Tipagine gu kumba i ayambu ko nga “Ako nda” ape gupai ti ni nga ka ko di Ruta si nika “gbarasa pa” gako ũkumbo? (Ruta 4:1, 6)

▪ Ti agu aregbo i ake Baibiri ti ni, ka si anidu nga kumba anikpi zanga i vungu gude fuko, asanahe kinaho si anaida i karagapai kutini: Ginipai nika manga tipa agu ahe naadu beni? Gere nga ngbatunga ko nika inga nyeanye kindi? Ga Moize aNdiko aima karagapai kuti agu asanahe re.

Ginipai naanimangi tipa gu rago nga ga gu kumba naani kpi watadu naanida ni irarungo na niki bagi gani rago? Wirinani watadu mbembedi gumeni anirengbe ka tumo watadu ka ngbe gu rago re. Sidu, gu rago re anirengbe kadu kindi kina ku be agumeni.​—Pa Mot. 25:23-28; Geda 27:8-11.

Waigu gipai re anirengbe ka sa gupai nga ka rimo gu kumba nakpi re gbandaka nga ya? Si aima rengba ka ndu kumbatayo mbiko sino aboro angia kaa roga adekurugbo agu agumeyo kpiki zanga vunga agunde tipa ka zugosi ngbatungayo a wa si adu tipa Ruta. Kumba anirengbe ka dia dekurugbo unvurako watadu tameko tipa ka vungu agude tipa rimo ni naandu kindi kumbatayo na i ki di gaani ahe. Gi wene mbakadapai re anaasa gupai nga i nangerafuo adekurugbo a.​—Pa Rug. 25:5-7; Mt. 22:23-28.

Oni bingo gu kpiapai naadu tipa Naomi. Ri adi kumba rimoko angia Erimereke. Ho ko gbiati awiriko ue akpi ni, kumba aadunga ho rogo gari ngbadimo kporo ka ngerefuo ri te. (Ruta 1:1-5) Ho ri aga ni ku Yuda yo, ri ape gupai fu dia wiiri nangia Ruta nga ri sana Boaza ko ngbe gayo rago. Ko angia mbembedi gume Erimereke. (Ruta 2:1, 19, 20; 3:1-4) Ono ho Boaza aini gupai ni nga gu kura gumeyo adu kinaho nangia mbembedi gume Baibiri ayamba ko nga “Ako nda!” Ko du naadu na bambata mamu beko tipa ngbe gu rago re.​—Ruta 3:9, 12, 13.

Ti tonatonaha, “Ako nda” aima ida ka undo. (Ruta 4:1-4) Ko aima ino gupai nga si nika ida gupai aida nga ko tumo marã tipa ka ngbe gu rago re, ono ko aima ino gupai nga Naomi aima gbinza na ri arengbanga ka vunga gude berewe nga gu ni narengbe ka dia gu rago nga ga Erimereke te. Ako nda arengbe ka dia gu rago re na si ki da ni papara gako rago na gipai re aima rengba kadu ni gupai nika fu marã fuko.

Ono Ako nda aˈaria berãko ho ko aini gupai ni nga si nika ida ko di Ruta adia a. Ko aya: “Ka mi tumo nga ha tipa re tigimi te, mi ka gbarasa pa gi ũkumbo.” (Ruta 4:5, 6) Tipagine ko aria berãko ti ni?

Ka si adu nga Ako nda adi Ruta watadu kura boro kia na ri ki vungu kumbagude, gu gude re du narengbe ka dia gu rago nga ga Erimereke. Waigu ka gi pai re arengbe “ka gbarasa pa” gu “ũkumbo” nangia ga Ako nda? Baibiri afuranga tipa gipai re te, ono gere nga bete agu apai narengbe ka manga.

• Ni bambataha, ka ko azanga gu marã ko angbe gu rago nga ga Erimereke na ni, bambiko ka gu rago re adu nga ni gako te. Ka si ada ni ga Ruta na wiiri.

• Ni uehe, ka ko ada na gu tindiro nga ga ngerafuo Naomi na Ruta.

• Ni biataha, ka Ruta avungu kura agude fu Ako nda ka i akparaka aũkumbo na gu kura agude naadu beko.

• Ni biamaha, ka si adu nga Ako nda avunganga kura agude te, gu gude ka Ruta avungu ru re arengbe kadu na rengo be ru tipa ka dia gu rago nga ga Erimereke na gu nga ga Ako nda. Ho ka ko akpi ni, ka ko azanga gako rago fu gu gude ko avungu ru ti rimo Erimereke angianga ti rimoko ya. Sidu, Ako nda aadunga na nyemu ka maa gako ũkumbo ngbapai tipa ka undo Naomi te. Si du ko adiberã ti ni nga gu kura boro nangbefuo ko nangia Boaza di gu tindiro re. Boaza amangi gipai re bambiko ko aaida “ka zugasi pa rimo gu ko nakpi kuti gako ũkumbo.”​—Ruta 4:10.

Si nawira gupai nga, Ako nda adu na bakere nyemu pa banda rimoko na gako ũkumbo. Ko angia boro gbangbati. Ono wa si avura nga Ako nda aaida ka banda rimoko, ani ainongo da nangia ko areme te. Ko aima zanga gu bawene mamu a Boaza agbiaha. Boaza ada ni boro sa dagba ngbatunga Masiya, Yesu Kristo. Nagberẽ gu sangbanapai Ako nda agbiatiko na ni re mbiko gako gbangbati tipa ka undo gu boro naida na undo!​—Mt. 1:5; Rk. 3:23, 32.