1. Tipagine duhe ti ni nipa tatamana ka mbakadatise tipa gberãngo?

 HO ANI ambakada tirani ni, ani ima rengba ka batasa unga rani. Ni kpiapai, ho gberãngo amanga ni, agu aboro naima mbakada tiyo ima rengba ka bata na kidu na rengba tipa ka undo kura aboro. Kura riigbu sa Putu yo ninaˈasada ka undo aboro ape gupai nga: “Wene mbakadatise ima rengba ka batasa unga aboro.”

2. Tipagine si aida ani mbakadi tirani ti ni tipa bakere gberãngbi? (Matayo 24:44)

² “Bakere gberãngbi” nika tona ni tunguotunguo ho. (Mt. 24:21) Ono bakere gberãngbi nika du ti gaha kia ti gu kura agberãngbi ninaamanga, bambiko ani ima ino gupai nga si naye. Agarã wa 2,000 kusayo, Yesu afu zahe fu apefuoko i mbakadi tiyo tipa gi uru re. (Oni gedi Matayo 24:44.) Ka ani mbakaditirani, si nika du taata furani tipa ani hipai ti gu kere regbo re na ki undo kura aboro a.​—Rk. 21:36.

3. Waigu hipai, nunga, na nyemuse nika undo rani ti regbo bakere gberãngbi?

³ Ani sakingo pai tipa asino biata nga gu rengbe ka undo rani ani mbakada tirani tipa bakere gberãngbi. Ginipai rengbe ani ka mangaha ka si du nga i pe gupai furani nga ani pe gu pangbanga nga ga sapangbanga fu azanga idapase nga aguyo nasoga rani? (Yugo. 16:21) Si nika ida ani du na hipai ka giasangba Yekova, kidu na gu kido nga ko nika banda rani abanda. Ginipai rengba ani ka mangaha ka si du nga awirinarani zanga bete gayo ahe watadu gayo ahe dunduko? (Abak. 3:17, 18) Si nika ida nunga fõngbaduraniyo tipa ani fu guhe si aidaha tipa si undo yo. Waigu ani nika mangapai ka si du nga ni sangbana gu zubohe nga ga dunguradungura ariigbu, si nika ida ani raki mbembedi na awirinarani tipa bete regbo? (Yeze. 38:10-12) Si nika ida ani du na bakere nyemuse tipa yo, si nika undo rani ani susi rogo gu kere kpakarakpakara regbo re.

4. Waigu Baibiri ayugo gupai nga si naida ani naandu kindi kumbatayo kaa sonosa hipai, nunga, na nyemuse?

 ⁴ Fugo Mbori nangarasa rani ani naandu kindi kumbatayo kaa sonosa hipai, nunga, na nyemuse. Ruka 21:19 naya: “Rogo gaoni hipai oni abátasa ungaroni abatasa.” AKorosaio 3:12 naya: “Oni úkadi. . . weneringise.” Na 1 ATesaroniko 4:9, 10 naya: “Bambiko Mbori nayugo pa nyemu akuaroni fu roni tigaoni. . . . Ono ani nazungadi roni, awirina, ya oni susi asusa na ni kindi.” Agi afugo du rogo agi averesi re dunduko, i akehe fu agu abawiriki naima yugo hipai, nunga, na nyemuse. Wa vura duhe wo, si aaida i naandu kindi kumbatayo kaa sonosa agu asino re. Na si naida ani mangi kina gu bangisapai re. Tipa ka undo rani animangi gipai re, ani nika wisigopai tipa wai agu aKristano nadu mbata ayugu agi asino re ni basasa. Na ani nika bi wai rengbe ani ka wirika agu abawiriki re, na ni sangbanaha, ani nika yugoho nga ani ima mbakada tirani tipa bakere gberãngbi.

5. Waigu agu aKristano nadu mbata ahi gayo aˈasada?

⁵ Si aaida aida agu aKristano naadu mbata hipai. (Eb. 10:36) I adu na kina gu bangisa kpakarapai agu aboro naaraka ti gu regbo re adu na ni, ono gu kura kpakarapai adu kinaho mbiko wa i angia aKristano. Dungu yo agbiatiyo na arungosiro, angianga kina be agu agbia pambori nangia ga aYudo yo na aRomo yo ya, ono zavura be gayo aborokporo a. (Mt. 10:21) Na si aaida i bi gupai a nga si aidanga gu ziree yugopai nga ga abasamungu kparaka dungurati na kidu na ome kuriyo te. (Amo. 20:29, 30) Sidu, agu aKristano re aima hipai kidu ni ruruyo. (Yugo. 2:3) Ngba gini gene? I aberẽ wenengai kurii gu kpiapai du rogo Baibiri yo wa gu nga ga Eyobo. (Yak. 5:10, 11) I amangi kparakpee tipa ome. (Amo. 4:29-31) Na i aaberã kindi kurii gupai nga Yekova nika fu mosoro afu fuyo ka i hipai.​—Amo. 5:41.

6. Ginipai ani awirikaha be Merita ti gupai ri amangihe ka hi sogote?

⁶ Ani ima rengba ka hipai ka si du nga dedede ani namanga wisigopai tipa agu akpiapai nga ga hipai du rogo Fugo Mbori yo na agu du rogo gaani awaraga yo na kini berẽkuriihe. Ni manga gipai re, Merita nga wirina Albania yo, adu na rengba ka hi gu kere rungosiro ri agbia tiri na ni be gari aborokporo. Ri aya: “Gu pangbanga nga ga Eyobo du rogo Baibiri yo, angarasi re ni bakerehe. Ko aima rungo ni bakerehe gbe​—na ko aainongo gu boro naaye na gako aasada te​—ono wa si avura du wo, ko aya: ‘Daho mi ka kpi ni mi ambu nga pa gi du ni irarengo te.’ (Eyo. 27:5) Mi aaberãkuriipa agu aasada Eyobo agbiatiko na ni wai si anyaki kisusi gu mi aagbia tire na ni. Wa si avura du nga Eyobo aainongo gu boro naaye na gako akpakarapai te, mi aima ino gu boro naaye na gimi akpakarapai.”

7. Ka si vura du nga ani agbianga tirani na akpakarapai awere te, ginipai si aida ani wiriki ka mangaha awere?

⁷ Ani ima rengba ka nyakasa gaani hipai a ni manga ani kparakpee fu Yekova dedede na kini pe agu akpakarapai fuko du tipa rani. (Frp. 4:6; 1 Tesa. 5:17) Ti kura aregbo, mo agbianga tiro na nyanyaki asada awere te. Wa vura duhe wo, ya mo mo nakpara fu Yekova na kini sanako ko undoro ti agu aregbo du mo na bakere gberãrago ka mo ainongo gupai ka mo mangihe ya? Ka si du nga mo nakpara fu gaani Mbori tipa undo ho mo agbia tiro ni na agu apai du ni rukutu he, mo adunga na ndundu a ho mo ka gbiatiro ni na agu akpakarapai du ni bakerehe kumbatayo te. Na mo nika du na gu kido nga ko ima ino gu regbo si aida ko undoro na ko nika mangaha amanga.​—Tam. 27:1, 3.

8. Waigu gu kpiapai nga ga Mira ayugo gupai nga agu aˈasada ani ahihe areme ima rengba ka undo rani tipa ani hi agu aˈasada nika ye kumbatayo? (Yakoba 1:2-4) (Oni bi sura a.)

⁸ Ka ani nye ni rururani fu Yekova ho ani agbiatirani ni na akpakarapai areme, ani ima rengba ka hi gu asada nga ga bakere gberãngbi.  (Rom. 5:3) Tipagine rengbe ani ka pehe ti ni wo? Dungu awirina bi gupai nga agu aregbo dunduko i ahi akpakarapai, si naundo yo i hi kura kpakarapai nga gu nika ye kumbatayo. Ho i ahi akpakarapai ni mbiko gu undo nga ga Yekova, i na bakere idapase nga Yekova naida aida ka undo yo. Bambiko wa du yo na idapase kuti Yekova, i ima rengba ka hi gu kura asada. (Oni gedi Yakoba 1:2-4.) Mira nga nazakigene Albania yo, bi gupai nga agu akpakarapai ri ahihe kusayo aundo ri ri naandu kindi kumbatayo kaa hipai. Ri idi kuti gupai nga, ti kura regbo, ri nabihe nga ri nga gu yangara boro du na dungu akpakarapai ti ni. Ono ho ri atingidapa agu apai ni Yekova namangihe furi vuru agu agarã yo 20 susi kusayo ka undo ri, ri nape gupai fu tiri nga: ‘Mo nye niruru ro. Ka mo mbunga iriso Yekova awere ya, bambiko ko ima undo ro mo hi dungu akpakarapai.’ Mo ima rengba ka berãkurii wai Yekova naima undo ro mo hipai. Mo du na gu kido nga ai gu regbo mo ahipai, Yekova nabihe abi, na ko nika fu mosoro afu foro. (Mt. 5:10-12) Na gu regbo bakere gberãngbi nika tona ti ni, mo aima wirika wai ka hipai na mo nika diaberã adia kaa ndu kumbatayo kaa hipai.

9. Waigu agu adungurati naadu Andiokia yo na Suria yo ayugu nunga?

⁹ Ani bingo gupai namangi ho agu aKristano naadu Yuda yo agbiatiyo ni na bakere zingo riahe. Tingbafuo gu dungurati naadu Andiokia yo Suria yo gi pa gu zingo riahe re, i aima du na nunga agu awirinayo naadu Yuda yo. Sidu, i amangipai tipa ka undo awirina yo. I adiberã ka keda “ũgomoro fu agu awirina nadu Yuda yo, gu ni ki niringbisi gani na kina omeni.” (Amo. 11:27-30) Wa vura duhe nga agu awirina nadu nazingo tipa riahe re aaraka tuturũ, agu aKristano naadu Andiokia yo aima diaberã tipa ka undo yo.​—1 Yo. 3:17, 18.

10. Ngba gini agene rengbe ani ka yugo nunga ho gberãngo namangi akuarani aidipase ni? (Oni bi sura a.)

¹⁰ Ani ima rengba ka yugo nunga areme a, ho ani naini gupai ni nga gu kura awirinarani aidipase gbiatiyo na gu gberãngo naye nisangbana gu mangaapai nga ga ome zegino. Ani nafu undo niipo​—ti kura regbo, ni sana ani abaakumba singia pai ho rengba ani ka undo namangaha na nifu ani marã kurogo gu sanduki du tipa gu sunge namanga rogo zegino dunduko watadu ni manga ani kparakpee tipa agu awirina gbiatiyo na gberãngo. b (Snz. 17:17) Ni kpiapai, rogo 2020, i asigira gu Rondo du Tipa fu Undo ti Regbo Gberãngo bange gu rondo re aima susa 950 rogo zegino dunduko, tipa i naangerafuo agu aboro gu ririkaza nga Korona adu na maapai kuriyo. Ani na bakere tambuahe tipa agu awirina nga aguyo namanga agu asunge nga ga fu undo. Mbiko wa du yo na nunga koyo du awirinayo ni, i ima ndu na ariahe fuyo, na rogo kura abangiriba, ki undo na mbakada gayo akporo na aba irisombori.​—Oni ringbisinga ha na 2 AKorindo 8:1-4.

11. Waigu gu mangapai nga ga nunga afu taarimo fu gu Barani du ngbangbaturũ yo?

¹¹ Ho ani ayugo nunga ni tingbafuo gberãngo, gu kura aboro nabi gu futise abi ani amangaha. Ni kpiapai, rogo 2019, gu bakere bavugumo i ayambaha nga Hurricane Dorian agbarasi Bambu Kindo Bahamas yo. Wa awirina aambakada gu Bambu Kindo re, i asana gu kura bamangisunge naangianga Dezire Yekova ya tipa ko pepa gu marã si aida ha tipa gu kura sunge si aaida i mangihe. Ko ape gupai fuyo nga: “Mi naida kafu gamahe . . . agu aũsunge i nikaa mangasunge na ni, agu aboro nika mangasunge, na agu ahe si aidaha tipa gu  sunge re. . . . mi naida ka manga gipai re fu gaoni riigbu. Iriworago ima zio re tipa wai oni amangapai fu awirinaroni.” Dungu aboro rogo zegino areme ainongo Yekova te. Ono dungu yo nabi gupai abi aDezire Yekova amangaha tipa ka undo kura aboro. Ka iriwo gu pa mamu ngaha ka ino gupai nga gaani mangaapai nga ga nunga ima rengba ka gbe agu aboro koyo du gu Ko ni “nakumuko ni inapai”!​—Ef. 2:4.

12. Waigu sonosa nunga areme ambakada rani tipa bakere gberãngbi? (Yugoti 13:16, 17)

¹² Tipagine si nika ida ani yugu nunga ti ni ti regbo bakere gberãngbi? Baibiri nayugo gupai nga agu aboro nikaa songoda nga gu zogorago nga gi zegino re ya, nika gbiatiyo na akpakarapai​—awere na ti regbo bakere gberãngbi. (Oni gedi Yugoti 13:16, 17.) Awirinarani ima rengba ka ida naundo tipa ka gbia agu ahe nga gu i aida na ni tipa kaa raka. Ho gaani Bakindo nga Yesu Kristo nika ye ni ka sapangbanga, ani naida ko gbia rani ani niyugu nunga na ko ki fu gu yambahe furani nga “oni dí kumbo gu ngbi.”​—Mt. 25:34-40.

13. A wa duhe rogo ARomo 15:7, waigu agu aKristano naadu mbata anyakasi gayo nyemuse tipa akurayo?

¹³ Nyemuse nangia guhe naayugo agu aKristano naadu mbata. Ya mo si adu fuyo taata i naayugo nyemuse? Oni berẽnga pa gu dungu ngbatunga aboro naadu rogo gu dungurati naadu Roma yo. Aguyo angia aYudo nga aguyo i asonosi yo i naamangapai kuti ga Moize aNdiko, na aguyo ki ngia aGendiria i asonosi yo na gu kura ngbatunga sino raka a kia. Si na wiraha wa, gu kura aKristano angia akanga, na agu akurayo kidu na ranirii​—si wa ka i ya agu akurayo angia abaira akanga. Waigu agi aKristano re aandu kindi kumbatayo kaa yugo nyemuse fu akurayo apai ki vura du tipa yo ni bakiakia vurũ? Gu mokedi nangia Pauro angarasi yo ‘i di akura yo ku gume.’ (Oni gedi ARomo 15:7.) Ginipai gipai re ayugoho? Gu fugo sa yo ho nga “di,” rogoyo nga ka diaboro esuesu wenengai watadu kafu riahe funi na wa ngbatunga pai wa ni ye ka sungo kpuro, watadu nidu dagba abakureamo. Ni kpiapai, gu mokedi nangia Pauro ape gupai fu Firemona nga ko di gu kanga “ku gume” nazubo nangia Onesimo. (Frm. 17) Na aPuriseka na Akuira adi Aporo kugume nga gu ko naadu na kina wiri bete inohe tipa gu pambori nga ga aKristano, i amangi gipai re ni ‘dia yo ko fuo yo.’ (Amo. 18:26) Agu aKristano re aambunga agu apai naadu tipa yo ni bakiakia tipa si kusi kpakarapai dagbayo te.

14. Waigu Anna na kumbari ayugo nyemuse?

¹⁴ Ani ima rengba ka yugo nyemuse fu awirinarani a nida ani ni abakureayo na kini di regbo na yo. Na gipai re dedede a na sayo tipa i yugu nyemuse furani. (2 Kor. 6:11-13) Oni bingo gu kpiapai nga ga Anna na kumbari. Ngbutuko tingbafuo i ndu tipa gayo sunge nga ga amokedi ku rogo gu papara Afirika du ku dioyo, gu ririkaza nga Korona atona. Mbiko ririkaza i aadunga na rengba ka manga dunguratise na awirina rogo dungurati te, na si aima kpakara fuyo tipa i ini awirina. Waigu ka agi arogotise re ayugu gayo nyemuse? I amangisunge na vidio tipa ka fura na awirinayo na i anaape gupai fuyo nga i na bakere nyemu ka ino yo gbe. Agu aborokporo i anaayamba yo re adu na bakere tambuahe tipa gu nyemuse agi amokedi re ayuguhe na dedede i anaayamba he a na kini keke apai fuyo. Tipagine agi amokedi re aasadi ka ino agu awirina ti ni nadu rogo gayo vovo dungurati? Anna aya, “Bangire ago nga ti agu awirina nayugu nyemuse fere na gaani aborokporo ti agu aregbo apai anidu na ani ni wenehe na ni gbegberẽhe te, gayo kpipai asa re mi yugu nyemuse.”

15. Ginipai ani awirikaha ti gu kpiapai nga ga Vanessa tipa yugo nyemuse fu awirina dunduko? (Oni bi sura a.)

¹⁵ Dungu rani rogo agu adungurati du na dungu  awirina rogoyo nga aguyo du apai tipa yo kia ti gaani na du asino yo ni bakiakia a. Ani ima rengba ka nyakasa gaani nyemuse tipa yo ni maa ani berãrani kuti wene asino yo. Wirina du rimori nga Vanessa nga gu ri naraka rogo gu ringara nga New Zealand, adu na kpakarapai tipa kadu na wene pagume dagba tiri na gu kura aboro rogo gari dungurati. Ono tie, ri ada kuti gupai nga, kuba gupai nga ka neka agu aboro asinoyo anaaba gberãrago ti ri, ri adiberã kaa dia bakere regbo na yo. Mangaha wo asa ri ri ini gupai Yekova akpinyemu yo ti ni. Ri aya: “Wa kumbami ada ni babi adungurati, ani nadia bakere regbo na dungu awirina nga aguyo du asinoyo ni bakiakia, na si fere taata tipa ani naamanga apai wa sa na yo. Mi ima kpinyemu wai du aboro ni bakiakia. Yekova ima kpinyemuhe a wo bambiko agu aboro nada ni airisiko apai tipa yo ni bakiakia.” Ho ani awirika wai ni ka bi aboro wa gu Yekova abi yo, ani nayugo gaani nyemuse tipa yo.​—2 Kor. 8:24.

16. Tipagine nyemuse nika du ti ni na nyanyakipaha ti regbo bakere gberãngbi? (Oni bi sura a.)

¹⁶ Si nika ida ani kpinyemu awirinarani ti regbo bakere gberãngbi. Ho bakere gberãngbi nika tona ni, waigu Yekova nika banda rani? Oni bingo gupai Yekova apehe fu gako aboro ti gu regbo i azubo gu Babera naadu mbata: “Oni yé, gimi aboro, oni rími ku rogo gaoni abambu, ki kisi gaoni angbadimo fuo roni, oni óko tironi ngbutuko toni daho pa imisiri ngbaduse ka susa ni.” (Yes. 26:20) Si nangera wa ani nika pekafuo kina ngbatunga gu rugapai re ti regbo bakere gberãngbi. “Gaoni abambu” ima rengba kadu nga gaani adungurati. Ti regbo bakere gberãngbi, Yekova nakidohe nga, ko nika banda rani ka ani aandu kindi kumbatayo kaa irisoko na awirinarani. Sidu tie, si naida ani mangi nyanyaki asadatise awere tipa kadu na dudunguro nyemuse koyo du awirinarani ni. Pa bata ani na ru kuriihe!

17. Ka ani mbakadi tirani awere, ginipai ani nika du na rengba ka mangaha ti regbo bakere gberãngbi?

¹⁷ “Gu bakere rago nga ga Yekova” nika du ni kpakarakpakaraha fu wiri aboro dunduko. (Zef. 1:14, 15) Ga Yekova aboro nika gbiatiyo agbia na akpakarapai a. Ono ka ani mbakadi tirani awere, ani nika du na rengba kadu zezeredi na ki undo kura aboro. Ani nika hi agu akpakarapai dunduko ani nika gbiatirani na ni. Ho awirinarani nikaa rungo ni, ani nika manga gupai rengbe omerani na ni tipa ka undo yo niyugo ani nunga na kini fu agu ahe fuyo du yo na zingoho. Na ka ani wiriki ka kpinyemu awirinarani awere, ani nika yugo nyemuse fuyo kumbatayo. Yekova nika fu gu mosoro furani nga ga nyenye unga rogo gu zegino agberãngo na arungosiro nikaa du nga rogoho ya.​—Yes. 65:17.