1-2. Ngba gini gene rengbe Kristano kadu wakina gbanga bambu? (1 AKorindo 15:58)

 ROGO gu garã nangia 1978, i adua bagbanga bambu Tokyo Japan yo. Agu aboro naabihe aabaka kina bangiriyo singia gi bambu re aru nyanyaki ti regbo gu bakere bazigizo ni naamanga rogo gu gbata re. Ginipai agu aboro naame gi bambu re amangihe tipa ka saha si ru nyanyaki? Aba me gi bambu re amehe ngba gu gene nadu ni nyanyakihe na si ki du a na rengba ka ru nyanyaki ti regbo bazigizo. AKristano wakina gu gbanga bambu re. Ngba gini gene?

² Si naida Kristano banda ruru bipai nibipa ru nyanyaki. Si naida ni du nyanyaki zanga wo ho daha ni tipa ka manga ga Yekova arugute na arugapai. (Oni gedi 1 AKorindo 15:58.) Ni regerege ka ‘gia pai’ na ni akpakananga he te. Rogo kura gene, “ki du yee,” ho rẽarẽ ni tipa ka mangaha wo. (Yak. 3:17) Gu Kristano wiriki wai ka du na ruru bipai nika zanga mbu gene fu gu kura apai si gbe berãni. Rogo gi kekeapai re, ani nika sakapai tipa wai rengbe ani ka ru nyanyaki. Na berewe a, ani nika bi agene bisue nga gu Satana aasada ka sa apai furani ngbaha ni kpakarakpakaraha ka ani ru nga nyanyaki ya na ani nika wirika wai rengbe ani ka ru nyanyaki fu gu ome ko amangaha.

3. Gini andiko nga ga Bakere Bafu Arugute ani abihe rogo Amokedi 15:28, 29?

³ Kina Yekova sa nga gu boro du na rengo beko ka fu andiko furani na ko ninaamanga gako arugute ti aregbo dunduko taata fu gako aboro i rugutiyo na ni. (Yes. 33:22) Ni kpiapai, gu riigbu bipasunge naadu rogo bambata sa kama agarã ayugu bara agene biata nga gu si aida aKristano ru nyanyaki rogoho: (1) ni ne ani iriso kpiahe, kini irisi kina Yekova sa, (2) ni ne ani kure, na (3) ni raka ani kuti gu bangua arugute nga ga Baibiri nga gu nabipa  ruru mangapai. (Oni gedi Amokedi 15:28, 29.) Waigu rengbe aKristano areme ka ru nyanyaki rogo agi agene du biata re?

4. Waigu ani afu gu iriso fu Yekova nga gu rẽ tipa kina ko? (Yugoti 4:11)

⁴ Ani naká iriso kpiahe, kini irisi kina Yekova sa. Ko arũ ndiko fu aYisaraere i nairisa kina ko sa. (Pa Rug. 5:6-10) Na ho Satana aˈasadi Yesu ni, Yesu ape gupai nga, ani naairiso kina Yekova sa. (Mt. 4:8-10) Mbiko gipai rẽ, ani airiso nga aboro te. Ni kpiapai, ani amanganga pai na abarumbatayo rogo apambori, aboro birĩ zogarago, agu aboro wo rimoyo rogo agu apai du wa ambaro, avidio, watadu abia si ki du wa ambori nga yo te. Ani naru nyanyaki kubara Yekova yo na kini irisi kina ko sa mbiko ko “nafu ahe dunduko.”​—Oni gedi Yugoti 4:11.

5. Tipagine ani agiasangba gu ga Yekova rugute tini du tipa unga na kure?

⁵ Ani nagiasangba gu ga Yekova rugute du tipa unga na kure. Tipagine? Bambiko Yekova nape gupai nga kure narukuba unga, na si nga bawene gamahe beko furani. (Pa Mot. 17:14) Ti gu bambata regbo Yekova aidihe fu aboro tipa i tona ri pasio, ko aruguyo nga ka i ringa kure ya. (Bam. P. 9:4) Ko aima dogoda gi rugute re berewe ho ko afu andiko ni fu aYisaraere vurube Moize. (Pa Mot. 17:10) Na ko afu arugapai fu gu riigbu bipasunge nadu rogo bambata sa kama agarã fu aKristano nga “oni ne . . . kure.” (Amo. 15:28, 29) Ani naru nyanyaki ka giasangba gi rugute re ho ani amanga diaberã ni tipa gu ngbatunga husa ani aidaha. b

6. Gini ome ani amangaha tipa ka raka kuti gu ga Yekova arugute du tipa iriiri mangaapai?

⁶ Ani naka kuti ga Yekova tumbatumba arugute du tipa iriiri mangaapai. (Eb. 13:4) Ka pe pai ngba kura gene, gu mokedi nangia Pauro arugurani nga “ani imi” apai kpotorani yo dunduko​—naida ka ya, ka manga ome nyanyaki tipa ka mbu gbegberẽ nyemu ahe nga ga borose. Ani nambu ngana guhe watadu manga gupai nga gu rengbe ka ndu na ani sa wasiwasi kodaba. (Koro. 3:5; Eyo. 31:1) Ho ani agbia tirani ni na aasada, ani na mangapai ni ipiipihe tipa ka mbu ai gu berã watadu mangapai nga gu rengbe ka gbarasa gaani pagume na Yekova.

7. Ginipai si aida ani mangihe, na tipagine?

⁷ Yekova naida ani naagiasangba ko kina boro ‘kpotorani yo.’ (Rom. 6:17) Agu apai ko apehe furani ti aregbo dunduko tipa kina gaani wenepai, na ani arengbanga ka aria gako arugute te. (Yes. 48:17, 18; 1 Kor. 6:9, 10) Ani namanga ome tipa ka sa ngbarago ti Yekova na ki du na kina gu bangisa bipai bake papara atambuahe adu na ni nga guko naya: “Mi naruga kpotore yo ka manga pa gamo rugaapai, nye anye kindi.” (Tam. 119:112) Ono tie, Satana naasada ka rungburasi gaani diaberã. Gini agene ko amanga gipai re ngbaha?

8. Waigu Satana amangasunge na arungosiro tipa ka rungburasi gaani diaberã?

⁸ Arungosiro. Bakitingbanga namangasunge na arungosiro gbiati zuu ka rungburasi gaani diaberã. Gako sasa nga “ka rita” rani, naida ka ya ka gbarasa gaani pagume na Yekova. ( Pet. 5:8) Agu aKristano nadu rogo bambata sa kama agarã agbiatiyo na serekpohe, kpata, na zavura i ki imi aguyo tipa gayo ru nyanyaki. (Amo. 5:27, 28, 40; 7:54-60) Satana namangasunge kindi areme na arungosiro. Gipai re ni yuguyuguhe rogo gu gbegberẽ gene i amanga awirinarani ngbaha Russia yo na rogo kura aringara.

9. Oni yugungo gu kpiapai si aida ani moiberã rani tini kuti gu zubohe adunga gbaiga ya.

 ⁹ Gu soapai adunga gbaiga ya. Satana namanga sunge na gako abirĩ ku pati agu azubohe du gbaiga. (Ef. 6:11) Mo bingo gupai namangi tipa gu wirina du rimoko nga Bob, nga guko i adikako ku bambu ngua yo tipa i gbako. Ko agumba gupai fu amunganga nga ko aidanga i fu kure kutii kpotokoyo wagusa te. Amunganga aidihe ka iriso gako diaberã. Ono tie, rogo gu yuru nadu mbata fu i gba Bob, gu kura munganga aye ka bi ko fuo gako aborokporo naga. Gu munganga re agumba gupai fu Bob nga, si nangera wa i afunga kure kuti kpotokoyo te ono i nika ye na ni si du mbembedi ka si dunga si nika ida ha. Si rengbe kadu nga gu munganga re aberẽ gupai nga Bob nika aria berãko aria ho gako aborokporo nika dunga ni pati ko ya. Ono Bob aima ru nyanyaki, ki gumba gupai ziazia nga ko aidanga na kure te ka kina ginipai vura manga vurũ.

10. Tipagine du ga aboro berãpai tini ni kerepai? (1 AKorindo 3:19, 20)

¹⁰ Ga aboro berãpai. Ka ani aberã ngba gu gene agu aboro aberãnga pa ga Yekova andiko ya aberã ngbaha, ani ima rengba ka tona ka mbu Yekova gbiati pekafuo gako arugute. (Oni gedi 1 AKorindo 3:19, 20.) Dedede, “gu tatamana nga ga gi zegino re” nandu na aboro sa kina gu nyemu apai nga ga borose. Gu bete aKristano naadu Perugamona yo na Tuatira yo aima dia gu bipai nga ga iriso kpiahe na wasiwasi mangapai nga gu nadu rogo gu gbata re. Yesu afu nyanyaki rugute fu agu adungurati re mbiko i ambu gene fu wasiwasi kodaba si ni mangi. (Yugo. 2:14, 20) Areme, agu aboro du pati rani na asada ka sarani ani idi kuti iraira abipai. Agumerani gbiati abakurearani ima rengba ka ngarasa rani tipa ani kuo ga Yekova andiko. Ni kpiapai, i ima rengba ka ya anga pa nye ani ni ruru rani rogo gaani mangapai yo nga gupai nyakipaha te.

11. Wa ani nikaa ru nyanyaki, ginipai si aida ani ne he?

¹¹ Ti kura aregbo, ani ima rengba kadu na gu bipai nga, agu arugapai Yekova afu he furani arengbanga te. Ani ima rengba a ka du ni asadiasadi rani “ka susa ri agu apai du ni keke he.” (1 Kor. 4:6) Agu abarumbatayo rogo pambori nadu ti regbo Yesu aima manga gi ingahe re. Ni gbiayo gayo arugute kuti ndiko, i asaha ni kpakarakpakaraha fu aboro tipa i mangipai kuti ni. (Mt. 23:4) Yekova nafu zukazuka rugapai furani vurube Fugoko na vurube gako riigbu. Ndupai ho ani gbia kurapai kuti agi arugapai ko afu he re te. (Snz. 3:5-7) Sidu, ani agunga rii agu apai du ni kekehe rogo Baibiri yo te watadu ka maa andiko tipa agu apai adunga rogo Baibiri yo ya fu akuarani aidipase te.

12. Waigu Satana amangasunge na “kungba nangahe”?

¹² Anangahe. Satana namanga sunge na “kungba nangahe” gbiati “gu tata pai nga ga zegino” tipa ka imisa aboro na ki kparaka yo. (Koro. 2:8) Rogo bambata sa kama agarã, agi apai re aakoda agu ayugopai nga ga wiri aboro du mburuhe rii gayo aberã, agu ayugopai nangia ga aYudo mburuhe aadunga rii Ziazia Kekeapai ya, gbiati gu yugopai nga Kristano duwa ka niirisi agu andiko nga ga Moize. Agi aberãpai re aima nanga aboro bambiko si adiberã yo kusayo tigu boro nga ndikidi Mburu tatamana, nga Yekova. Areme, Satana namangasunge na aũgbandaka apangbanga tipa ka gbaraga agu aziree abarumbatayo rogo birĩ-zogarago agbandaka ha. Ani aima gia dungu agi apangbanga re ti regbo gu ririkaza nga Korona. c Agu aDezire Yekova nadegetuyo kuti agu arugapai gaani riigbu aafuhe abanda tiyo ti gu bakere bakabangirise agu aboro naadegatuyo  kuti gu ziree apangbanga re agbiaha.​—Mt. 24:45.

13. Tipagine du si aida ani du tini na rubangirise ka pai gbenga berãrani kusayo ya?

¹³ Agu apai rengbe ka gbe berãrani kusayo. Si aidanga pai di berãrani kusayo “ti agu apai nyakipaha” te. (Frp. 1:9, 10) Agu apai nagbe berãrani kusayo ima rengba ka dia bakere gaani regbo ti agu apai ka ani nimangihe nga gu du na nyanyakipaha. Agu apai ani amangaha na aˈuru dunduko wa​—riahe, mbirahe, mangonvo, gbiati sunge marã​—ima rengba ka diaberã rani kusayo ka ani mbu he si du ni banguapai rogo gaani raka yo. (Rk. 21:34, 35) Kurigure, auru dunduko ani agedapai tipa agu aboro nayugopa gayo gberãrago gbiati agu akango nga ga aboro birĩ-zogarago. Si aidanga ani mbu agi apai re si gbe berãrani kusayo te. Ka si adunga wo ya, ani ima rengba ka tona kaa ngbe na kura riigbu sa kpotorani yo. Satana namangasunge na agu agene ani nafura tipa ha kuari re na gu sasa nga ka rungburasi gaani diaberã ti manga gupai du ni ruruhe. Ani bingo wai ani narengbe ka ká fu Satana na gu ome ko amangaha na ki ru nyanyaki.

14. Ginipai sa rengbe ka undo rani ani ru nyanyaki kubara Yekova yo?

¹⁴ Mo berẽkurii gamo kparatise na bapatiza. Mo amangi agu adiandue re mbiko mo aaida ka songodapai kubara Yekova yo. Mo berẽ kusayo kuti gupai na undoro mo idi kuti gupai nga mo ima gbia rengo. Mo agbia ndikidi inohe tipa Yekova na ki sonosi iriso na nyemuse koyo du gu Bamo ni du ngbangbaturũ yo. Mo asonosi idapase na si ki fõngbaduroyo mo sa berãro. Ngbaduroyo a fõ ro tipa mo mbu gu gbegberẽ mangapai mo aamangaha na kini raki ringbisihe kuti gupai Mbori akpinyemu. Mo aima du na ngbarago ho mo abi ga Yekova mbupai ni koyo du mo ni. (Tam. 32:1, 2) Mo atona kaa ndu tipa agu adunguratise nga ga aKristano na ki tona kaa gumba gu weneapai fu kura aboro mo awirikihe. Wa du mo awere ni gu Kristano naima kpara gani raka fu Yekova na ki zi bapatiza, mo awere nata ngba gu  gene nga ga unga, na mo nika mangapai na ome ro dunduko kaa ndu kindi ngbaha.​—Mt. 7:13, 14.

15. Tipagine du wisigopai gbiati berãkuriipai tini na nyanyakipaha?

¹⁵ Mo wisigi Fugo Mbori na kini berẽkuriihe. Kina wai rengbe ngua ka ru nyanyaki ho du atarãha ni dudunguro ku sende yo, ani ima rengba a ka ru kina wo nyanyaki ka mburu gaani idapase du nyanyaki rogo Fugo Mbori yo. Wa ngua atona kaa sona, atarãha narimo dudunguro na si kini tona kaa gbaraga. Ho ani awisigopai ni na kini berẽkurii he, ani na nyakasa gaani idapase na kini dungurosi gaani kido kuti ga Mbori gene mangapai nga si du ni wenehe. (Koro. 2:6, 7) Mo berẽkuriipa wai ga Yekova arugapai, gako ngbe mbatayo, gbiati gako bandahe aundo gu gako amoyambu na du mbata kusayo. Ni kpiapai, Yezekere agbeberã ko wenengai wa maraika aadia ringbisiringbisi Yekaru ko abihe rogo yuguyugupai. Gi yuguyugupai re aima nyakasa Yezekere, na si nayugo gu nyanyakipa pai rengbe ani ka wirikaha tipa wai rengbe ani ka songoda ga Yekova arugute nga gu du tipa ziazia irisombori. d (Yeze. 40:1-4; 43:10-12) Ani na gbia undo agbia a ho ani adia regbo ni kaa wisigopai na kini berẽkurii gu dudunguro apai du rogo Fugo Mbori yo.

16. Waigu padu kpoto Bob yo nyanyaki abanda ko? (Atambuahe 112:7)

¹⁶ Mo sonosi gu kpotose yo du nyanyaki. Bakindo Davide adu mbata na kakaka nyemuse tipa Yekova ho ko abi bia ni ki ya: “Ako Mbori, kpotore yo ru nyanyaki.” (Tam. 57:7) Ani ima rengba a kadu na gu kpotoseyo du ni nyanyaki he, kini kido kuti Yekova. (Oni gedi Atambuahe 112:7.) Oni bingo wai gipai re aundo Bob, ani nifura tipa ko mbata kusayo. Ho i agumba gupai ni fuko nga i nika ye aye na kure ki moihe barambeda ka si aidaha, ko akaragapai ni ipo nga, ka si dunga pai nika du ho si nika ida i fu kure fuko, ko nika guari nibasa rogo gu bambu ngua re. Kusa, Bob ape gupai nga, “Mi aadunga na kapa tipa gupai mi nika mangaha te.”

17. Ginipai rengbe ani ka wirikaha ti ga Bob kpiapai? (Oni bi sura a.)

 ¹⁷ Gupai naundo Bob ko ru nyanyaki nga ko aima diaberã tipa ka ru nyanyaki mbata fu ko ndu ku bambu ngua yo. Bambatapai nga, ko adu na nyemu ka sa ngbarago ti Yekova. Uepai nga, ko awisigipai wenengai tipa ka ino gupai Baibiri gbiati agu awaraga du mburuhe ri Baibiri agumbaha tipa pa du unga na kure ni ziazia ha. Biatapai nga, ko aima du na gu kido nga Yekova nika fu maku fuko tipa gako diaberã ka giasangba ga Mbori andiko. Ani ima rengba a kadu na gu kpotoyo du ni nyanyakihe ka ani vura kaa gbiatirani na kina gini aˈasada vurũ.

18. Ginipai ga Baraka kpiapai ayugoho furani nibipa kido kuti Yekova? (Oni bi gu sura duti kpotoho.)

¹⁸ Mo kido kuti Yekova. Oni bingo wai Baraka adu na diabese mbiko pa du ko na kido kuti ga Yekova arugapai. Ti gu regbo re, aboro Yisaraere aambakadanga tiyo tipa vura te na i aadunga na aũvura a te, ono Yekova agumba gupai fu Baraka nga, ko ndu ka sovura kuti gu barutiriivura nga ga aKanano ko nangia Sisera. (Abasa. 5:8) Gu dee nebi nangia Debora agumba gupai fu Baraka nga ko ndu ku kpasakpasa rago yo ka gbia Sisera na gako angbagida vura 900. Rii kpasakpasa sende, si aima rengba kadu ni kpakarakpakaraha fu aYisaraere i sovura kuti agu angbagida vura naaora ni ipo re, ono wa Baraka avura ino gipai re ko agisangba. Wa abanzengere aora ti gangara Tabora, Yekova asa bakere mai si na. Ga Sisera ngbagida vura akongo ku rogo dogoro, na Yekova ki fu diabese fu Baraka. (Abasa. 4:1-7, 10, 13-16) Wakina gure a, Yekova nika fu diabese furani ka ani du na kido kuti ko gbiati gu rugapai gako riigbu afuhe.​—Pa Rug. 31:6.

19. Tipagine si aida ani ru nyanyaki ti ni kindi?

¹⁹ Gaani asadatise ka ru nyanyaki nikaa ndu kindi kumbatayo wa ani kaa raka kindi rogo gi sino raka re. (1 Tim. 6:11, 12; 2 Pet. 3:17) Ani dinga berã adia ka zanga wo be agu apai nga ga arungosiro, gu soapai adunga gbaiga ya, gu berãpai nga ga aboro, nangahe gbiati agu apai nagbe berãse kusayo. (Ef. 4:14) Kuba gure, ani dinga berã adia ka ru nyanyaki, na kini kpinyemu Yekova ti aregbo dunduko kini gisangba gako arugute. Ti kina gu bangisa regbo re, si naida ani du na ruru bipai. Rogo gu kekeapai ngbe fuo gere, ani nika sakapai tipa wai du aYekova na Yesu ni wene kpiapai nga ga du na ruru bipai.