Oni bingo wai Ziazia Kekeapai akaragapai kuti agu asanahe re.

Amokedi 24:15 nagumba gupai furani tipa zingabekpio nga, ‘ruru aboro azinga be kpio na iraira yo a.’ Ruru aboro nga agu aboro naima giasangba Mbori mbata fu i kpiki, sidu, i aima ke arimoyo ku rogo kitabu unga. (Mara. 3:16) Iraira aboro nakoda agu aboro nakpiki zanga i du na momu ka wirikapai tipa Yekova, sidu, i aakenga arimoyo ku rogo kitabu ungayo te.

Yoane 5:28, 29 nafura kina tipa gu bangisa badona aboro ue i nape payo rogo Amokedi 24:15. Yesu ape gupai nga ‘agu aboro nanamanga wenepai’ nika gbia ‘gu zingabekpio nga ga unga; agu yo nanamanga gbegberẽpai, sa gu zingabekpio nga ga sapangbanga.’ Ruru aboro amangi weneapai mbata fu i kpiki. I nika zingisayo ku rogo gu zingabekpio nga ga unga mbiko arimoyo nika du kindi ni kekehe rogo kitabu unga. Ono tie, iraira aboro aamanga gbegberẽ apai mbata fu i kpiki. I nika kura sa gu zingabekpio nga ga sapangbanga. Arimoyo aadunga kindi ni kekehe rogo kitabu unga yo te, na i nikaa raka ti gu regbo i nikaa wisigo gayo mangaapai sirisiri watadu i nika asada gayo mangaapai. Ti gu regbo re, i nika du na momu ka wirikapai tipa Yekova na si ki idi i ke arimoyo ku rogo kitabu unga yo.

Yugoti 20:12, 13 nasaka gupai nga agu aboro dunduko i nika zingisayo be kpio, si nikaa i da i gisangba “agu apai du ni keke he rogo akitabu,” nga gu Mbori nika fuhe furani rogo vovo zegino. Yekova nika gbarasa agu aboro agianga sangba ya.​—Yes. 65:20.

Daniere 12:2 agumba gupai kumbatayo nga agu aboro nara awere rogo kpio yo nika zinga be kpio “agu yo sa nyenye unga, agu yo sa nyenye wasiro.” Gi veresi re nafura tipa gu yangarapai nika manga agu aboro nika zingabekpio, i nika gbia singia​—‘nyenye unga’ watadu ‘nyenye wasiro.’ Sidu, ti digido agarã 1,000, gu kura aboro nika gbia nyenye unga na i ki gbarasi agu akurayo nyeanye kindi.​—Yugo. 20:15; 21:3, 4.

Oni bingo kpiapai. I rengbe ka ringbisa agu apai du tipa agu abadona aboro ue i nika zingisayo be kpio kuti agu ayeaye naida ka raka rogo kura ringara. Ruru aboro wakina agu aboro nagbia gu waraga nga ga ayeaye be irangbii nga gu du tipa mangasunge watadu gu du tipa gupai nga aboro ini yo aino na i kidu na bete ranirii. Ono iraira aboro tigayo wakina agu ayeaye na gbia gu waraga rimo ku rogo kura ringara du tipa raka rogo gu ringara re tipa wiri guru regbo watadu gu du tipa agu aboro nata ka bi ringara. Si naida ngbatunga agu ayeaye re yuguhe nga i ima rẽ ka rimo ku rogo kura ringara mbata fu i mbu yo i tona raka rogo vovo ringara. Wakina gu re a, si nika ida iraira aboro gisangba ga Yekova andiko na ki yuguhe nga i ni ruruyo tipa wa ka i nye rogo Paradizo. Na ka si vura du nga ayeaye gbia kina gini ngbatunga waraga rimo ku rogo kura ringara, agu akurayo ima rengba ka gbia gu waraga naida na gupai nga i raki rogo gu ringara re, ka aguyo agbianga ha ya na i ki do yo kusayo rogo gu ringara re. Mburu gu yangara diaberã i nika mangaha tipa yo nika ru rii gayo asino gbiati mangaapai rogo vovo ringara. Wakina gure a, gu yangara sapangbanga nika du tipa agu aboro dunduko i nika zingisayo be kpio nika ru riipa gayo padu niruruse gbiati gayo mangaapai rogo vovo zegino.

Anga Yekova sa nga kina Mbori nyemuse te, ono ko a nga Mbori ruru sarangbanga. (Pa Rug. 32:4; Tam. 33:5) Ko nika yugo gako nyemuse ni zingisa ko gu badona aboro ue re be kpio nga ruru aboro na iraira yo. Ono ko nikaa ida gupai nga i dunduko mangipai kuti gu gako arugute du tipa rurupai na irairapai. Kina agu aboro nika kpinyemu ko na kini raki ringbisihe kuti gako arugute i i nika mbuyo i naandu kindi kumbatayo kaa raka nyeanye kindi rogo vovo zegino.