Buba angia bakumba rogo gu kanisa nangia United Church of Canada, sidu, rogo aposo dunduko, ko anaakeda re gbiati dawire tipa gu wirikapai naanidu fu agude kanisa yo rago Poso wiso. Na fuo gure, ti ndu uru 11 wiso, ani anaandu na ko ku kanisa yo tipa kpara fu Mbori. Tingbafuo bebere uru, ani anaandu na nina ku Bambu Kindo yo. Si aima du furani taata ani bi gu kparakparapai naadu dagba agu apambori naadu ue re.

Nina ape pa gupai ri aawirikaha rogo Baibiri yo fu wene abakureari nangia Bob na Marion Hutcheson, na i aima ye ki da ni aDezire Yekova kusa a. Rogo 1958 gu riikporo nga ga Hutchesons adi re gbiati awiriko biata ni akumbagude ani ndu tipa gu Bakere Dunguratise namangi New York City yo tipa auru muambe riihe adu nga Divine Will. Mi rugutire awere na gupai nga, si aadunga fuyo taata tipa i di re te, ono gu bakere dunguratise re nga gu bawenepai namangi bangire nikaa gonga ti ni ya.

Ho mi adu ni ni gude, ani anaaraka rogo gu ba i naabanda anya rogoho na mi aima gbia ngbarago ti ngerafuo anya. Mi atona ka berã gbe tipa wai ka wirikapai ka da ni gu boro nangerafuo anya. Nina agumba gipai re fu bakumba rogo dungurati. Ko atingidi re na gupai ngba wene gene nga, ani naraka rogo “kusa rago” na ko ki sana re tipa wai rengbe pa dia mi dungu agarã ku yunivasiti yo narengbe kadu na maapai kurii gimi  pagume na Yekova. (2 Tim. 3:1) Ni sangbanaha, mi adiberã ka zanga ndu ku yunivasiti yo.

Mi aabakabangire kindi tipa gupai mi nika mangaha tifuo mi nyasi sekonderi sukuru. Wa si avura du nga, mi anaandu gene tungusapai yo ti digido aposo dunduko, mi anaagbia nga ngbarago ti sunge tungusapai te na mi aabingo ho nga mi rengbe ka manga sunge abazakigene te. Ti kina gu bangisa regbo re, buba gbiati tameko nangianga aDezire Yekova ya, aangarasa re mi ndu kaa mangasunge ti aregbo dunduko rogo gu bakere basunge naadu Toronto yo. Tame buba adu na nyanyakipa bangiriba beko yo, sidu, mi aidi ka ndu ka manga gu sunge re.

Toronto yo, mi anaadia bakere regbo kuti sunge na kini kodi tire na agu aboro naangianga aDezire Yekova ya, na gipai re aká na mi ti nduge tipa adunguratise na ti tungusipai dedede. Ti tonatonaha, mi aaraka na tita nangianga Dezire Yekova ya, ono tifuo ko kpi, si aaida mi gbata gu kura ba kaa raka rogoho.

Agu aborokporo nga ga Hutchesons yo nga aguyo nandu na mi rogo 1958 tipa bakere dunguratise adu fere wakina avungure. I ayambu re mi naaraka kpuyo yo na i aundo re mi sono rogo toro yo. Rogo 1960, mi gbiati wiriyo nangia John azi bapatiza. John atona mangasunge abazakigene, nga gupai nangarasi re mi kiisi gimi tungusapai. Awirina rogo dungurati abi gupai nga, mi aima tona kaa nyaka rogo toro yo, na ni yangaraha, i amoi re ni bangere kurii Gu Sukuru Nga ga Siokrasia. a

Rogo 1966, mi amangi rogatise na Randi Berge, nangia zaaza nazakigene na ki ima du na bakere nyemu mangasunge rogo gu ba du na bakere zingo abatungusipai rogoho. Gaani babi rimbasa adungurati akpinyemu ka undo rani, na ko angarasi rani ani undo rogo gu dungurati naadu Orillia yo, Ontario yo. Sidu, ani aga ku rogo gu dungurati re ni basa.

Ni basa tifuo ani da Orillia yo, mi atona mangasunge abazakigene wa sa na Randi. Mi adu na bakere ngbarago wakina ri! Tingbafuo mi tona mangasunge nyanyaki kadu ni wene bazakigene, mi atona ka gbia gu ngbarago du ti mangasunge na Baibiri na kini bi aboro i ni girogoyo. Si adu ni bakere pa ngbarago ka undo wene  arogotise Orillia yo i mangi aariapai rogo gayo raka yo na ki da ni ga Yekova amoyambu.

Ho ani andu ni ku Toronto yo, mi agbia wiriba Arnold MacNamara nga gu wirina naangbe rogo apai yo Betere yo. Ko asana re singia ani rengbe ka mangasunge ni kparakpara abazakigene. Mi akaragapai ni basa nga: “Ii! Mi ima rengba ka ndu ku rogo ai ba, ono angianga Quebec yo ya!” Mi aima du na gu gbegberẽ bipai agu aboro naaraka rogo gu papara Canada naape pa-Ngirisi adu na ni tipa gu rago nga Quebec nga gu ba aboro aape Faransée rogoho. Ti gu regbo re, aboro aakura ku bangiri gene kaa yugo gayo gberãrago tipa airangbii na i kini idi gupai nga Quebec du ni ringara nisaha ti Canada.

Arnold akaragapai nga, “Quebec yo nga gu yangara ba be-basunge akeda kparakpara abazakigene ku rogoho ti gi regbo re.” Mi adiberã nibasa tipa ka ndu koyo. Mi aima ino gupai nga Randi aima du na nyemu ka ndu ka mangasunge yo. Kusa, mi aye ka rugatire na gupai nga, gipai re angia gu bawene diaberã kisusi ani amangihe rogo gaani raka yo!

Tifuo ani wiriki Faransée tipa aposo bisue, mi na Randi gbiati kura arogotise andu ku Rimouski yo, du baturoho nga akirometere 540 (amairo 336) du bangbanda nodiyo na uroyo Montreal yo. Dungu apai adu kinaho si aaida ani wirikihe, nga gu naima yugo tihe ti regbo dunguratise ho mi anaageda atingidapai ni. Mi agumba gupai nga rogo gu gaani bakere dunguratise naye kumbatayo, ani nika du na badungu “aboro nika ye nga asurutio” kuba gupai nga mi ya “nga aboro Austria.”

Ho ani adu ni Rimouski yo, wa ani adu biama, gu kura anakuparanga biama gbiati wiriba Huberdeaus gbiati awiriyo ni adegude ue aye fuo rani. Wiriba Huberdeaus gbiati diako atumo tipa bakere bambu na agu abazakigene dunduko naaraka yo aundo kaa fu marã tipa gu bambu re. Ani anaayambaha nga Pusi Bambu mbiko ngbadimo gu bambu re adu ni pusi he na anduhe kidu ni kina pusi he. Dedede, aboro anidu bangbanda 12 na 14 nanaaraka yo. Wa ani angia kparakpara abazakigene, mi na Randi anaatungusapai wiso, tifuo bebere uru, na nyemu, ani anidu na tambuahe ho boro anidu ni kinaho ni tipa ka gasa rani gene tungusapai yo​—zavura rogo agu anyemu rago anidu ni kere zezerehe rogoho.

Ani aima ye ka mbeda dagbarani gbe na gi ruru abazakigene re na i ki da furani wakina gaani aborokporo. Ti gu kura aregbo, ani anisungu pati we kina sa watadu ka manga riahe rogo gu kura uru kina sa. Gu kura wirina sa angia bayango, na arago aNzengu dunduko ani anaabi bia kini do gbere.

Dungu aboro Rimouski aima du na nyemu ka wirika Baibiri! Vuru agarã yo bisue, ani adu na gu ngbarago nga, ka bi dungu gaani abawiriki Baibiri i ni mangi sonakumbatayo ki da ti zio bapatiza. Na bange abatungusipai rogo dungurati asono ki da ti 35.

Ho ani adu ni Quebec yo, ani aima gbia wene rabahe nga ga abatungusi wene pangbanga. Ani aima bi wai Yekova aundo rani ti ngba sunge tungusapai na ki undo rani na gaani azingo nga ga borose. Kurigure, ani awiriki wai ka kpinyemu agu aboro naape Faransée, gayo fugo, gbiati gayo sino mangaapai​—si nasa gupai nga ani kpinyemu gu kura sino mangapai a.​—2 Kor. 6:13.

Be-basunge asana rani ni tunguotunguoho ani ndu ku rogo gu gbata nangia ga Tracadie, nga gu naadu ku uroyo New Brunswick yo. Gipai re aima du ni kpakarakpakaraha mbiko ani amoi fuo berani tipa ka tumo tipa bambu na ani aamangasunge yugopai tipa bete asaa rogo poso yo rogo kura sukuru. Na ku pati gure, gu kura gaani abawirikipai ada ni abatungusipai na ani aame Bambu Kindo.

 Rogo gu digido gu poso yo re dunduko ani amangi kparakpee kakaka tipa ka ga ku Tracadie yo na ani andu ka bihe, nga gu gbata naadu kia ti Rimouski. Ani adiberã nga wa duhe nga Yekova du naida ani du yo, ani nika ga aga koyo. Ani amoi Yekova kurogo asada na ani abi wai ko adi akpakarapai dunduko kusayo. (Mara. 3:10) Wa Randi adu na nyanyakipa gume dagbari na Yekova, ki mbu pa kura gari apai, na kini bi apai dunduko taata si asa gu nunguro re si du taata.

Bakumba adu sa rogo gaani vovo dungurati rimoko angia Robert Ross, i aamangasunge abazakigene na diako nangia Linda na tingbafuo vunga yo bambata wiriyo nga kumbagude, i adiberã ka nye kina yo. Wa si avura du nga i aangerafuo tooni wiriyo, i angarasi rani ni bakerehe bambiko i adi rani kugume na i adu zaaza gene tungusapai yo.

Tingbafuo ani mangisunge abazakigene Tracadie yo tipa agarã ue, ani agbia gu kura tunguotunguo yambahe berewe​—i ayambu rani tipa sunge biko adungurati. Ani amangisunge biko adungurati rogo gu dagbarago nangia ga pa-Ngirisi tipa agarã saba, tingbafuo gure, i akedi rani kurogo gu dagbarago nape Faransée Quebec yo. Gaani babi rimbasa adungurati Quebec yo, nangia Léonce Crépeault, anaatambua re tipa gimi agumbapai. Ono kusa, ko ani sana re nga, “Waigu rengbe gi gumbapai re gbe kadu rogo mangimangipai yo?” b Pa maa ko berãko fuore wa gure aundo re tipa mi sa gimi yugopai si du ni ndikidipai na ni taataha tipa aboro gi rogoyo.

Sunge sa dagba agu asunge nga gu mi amangihe nga gu mi atingidapaha kindi nga gu naadu rogo 1978 ti regbo gu bakere dunguratise nga ga aringara namangi Montreal yo rihe angia “Victorious Faith.” Mi aamangasunge ba riahe yo. Ani amaabangirani nga ani nika fu riahe fu aboro bangeyo adu nga 80,000, na si adu nga ani nika fu riahe fuyo ngba gu gene nga gu ani aamanganga ha mbata ya. Apai adu dunduko ni vovoho: agu ahe si adu nga ani nika mangasunge na ni, gu riahe si adu nga ani nika mangaha, na gu gene si adu nga ani nika mangaha ngbaha. Ani adu na kikindigi baigo ariahe 20, na ti kura aregbo si anaamanganga sunge te. Mbata fu gu bambata uru nga bakere dunguratise, ani aadunga na rengba ka rimo kurogo gu bangi ambaro re te da kina ku bebere yuru mbiko gu kura ambaro adu kinaho rogo gu uru nasusi. Na si aaida ani zaki ba faasa riahe ka manga gu riahe a nga ga wiso mbata fu uru kuru! Ani aima mbu, ono mi aima wirika dungu apai be agu awirina nafu tiyo na kini mangisunge nyanyaki, pa du yo nyanyaki rogo toro yo, na padu yo na ngbarago ti aregbo dunduko. Gaani  pagume aima du ni bawenehe, na si ki sa gupai nga ani da ni wene abakure da ku areme. Nairiwo gu pangbarago nangia ha re ka bi gi nyanyakipa pai nga ga bakere dunguratise Quebec yo re, nga gu dagbarago i aima soga rengo rogoho na kini rungosi aboro rogo agu agarã nangia 1940 kuti 1950!

Mi awiriki dungu apai be gu kura ababiapai ti regbo gu bakere dunguratise naadu Montreal yo re. Rogo gu kura garã sa, David Splane, nga gu ko namangasunge awere rogo Riigbu Bipasunge adu ni bangerekurii bakere dunguratise. Ti regbo gu kura bakere dunguratise sa naadu kusa, ho i asana re ni mi mangi gu sunge ko aamangaha, wiriba David aima songoda re.

Rogo 2011, tingbafuo ani gbia ngbarago ti sunge biko adunguratise tipa agarã 36, i ayambu re tipa mi ye kadu ni bayugupai rogo Gu Sukuru Du Tipa Abaakumba. Vuru agarã yo ue, mi na Randi api ri aba pigo ni bakiakia bangehe adu nga 75, na gipai re aima rẽ na pa agu apai ani ambupaha. Ti digido aposo dunduko, abaakumba anidu na tambuahe, bambiko i aima bihe nga Riigbu Bipasunge naberã padu abaakumba wenengai rogo toroyo.

Kusa, mi ayugupai rogo Gu Sukuru Du Tipa Abatungusipa Kindo. Dedede, agude sukuru anidu na bakere mbugo na bakere bakabangirise: bambiko i anaasungo tipa asaa saba rogo uru sa bawirikapai yo, na kini mangi agu asunge i anaafuhe fuyo tipa asaa biata rogo anyemu dunduko na kini mangi agu asunge nga ga sukuru biama watadu bisue rogo poso sa. Mi na gu kura bayugupai asaki gupai fuyo nga i arengbanga ka manga gipai re ngba gayo ome te, ono kina mbiko ga Yekova undo. Mi nikaa tingida gupai atingida kindi wai iriworago ati ti agude sukuru ka bi gupai nga mbiko kido yo kuti Yekova i aima du na rengba ka manga agu apai i aaberãha nga pa mangaha ima mbu fuyo.

Wa nina aayugo gupai nga ri naberã pa kura aboro aberã, si aundo gari abawiriki Baibiri tipa i mangi sonakumbatayo na si ki undo buba a tipa ko aria gako bipai tipa rengo. Auru biata tingbafuo nina kpi, kina iriworago naati tirani ka bi gupai nga buba aye tipa gumbapai gbaiga ku Bambu Kindo yo, na kini ndu kindi kumbatayo kaa ye tipa adunguratise tipa agarã 26. Wa vura duhe nga buba aaziongo bapatiza te, abaakumba ape gupai fere nga ko naaningia bambata boro ka da ba dunguratise yo na aposo du.

Nina namoi wene kpiapai fere na adawire. Adawire dunduko biata na akumbayo na iriso Yekova ni ruruyo. Adawire ue namangasunge abe-basunge yo​—gu kura ri namangasunge rogo gu be-basunge du Portugal yo na gu kura ri kini mangisunge rogo gu du Haiti yo.

Mi na Randi namangasunge ni kparakpara abazakigene Hamilton yo Ontario yo. Ho ani aamangasunge biko adungurati ni, ani anaagbia ngbarago ti ndu na kura awirina kaa manga karagatise fuo aboro, na kaa ndu fuo gayo abawiriki Baibiri. Ono awere ani na ngbarago ka bi wai gaani abawiriki Baibiri namangi sonakumbatayo. Na wa ani azio bakure na awirina rogo gaani vovo dungurati, ani nagbia ngarasaro ti wai Yekova aundo yo ti agu aregbo du ni wenehe na gbegberẽhe.

Ho ani angera ni kusayo ka bi wai gu kura aboro ayugu nyemupai koyo du ani ni, ani na bakere tambuahe tipa gipai re. Ani naasada ka yugo “nyaka” watadu berãpa kura aboro ni ngarasa ani yo tipa i da ti gayo asasa nga ga toro. (2 Kor. 7:6, 7) Ni kpiapai, rogo kura ngbadimo kporo sa, diakumba na awiri nga kumbagude na degude, adu ti sunge kindo ti aregbo dunduko. Mi asana kumbari singia ko berẽnga pa mangasunge abazakigene. Ko akaragapai ki ya ko naundo abazakigene biata. Sidu, mi asanako nga, “Ya mo mo rengbe ka undo yo susi wai Yekova narengbe ka undo yo?” Mi angarasi ko tipa ko gbia ngbarago kina wai i aagbia ngbarago. Adiwi sita kusa ko ada ni bazakigene.

Mi gbiati Randi nikaa ndu kindi kumbatayo kaa pepa ga Yekova “iiriwo mangaapai” “fu gu rika ngbatunga aboro nikaye,” na ani namaabangirani nga, i nika gbia ngbarago agbia ti mangasunge fu Yekova wa gu ani nagbiaha ni bakerehe.​—Tam. 71:17, 18.