, na ho ri adu ni ni gude, ri aagunde agunde be kpio. Ri natingidapa gupai ri agedihe nga gu ka bangiriri aagonga ti ni ya nga: “Kura uru adu kinaho gba ni kaa dunga ya.” Ri aya: “Agu afugo re asa re mi nipi yuru kini berẽpa gimi raka kumbatayo. Mi aberẽ gupai nga, ‘badungu apai kinaho si aidaha rogo raka yo.’ ‘Ka ino ndu gupai du mi ti ni ane.’ Mi aaidanga ka kpi te!”

⁷ Kusa, ho Yvonne adu ni ni paranga gude, ri agbia aDezire Yekova. Ri aya: “Mi atona ka ida kuti gupai nga, mi ima rengba ka du na maabangirise tipa ka raka nyeanye kindi rogo Paradizo auru kpotosende ane.” Waigu wirika rengo naundo wirinarani? Ri agbia kurapai kuti ni nga: “Mi apingo yuru berewe kini bakibangire tipa kumbatayo watadu kpio te.” Si tie ziazia nga, Yvonne ima kpinyemu gu rengo du rogo Baibiri yo na ri nagbia ngbarago ni bakerehe ti pe ri pa gari maabangirise tipa kumbatayo fu kura aboro.—1 Tim. 4:16.

8-9. (a) Rogo kura ga Yesu sanza yo sa, waigu kumba sa abi gu ũkumuko nga gu ko agbiaha na nyanyakipa ha gbe? (b) Waigu nyakipa rengo foro?

⁸ Gu rengo nga ga Baibiri a nakodapa gu wene pangbanga du tipa ga Mbori Kindo. Yesu aringbisipa gu rengo du tipa Kindo kuti õkoõko ũkumuko. Rogo Matayo 13:44, Yesu aya: “Gu ngbi nga ga ngbangbaturũ du wa kina bakere mosoro i aoko ho ku rogo ati yo; nga gu gu ni abi he, ki nioko ho; mbiko ngbarago ni ki ta ndu nibagi gani ahe dunduko, ki ningbe gu ati re.” Oni bingo gupai nga, gu kumba re aagbatanga gu ũkumuko re te. Ono ho ko abihe ni, ko aima mbupa dungu apai tipa ka gbia ha. Zavura ko abagi agu ahe dunduko naadu beko. Tipagine? Bambiko ko aima ino gupai nga gu ũkumuko ko agbiaha re aima du na nyanyakipaha. Paha aima nyaka kisusi ai guhe si aaida ko mbupa ha.

⁹ Ya mo kina gu bangisa bipai re du mo na ni tipa rengo? Zanga kapa, kina wo duhe! Ani ima ino gupai nga he ho rogo gi zegino re paha nanyaki kisusi gu ngbarago ani agbiaha ti iriso Yekova awere, gbiati gu maabangirise du tipa nyenye unga kumbatayo tii ga Mbori Kindo te. Gu momu du ani na ni nga ka gbia  ngbarago ti du na mbembedi pagume na Yekova, paha ima nyaka kisusi ai gupai rengbe ani ka mbupaha. Gu bakere ngbarago kisusi du ani na ni nga “ka sa ngbarago tiko wenengai.”—Koro. 1:10.

10-11. Ginipai nafõngbadu Michael yo ko mangi bakere aariapai rogo gako raka yo?

¹⁰ Badungu rani aima mbupa bakereapai tipa Yekova idi na gaani pai. Gu kura aboro ima mbu bawene asunge rogo zegino. Agu akurayo ki mbu asadatise kada ni airakumuko. Berewe a, agu akurayo ima manga ariapai ngba gu gene dunduko i aaraka ngbaha ho i awirikipai ni tipa Yekova. Gure du nga gupai Michael amangihe. I aasonosanga ko rogo rengo yo te. Ho ko adu ni ni paranga, i araba ko tipa gu kpata nga karate. Ko aya: “Si adu ni nyanyakipa pai gbe fere tipa ka ngerafuo kpotore si du wenengai. Ti kura aregbo, mi anaabi tire wa boro ho inipai tipa re te.” Ono ho Michael atona wisigo Baibiri ni, ko awirikipai tipa wai Yekova abi zuu. (Tam. 11:5) Michael aya tipa agu aDezire Yekova ni arogotise nawirikipai nako wẽ: “I aayanga fere si naida mi mbu karate te; i aandu gbua kumbatayo kaa yugo gu rengo nga ga Baibiri fere.”

¹¹ Kina wai Michael aawirikapai tipa Yekova ni bakerehe, kina wo a gako nyemuse tipa Ko aasona. Gupai naazi ngbadu ko yo gbe nga ga Yekova nunga tipa airisiko. Fuo bete regbo kusa, Michael aini gupai nga si aaida aida ko mangi diaberã tipa ka manga ariapai rogo raka yo. Ko aya, “Mi aima ino gupai nga pa mbu karate nika ngia gu bakpakarakpakarapai si nika ida mi mangihe. Ono mi aima ino gupai a nga si nika sa ngbarago asa ti Yekova, na mi aima ida kuti gupai nga pa irisoko nga gupai nyakipaha kisusi ai gupai boro narengbe ka mbupaha.” Michael aima ino gupai nga gu rengo ko nagbiaha paha ima nyaka, na si nangia ndu gupai ko adu na nyemu ka manga bakere aariapai rogo gako raka yo ti ni.—Yak. 1:25.

12-13. Waigu gu rengo du rogo Baibiri yo aundo Mayli?

¹² Tipa ka yugopa nyakapa rengo, Baibiri naringbisa rengo kuti ima baro nga gu nahaasarago rogo bitimo. (Tam. 119:105; Ef. 5:8) Mayli, du Azerbaijan yo, nabi gu undo na nyanyakipaha gbe ri agbiaha rogo Fugo Mbori yo. Avunguri adu na gayo apambori ni ni bakiakia. Bari angia Masarami, na nari kingia Yudo. Ri aya: “Wa vura duhe nga mi aakapanga pa du Mbori ti ni te, mi aima du na dungu asanahe naafuda re. Mi aabaka bangire nga, ‘Tipagine Mbori akusi aboro ti ni, na tipagine si aida boro rungo arungo ti ni rogo gani raka yo naabaha tifuo gure i ki mbusi ni rogo we iferno yo nyeanye kindi?’ Wa duhe nga aboro nape gupai nga agu apai dunduko namanga Mbori du nakpinyemu si naamanga, mi aabaka bangire nga, ‘Ya mo Mbori nita zoga aboro na tifuo gure kini gbia ngbarago ti bi yo i nirungo?’”

¹³ Mayli aandu kindi kumbatayo kaa gbata akaragapai kuti gari asanahe. Fuo bete regbo kusa, ri aidipa wisigo Baibiri na ki ye kurogo rengo yo. Ri aya: “Gu ruru akaragapai du rogo Baibiri yo aundo re mi du ni gu boro du na ngbarago. Gu ruru sakarogopai yo mi agbiaha rogo Fugo Mbori yo asa gupai nga mi du zezeredi berã re yo.” Wakina Mayli, ani dunduko natambua Yekova, nga “gu ko nayambu [rani] bitimo yo ku rogo gako iiriwo imarago yo.”—1 Pet. 2:9.

14. Waigu rengbe ani ka nyakasa gaani nyemuse tipa rengo? (Oni bi gu sanduki a nga “ Gu Kura Aringbisapa Pai.”)

¹⁴ Gere gbua nga bete akpiapai nga gu nayugo nyakapa rengo. Zanga kapa, mo ima rengba ka berãpa kura dungu akpiapai. Si angba gbe ka mo moihe ni gamo sasa ka  wisigo gu kura nduapai nga gu si aida ani kpinyemu rengo ti ni. Kina wai ani nikaa kpinyemu rengo ni bakerehe gbe, kina wo a ani nikaa gbata agene tipa ka yugo gaani nyemuse tipaha.

15. Gini gene sa rengbe ani ngbaha ka yugo gaani nyemuse tipa rengo?

¹⁵ Ani rengbe ka yugo gupai nga ani ima kpinyemu rengo niwisigo ani agu awaraga du mburuhe rii Baibiri dedede. Gu garakaha agaraka tie nga, ka ani vura dia bagizo regbo wai vurũ ku rogo rengo yo, badungu apai kina ho ti aregbo dunduko si aida ani wirikihe. Bambata gi magazini re aya: “Rengo wakina tooni mbumbudo rogo gu bire nga ga unga, nga gu bakere rende nga ga ingapai nakehe ake kirikiri na ki ima mbeda ka furii he. Ka mo aida ka gbiaha si naida mo nangera angera kindi tipa ha. . . . Ka mo aida si du bero, mo du wa ka mo nugo ka diaha. Ka mo rengbenga be kina bangisa mbumbudo nga ga rengo ya. . . Mo nidungura ha adungura kindi, na kini ngere tipa agu akuraha.” Manga wisigopai ima nyaka, ono si ngba angba ani mangi ome ka manga wisigopai.

16. Gini ngbatunga gene wisigopai mo nabihe nipa undo? (Asanza 2:4-6)

 ¹⁶ Anga ani dunduko du na nyemu ka gedapai na kini mangi wisigopai te. Ono Yekova nayamba rani ani “gbata” na “ki nita tipa” gu dudunguro giarogopai yo nga ga rengo. (Oni gedi Asanza 2:4-6.) Ho ani amanga ome ni wa gure, ani nagbia undo ti aregbo dunduko. Nibi pa ga Corey geda Baibiri nisase, ko ape gupai nga ko naamaa berãko gbe kuti averesi nibasasa. Ko asaki rogoyo nga: “Mi naageda rukutu kekeapai dunduko, kini bi gu kekeapai dunduko du tipaha, na kini mangi kura awetekapai tipa gu veresi re. . . . Gi ngbatunga gedapai re naundo re mi wiriki dungu apai.” Singia ani nagedapai ngba gi gene re watadu gu kuraha kia, ani nayugo gupai nga ani na tambuahe tipa rengo ho ani akpara regbo ni na kini mangi ome tipa ka wisigopai.—Tam. 1:1-3.

17. Rogo gupai yo nga ka raka ringbisihe kuti rengo nga gine? (Yakoba 1:25)

¹⁷ Rengo ngaha nga, ani ima ino gupai nga anga pa wisigopai tipa rengo nga gu yangarapai te. Tipa ka gbia undo ni bakerehe, si naida ani naaraka ringbisihe kuti rengo, naida ka ya ka mangapai kuti gupai ani awirikaha rogo gaani raka yo. Kina gu ka ani mangihe wo sa si ka rengo ye ti ni na ndikidi ngbarago furani. (Oni gedi Yakoba 1:25.) Waigu rengbe ani ka yugo gupai nzunzu nga ani naraka ringbisihe kuti rengo? Kura wirina sa afu gu berãpai nga si naida ani wisigi gaani raka ka bihe singia ani namangapai kuti gupai ani awirikaha na gu bangiri ba si aida ani mangipai rogoyo ni bakerehe gbe. Gu mokedi nangia Pauro amoihe ngba gi gene re: “Ani tá ni kina gu rugute da ani ti ni.”—Frp. 3:16.

18. Tipagine si aida ani mangi ome ti ni kaa ‘ta rogo rengo yo’?

¹⁸ Oni berẽnga pa agu aundo naye ho ani amanga ome ni ka ‘ta rogo rengo yo’! Anga ani nambakada kina gaani gene raka sa ni wenehe te, ono si naye aye a na ngbarago fu Yekova gbiati akuarani aidipase. (Snz. 27:11; 3 Yo. 4) Gere nga gu bawene nduapai kisusi si aida ani kpinyemu rengo ti ni na kini raki ringbisihe kuti ni.