1. Gini arengo mo awirikihe ho mo atona wirika Baibiri ni?

 YA MO mo natingidapa gu regbo mo atona wirika Baibiri ti ni? Si nawiraha wa, kina ngbaro nazere tipa ka ino gupai nga rimo Mbori kina ti ni. Isoke mo aima gbia wasa ho mo aini gupai ni nga, Mbori ambusanga aboro rogo we-iferno te. Na si nawiraha wa mo aima du na bakere ngbarago tipa gu maabangirise nga ga bi gu gamo aboro berewe nakpiki na ki raki na yo rogo paradizo auru kpotosende.

2. Kurii gu nga ga wirika agu arengo du rogo Baibiri, gini kura sonakumbatayo berewe mo amangihe? (AEfeso 5:1, 2)

² Wa mo aawisigo Fugo Mbori ni bakerehe, kina wo a gamo nyemuse tipa Yekova aasona gbe. Gu nyemuse re afõngbaduroyo mo mangipai kuti gupai mo awirikihe. Mo amangi wene adiaberã riimburu agu abangua arengo nga ga Baibiri. Mo awiriki wai ka berã na ka manga gupai du ni wenehe mbiko mo aaida ka sa ngbarago ti Mbori. Kina wai gude ninaawirika vungu ru, kina wo mo awiriki gu Bamo du ngbangbaturũ yo.​—Oni gedi AEfeso 5:1, 2.

3. Gini asanahe rengbe ani ka sana tirani na ni?

³ Ani ima rengba ka sana tirani nga: ‘Ya mo mi kpinyemu Yekova ni bakerehe awere susi wai mi akpinyemu ko ti gu bambata regbo mi ada ni Kristano? Tifuo gimi bapatiza, ya mo gimi aberã na mangapai da gbe wa ga Yekova gene mangaapai​—niyugo mi nyemuse fu awirinina?’ Ka si vura du nga gamo “bambata nyemuse” ima zera, ka mo du nga na gberãrago ya. Ngbatungapai wa gure aima manga agu aKristano naadu rogo bambata sa kama agarã. Yesu aakánga yo te, na ko akánga rani a te. (Yugo. 2:4, 7) Ko ima ino gupai nga, ani ima rengba kadu na gu nyemuse berewe ani adu na ni ho ani awiriki rengo ni ti bambata regbo.

4. Ginipai ani nika sakapai tipaha rogo gi kekeapai re?

 ⁴ Gi kekeapai re nika sakapai tipa wai rengbe ani kaa ndu kumbatayo kindi kaa sonosa gaani nyemuse tipa Yekova na tipa kura aboro. Fuo gure, ani nika wirikapai tipa gu bete weneapai nika manga furani ka ani kpinyemu Yekova gbiati awirinarani ni bakerehe.

5-6. (a) Gini akpakarapai gu mokedi nangia Pauro agbiatiko na ni ti regbo gako sunge tungusapai? (b) Ginipai nafõngbadukoyo ko naamangasunge fu Yekova kindi?

⁵ Gu mokedi nangia Pauro aima du na ngbarago tipa ka mangasunge fu Yekova, ono si aadunga taata fuko ti aregbo dunduko te. Dedede, Pauro anaandu gbanga anunguro, na ndu nunguro ti agu aregbo re anaadunga taata te. Ti regbo ga Pauro anunguro, ti kura aregbo ko anidu “ngba pai be adi” na “ngba pai be abatuka.” Gu kura aregbo adu kinaho a avurako anaata ko. (2 Kor. 11:23-27) Na zavura agu awirina Pauro nangia aKristano anaadunga dedede na tambuahe tipa agu apai ko anaamangaha tipa ka undo yo te.​—2 Kor. 10:10; Frp. 4:15.

⁶ Ginipai naundo Pauro ko naandu kindi kumbatayo kaa mangasunge fu Yekova? Pauro awiriki badungu apai tipa asino Yekova rogo Ziazia Kekeapai yo na ti agu apai namangi ko. Pauro aye ka da kuti gu digisopai nga, Yekova Mbori ima kpinyemu ko. (Rom. 8:38, 39; Ef. 2:4, 5) Na ko aye ka kpinyemu Yekova ni bakerehe gbe. Pauro ayugu gako nyemuse tipa Yekova ni manga ko gupai ko “amangi fu gako aboro, a wa oni namanga pa yo awere kindi.”​—Eb. 6:10.

7. Gini gene sa rengbe ani ka nyakasa gaani nyemuse ngbaha tipa Yekova?

⁷ Ani rengbe ka nyakasa gaani nyemuse tipa Mbori ni wisigo ani Fugoko sirisiri. Wa mo nikaa geda Baibiri, mo asadi ka bi gupai agu apangbanga du rogo yo ni basasa ayugoho tipa Yekova. Mo sana tiro nga: ‘Waigu gi pangbanga re ayugo gupai nga Yekova ima kpinyemu re? Gini kura andu apai si afuhe fere tipa mi kpinyemu Yekova?’

8. Waigu rengbe kparakpee ka undo rani ani nyakasi gaani nyemuse tipa Mbori?

⁸ Gu kura gene sa rengbe ani ka nyakasa gaani nyemuse ngbaha tipa Yekova nga ni kusuko ani kpotorani yo fu Yekova dedede rogo kparakpee yo. (Tam. 25:4, 5) Yekova nika karagapai akaraga kuti gaani akpee. (1 Yo. 3:21, 22) Khanh, nga wirina ni dee Asia yo, aya: “Ti tonatonaha, mi akpinyemu Yekova mbiko gupai mi awirikihe tipa ko, ono ho mi aabi wai ni ko aakaragapai kuti gimi akparakpee, mi aye ka kpinyemuko gbe. Gipai re asa re mi asadi ka manga agu apai nafu ngbarago fuko.” b

9. Waigu afugo Pauro ayugo gupai nga Timoteo aamanga ome amanga tipa ka yugo dudunguro nyemuse fu aboro?

⁹ Tifuo bete agarã fuo Pauro da ni Kristano, ko agbia wene paranga rimoko angia Timoteo. Timoteo aima kpinyemu Yekova na ko aima kpinyemu aboro. Pauro ape gupai fu aFiripoio nga: “Kura boro adu nga ho na berãpase wa [Timoteo], ka banda pa roni sirisiri te.” (Frp. 2:20) Pauro aafuranga ane tipa gu tandu Timoteo adu na ni nga ga du ni wene bambakadi apai watadu bagumbapai gbaiga te, ono Pauro aafura ane tipa ga Timoteo bakere nyemuse tipa awirina. Zanga kapa, agu adungurati Timoteo anaamangasunge rogoho anaangera kumbatayo tipa gu regbo ko nika ye berewe ti ni.​—1 Kor. 4:17.

10. Waigu Anna gbiati kumbari apepa gu nyemuse i adu na ni tipa awirinayo?

¹⁰ Ani naangera a tipa agu agene rengbe ani ka undo awirinarani aKristano ngbaha. (Eb. 13:16) Oni bingo gu kpiapai nga ga Anna, i ape pa ri rogo gu kekeapai du mbata fu gere. Tifuo bakere bavugumo, ri gbiati kumbari andu ka bi  agu aborokporo nangia aDezire Yekova na i abi gupai nga, bavugumo aima gbarasa rii gu bambu nangia ga agu aborokporo re. Ni sangbana gipai re, gigiri aroko aadunga be agi aborokporo re te. Anna aya: “Ani adi gayo aroko ki zundu he na ki kutukpaha wenengai. Si aadunga ni kpakarakpakaraha fu rani ka manga gipai re te, ono mbiko wa ani amangihe si asa gupai nga ani da ni wene abakure da ku areme.” Gu nyemuse nga ga Anna gbiati kumbari afõngbaduyo yo i fu undo rogo mangimangipai yo.​—1 Yo. 3:17, 18.

11. (a) Waigu du kura aboro ho ani ayugo nyemuse ni fuyo? (b) Ringbisihe kuti Asanza 19:17, waigu du Yekova ho ani ayugo nyemuse ni?

¹¹ Ho ani amangapai ni na kura aboro rogo nyemuse, i nika bi gu ome abi ani amangaha tipa ka wirika wai kaa berã na kini mangipai wa Yekova. Na i nika du na bakere tambuahe tipa gaani wenesino. Khanh, i nipe pa ri kusayo natingidapa agu aboro atingida na undo ri. Ri aya: “Mi na bakere tambuahe fu agu awirina nga adee dunduko nandu na mi ku gene tungusapai yo. I anaaye kaa dia re kporo yo, kini yambu re ani naari riahe na yo, na kini karaga re zezeredi ku kporo yo. Mi ima ye ka rugatire awere na gupai nga, gipai re angia bakere sunge fuyo. Na i adu na ngbarago ka mangaha.” Si nirengo nga, anga aboro dunduko nika fu tambuahe furani tipa agu apai ani namangihe fuyo te. Khanh ape gupai tipa agu aboro naundo ri nga: “Mi nakpinyemu ka fu tambuahe fuyo tipa gu weneapai dunduko i amangihe fere, ono mi ainongo wari i dunduko araka ni awere te. Ono tie, Yekova na tambuahe tipa agu apai i amangihe, na mi naamanga kparakpee nga, ko fu mosoro fuyo kuba re.” Gipai Khanh apehe re nga rengo. Yekova nabi gu weneapai dunduko ani amangaha fu kura aboro, ka si vura du kina tooni vurũ. Ko nabi gu futise re na nyanyakipaha na ni gu bape ko nika fu mosoro afu tipaha.​—Oni gedi Asanza 19:17.

12. Waigu rengbe awirina ka yugo gayo nyemuse tipa dungurati? (Oni bi asura a.)

 ¹² Ka singia mo nga wirina nga kumba, waigu rengbe mo ka yugo gamo nyemuse tipa kura aboro na ki mangipai tipa ka undo yo? Paranga wirina du rimoko nga Jordan asana bakumba tipa gupai rengbe ko ka mangaha tipa ka undo ni bakerehe rogo dungurati. Gu bakumba re afu tambuahe fuko tipa gu sonakumbatayo ko namangihe na ki fu bete arugute fuko tipa wai rengbe ko ka manga bakere sonakumbatayo. Ni kpiapai, ko afu gu berãpai nga, Jordan naada Bambu Kindo yo mbata fu regbo na kini fu sene fu kura aboro, ko naafu karagapai ti regbo adunguratise, na kini tungusipai dedede na gako badona nga ga tungusapai, na kini ngere tipa agu agene nga gu rengbe ko ka undo kura aboro ngbaha rogo mangimangipai yo. Ho Jordan amangi agi apai re ni, ko awiriki wai ka manga kura apai ono ko awiriki wai a ka kpinyemu awirinako ni bakerehe. Jordan aye ka wirika gupai nga, ho boro ada ni ni moundo abaakumba, anga gure nga gu regbo ni atonanga kaa undo aboro ti ni te; kuba gure ni nandu kindi kumbatayo kaa undo yo.​—1 Tim. 3:8-10, 13.

13. Waigu nyemuse afõngbadu gu wirina yo du rimoko nga Christian ko da berewe ni bakumba?

¹³ Na ka si du nga mo amangisunge mbata kusayo ni moundo abaakumba watadu ni bakumba? Yekova natingidapa gu sunge atingida mo amangihe mbata kusayo gbiati gu nyemuse nafõngbaduroyo mo mangihe. (1 Kor. 15:58) Ko nabi gu nyemuse abi a mo andu kindi kumbatayo kaa yugoho. Gu wirina du rimoko nga Christian adu na gberãrago ho i adi ko ni kusayo ti sunge abaakumba. Wa si avura du wo, ko aya, “Mi adiberã tipa ka manga agu apai dunduko du mi na rengba ka mangaha ti ngba ga Yekova sunge mbiko nyemuse​—singia mi nga bakumba watadu mi nga bakumba te.” Fuo bete regbo kusa, i asiako berewe ni  bakumba. Christian aya: “Mi aagunde agunde tipa ka mangasunge berewe ni bakumba. Ono mi adiberã nga, ka si du nga mbiko ga Yekova inapai, ko naida mi mangisunge berewe ni bakumba, mi nika mangaha amanga mbiko gimi nyemuse tipa ko na tipa awirinina.”

14. Ginipai oni awirikaha ti gupai wirina ni dee apehe rogo gu ringara nga Georgia?

¹⁴ Ga Yekova amoyambu nabaka bangiriyo abaka a tipa gayo amurakporo. (Mt. 22:37-39) Ni kpiapai, Elena nga wirina rogo gu ringara nga Georgia aya: “Ti tonatonaha, gu yangarapai naafõngbadure yo mi naatungusapai nga gimi nyemuse tipa Yekova. Ono wa gimi nyemuse tipa gu Buba du ngbangbaturũ yo aasona, gimi nyemuse tipa aboro aasona a. Mi aasadi ka berãpa agu akpakarapai i narengbe kaa gbiatiyo na ni na gini arii apai rengbe ka zio ngbaduyo yo. Wa mi aaberã tipa yo ngba gi gene re, kina wo a mi aaida ka undo yo ni bakerehe.”​—Rom. 10:13-15.

15-16. A wa i nayuguhe rogo asura, gini amaku naye mbiko yugo nyemuse fu kura aboro?

¹⁵ Ho ani ayugo nyemuse ni fu kura aboro, anga kina yo nga gu yangara aboro nagbia undo te. Tingbafuo gu ririkaza nga Korona tona, wirina du rimoko nga Paolo gbiati diako aundo gu dungu sosono awirina nga adee i wiriki wai ka mangasunge na gayo erekturoni tipa kaa manga dezirepai. Gu kura wirina sa si aima kpakara furi ti tonatonaha tipa ka manga sunge na gari erekturoni aima ye kidu na diabese kusa. Ri aima du na rengba ka mangasunge na ni tipa ka yamba agumeri tipa Tingidapa  Kpio Yesu. Aguyo sita bawe aima du pati ni rogo vidio! Gu wirina re gbiati agumeri dunduko aima gbia undo ti gu asadatise nangia ga aPaolo na diako. Kusa, gu wirina re akepai fu Paolo nga: “Tambuahe tipa yugopai furani nga sosono aboro. Ka bangire gonga ti wai Yekova aberãpa rani na ti wai mo amangisunge nyanyaki ka undo rani te.”

¹⁶ Akpiapai wa gere ayugu nyanyakipa pai fu Paolo. Ko aye ka ino gupai nga, nyemuse nyakipaha gbe kisusi inohe watadu gu tandu i avunga boro na ni. Ko natingida gupai nga: “Mi anaamangasunge ni babi adungurati. Areme, mi ye ka rugatire na gupai nga, wa vura duhe nga si nawiraha wa bangiri agu awirina re aima go ti gimi agumbapai, i natingidapa wai kindi mi aundo yo rogo mangimangipai yo.”

17. Ada berewe nika gbia undo ho ani ayugo nyemuse ni?

¹⁷ Ho ani ayugo nyemuse ni fu kura aboro, ani nitirani a nagbia undo ngba agu agene ani aaberãnga paha ya. Jonathan, naraka rogo gu ringara nga New Zealand, aima bi gipai re ni rengo. Rogo kura Rago Nzengu sa fuo bebere uru, uru nifai ni kerehe, ko abi bazakigene pangba gene ko ni mangi dezirepai. Jonathan adiberã kaa mangasunge na gi bazakigene re rogo aRago Nzengu fuo bebere uru. Ti gu regbo re, ko aainongo wai ko nitiko nika gbia undo ti gi mangapai nga ga wenesino re te. Jonathan aya, “Ti gu kura regbo sa rogo gimi raka yo, mi aakpingo nyemu sunge tungusapai te. Ono wa mi aadegature kuti wai gi bazakigene re aayugopai na kini bi wai gako sunge tungusapai aakusa wene surungbaha, mi atona kaa gbia ngbarago ti sunge tungusapai. Gu wirina re ada a ni mbembedi bakureami na ko aundo re mi naagbia ngbarago ti sunge tungusapai na ki mbedi gbe na Yekova.”

18. Ginipai Yekova akpinyemu ani mangihe?

¹⁸ Yekova naida gupai nga ani dunduko nyakasi gaani nyemuse tipa ko na tipa kura aboro. A wa ani nawirikihe, ani rengbe ka nyakasa gaani nyemuse tipa Yekova ni geda ani Fugoko na kini berẽkuriihe na kini fura na ko dedede rogo kparakpee yo. Ani rengbe ka nyakasa gaani nyemuse tipa awirinarani niundo ani yo rogo mangimangipai yo. Wa gaani nyemuse nikaa sona, ani nika mbeda gbe na Yekova gbiati gu gaani aborokporo nga ga toro yo. Na ani nika gbia ngbarago ti gu pabakure re nyeanye kindi!