AGU ABORO nageteka kuru ahe sende yo ima ge dungu amirioni abiriki rogo gu Babera naadu mbata nga gu i amangisunge na ni ka me gu gbata re. Ringbisihe kuti gu ba geteke kuru ahe sende yo nga Robert Koldewey, i anaaba agu abiriki re rogo fofoi ahe rogo agu aba naadu “kusayo ti gbata, yo wene asende anidu ni na bakere nvuo tipa kaa mangasunge na ni ni ime we.”

Agu aboro nageteka kuru ahe sende yo ima bi gu gopai nayugo gupai nga agu airangbii naadu Babera yo anaamangasunge na gu fofoi arago re a tipa kaa manga kere gbegberẽ apai. Paul-Alain Beaulieu, nga bakere bayugupai tipa aSuro rogo gu Yunivasiti du Toronto yo aya: “Gu kekeapai nga ga aBabera nayugo gupai nga, bakindo afu zinahe nga agu aboro nabasa sangbako watadu nayugo zanga irisa fu agu ambori nga ga Babera yo, i ba yo ku rogo gu fofoi rago re na ki zo yo.” Ni kpiapai, gu kura kekeapai sa naadu ti gu regbo nangia ga Bakindo Nebukadenesara naya: “Oni gbarasi yo, oni zo yo, . . . oni ba yo ku rogo gu fofoi rago re . . . oni sa ngime yo si gundu kuari, oni imi yo ni ba oni yo ku we yo.”

Gipai re natingida agu aboro nageda Baibiri na gupai du ni kekehe rogo Daniere kapita 3. Ani nageda gupai yo nga, Bakindo Nebukadenesara amangi bakere kpiahe rogo dahabu yo rogo gu kpasakpasa rago nangia Dura​—angianga vuru gu gbata nangia Babera ya. Ho agu aparanga biata ni aEbere nangia Sadaraka, Mesaka, na Abedenego aká ni ka nugodi fu gu kpiahe re, Nebukadenesara azingi ni kerehe na ki fu zinahe nga i gindo we si foi susi gu nidu mbata “wa bara saba,” na i ki ba agi akumba naadu biata re “ku rogo gu we nagbi ni ngariangaria ha.” Gu maraika du na ome tiko abatasi yo be kpio.​—Dan. 3:1-6, 19-28.

Agu abiriki i abihe Babera yo ayugu gupai a nga, agu apai du rogo Baibiri ni ruruhe. Badungu agu abiriki re na gu kekeapai ti ni nga gu natambua bakindo. Gu kura gu kekeapai re sa naya: “Nebukadenesara, Bakindo Babera . . . Gu kporo nga ga bakindo, nga gu mi adua ha nga Bakere Bakindo . . . Agu aboro nika ye fuo re zogorago nyeanye kindi.” Agi afugo re wakina gupai du ni kekehe rogo Daniere 4:30, nga gu Nebukadenesara atangbadu ko tipaha nga: “A nga gere nga gu bakere Babera, nga gu mi adua be gu nyaka nga ga gi ome wa ga bakindo kporo na tipa gu taarimo nga ga worimore, te?”