1. Gamo raka adu wai mbata fu mo tona wirika Baibiri?

 GAMO raka adu wai mbata fu mo tona wirika Baibiri na aDezire Yekova? Badungu rani akpingo nyemu kaa berãkuriipa wai si adu te. Si nawiraha wa gupai zegino abihe nga si nga ruruhe na gu nga irairaha naadu na maapai kurii gaani mangaapai na asino. Ka singia wo si adu, ani “adu nga na maabangirise te, ki zanga Mbori zegino.” (Ef. 2:12) Ono fuo tona ani wirika Baibiri, gaani gene raka aˈariatihe!

2. Ginipai namangi tifuo mo tona wirika Baibiri?

² Fuo tona mo wirika Baibiri, mo aini gupai nga, Bamo kinaho du ngbangbaturũ yo nga guko naima kpinyemu ro ni bakerehe gbe. Mo abi gupai nga, ka mo aaida ka sa ngbarago ti Yekova na ki da ni papara gako aborokporo nga airisiko, si naida mo mangi bakere aariapai ti gamo gene raka, gamo bipai, na gamo aberãpai. Mo aima wirika wai ka manga gupai Yekova aya si du ni ruruhe na ki ne gu ko aya si du ni irairaha.​—Ef. 5:3-5.

3. Ringbisihe kuti AKorosaio 3:9, 10, ginipai Yekova aida ani mangihe, na gini apai ani nika sakapai tipaha rogo gi kekeapai re?

³ Yekova nga Bakusirani na ni gu Barani du ngbangbaturũ yo, sidu, ko na kina rengo beko ka diaberã tipa wai si aida gu gako aborokporo nga airisiko naamangaapai. Na ko naida gupai nga mbata fu ani zi bapatiza, si naida ani mangi nyanyaki asadatise tipa ka ‘mbu kuru borose, na gaha mangaapai.’ * (Oni gedi AKorosaio 3:9, 10.) Gi kekeapai re nika undo agu aboro naida ka zio bapatiza i karagapai kuti asanahe biata: (1) Ginihe nga ‘kuru borose’? (2) Tipagine Yekova aida ani uruhe ti ni? (3) Waigu rengbe ani ka ura ha? Tipa agurani naima zio bapatiza, gi kekeapai re nika undo rani ka ani mbunga  agu asino nga ga kuru borose si karagatihe berewe ya.

4. Waigu boro amangapai ho du ni ni na ‘kuru borose’?

⁴ Gu boro du ‘kuru borose’ na maapai kurii ni, ni naberã na kini mangipai dedede rogo gu gene nga ga borose. Ni ima rengba kadu ni boro gbangbati, kini zingi niipo, kidu zanga tambuahe, na ni irarukö. Ni ima rengba kaa gbia ngbarago ti bi kpia kundiri aboro watadu kaa gbia ngbarago ti bi agu avidio du na wasiwasi mangaapai rogoho watadu du na zuu rogoho. Zanga kapa, ni na kina kura wene asino ti ni, na ni ima rengba kadu na gberãrago tipa gu gbegberẽ apai ni apehe watadu ni amangaha. Ono gani nyemupai anyakanga gbe tipa ni mangi ariapai ti gani berã na mangaapai te.​—Gara. 5:19-21; 2 Tim. 3:2-5.

5. Gini ruru bipai si aida ani du na ni nibipa ura kuru borose kusayo? (Amokedi 3:19)

⁵ Ani nga kpakpa aboro, sidu, boro ho dagbarani yo rengbe ka dia gbegberẽ aberã gbiati gbegberẽ nyemuapai dunduko kusayo ngbadu ni yo na rogo gani aberã te. Ti kura aregbo, ani nika manga gupai amanga watadu ka pe gupai ani nika biratirani tipaha. (Yere. 17:9; Yak. 3:2) Ono ho ani aura kuru borose ni kusayo, agu asino na mangaapai nga ga borose adunga berewe na maapai kurirani te. Ani nada ni kura ngbatunga aboro kia.​—Yes. 55:7; oni gedi Amokedi 3:19.

6. Tipagine Yekova aida ti ni ani mbu gu iraira aberã gbiati gbegberẽ mangaapai nga ga kuru borose?

⁶ Yekova naida gupai nga ani mbu iraira aberã na gbegberẽ mangaapai mbiko ko ima kpinyemu rani ni bakerehe gbe na ko naida ani gbia ngbarago ti raka. (Yes. 48:17, 18) Ko ima ino gupai nga, agu aboro asonga vura kuti iraira nyemuapai ya, naimisa tiyo gbiati agu aboro du pati yo. Ko na gberãrago ka birani ani niimisi tirani gbiati kura aboro.

7. Ringbisihe kuti ARomo 12:1, 2, gini asiapai du berani?

⁷ Kura abakurearani gbiati gaani aborokporo ima rengba kaa sawia rani ti tonatonaha mbiko ani naasada ka manga aariapai ti gaani asino. (1 Pet. 4:3, 4) I ima rengba ka pe gupai nga, ani na kina rengo berani ka manga ai gupai ani aida ka mangaha na si aidanga ani mbu kura aboro i pe gupai furani si aida ani mangihe te. Ono agu aboro naká ga Yekova arugute nzunzu ngbariyo te. Ka pe guhe nga rengo, i  nambu gu zegino du Satana kuriihe si du naa maapai kurii yo. (Oni gedi ARomo 12:1, 2.) Ani dunduko si aida ani mangi siapai: Singia ani naida ka mbu gu kuru borose nga gu ingaapai gbiati ga Satana zegino amehe, watadu ani nika mbu Yekova ko aria rani ku rogo gu ngbatunga aboro ngba kisusi ti gi regbo re.​—Yes. 64:8.

8. Ginipai nika undo rani ani ne iraira aberã na gbegberẽ mangaapai?

⁸ Yekova ima ino gupai nga si nika dia regbo adia gbiati asadatise tipa ani ne iraira aberã na gbegberẽ mangaapai. (Tam. 103:13, 14) Ono tie, Yekova nafu gu tatamana, ome, gbiati undo ani aidaha tipa ani mangi ariapai vurube Fugoko, gako toro, gbiati gako riigbu. Zanga kapa ko ima undo roni. Ani wisigingo bete agu apai awere rengbe oni ka mangaha tipa ka mbu kuru borose na ki rẽ tipa zio bapatiza.

9. Ginipai rengbe Fugo Mbori ka undo ro mo mangihe?

⁹ Mo mangisunge na Baibiri tipa ka wisigo tiro wenengai. Fugo Mbori wakina bitirobi, si naundo ro mo wisigipa gu gene mo aberã, kini fura, na kini mangipai ngbaha. (Yak. 1:22-25) Gamo bayugu Baibiri gbiati kura nyanyaki aKristano ima rengba ka fu arugute foro. Ni kpiapai, i ima rengba ka mangasunge na Ziazia Kekeapai tipa ka undo ro mo inipa agu apai nyaki mo rogoho na gamo arungbura. I ima rengba ka yugo wai foro rengbe mo ka gbia agu apangbanga du mburuhe rii Baibiri nga gu nafu wene arugute tipa wai rengbe mo ka mbu gamo gbegberẽ mangaapai. Na Yekova ti aregbo dunduko regerege tipa ka undo ro. Ko nga gu wene boro nzunzu rengbe ka undo ro mbiko ko ima ino gupai du ngbaduroyo. (Snz. 14:10; 15:11) Sidu, mo saha ni sinoro kaa manga kparakpee fuko na kini wisigi Fugoko na auru dũ.

10. Ginipai mo nawirikihe ti ga Elie kpiapai?

¹⁰ Mo du na gu kido nga ga Yekova arugute ngba kisusi. Ani ima rengba ka gbia undo ti agu apai dunduko Yekova asana rani ani mangihe. Agu aboro naraka kuti ga Yekova arugute nadu na ruru bipai tipa tiyo, gayo raka kidu na rogoyo ti ni, na i kidu na ndikidi ngbarago. (Tam. 19:7-11) Ono tie, agu aboro naká ga Yekova arugute nambu be sangbana agu apai naye ti manga agu apai nga ga borose. Oni bingo gupai gu kumba du rimoko nga Elie apehe tipa ká ga Mbori arugute. Avunguko nasonosi ko aima kpinyemu Yekova. Ono ho Elie aasona ni, ko asia kaa koda tiko na gbegberẽ abakure. Ko atona dia kere angua kutii kpotoko yo, kini raki wasiwasi raka, na kini dĩ he. Elie ape gupai nga ko aada nikere boro zinga na ni boro zuu. Ko aya, “Mi aamanga agu apai dunduko nga gu i ayuguhe fere nga gu si aidanga Kristano mangihe ya.” Ono tie, bangiri Elie aagonga ti agu apai ko awirikihe mbuko ni gude te. Ni yangaraha, ko atona wirika Baibiri berewe. Ko amangi nyanyaki asadatise tipa ka mbu gako gbegberẽ mangaapai na ko ki zi bapatiza rogo 2000. Waigu raka kuti ga Yekova arugute naundo ko? Elie aya: “Mi awere na zereda nga ga berãse yo gbiati gigiri sangbakpotoseyo.” * Ga Elie kpiapai nayugo gupai furani nga, agu aboro naká ga Yekova arugute naimisa kina tiyo. Na wa vura duhe wo, Yekova na kina nyemu ka undo yo i mangi aariapai.

11. Gini apai Yekova asogaha?

¹¹ Mo wiriki wai ka soga agu apai Yekova asogaha. (Tam. 97:10) Baibiri nape gupai nga Yekova nasoga “ngera ruka, na gu mirãse nare zire, gu be nauka kure boro wenesa.” (Snz. 6:16, 17) Na ko “nasoga abaimiaboro na airanangahe a.” (Tam. 5:6) Yekova ima soga gi gbegberẽ  asino na mangaapai re nikerehe, si nasa gupai nga ko gbarasi gu gbegberẽ aboro dunduko naadu ti rago Noa mbiko i aima hiiso kpotosende na zuu. (Bam. P. 6:13) Oni bingo kura kpiapai. Ti regbo gu nebi nangia Maraki, Yekova ape gupai nga ko ima soga agu aboro naataburõ tipa ka mbu adiayo. Mbori aima ká gayo iriso na ko nika sapangbanga yo asapa tipa gayo mangaapai.​—Mara. 2:13-16; Eb. 13:4.

12. Ginipai pa ‘né gu pai nga gbegberẽpai’ ayugoho?

¹² Yekova naida gupai nga, ani “né gu pai ane nga gbegberẽpai.” (Rom. 12:9) Gu fugo nga ka “né,” si nayugo pa nyanyaki zahe; si nayugo gupai nga ka soga he ni kerehe gbe na kini bihe ni kere gbegberẽhe. Mo berẽnga pa wai rengbe mo kadu ka boro ya foro mo ri zirĩ riahe. Berãpa gupai nga ka ri zirĩhe ima rengba ka sa ro mo du wa mo na woka awoka. Wakina gure a, si naida berãpa manga gupai Yekova aya si ni gbegberẽhe du ni kere gbegberẽhe furani.

13. Tipagine si aida ani banda gaani aberã ti ni?

¹³ Mo banda gamo aberã. Gaani aberã na maapai kurii gaani mangaapai. Si du Yesu ayugupai ti ni furani ani ká agu aberã rengbe ka sarani ani mangi kere ingaapai. (Mt. 5:21, 22, 28, 29) Ni rengo, ani naida ka fu ngbarago fu gu Barani du ngbangbaturũ yo. Sidu tie, si ni nyanyakipaha furani ani ká ai gu gbegberẽ aberã rengbe ka ye ku berãrani yo!

14. Ginipai gaani afugo ayugoho tipa rani, na gini asanahe si aida ani karagapai kutini?

¹⁴ Mo du na zatise rogo gamo afugoyo. Yesu aya: “Agu ahe nakura ngba yo, si naenga kpoto yo.” (Mt. 15:18) Ni rengo, gaani afugo nayugo badungu apai tipa gu ngbatunga aboro nga ani kpotorani yo. Sidu, mo sana tiro na agi asanahe re: ‘Ya mo mi naaká ka gumba ziree ka si vura du vurũ nga gumba rengo ima rengba ka ye na kpakarapai fere? Wangia mi rogotise, ya mo mi na rubangirise ka zanga ba nyemu re ti gu boro angianga gimi badiarogatise ya? Ya mo mi naane wasiwasi afugo dunduko? Ya mo mi naakaragapai ngba zezeredi gene ho boro naba gberãrago ni tire?’ Si nika du foro nipa undo ka mo berẽ wenengai kurii agu asanahe re. I rengbe a ka ringbisa gamo afugo kuti rukutu agire ti roko. Kina wai rukutu agire azio roko si du kina sa, kinawo a gbegberẽ afugo azio kuru borose kina sa, sidu, ka ani aaida ka mbu kuru borose, si naida ani mbu gumba gbegberẽ afugo, ziree, gbiati wasiwasi afugo.

15. Ginipai pa banga ani kuru borose kuti “ngbunduru ngua” ayugoho?

 ¹⁵ Mo du na nyemu ka manga ai gupai si aidaha. Gu mokedi nangia Pauro amangisunge na kpiapai tipa ka yugo gupai nga si ni nyanyakipa pai furani ani aria gaani gene raka. Ko ake gupai nga, ani du wa ka ani banga gaani kuru borose kuti “ngbunduru ngua.” (Rom. 6:6, NW) Yesu aima du na nyemu i banga ko kuti ngbunduru ngua tipa ka sa ngbarago ti Yekova. Wakina gure a, tipa ani sa ngbarago ti Yekova, si naida ani du na nyemu ka mbu agu asino na mangaapai nga gu naba gberãrago ti ko. Si naida ani mangi agi apai re tipa kadu na gigiri sangbakpotoseyo gbiati gu maabangirise nga ga gbia ngbarago ti raka nyeanye kindi. (Yo. 17:3; 1 Pet. 3:21) Si naida ani tingidi gupai nga, ka Yekova arianga gako arugute tipa ka sa ngbarago tirani te. Kuba gure, si naida ani mangi ariapai ti gu ngbatunga aboro nga ani na ki pekefuo gako arugute.​—Yes. 1:16-18; 55:9.

16. Tipagine si aida mo diberã ti ni kaa ndu kindi kumbatayo kaa sovura kuti agu arungbura nga ga borose?

¹⁶ Mo naandu kindi kumbatayo kaa sovura kuti agu arungbura nga ga borose. Zavura tifuo mo zi bapatiza, si nikaa ida mo naandu kindi kumbatayo kaa sovura kuti gu nyemuapai nga ga borose. Oni berẽnga pa gu kpiapai nga ga gu kumba du rimoko nga Maurício. Ho ko adu ni ni paranga, ko atona kaa raka gu raka nga ga kodaba na akurako akumba. Ni yangaraha, ko agbia ga Yekova aboro na ko ki tona wirika Baibiri. Fuo ko mangi aˈariapai rogo gako raka yo, ko azi bapatiza rogo 2002. Wa vura duhe nga Maurício ima iriso Yekova awere tipa dungu agarã, ko aya: “Ni rengo, si naaida aida mi naasovura kuti iraira nyemuapai ti kura aregbo.” Ko ambunga gipai re si fu gberãrago fuko te. Kuba gure, ko aya: “Mi naagbia wasa mbiko mi naasia ka zanga mangapai kuti gu nyemuapai re, tipa ka sa ngbarago ti Yekova.” *

17. Ginipai bi moho nipa ngarasaro nibi gu kpiapai nga ga Nabiha?

¹⁷ Mo kpari tipa ga Yekova undo, na ki kido kuti gako toro, angianga kuti kina gamo ome ya. (Gara. 5:22; Frp. 4:6) Si naida ani mangi nyanyaki asadatise kaa ani aaida ka ura kuru borose kusayo na ki zanga voho berewe. Oni bingo gu kpiapai nga ga gu dee du rimo ri nga  Nabiha. Ba ri ambu ri ho garã ri adu ni gbua sita. Ri aya, “Si aima ye na bakere imisiri fere.” Wa Nabiha aasona, ri ada ni gu boro nanaazinga ni kerehe na ngbaduri kini imi nika boro ipo. Ri atona baga kere angua i ki zi ri ku bambukiso yo na ri ki di bete agarã yo. Agu aDezire Yekova nanaandu ku rogo gu bambukiso re atona wirika Baibiri na ri. Nabiha atona manga bakere aariapai. Ri aya, “Si adu fere taata mi mbu kura gimi gbegberẽ mangaapai. Ono si aima du ni kere kpakarakpakaraha ka mbu vu gundö.” Nabiha asota tipa garã naima susa sa na ni yangaraha, ri ambu vu gundö. Waigu ri amangi gipai re? Ri aya, “Gupai paha anyaki gbe angia manga kparakpee fu Yekova dedede, si naundo re mi mbu vu gundö.” Ri naape gupai fu kura aboro awere nga: “Ka si du nga mi amangi aariapai tipa ka sa ngbarago ti Yekova, ai boro rengbe ka mangaha!” *

18. Ringbisihe kuti 1 AKorindo 6:9-11, ginipai dungu ga Mbori amoyambu niidu na rengba ka mangaha?

¹⁸ Rogo bambata sa kama agarã, gu kura aboro nga aguyo Yekova asiayo tipa i zogorago na Kristo anaamanga kere gbegberẽ apai amanga mbata. Ni kpiapai, i aningia airabäri, akumba kini kodiba na akurayo watadu adee na akurayo, na i ki ngia airadĩ. Ono tie, mbiko gu undo nga ga ga Mbori ziazia toro, i aima du na rengba ka aria gayo asino. (Oni gedi 1 AKorindo 6:9-11.) Wakina gure a, Baibiri ima undo amirioni aboro tipa i mangi aariapai rogo gayo raka yo. * I ima mbu gbegberẽ mangaapai. Gayo kpiapai nayugo gupai nga, mo a ima rengba ka manga aariapai ti gamo asino na ki di be gbegberẽ mangaapai tipa wa ka mo rẽ tipa bapatiza.

19. Ginipai gu kekeapai ngbefuo gere nika sakapai tipaha?

¹⁹ Kurii gu nga ka ura kuru borose kusayo, si naida agu aboro naida ka zio bapatiza mangi nyanyaki asadatise tipa ka ukadi vovo borose. Gu kekeapai ngbefuo gere nika undo rani tipa wai rengbe ani ka manga gipai re na wai rengbe kura aboro ka undo rani.