Ringbisihe kuti 1 AKorindo 15:8, Pauro aya: “Ti yangara ha dunduko ko ayugu tiko fere wa fu gu boro i avunga nga ni ti rago vunga ya.” Mbata kusayo, ani asaki gupai nga, Pauro aafura kina tipa agu apai namangi ko ho ko abi Yesu ni rogo taarimo ngbangbaturũ yo rogo yuguyugupai. Si adu wa ka i ya i fu gu taarimo fuko du wa i vunguko avunga, watadu i zingisi ko be kpio ku rogo gu raka nga ga toro nga gu naadu mbata fu regboho, mbu dungu akutu agarã kumbatayo mbata fu ngbatunga gu zingabekpio re tona manga. Ono tifuo wisigo ani gi veresi re ni bakerehe, si rẽarẽ ani mangi ariapai ti wai ani agi rogo gi veresi yo re.

Si ni rengo nga Pauro aafura ane tipa gupai namangi ho ko asa tiko ni. Ono ginipai ko aaida ka gumbaha ho ko aya ni ‘i avunga nga ko ti rago vunga’ te? Dungu nduapai kinaho.

Ko asa tiko ni kina wiri ipo na ni gupai naaima iriwo. Gu boro i naavunga ni mbata fu gani regbo, si naamanga ni tunguotunguoho. Wa Saura (aboro aye ka ino ko kusa nga Pauro) aandu ku Damaseke yo tipa ka rungosi aKristano yo, ko aainongo ho nga ko nika bi yuguyugupai nga ga Yesu naaima zingabekpio te. Ga Pauro satise adu ni tunguotunguoho angianga fu kina ko ya, ono fu agu aKristano a ko aaida ka ndu ka rungosi yo rogo gu gbata re. Kurigure, gipai namangi re aima du ni iiriwoho si ki sa gupai nga ko da ni iravurari tipa bete regbo.​—Amo. 9:1-9, 17-19.

Ko amangi satise ti “gbegberẽ regbo.” Gu ndikidi pa-Giriki i asaha nga “gu boro i avunga nga ni ti rago vunga ya” i ima rengba ka saha a nga “gu boro i avunga ni ti gbegberẽ regbo.” Gu Baibiri nga The Jerusalem Bible moihe ngba gi gene re: “Si wa ka i ya i avungure ti gu regbo boro aainongo ho ya i nika vunga re ya.” Ti gu regbo Pauro amangi satise, Yesu aima karagatiko ti gu regbo re ku ngbangbaturũ yo. Pauro aadunga wa agu aboro ko afura tipa yo rogo agu averesi du kusayo te, ko aabingo Yesu fuo zinga ko be kpio mbata fu ko ga ku ngbangbaturũ yo te. (1 Kor. 15:4-8) Wai Yesu akuru fu Pauro ni tunguotunguoho afu momu fu Pauro tipa ko bi Yesu tifuo ko zingi be kpio, wa vura duhe wa si aangera wa gupai namangi ti “gbegberẽ regbo.”

Ko aafura tipa tiko ngba wene gene. Ringbisihe kuti kura bawene abawirikipai, agu afugo Pauro amangi sunge na ni ane ima rengba kadu wa afugo bisirahe. Ka si du nga si du nga gupai naadu berã Pauro yo, ko aabihe nga ko arẽnga kadu ni mokedi te. Ni rengo, ko andu kumbatayo ki ya: “Bambiko mi nga gu umba ni dagba amokedi yo dunduko, arengba nga na gu rimo nga mokedi ya, bambiko mi arungosi ga Mbori kanisa. Ono be gu undahe nga ga Mbori mi du wa du mi.”​—1 Kor. 15: 9, 10.

Sidu, si nawira gupai nga Pauro aafura tipa gu regbo Yesu akuru ti ni fuko ni tunguotunguoho ti gu regbo ko amangi satise, watadu ko abihe nga ko aarẽnga na ngbatunga gu iiriwo yuguyugupai re te. Ka si vura du nga kina ginipai naadu, gipai naamangi re aima du na nyanyakipaha fu Pauro. Si ayugu gupai fuko zanga kapa nga i aima zingisa Yesu be kpio. Si airiwongo te nga, ko anaafura tipa gupai namangi ko re ho ko anaatungusapai ni fu kura aboro tipa ga Yesu zingabekpio.​—Amo. 22:6-11; 26:13-18.