Tifuo gu garã nangia 1940, avungu re aawirika Baibiri na aDezire Yekova. Wa vura duhe nga i aima mbu wirika Baibiri, nina anaandu kindi kumbatayo kaa roga agu amagazini nga Ngbaõbambu Sinziri na, Awake! tipa kaa gedaha. Rogo 1950 i amangi gu bakere dunguratise nga ga dungu aringara New York City yo, na gimi aborokporo aima ndu tipaha

Ngbutuko fuo gure, Wiriba Lawrence Jeffries atona ka ye kaa bi rani. Ko aˈasadi ka undo re mi wiriki rengo. Ti tonatonaha, mi aberẽ gupai nga si naida aDezire Yekova rimisi tiyo ku rogo agu apai nabipa birĩ-zogarago na kini mangisunge abanzengere, kuba gupai nga i kparatiyo ti agu apai nabipa birĩ-zogarago. Mi aya fuko wẽ ka si du nga aboro dunduko Amerika ane ká ka ndu tipa vura, avurarani ima rengba ka ye na ki di ringara naabaha. Wiriba Jeffries asakipai na mi rogo zerangbaduse yo nga: “Ginipai mo aberãha nga Yekova Mbori rengbe ka mangaha ka si dunga aboro dunduko Amerika ane nairiso kina ko sa na avurayo kini ye ka zubo yo?” Gako karagapai tipa gupai re gbiati gu kura apai aundo re mi bi gupai nga gimi bipai adu ni irairaha. Gipai re asa re mi du na bakere nyemu ka wirika gu rengo du rogo Baibiri yo.

Mi anadia dungu asaa kaa geda gu kuru amagazini nga Ngbaõbambu Sinziri na Awake! nga gu nina aigihe ku bambu igo ahe yo. Fuo bete regbo kusa, mi aini gupai nga mi aawirika rengo, sidu, mi aidi ka wirika Baibiri na Wiriba Jeffries. Mi atona kaa ndu tipa adunguratise a dedede. Mi aima kpinyemu gupai mi aawirikaha, na mi ada ni batungusipai nga ga wene pangbanga. Gimi asasa aˈariatihe ho mi agirogo gupai yo ni nga “gu bakere rago nga ga Yekova [adu] mbembedi.” (Zef. 1:14) Kuba gupai nga kaa maaberã re gbe tipa nduge gu yunivasiti yo, mi aaida ka undo aboro i wiriki gu rengo nga ga Baibiri.

Mi anyasi wirikapai nga ga sinia (secondaire) rogo Banzinga 13, 1956, na fuo agarã biata kusa, mi azi bapatiza  ti regbo bakere dunguratise nga ga uru sa. Mi aainongo ho ti gu regbo re nga mi nika gbia badungu weneapai be Yekova mbiko pa sia mi ka mangasunge na gimi raka ka wirika rengo na ka yugopai tipa Yekova fu kura aboro te.

Adiwi sita fuo zio mi bapatiza, mi ada ni bazakigene. Gu gaani Sunge Nga ga Kindo nangia ga Banduru 1956 adu na gu riipai rogoyo nga “Can You Serve Where the Need Is Great?” [Ya mo Mo Rengbe ka Mangasunge Rogo gu Ba du na Bakere Zingo Abatungusipai Rogoho?] Gu yambahe re aduadu fere a. Mi aaida ka undo rogo gu rago kina bete abatungusi wene pangbanga adu rogoyo.​—Mt. 24:14.

Mi aga ku Edgefield yo, South Carolina yo. Abatungusipai adu gbua biama rogo gu dungurati nadu yo re. Mi aye kadu nga namba bisue yo. Ani aamanga adunguratise ngbadimo kua kura wirina sa. Rogo adiwi dunduko, mi anaadia asaa nga 100 kuti ngba sunge tungusapai. Mi adu zaaza ka ngbembatayo rogo nungusa sunge tungusapai na kini mangi agumbapai ti regbo adungurati. Gu nangba gbe tie nga, kina wai mi aamanga gi sunge re ni bakerehe gbe kina wo a mi aawirikapai tipa Yekova ni bakerehe.

Dee sa ni dekurugbo nga guri mi awiriki Baibiri na ri adu na kporo beri nga gu i naakpara aboro rogoho Johnston yo, nga gu gbata du baturõ ho nga bete amairo gbua. Ri afu gu sunge fere boro amangaha tipa bete auru rogo poso yo na ri aidihe furani ani naamangasunge na kura tooni papara gari bambu ni gaani Bambu Kindo.

Wiriba Jolly Jeffries, nga wiri gu wirina nawiriki Baibiri na mi ayego ku Brooklyn yo, New York yo, na ko ada ni gi badiasunge nga ga abazakigene. Ani aaraka rogo wiri tooni bambu nga gu wirina afuhe furani.

I anaatumo rani na wiri tooni marã gbua South Carolina yo. I anaatumo rani na adorari ue watadu biata tipa gu sunge ani anaamanga ha rogo gu uru re. Ti kura regbo sa, mi amangisunge na gu yangara zau mara nadu bere ka ngbe bete riahe bambu bagaahe yo. Ho mi akuru ni, kumba aye fuo re na ki sana re nga: “Mo naida ka mangasunge? Mi nikaa tumo ro nga saa sa na dorari sa.” Ko afu sunge fere nga ga rame biata rogo gu ba i aame bambu rogoho. Si adu ziazia fere nga Yekova aaundo re mi naraka kina Edgefield yo. Wa si avura dunga mi aagbia wiri mara tooni, mi aima du na rengba ka ndu tipa gu bakere dunguratise nga ga dungu aringara namangi rogo 1958 New York City yo.

Rogo gu ue uru nangia ga bakere dunguratise, bawenepai amangi. Mi agbia Ruby Wadlington, nga guri naamangasunge ni nazakigene Gallatin yo, Tennessee yo. Bambiko ani dunduko ue aaida kadu nga amokedi, ani amangi gu dunguratise du tipa Girada ti regbo gu bakere dunguratise re. Kusa, ani atona kaa keka apai dagba tirani. Tifuo gure, i ayambu re ku Gallatin yo tipa mi mangi gumbapai. Mi amangisunge na gu momu re tipa ka sana ri tipa ani mangi rogatise. Fuo gure, mi aga kurogo ga Ruby dungurati na ani ki mangi rogatise rogo 1959.

Ho garãre adu ni nga 23, i asia re ni moyambu rogo dungurati (i ayamba ni awere nga barii gu rondo nga ga abaakumba) Gallatin yo. Gaani dungurati  nangia bambata dungurati Charles Thompson aye ka bihe ho i amoi ko ni ni babi adungurati. Ko aima du na bakere inohe; ono wa si avura du wo, ko aasana gi berãpai kindi tipa agu apai si aaidaha tipa awirina na wai kura ababi adungurati naangerafuo agu apai nga ga dungurati. Mi awiriki gupai beko nga si ni wenepai kaa sasanahe na ka ino agu arengo duho dunduko mbata fu diaberã.

Rogo Merekoko 1964, i ayambu re tipa Gu Sukuru Nga ga Sunge Kindo nga gu i amangihe South Lansing yo, New York yo, gu sukuru re anaadia diwi sa. Agu awirina naanungusa gi sukuru re asa re mi kpinyemu ka wirikapai ni bakerehe tipa Yekova na ka mbeda na ko.

Rogo Ngi 1965, be-basunge asana re mi du ni babi adungurati na kini ta na Ruby kaa bi adungurati. Gaani bambata dagbarago nga ga sunge biko adungurati adi bakere papara rago. Si atona Knoxville yo, Tennessee yo, ki mbedi ambeda ku Richmond yo, Virginia yo. Si aakoda agu adungurati naadu North Carolina yo, du Kentucky yo, na West Virginia yo. Mi aabiko kina agu adungurati sa nadu na bi aboro rogoho bambiko agu andiko nadu tipa kparakaro Amerika ku sudiyo aambunga gene fu bi aboro na pusi aboro i naamanga adunguratise sa te. Awirina aadunga na ahe beyo gbe te, na ani awiriki ka gamahe fu agu aboro nadu na zingo. Gu babi adungurati naaima ima kuti sunge biko adungurati ayugu nyanyakipa pai fere nga: “Mo du nga wirina. Ka mo ndunga ka bi dungurati mo kini mangi wa ka i ya mo nga baira agu aboro du rogo dungurati ya. Mo rengbe ka undo yo sa ka si du nga i ni kaa bi ro wa wirinayo.”

Ho ani andu ni ka bi kura tooni dungurati sa, Ruby atona wirika Baibiri na paranga degude garãri adu nga 17 naaima manga rogatise, na wiiri adu na garã ru sa. Ho boro aadunga ni rogo dungurati narengbe ka wirika Baibiri na ri ya, Ruby aawirikapai na ri nikeka awaraga rogo mail. Ho ani aye ni berewe ni uehe, gu degude re aaye tipa adunguratise naabaha. Ho i akedi kparakpara abazakigene ni ue nangia adee ku rogo gu dungurati re, i aandu kindi kumbatayo kaa wirika Baibiri na ri na si aaima nga te ri ki zi bapatiza. Fuo agarã biata bawe kusa rogo 1995, Patterson yo Betere yo, paranga wirina ni degude aye ka fura na Ruby. Ri angia wiri gu dee Ruby awiriki Baibiri na ri. Gu degude re gbiati kumbari angia agude rogo gu riko nangia namba 100 nga ga Girada.

Ani amangisunge biko adungurati berewe ni uehe Florida yo. Ti gi regbo re si aaida tarambiri du adu berani, sidu, ani angbe gu sa na ginoho kusende. Ono tie, rogo bambata poso, kura he sa rogo makana tarambiri akuo. Marã aadunga berani tipa ka mbakadaha te. Mi ayambu wirina nga gu ko mi aberẽ gupai nga ko aima rengba ka undo rani. Gu wirina re asana boro sa dagba gako aborosunge yo tipa ni mbakadi gu tarambiri re na ko aaidanga ani fu marã fuko tipa wa i ambakadihe te. Ko aya gbua we, “Si aidanga oni fu ai he fere te.” Zavura ko afu bete marã a furani ni gamahe! Gipai re angia bawene kpiapai nga ga wai Yekova angerafuo gako amoyambu. Ti atingidi rani na gupai nga si naida ani naagamahe fu kura aboro.

Ti agu aregbo dunduko ani anaabiko adungurati, ani anaasungo kina kua awirina yo. Ni sangbana gipai re, ani azi badungu wene abakure. Rogo kura uru sa, mi atona kaa kepai tipa gu fuo sunge nga ga dungurati, na mi ambu gupai re kina rii gimi tapurata kini mere. Ho mi ayego ni ku kporo yo rogo gu nyemu re, mi abi gupai nga wiri gu bairakporo re garã ko adu gbua biata anofodi gu tapurata re ki gbarasi apai naabaha si ki idi mi kehe berewe. Mi aba wia kuriko na paha tipa dungu agarã.

Rogo 1971, i akedi waraga fere na gupai nga i ima sia re tipa mi mangisunge ni babi rimbasa adungurati New York City yo. Gipai re aima zigbä rani! Ho ani aga ni ko yo, garã re adu gbua nga 34. Awirina adi re kugume, ni bambata gayo babi rimbasa adungurati nangia bi boro.

Wa mi angia babi rimbasa adungurati, mi aagbia ngbarago ti yugopai tipa Yekova ti digido aposo dunduko ti regbo bakere dunguratise. Badungu ababi adungurati adu na bakere inohe kisusi gu mi adu na ni. Gu ni sa dagbayo yo namangi gumbapai ti regbo gimi bapatiza. Kura wirina nga, Theodore Jaracz, ada kusa ni boro rogo Riigbu Bipasunge. Badungu awirina adu kina ho a nadu na inohe naamangasunge rogo gu Betere du Brooklyn yo. Mi adu na bakere tambuahe nga ababi adungurati gbiati aboro Betere asa apai si du fere taata. Mi nitire aima bi gupai nga agi awirina re angia agu ababi akandoro du na nyemuse nga aguyo a nakido kuti Fugo Mbori na kini songodi gako riigbu ni  ruruyo. Gayo umbasitise asaha taata fere tipa mi mangisunge babi rimbasa adungurati.

Rogo 1974 Riigbu Bipasunge asia kura badona nga ga ababi adungurati i mangisunge ni ababi rimbasa adungurati na si aaida mi mangisunge tigimi ni babi adungurati​—bara gere, South Carolina yo. Si adu ni pa ngbarago nga agu adungurati nangia ga pusi aboro na bibiri aboro aadunga berewe ni kparakakparakaha te, na awirina adu na bakere ngbarago tipa gupai re.

Ti digido gu garã nangia 1976, i asia re mi naabiko adungurati Georgia yo du bangbanda Atlanta na Columbus. Mi natingida gu regbo atingida mi amangi gumbapai tipa kangba agude bisue nangia awiri bi boro nga aguyo nakpiki ho boro azo kpuyo ni. Si aaida nayo ndu andu a ku bambungua yo mbiko ri aima gbia egiterẽ be we. Badungu awirina nga pusi yo na bibiri yo, aaye ku bambungua yo tipa kaa fu wasa fu avungu agi agude re. Mi abi gupai nga gu nyemuse nangia ga awirina aima du ni yuguyuguhe nzunzu. Ho ga Mbori amoyambu ayugo gi ngbatunga nunga re ni fu akurayo, si ima rengba ka sa gupai nga i hi kere kpakarakpakaraapai.

Rogo 1977, i ayambu rani ani ye ku rogo gu Betere du Brooklyn yo tipa bete adiwi ka undo na kura sunge. Ho gu sunge re aambeda ka nyasa ni, aboro Riigbu Bipasunge ue aye ka sana re singia ani na Ruby rengbe kadu na nyemu ka mangasunge Betere ane tipa kindi. Ani aima dia gu yambahe re kugume.

Tipa agarã 24, mi aima digo nimangi sunge rogo gu Gbuu Nga ga Sunge Tungusapai, dedede, mi anaaundo kaa karagapai kuti kpakarakpakara asanahe. Vuru gu dungu agarã yo susi, Riigbu Bipasunge ima fu arugapai nga gu du na ngbanya ringbisihe kuti gu abangua arengo nga ga Baibiri. Gipai re naundo gu Gbuu Nga ga Sunge Tungusapai tipa i naakaragapai kuti asanahe na i namangasunge a na ni tipa ka raba ababi adungurati, abaakumba, gbiati abazakigene. Gi ũsunge nga ga rabahe re ima undo badungu aboro i sono rogo toro yo. Gipai re tigaha ima nyakasa ga Yekova riigbu ni bawenehe.

Natona rogo 1995 kuti 2018, mi ata kaa biko dungu abe-basunge ni gu boro naarukuba rii-basunge i anaayamba ni ti gu regbo re nga babi abe-basunge. Mi agbia aboro Rondo nga ga Be Basunge yo, aboro Betere, gbiati amokedi tipa ka ngarasayo na ka undo yo na gayo akpakarapai. Na agu apangbanga awirina anaapeka ha furani na Ruby nga gu namangi yo si naangarasa rani dedede. Ni kpiapai, ani andu ku Rwanda yo rogo 2000. Pangbanga wai awirinarani gbiati agu aborokporo nga ga Betere yo abati ti gu kere regbo imo ngbatunga namangi rogo 1994 aima zio ngbadurani yo. Badungu aboro aima zanga gayo aboro. Zavura agu apai dunduko awirina ahihe re, i ayugu idapase, maabangirise, gbiati ngbarago.

Garã rani ima susa 80. Rogo agu agarã susi 20 re, mi ima mangasunge Amerika yo na Rondo nga ga Be Basunge. Mi aagbianga bakere wirikapai yunivasiti yo te; ono wa si avura du wo, mi ima gbia bawene wirikapai be Yekova na gako riigbu. Gipai re ima mbakada re mi yugu agu arengo nga ga Baibiri fu kura aboro nga gu rengbe ka undo yo nyeanye kindi. (2 Kor. 3:5; 2 Tim. 2:2) Mi ima bi wai gu pangbanga nga ga Baibiri naundo aboro i mbakadi gayo gene raka na ki sonosi wene pagume dagbayo na Bakusiyo. (Yak. 4:8) Ho rengba nidu ni berani, Ruby gbiati re ani ninaandu kindi kumbatayo kaa ngarasa aboro i naabi gu momu nga kaa wirikapai tipa Yekova na kaa yugo agu arengo nga ga Baibiri fu kura aboro na nyanyaki paha​—nga gu bakerepa momu rengbe ga Yekova moyambu ka gbia ngbarago ti mangaha!