1. Ginipai aboro ninaabihe ho i aye ni tipa gaani adunguratise ti bambata regbo? (Oni bi sura a.)

 ONI berẽnga pa arogotise nga aguyo ye ni bambataha tipa dunguratise ku rogo gu Bambu Kindo nga ga aDezire Yekova. Iriwoapai ima ti tiyo ni bakerehe ka bi wai i nadi yo ku gume na gu nyemuse i nabihe dagba agu aboro du rogo dungurati. Ho i aga ni ku kporo yo fuo dunguratise, dee pe gupai fu kumbari nga, ‘Agi aboro re ima du kia ti gu kura aboro ani nabi yo, na mi niima gbia ngbarago ti du na yo.’

2. Tipagine kura aboro nakoto ti ni?

² Gu nyemuse du dagba ga Yekova aboro ima du kia gbe. Rengo nga ha nga, anga aDezire Yekova nga rengberengbe aboro te. (1 Yo. 1:8) Sidu, kina wai ani nikaa ino agu aboro du rogo dungurati, si nawiraha wa, kina wo a ani nika ye ka inopai tipa gayo aingahe. (Rom. 3:23) Si nafu kina gberãrago nga, kura aboro ima mbu agu aingahe nga ga kura aboro si kotosi yo.

3. Ginipai i aino ndikidi apefuo Yesu ti ni? (Yoane 13:34, 35)

³ Oni bingo gu bangua veresi berewe nga ga gi kekeapai re. (Oni gedi Yoane 13:34, 35.) Gini banguapai i aino ndikidi apefuo Kristo ti ni? I naino yo ti nyemuse, angianga pa du yo ni rengberengbe aboro ya. Oni bingo gupai nga, Yesu aapenga gupai ane nga: ‘Si oni ka ino ti ni ya oni nga gimi abawiriki te.’ Ko aya: ‘Si ka aboro ini ti ni dunduko ya gimi abawiriki nga oni.’ Ngba gi gene re, Yesu ayugu gupai nga anga kina apefuoko sa nika ino ndikidi apefuo ko ti gu nyemuse adunga na gbangbati ti ni ya te, ono agu aboro a adunga rogo gu dungurati nga ga aKristano ya nika ino ndikidi apefuoko aino ti gu nyemuse i ayugoho fu akurayo.

4. Ginipai kura aboro narengbe ka ida ka inoho tipa ndikidi aKristano?

⁴ Agu aboro angianga aDezire Yekova ya ima rengba ka bakabangiriyo nga: ‘Waigu du nyemuse aundo rani ani ini ndikidi  apefuo Yesu? Waigu Yesu ayugu nyemuse fu gako amokedi? Na waigu ani narengbe ka wirika ga Yesu kpiapai areme?’ Si naida aida aDezire Yekova berẽkurii agu akaragapai du tipa agi asanahe re. Pa mangaha wo ima rengba ka undo rani ani yugu nyemuse wenengai, gbe, ho ani amangapai ni na agu azangarengba nga ga akuarani.​—Ef. 5:2.

5. Oni sakingo rogo agu afugo Yesu yo du rogo Yoane 15:12, 13.

⁵ Yesu asakirogo gupai yo nga apefuoko nikaa kpinyemu akurayo ngba kparakpara gene. (Oni gedi Yoane 15:12, 13.) Oni bingo gupai nga, Yesu azinahe fuyo nga: ‘Oni nikpi nyemu akuaroni, wa gu mi nakpi nyemu roni.’ Ginipai gipai re ayugoho? Yesu andu kumbatayo ka sakarogoyo nga, si nga mo kpinyemu kura aboro kisusi wai mo akpinyemu tiro watadu gu ngbatunga nyemuse rengbe ka sa Kristano ni kpi tipa kurani idipase ka si aidaha wo. b

6. Waigu Fugo Mbori anyakasapa gu nyanyakipa sino nga nyemuse?

⁶ Fugo Mbori nayugo gupai furani nga nyemuse na nyanyakipaha gbe. Badungu aboro ninaarimiso agi averesi du kusende re ku dagba agu averesi yo ngba tiyo gbe nga: “Mbori nga nyemuse.” (1 Yo. 4:8) “Mo nikpí nyemu kuaro wa mo akpi nyemu tiro.” (Mt. 22:39) “Nyemuse nadada badungu ingaapai.” (1 Pet. 4:8) “Nyemuse adíga nga te.” (1 Kor. 13:8) Agi averesi re na agu akuraha nayugoho ziazia nga, si ni nyanyakipa pai ka yugo gi bawene sino re.

7. Tipagine Satana arengbanga ka yugopai ti ni fu aboro tipa i kpinyemu akurayo na kidu na kodatise ya?

⁷ Badungu aboro nasanahe nga: ‘Waigu rengbe mi ka ino ndikidi pambori? Apambori dunduko naya si nayugo rengo, ono si  dunduko nibasasa nayugo kuraapai ni bakiakia tipa Mbori.’ Satana ima kusa badungu ziree apambori na gipai re nasaha ni kpakarakpakaraha fu aboro tipa i ini gini gu nga ndikidi pambori. Ono ka ko dungura nga aboro dunduko rogo zegino ku rogo ba sa tipa i naakpinyemu ti yo te. Kina Yekova sa rengbe ka manga gipai re. Ani naino gipai re mbiko nyemuse naye be Yekova. Kina agu aboro sa du na ga Yekova toro riyo gbiati gako maku rengbe kadu na ndikidi nyemuse dagbayo. (1 Yo. 4:7) Si nga ndu gupai Yesu aya ti ni wẽ, kina apefuoko sa nika du na ndikidi nyemuse dagbayo.

8-9. Waigu du gu nyemuse du dagba aDezire Yekova nadu na maapai kurii gu dungu aboro nabiyo?

⁸ Kina wai Yesu apehe, badungu aboro ima ino ndikidi apefuoko ti gu ndikidi nyemuse i ayugoho dagbayo. Ni kpiapai, wirina du rimoko nga Ian natingidapa gu bambata regbo ko andu tipa bakere dunguratise, nga gu i amangihe rogo gu kikii ba ngimbaro nadu mbembedi na kpuko. Ian aima ndu ku rogo gu bangimbaro re bete adiwi kusayo tipa ka bi mbaro. Ko aya: “Gu mangaapai nga ga agu aboro naadu pati bakere dunguratise aima du kia ti ga agu aboro naandu kaa bi ambaro. ADezire Yekova adu ni zezeredi yo na ki voditiyo wenengai, na awiriyo aamangapai wenengai.” Ko agbia kura pai kutini nga: “Agi aboro re aangera wa i aima du na rengbabepai na kidu ni zezeredi yo. Gere nga kina boro gupai mi aaidaha rogo gimi raka yo. Mi atingida nga pa ai agu agumbapai i amangihe ni gu uru re te, ono gu mangaapai nga ga aDezire Yekova aima du na nyenye maapai kurire.” c Ni rengo, ngbatunga gu mangaapai re nga sangbana gu ndikidi nyemuse du dagbarani. Mbiko gupai nga ani ima kpinyemu awirinarani, ani namangapai na yo rogo wenesino gbiati irisa.

⁹ Wirina du rimoko nga John adu na kina gu bangisa bipai re ho ko atona nduge ni tipa agu adunguratise nga ga adungurati, ko aya: “Rago aima ngba tire ka bi gu pabakure naadu dagba aboro dunduko yo. I aima ngia wenesino aboro si ki sa gupai nga mi berẽ gupai nga i ima rengba kangia rengberengbe aboro. Gu ndikidi nyemuse nadu ti yo asa re mi idi kuti gupai nga mi ima bi ndikidi pambori.” d Agi akpiapai re na agu akura dungu akpiapai nayugo gupai nga, ga Yekova aboro nga ndikidi aKristano.

10. Gini regbo gbe du ani na momu ka yugo gu nyemuse nga ga aKristano? (Oni bi gu kekeapai a du bandu waraga yo.)

¹⁰ A wa duhe ti tonatona gi kekeapai re, anga boro ho dagba awirinarani aidipase yo nga rengberengbe boro te. Ti kura aregbo, i ima rengba ka gumba gupai watadu ka manga agu apai nika ba gberãrago tirani. e (Yak. 3:2) Gbe, ho kura aboro aba gberãrago ni tirani, ani ima rengba ka yugoho nga ani ima kpinyemu yo nzunzu rogo gupai ani agumbaha na kini mangihe. Rogo gi bangiriba re, ginipai rengbe ani ka wirikaha ti gu kpiapai Yesu amoihe?​—Yo. 13:15.

11. Gini asino aYakoba na Yoane ayuguhe? (Oni bi sura a.)

¹¹ Yesu aaberãnga gupai nga si naida apefuoko du ni rengberengbe yo te. Kuba gure, ko aundo yo rogo nyemuse yo tipa i mangipai  sa gayo arungbura na ki mangi aˈariapai tipa wa ka i sa ngbarago ti Yekova. Ti kura regbo sa, amokedi ue dagba amokedi yo nga aYakoba na Yoane aya fu nayo wẽ ri sana Yesu ko fu nyanyakipa bangiriba fuyo rogo Kindo yo. (Mt. 20:20, 21) Gupai aYakoba na Yoane amangihe re ayugu gupai nga i adu na rukö na i aaida payo du ni nyanyakihe kisusi ga kura aboro.​—Snz 16:18.

12. Ya mo kina aYakoba na Yoane sa nga gu yangara aboro nayugu gbegberẽ asino? Oni sakingo rogoyo.

¹² Anga kina aYakoba na Yoane nangia gu yangara aboro nayugu gbegberẽ asino rogo gu uru re te. Oni bingo wai kura amokedi amangipai: “Ho agu yo agi he ni nadu bawe, i ki zingi kuti agu awirina ue re.” (Mt. 20:24) Ani ima rengba ka berãpa wai Yakoba na Yoane gbiati kura amokedi aapaya dagba tiyo. Isoke, gu kura amokedi arengbe ka aya: ‘Oni naberã ha nga oni nyakipa roni kisusi rani? Si du nga ndu gupai oni nasanahe ti ni tipa pa nyanyakipa bangiriba kisusi rani? Anga oni nga gu yangara aboro sa mangisunge nyanyaki na Yesu te. Ani ima rẽ a tipa nyanyakipa bangiriba kina wai oni na rẽ tipaha!’ Ka si vura du nga kina gini apai i aberẽhe watadu ki pekehe rogo gu uru re, bangiriyo aima go nga si naida i naayugo nyemuse gbiati wene sino ti aregbo dunduko fu akurayo.

13. Waigu Yesu amangipai kuti agu azangarengba nangia ga gako amokedi? (Matayo 20:25-28)

¹³ Waigu Yesu amangipai kuti gipai re? Ko aazinganga te. Ko aayanga ko nandu ka gbata gu kura amokedi nika ngba kisusi yo te, nga  aguyo nika du na bakere umbasitise na kini mangipai na akurayo dedede rogo nyemuse yo te. Kuba gure, Yesu afura fuyo rogo zerangbaduse yo bambiko ko aini gupai nga i aaida aida ka manga gupai du ni ruruhe. (Oni gedi Matayo 20:25-28.) Ti aregbo dunduko, Yesu anaamangapai na amokedi rogo wene gene yo wa si avura du vurũ nga i anaapaya dedede tipa da nadu na kikipa ni dagbayo.​—Mk. 9:34; Rk. 22:24.

14. Gini ngbatunga sino mangapai ga Yesu amokedi asono rogoyo?

¹⁴ Ni rengo, Yesu aima tingida gupai nga, gu sino ngbatunga amokedi asono rogo yo aima du na maapai kuriyo. (Yo. 2:24, 25) Agu aYudo nangia abakeapai na aFarusi ayugu gupai nga aboro rengbe kadu na nyanyakipa yo sa kina gu ka i du rogo nyanyakipa bangiriba. (Mt. 23:6; oni ringbisihe na gu vidio nga The Front Seats in the Synagogue du rogo gu kekeapai du tipa wisigoho rogo Matayo 23:6.) Agu aYudo nangia abangbembatayo rogo apambori anaabi tiyo a nga i payo anyaki kisusi ga kura aboro. f (Rk. 18:9-12) Yesu aima rugatiko na gupai nga, gi ngbatunga berã re aima rengba kadu na maapai kurii gu gene gako amokedi aabi tiyo gbiati kura aboro ngbaha. (Snz. 19:11) Ko aaberãnga gupai nga ka gako amokedi mangingo aingahe te te, na ko adu na zerangbaduse na yo ho i animangi ingahe ni. Ko aima ino gupai nga, i adu na wene kpotoyo yo, sidu, ko aundo yo rogo zerangbaduse yo i dibe gayo rukö na be gayo nyemu kadu na pagbia, na ki moi nyemuse kubaha.

15. Ginipai rengbe ani ka wirikaha ti gupai namangi dagba aYakoba, Yoane, gbiati kura amokedi?

¹⁵ Ani ima rengba ka wirikapai ni bakerehe ti gupai naakoda aYakoba na Yoane. Si adu ni gbegberẽpai fu aYakoba na Yoane tipa i sana Yesu tipa nyanyakipa bangiriba rogo Kindo yo. Ono gu kura amokedi aima manga ingahe a, nimbu yo gipai re si gbarasipa gayo kodatise. Ono Yesu amangipai na agu amokedi dunduko nadu 12 re rogo wenesino yo, nga rogo gu gene nga ga nyemuse. Ginipai ani awirikaha? Anga gupai nyakipaha sa nga gupai kura aboro amangaha te, ono wai ani amangapai a sa gayo aingahe na gayo azangarengba. Ginipai rengbe ka undo rani? Ho rago agberã ni tirani fu kuarani idipase, ani ima rengba ka sana tirani nga: ‘Tipagine gupai ni nimangihe re aba gberãrago ti ni tire ni bakerehe? Ya mo gipai re nayugopa gu gbegberẽ sino si aida mi mangi ome tipa ka mbuhe? Isoke, ya mo gu boro ni ba gberãrago tire re nagbia tini na akpakarapai? Ka si vura du nga wene ndupai kina ho sa gupai nga rago gberẽ tire, ya mo mi rengbe ka yugo nyemuse na ki mbupai fu gu boro re?’ Ho ani ayugo nyemuse ni fu kura aboro, ani nayugo gupai nga ani nga ndikidi apefuo Yesu.

16. Gini kurapai berewe rengbe ani ka wirikaha ti ga Yesu kpiapai?

¹⁶ Ga Yesu kpiapai nayugo gupai furani a nga, si naida ani mangi asadatise ka rugatirani na akuarani aidipase. (Snz. 20:5) Ni rengo, Yesu aima rengba ka ino gupai du ngbadu aboro yo. Ani arengbanga ka ino ho te. Ono tie, ani ima rengba kadu na zerangbaduse na awirinarani ho ka i imisi rani ni. (Ef. 4:1, 2; 1 Pet. 3:8) Si taata ka mangaha wo ka ani inipai ni bakerehe tipa yo. Ani bingo kpiapai.

17. Waigu babi adungurati sa agbia undo ti inoko kurako idipase wenengai?

 ¹⁷ Babi adungurati natingidapa wirina sa rogo dungurati dagba agu adungurati ko amangisunge rogoyo East Africa yo. Ti bambata regbo, gu babi adungurati re aberẽ gupai nga gu wirina re aadunga na wene sino ti ko te. Waigu gu babi adungurati re amangipai kuti gipai re? Ko aya: “Kuba gupai nga mi naane gu wirina re mi adiberã tipa ka inoko wenengai.” Ho gu babi adungurati re adi regbo ni na gu wirina re, ko ainipai tipa wai gu wirina re asono, na wai gipai re adu na maapai kurii gu gene ko aamangapai na kura aboro ngbaha. Gu babi adungurati re andu kumbatayo ki ya: “Ho mi ainipai ni tipa wai si adu ni kpakarakpakaraha fuko tipa ko mangi agu aˈariapai si aaida ko mangihe tipa kadu na kura aboro wenengai, na wai ko amangi ariapai ni bakerehe, si asa re mi kpinyemuko. Ani ada ni wene abakure.” Ni rengo, ho ani aasada ka rugatirani ni wenengai na awirinarani, si naye kadu furani taata ti aregbo dũ ka yugo nyemuse fuyo.

18. Gini asanahe rengbe ani ka sana tirani na ni ka si dunga kuarani idipase ba gberãrago tirani? (Asanza 26:20)

¹⁸ Ti kura regbo, si ima rengba ka ida gupai nga ani fura na gu kuarani idipase ba gberãrago tirani. Ono ti bambata ha tie, si naida ani sana tirani na asanahe wa gu nga: ‘Ya mo mi ini gu rengo apai du ho dunduko?’ (Snz. 18:13) ‘Ya mo si rengbe kadu nga ni aaida nga aida ka ba gberãrago tirani te?’ (Batu. 7:20) ‘Ya mo mi amangingo kina ngbatunga ingahe wa gure?’ (Batu. 7:21, 22) ‘Ka mi fura na gu boro re tipa gupai re, ya mo si asa gupai re si gbere kina kumbatayo?’ (Oni gedi Asanza 26:20.) Ho ani adia regbo ni ka wisigo ngbatunga asanahe wa gure, ani ima rengba kada kuti gu digisopai nga gaani nyemuse tipa wirinarani ima rengba ka fõ rani ani mbu gupai re.

19. Ginipai mo nadiberã tipa ka mangaha?

¹⁹ Wa ngia aDezire Yekova badona, i nayugo gupai nga i nga ndikidi ga Yesu abawiriki. Ani dunduko ni basasa nayugo gupai nzunzu nga ani nga ndikidi apefuo Yesu ho ani ayugo gu nyemuse ni adu nga na gbangbati ti ni ya fu awirinarani gayo aingahe ki vura du vurũ. Ho ani ayugo gu nyemuse ni adunga na gbangbati ti ni ya, si ima rengba ka sa kura aboro i ini ndikidi pambori na i ki kodi tiyo na ani tipa ani irisi Yekova, nga Mbori nyemuse. Ani dinga berã adia kaa ndu kindi kumbatayo kaa yugo nyemuse nga gu i aino ndikidi aKristano ti ni.