1. Tipagine du mo ti ni na tambuahe ho aboro ayugo zerangbaduse ni?

 ANI dunduko niima kpinyemu agu aboro du na zerangbaduse. Ani nidu na irisa koyo du agu aboro ni rengbe ka sungudopai zanga du na gberãrago. Ani nidu na tambuahe ho gu kura aboro ni du ni na zerangbaduse furani ho ani namangi aingahe ni. Na ani na tambuahe nga gaani bayugu Baibiri adu na zerangbaduse na ani ho ani aasota ni ka wirika agu ayugopai nga ga Baibiri, ka ida kuti ni, watadu ka mangapai kuti ni. Kurigure, ani na bakere tambuahe nga Yekova Mbori na zerangbaduse furani!—Rom. 2:4.

2. Rogo gini abangiriba si narengbe ka kpakara furani rogoho ani du na zerangbaduse?

² Wa vura duhe nga ani nabi gu sino nga ga zerangbaduse na nyanyakipaha rogo kura aboro yo, dedede, si ima rengba ka kpakara furani ani du na zerangbaduse. Ni kpiapai, ani ima rengba ka sota ka nye zezeredi ho dungu atarambiri akiso gene ni, gbe, ka si du nga ani nika da kugii regbo yo tipa gupai ani andu tipaha. Ani ima rengba kadu na bakere zinga ho kura aboro aba gberãrago ni tirani. Na ti kura aregbo, si ima rengba ka kpakara furani ani naapido gu vovo zegino Yekova nakido paha. Ya mo mo nakpinyemu kadu na bakere zerangbaduse? Rogo gi kekeapai re, ani nika sakapai tipa wai rengbe ani kadu na zerangbaduse na ndu gupai duhe ti ni na nyanyakipaha gbe. Ani nika sakapai asaka a tipa gupai rengbe ka undo rani ani du na bakere zerangbaduse.

3. Ginipai gu boro du na zerangbaduse amangaha ho kura aboro aba gberãrago ni ti ni?

³ Oni bingo agene biama rengbe ani ka yugo zerangbaduse rogoho. Ni bambataha, gu boro du na zerangbaduse watadu hipai azinganga niipo te. Ho gu kura aboro aba gberãrago ni ti ni, ni amanganga pai na yo ngba gu gene i amangapai na ni ngbaha te,  na ni amanganga apai na aboro ngba gbegberẽ gene ho du ni ni na gberãrago te. Gu fugo nga “ni bayee ko tipa zinga” si kuru ni bambataha rogo Baibiri yo yo i nasakipai ni tipa Mbori nga ko nga, “Mbori du adu na nunga aboro na undahe ti ko, du ni bayee ko tipa zinga, ki du na inapai kpaima na rengo.”—Gate 34:6.

4. Waigu gu boro du na zerangbaduse amangapai ho duhe ni nga si naida ni sungudipai?

⁴ Uepai nga, gu boro du na zerangbaduse ima rengba ka sungudopai zezeredi. Ka pai di gbanga regbo kisusi gu ni aaberã ha, ngbatunga gu boro re aˈasadanga ka zanga du zezeredi watadu ka du na zinga te. (Mt. 18:26, 27) Dungu abangiriba kinaho nga gu si aida ani sungudipai rogoho zezeredi. Ni kpiapai, si naida ani degeturani ni zerangbaduse ho boro afura ni ki zanga defugo ngba ni. (Eyo. 36:2) Si naida aida a ani du na zerangbaduse ho ani aundo bawiriki Baibiri ni ni rugu ti ni na agu ayugopai nga ga Baibiri watadu ni dibe kura gbegberẽ sino mangapai.

5. Gini kura gene sa rengbe ani ngbaha kadu na zerangbaduse?

⁵ Biatapai nga, gu boro du na zerangbaduse agunga ka mangapai zanga berã mbata kuriihe te. Si nirengo nga, kura aregbo kinaho si aida aida ani mangipai niipo. Ono tie, ho du nyanyakipa sunge ni tipa i amangihe, gu boro du na zerangbaduse agunga agu sa gu sunge re watadu ka manga gu sunge re gbua ni wiri ipiipihe te. Ono ni nadia regbo rengbearengba tipa ka bi wai ka ni mangi gu sunge re. Na ni ki di regbo tipa ka mangaha wenengai.

6. Waigu gu boro du na zerangbaduse amangapai ho ni agbia ti ni ni na aasada watadu akpakarapai?

⁶ Biama pai nga, gu boro du na zerangbaduse naʹasada ka hi aasada zanga kpakanahe. Ngba gi gene re, gu sino nga zerangbaduse nandu wa sa na hipai. Ni rengo, gbegberẽpai ngaha ka pe gupai du kpotorani yo fu mbembedi bakurearani na ki pe gu bipai du ani na ni tipa gu asada ani agbiatirani na ni te. Ono tie, gu boro du na zerangbaduse nika berã aberã a kurii gu weneapai mangi fu ni rogo gani raka yo, na ki mangi  ome kaa ndu kumbatayo kindi kaa iriso Yekova na ngbarago. (Koro. 1:11) Si naida ga Yekova aboro yugo zerangbaduse rogo agi agene yo re dunduko. Tipagine? Ani bingo bete nduapai.

7. Ringbisihe kuti Yakoba 5:7, 8, tipagine du hipai na nyanyakipaha gbe ti ni? (Oni bi sura a.)

⁷ Ka ani aaida ka gbia nyenye unga, si naida ani du na zerangbaduse watadu hipai. Wakina gu ruru airisi Yekova naadu mbata kusayo, si naida ani sungudi Mbori na zerangbaduse ko digisi gako akidohe. (Eb. 6:11, 12) Baibiri naringbisa rani kuti basopobino. (Oni gedi Yakoba 5:7, 8.) Basopobino namangasunge nyanyaki ka ru gani ahe na kini tudihe, ono ni ainongo gu regbo nzunzu si nika sona ti ni te. Sidu, basopobino nasungo na zerangbaduse kidu na gu kido nga, ni nika ke gani zuzuahe ake. Wakina gure a, ani namangasunge nyanyaki kadu ni apefuo Yesu, si ki vura du vurũ nga, ani ‘aina nga ni gu uru gaani Gbia ka ye te.’ (Mt. 24:42) Ani nasungo ni zerangbaduse na kidu na gu kido nga, ti wene regbo, Yekova nika digiso agu apai dunduko ko nakidopaha. Ka ani aadunga na zerangbaduse ya, omerani ima rengba ka bata na ani ki tona bitikpa ti Yekova. Ani ima rengba a ka tona maaberã rani kuti agu ahe ani aberã gupai nga si nika sa rani ani du na ngbarago awere. Ono ka ani du na zerangbaduse, ani ima rengba ka hipai na ki bati.—Mika 7:7; Mt. 24:13.

8. Waigu hipai aundo rani ho ani amangaapai ni na kura aboro? (AKorosaio 3:12, 13)

⁸ Tipa ani du na wene pagume na kura aboro, si naida ani du na zerangbaduse watadu hipai. Si nika undo rani ani degeturani wenengai ho kura aboro afura ni. (Yak. 1:19) Zerangbaduse naundo rani a ani du na zereda na yo. Du na zerangbaduse na banda rani a ti mangapai niipo kuti pai na ti pe ani gupai du ni gbegberẽhe ho du ani ni na gberãrago. Na ho du ani ni na zerangbaduse, ani azinganga niipo ho boro naimisi rani ni te. Kuba gupai nga ka irobape, ani nikaa ‘hipai fu akuarani, nivu akuarani.’—Oni gedi AKorosaio 3:12, 13.

9. Waigu hipai aundo rani ho ani aida ka manga adiaberã ni? (Asanza 21:5)

⁹ Hipai watadu zerangbaduse ima rengba ka undo rani a ani mangi wene adiaberã. Kuba gupai nga ani gu agu ka manga diaberã ni kina wiri ipo, ani nika manga wetekapai na ki bi agu asiapai du berani na ki mangi diaberã tipa gupai ngba gbe. (Oni gedi Asanza 21:5.) Ni kpiapai, ka si du nga ani nangera tipa sunge, ani ima rengba ka bihe nga si naida ani di gu sunge ani nabihe ni bambataha ka si vura du vurũ nga, si nikaa ida ani naakpa kura adunguratise watadu ka ani naatungusanga pai ni bakerehe ya. Ono ka ani du na zerangbaduse, si nika sa gupai nga ani berẽkurii pa gu ba du gu sunge re rogoho, baturoho, bange asaa wai ani nikaa diaha kuti ngba gu sunge re, na wai gu sunge re nika du na maapai kurii gaani aborokporo na gaani pagume na Yekova. Ka ani du na zerangbaduse, si nika sa gupai nga ka ani mangingo gbegberẽ diaberã ya.

10. Waigu rengbe Kristano kadu na hipai na ki bandaha?

¹⁰ Mo mangi kparakpee tipa bakere hipai. Hipai nga papara zuzu toro. (Gara. 5:22, 23) Sidu, ani ima rengba ka kpara fu Yekova tipa ziazia toro na ki sana ko ko undo rani ani sonosi apapara zuzu toro. Ka ani gbiatirani na gupai naˈasada gaani padu na hipai watadu zerangbaduse, si nika ida ani “sána he” kindi tipa ziazia toro tipa si undo rani ani du na zerangbaduse. (Rk. 11:9, 13) Ani ima rengba a ka sana Yekova ko undo rani ani naabi apai wa gu ko abihe. Na tifuo manga ani kparakpee, si naida ani mangi bakere asadatise tipa kadu na zerangbaduse  na aˈuru dunduko. Ka ani aandu kindi kumbatayo kaa manga kparakpee tipa zerangbaduse na kini mangi asadatise kadu na ni, Yekova nika undo rani aundo ani du na zerangbaduse ka si vura du vurũ nga gi sino re aadunga tirani mbata te.

11-12. Waigu Yekova nayugu zerangbaduse?

¹¹ Oni berẽkurii agu akpiapai nga ga Baibiri. Baibiri na dungu akpiapai rogoho nga ga agu aboro nadu na zerangbaduse. Ka ani berẽkurii agu apangbanga re, ani ima rengba ka wirika agu agene rengbe ani kadu na zerangbaduse rogoho. Mbata fu ani sakipai tipa bete agu akpiapai re, ani bingo bakere kpiapai sa nga ga du na zerangbaduse, gu kpiapai nga ga Yekova.

¹² Satana agumba kere ziree kuti rimo Yekova ati Edene yo, ko aˈasadi ka sa Eva ri du na kapa kuti gupai nga Yekova nga gu bawene Bazogo du na nyemuse. Kuba gupai nga Yekova gbarasi gu iraziree re ni basa, ko ayugu zerangbaduse na zatise, ni ino ko gupai nga si nika dia regbo adia tipa aboro inihe nga ga Ko zogarago ngba kisusi. Na wa ko asungudo gu regbo re, ko ima hi gu dungu aziree i apehe kuti rimoko. Kurigure, Yekova ninaasungo na zerangbaduse ka pido badungu aboro i du na momu ka gbia nyenye unga. (2 Pet. 3:9, 15) Amirioni aboro ima ye ka ino ko ni sangbanaha. Ka ani moiberãrani kurii agu aundo ga Yekova zerangbaduse na ye na ni, si nika du furani taata ani sungudi gako regbo ko digisi gi sino raka re.

13. Waigu Yesu awiriki ga Bako zerangbaduse ngba rengberengbe gene? (Oni bi sura a.)

¹³ Yesu awiriki gu sino Bako nga ga du na zerangbaduse ngba rengberengbe gene na ko ayugu gi sino re ho ko adu ni auru kpotosende. Si aadunga fuko taata ti aregbo dunduko ko naayugo zerangbaduse te, gbe, fu agu aboro biriki nangia abakeapai na aFarusi. (Yo. 8:25-27) Ono wa Yesu adu wakina Bako, ko aaipo ngo sa zinga te. Ko aairongo bape ho i anaasenga ko  ni watadu ho i anasa ko ni ko zingi te. (1 Pet. 2:23) Yesu ahi aasada ni zerangbaduse zanga kpakanahe. Si du nga ndu gupai Baibiri ape gupai ti ni furani nga, “oni mákia pako wenengaĩ nga gu ko nahi pa gu gumbarimo nga ga aboro ingapai kuti ko”! (Eb. 12:2, 3) Na ga Yekova undo, ani ima rengba a ka hi ai asada.

14. Ginipai rengbe ani ka wirikaha ti ga Abarayama zerangbaduse? (AEbere 6:15) (Oni bi sura a.)

¹⁴ Na ka si du nga gaani maabangirise tipa digido gi sino raka re ata digisongo tihe te? Agu akura rani kinaho naima rengba kadu na gu maabangirise nga, si aima ida digido gi sino raka re ye bakuru yo, na ani nabakabangirani awere nga ani arakanga ni gbangaha ka bi gi digido sino raka re te. Ginipai rengbe ka undo rani ani naandu kindi kumbatayo kaa sungudo ho ni zerangbaduse? Oni bingo gu kpiapai nangia ga Abarayama. Ho garã Abarayama adu ni nga 75 zanga gude du beko, Yekova akido ko nga: “Mi ki sa ro ni bakere rikaaboro.” (Bam. P. 12:1-4) Ya mo Abarayama abi gu kidohe re si nadigisi tihe? Ko aabingo ho dunduko si nadigisi tihe te. Tifuo Abarayama si gu di nangia Ferata na ki sungudi tipa agarã 25, ko abi wai i avungu wiriko nangia Yisaka ngba iiriwo gene, na tifuo kura agarã 60 kusa, i avungu atitako nangia Esau na Yakobo. (Oni gedi AEbere 6:15.) Ono Abarayama aabingo atitako i nada ni bakere rikaaboro na ki zi Ringara Mokido te. Wa si avura du wo, gu ruru kumba re aima du na mbembedi pagume na Bakusiko. (Yak. 2:23) Na ho i nika zingisa Abarayama ni be kpio, nairiwo wai ko nika du na bakere ngbarago ka bi gupai nga gako idapase gbiati gako zerangbaduse asa arikaaboro dunduko i gbia amaku! (Bam. P. 22:18) Ginipai ani awirikaha? Ani ima rengba ka zanga bi ga Yekova akidohe dunduko si ni digisitihe awere. Ono ka ani du na hipai wa Abarayama, ani ima rengba kadu na gu kido  nga, Yekova nika fu mosoro furani awere na ki fu bakerehe furani rogo gu ga Ko vovo zegino ko nakido paha.—Mk. 10:29, 30.

15. Gini apai rengbe ani ka wisigoho ti regbo gaani wisigopai nisase?

¹⁵ Baibiri na kura dungu akpiapai rogoho nga ga agu aboro naadu na hipai watadu zerangbaduse a. (Yak. 5:10) Si ima rengba kadu ni wenepai foro ka manga wetekapai tipa agu akpiapai re. b Ni kpiapai, wa si avura du nga i ambedi Davide ko du ni bakindo aYisaraere kumbatayo mbuko kindi tooni, si aaida ko sungudi tipa dungu agarã mbata fu ko gbia mbatabakindo. Simona na Ana airisi Yekova ni ruruyo wa i aapido gu Masiya i akidopa ko. (Rk. 2:25, 36-38) Wa mo nikaa wisigopai tipa ngbatunga agi apangbanga re, mo ngere tipa karagapai kuti agi asanahe re: Ginipai narengbe ka undo gi boro re niyugu zerangbaduse? Waigu ni agbia undo ni du ni na zerangbaduse? Waigu rengbe mi ka wirika ni? Mo ima rengba a ka gbia undo ni wirika mo pai tipa agu aboro naayugongo zerangbaduse ya. (1 Sam. 13:8-14) Mo ima rengba ka sana tiro nga: ‘Ginipai nasa gupai nga ka i du nga na zerangbaduse ya? Gini gbegberẽ apai namangi yo mbiko i aadunga na zerangbaduse te?’

16. Gini bete aundo du ti du na zerangbaduse?

¹⁶ Mo bi agu aundo du ti du na zerangbaduse. Ho du ani ni na zerangbaduse, ani nadu na bakere ngbarago na kidu zezeredi. Sidu, zerangbaduse ima rengba ka sa gupai nga berãrani yo gbiati kpotorani du wenengai. Ho du ani ni na zerangbaduse na kura aboro, ani nagbia ngbarago ti du ani na wene pagume na yo. Gaani dungurati nadu na bakere kodatise rogoho. Ka boro pe gupai nga gu ba zinga tirani, ani agunga sa zinga te, na ani asanga gu kpakarapai re si du ni bakerepai te. (Tam. 37:8; Snz. 14:29) Ono gu nyakipaha gbe nga, ho du ani ni na zerangbaduse, ani nawirika gu Barani du ngbangbaturũ yo na ani nambeda gbe na ko.

17. Ginipai si aida ani diberã ka mangaha?

¹⁷ Zerangbaduse ni rengo nga bawene sino nga gu ani dunduko agbia undo ti ni! Si taata ti aregbo dunduko kadu na zerangbaduse te, ono na ga Yekova undo, ani ima rengba kaa ndu kumbatayo kindi kaa sonosa gi sino re. Na wa ani nikaa ‘súnguda’ vovo zegino ni zerangbaduse si ye, ani ima rengba kadu na gu kido nga Yekova nika undo rani aundo na ki banda rani. (Mika 7:7) Ani dunduko dinga berã adia kaa ndu kumbatayo kindi kaa du na zerangbaduse.