1-2. Ginipai ninaamanga dedede ho aboro azio bapatiza ni, na ginipai ani nika wisigopai tipaha rogo gi kekeapai re?

 YA MO mo abingo badona agu aboro nazio bapatiza? Ho i akaragapai ni kuti agu asanahe du ue mbata fu zio bapatiza, i na karagapai nakido. Mo nabi gupai nga gayo aborokporo na ngbarago na abakureayo na ngbarago na yo. Ho i akura ni ime yo, aboro ninaata beyo, kpakpu aboro yo kidu na ngbarago. Rogo aposo yo dũ, akutu aboro namanga gu diandue nga ga kpara gayo raka na ki zi bapatiza na ki da ni aDezire Yekova.

² Na ginipai du tipa ro tigamo? Ka ngia mo naberãpa zio bapatiza, mo nga gu boro du ni kparakpara ni rogo gi gbegberẽ zegino re bambiko mo ‘nagbata Mbori.’ (Tam. 14:1, 2) I mbakadi gi kekeapai re tipa ro singia mo nga paranga boro watadu sosono boro. Ono tipa agu rani naima zio bapatiza, si naida ani nyakasi gaani diaberã nga ga iriso Yekova nyeanye kindi. Ani wisigingo nyanyakipa nduapai biata tipa ka iriso Yekova.

3. Tipagine ga Yekova amoyambu akpinyemu rengo na rurupai ti ni? (Atambuahe 119:128, 163)

³ Yekova afu zinahe fu gako aboro nga i “kpí nyemu rengo.” (Zek. 8:19) Yesu angarasi apefuoko i pekefuo rurupai. (Mt. 5:6) Gere nayugo gupai nga si naida boro du na kakaka nyemu ka manga gupai du ni ruruhe, ni wenehe, na ni gigirihe bangiri Mbori. Ya mo mo nakpinyemu rengo na rurupai? Ani na gu kido nga mo ima kpinyemuhe. Mo ima soga irairapai na gu du ni gbegberẽhe. (Oni gedi Atambuahe 119:128, 163.) Ziree nga sino Satana nga gu boro nazogo gi zegino re. (Yo. 8:44; 12:31) Gu sasa nga ga Satana nga ka pe kere ziree kuti rimo Yekova Mbori. Satana aima digo ni gbaragi aziree tipa gaani Mbori natona ti gu regbo samungu naadu Edene yo. Ko naasada ka sa aboro i naabi Yekova Mbori nga ko aberãnga pa aboro te, ko nga gu Bazogo apenga rengo ya na ko naká na weneapai  be aboro. (Bam. P. 3:1, 4, 5) Agu aziree Satana apekaha tipa Yekova ima sa aboro i nabi Yekova nga ko nga gbegberẽ boro. Ho aboro asia ka “kpinyemu rengo” ni, Satana ima rengba kadu na maapai kuriyo tipa i mangi irairapai na gbegberẽ apai dunduko.​—Rom. 1:25-31.

4. Waigu Yekova nayuguhe nga ko “nga Mbori nga irarengo”? (Oni bi sura a.)

⁴ Yekova “nga Mbori nga irarengo,” na ko nayugo rengo fu agu aboro nakpinyemu ko. (Tam. 31:5) Ni manga ko ho wo, ko naundo yo ka i naida nga kuti agu aziree nga ga Satana ya. Yekova nayugopai fu gako amoyambu a i du ni airarengo na kini mangi gupai du ni ruruhe. Gipai re nasayo kura aboro nairisa yo na kidu na gu zereda nga ga kpotoseyo. (Snz. 13:5, 6) Ya mo ko amangingo gipai re foro wa mo nawiriki Baibiri? Mo ima wirika gupai nga ga Yekova gene mangaapai ni wenehe tipa aboro dunduko na tipa ro a. (Tam. 18:30) Sidu, mo naida ka manga gupai nga gu Mbori aya si du ni ruruhe. (Mt. 6:33) Mo naida gu kura aboro ini rengo, na ka yugo gupai nga gupai Satana apehe tipa gaani Mbori nga Yekova, nga ziree. Waigu rengbe mo ka manga gipai re?

5. Waigu rengbe mo ka songoda gupai nga rengo na ruruhe?

⁵ Mo ima rengba ka sia gu gene raka nga gu nika yugo gupai nga mo ima ká ga Satana aziree na mo naida ka songodapai kubara rengo yo. Mo ima rengba ka yugoho nga mo naida Yekova du ni gamo Bazogo, na mo naida ka manga gupai nga gu ko aya si du ni ruruhe. Waigu rengbe mo ka manga gipai re? Mo fura na Yekova rogo kparakpee yo nga mo naida ka iriso ko nyeanye kindi, na ki yuguhe fu aboro gbaiga ni zio mo bapatiza. Nyemuse tipa gupai nga rengo na ruruhe nika sa ro mo sia ka zio bapatiza.

6. Gini nduapai du rogo Atambuahe 45:4 nga gu nasa ro mo nikpinyemu Yesu Kristo?

⁶ Tipagine mo akpinyemu Yesu Kristo ti ni? Mo bi nga gu wene nduapai du rogo Atambuahe 45:4. (Oni gedihe.) Yesu aima kpinyemu rengo, umbasitise, na rurupai. Ka si du nga mo kpinyemu rengo na rurupai, si nayugoho ayugo gbaiga nga mo ima kpinyemu Yesu Kristo a. Mo berẽnga pa wai Yesu adu na wingbaduse na ki songodi pai ku bara rengo yo na rurupai. (Yo. 18:37) Waigu tie Yesu ayugopai furani tipa ani du na umbasitise?

7. Ginipai ngba tiro tipa ga Yesu umbasitise?

 ⁷ Yesu nayugo umbasitise rogo gako mangapai yo. Ni kpiapai, ko nafu taarimo dunduko fu Bako, angianga fu tiko ya. (Mk. 10:17, 18; Yo. 5:19) Ga Yesu umbasitise na saro mo du wai? Nirengo, si nasa ro mo kpinyemu Wiri Mbori na kini pekefuoko. Tipagine du Yesu ti ni na umbasitise? Bambiko ko nakpinyemu Bako na kini wiriki ko, nga boro umbasitise. (Tam 18:35; Eb. 1:3) Ya mo mo akpingo nyemu Yesu te, nga gu boro nawirika asino Yekova?

8. Tipagine du ani na ngbarago ti ni tipa du Yesu ni gaani Bakindo?

⁸ Ani ima kpinyemu Yesu ni gaani Bakindo bambiko ko nga bawene Bazogo. Yekova nitiko naraba Wiriko na ki siako ko zogorago. (Yes. 50:4, 5) Mo berẽnga pa wai ko nambu pa kura gako apai. (Yo. 13:1) Wa du Yesu nga gamo Bazogo, ko ima rẽ nzunzu mo kpinyemu ko. Ko ayugu gupai nga ko nayamba agu aboro ko akpinyemu yo nga abakureako na i nayugo gayo nyemuse fuko ni giayo sangba gako arugute. (Yo. 14:15; 15:14, 15) Si ni bakerepa mamu kadu ni bakurea Wiri Yekova!

9. Waigu du gu bapatiza nga ga aKristano wakina ga Kristo?

⁹ Yesu afu zinahe fu apefuoko nga i zi bapatiza. (Mt. 28:19, 20) Ko amoi kpiapai. Ngba kura gene, gako bapatiza kia ti gu nga ga apefuoko. (Oni bi gu sanduki nga, “ Ga Yesu Bapatiza na ga Apefuoko​—gu Kparakparapai Duti Ni.”) Ono ngba kura agene si ima wira tihe. Ho Yesu azi bapatiza ni, ko afu tiko ka manga gupai Bako akpinyemuhe. (Eb. 10:7) Wakina gure a, ho apefuo Kristo azio bapatiza ni i nayugoho gbaiga nga i ima kpara gayo raka fu Yekova Mbori. Sidu, gupai nyakipaha rogo gayo raka yo nga, manga gupai Mbori akpinyemuhe angianga gupai ngbatiyo ya. Sidu, i napekafuo gu kpiapai nga ga Baira yo.

10. Gini andu apai du bero tipa ka kpinyemu Yesu, na ginipai si aida gu nyemuse re sa ro mo mangihe?

¹⁰ Mo ima ida kuti gupai nga Yesu nga bangisa Wiri Yekova na mo na ngbarago nga ko nga gu Bakindo Mbori nasiako ko zogorago kurii rani. Mo ima ino gupai nga Yesu nga boro umbasitise na ko nawirika Bako ngba rengberengbe gene. Mo ima wirika gupai nga ko arigi agu aboro naadu na gomoro, ki fu wasa fu agu aboro naadu na gberãrago, na zavura ki husi kazakaza aboro. (Mt. 14:14-21) Mo ima bi wai ko angbe kumbatayo fu gako dungurati areme. (Mt. 23:10) Na mo ima ino gupai nga ko nika manga dungu wene apai furani kumbatayo wa du ko nga Bakindo ga Mbori Kindo. Waigu rengbe mo ka yugoho nga mo ima kpinyemu ko? Ni pekafuo gako kpiapai. (Yo. 14:21) Pai sa dagba agu apai yo rengbe mo ka mangaha ni pekafuo gako kpiapai nga, ka kpara gamo raka fu Yekova na ki zi bapatiza.

11. Ginipai rengbe mo ka pehe nga si nga gu yangada nyanyakipa ndupai si aida boro zi bapatiza ti ni, na tipagine duhe ti ni wo?

¹¹ Gine nga gu nyanyakipa ndupai si aida boro zi bapatiza ti ni? Yesu ayugu gu bangua arugute re ni pe ko gupai nga: “Mo kpi nyemu Gbia nga ga Mbori kpotoro yo dunduko, na mbisimoro dũ, na ga berã dũ, na omero dũ.” (Mk. 12:30) Ya mo agu afugo re nayugo wai kpi mo nyemu Mbori?

12. Tipagine mo akpinyemu Yekova ti ni? (Oni bi sura a.)

¹² Dungu nduapai duho tipa ka kpinyemu Yekova. Ni kpiapai, mo ima ye ka ino gupai nga ko nga “gugaabi unga” na ko nga Bafu “wene gamahe dunduko, na ziazia ũgamahe dunduko i nagama ha.” (Tam. 36:9; Yak. 1:17) Gu wene ahe dunduko mo agbia ngbarago ti ni naye be gu Mbori nga Mbori gamahe na Mbori nyemuse.

13. Tipagine du ga Yesu motumo tumori ti ni nga bawene gamahe?

 ¹³ Motumo tumori nga bawene gamahe be Yekova ko nafuhe furani. Tipagine rengbe ani ka pehe ti ni wo? Mo berẽnga tipa gu wene pabakure du dagba Yekova na Wiriko. Yesu aya: “Buba nakpi nyemu re” na “mi nakpi nyemu Buba.” (Yo. 10:17; 14:31) Ga yo pagume adu ni mbembedi he vuru agu abirioni agarã yo i adu kina sa. (Snz. 8:22, 23, 30) Mo berẽnga pa wai si aimisi Yekova ho ko ambu Wiriko ni ko ye ka mbu na ki kpi. Yekova ima kpinyemu aboro​—kodihe na mo​—si nga ndu gupai ko afu bangisa Wiriko ti ni ko ye ka fu motumo si saro na kura aboro oni raki nyeanye kindi. (Yo. 3:16; Gara. 2:20) Gere nga gu ba nyanyakipa ndupai ani akpinyemu Mbori ti ni.

14. Gine nga gu bawene sasa mo narengbe ka siaha rogo raka yo?

¹⁴ Gamo nyemuse tipa Yekova ima sona wa mo na wiriki badungu apai tipa ko. Nirengo, mo naida aida ka mbeda na Mbori awere na nyeanye kindi. Na mo ima rengba ka mbeda na ko. Ko nangarasa ro mo sa kpotoko yo si ningi. (Snz. 23:15, 16) Mo ima rengba ka manga gipai re angianga kina rogo afugo ro yo ya, ono rogo gamo mangapai a. Gu gene mo araka gamo raka ngbaha nika yugoho si ngia mo ima kpinyemu Yekova nzunzu. (1 Yo. 5:3) Sia gu gene raka nasa ngbarago ti  Yekova nga gu bawene sasa mo narengbe ka siaha rogo raka yo.

15. Waigu rengbe mo ka yugo gamo nyemuse tipa Yekova?

¹⁵ Waigu rengbe mo ka yugo gamo nyemuse tipa Yekova? Ni bambataha, si naida mo mangi kparakpara kparakpee nga gu mo nika kpara gamo raka rogoyo fu ndikidi Mbori. (Tam. 40:8) Tingbafuo manga mo gamo kparatise fu Yekova, mo yuguhe gbaiga ni zio mo bapatiza. A wa ani niwisigihe kusayo, rogo gi kekeapai re, gamo bapatiza nga uru ngbarago na nyanyakipa pai rogo gamo raka yo. Mo tona vovo raka, angianga fu tiro ya, ono fu Yekova. (Rom. 14:8; 1 Pet. 4:1, 2) Gipai re nangera wa nyanyakipa diaberã, na kina rengo du. Ono si nazakagene foro mo raki wene raka. Ngba gini gene?

16. A wa duhe rogo Atambuahe 41:12, waigu Yekova nika fu mosoro fu agu aboro kpara gayo raka ka iriso ko?

¹⁶ Yekova nga Boro gamahe. Ka mo vura fu kina ginihe fuko, ko agasa ha agasa foro ni bakerehe gbe. (Mk. 10:29, 30) Ko nikafu bawene raka foro nga gu mo nika du na rengbanapai behe zavura rogo gi kere zegino re. Na gure gbua nga tonatonaha. Si aidanga gu raka mo nika tonaha tingbafuo zio mo bapatiza digi te. Mo ima rengba kaa ndu kumbatayo kaa iriso gu Bamo nga boro nyemuse nyeanye kindi. Gu nyemuse du bangbanda ro na bamo nikaa sona kina kumbatayo, na mo nikaa raka nyeanye kindi wa kina ko.​—Oni gedi Atambuahe 41:12.

17. Gine rengbe mo kafu he fu Yekova nga gu adu nga beko ya?

¹⁷ Ho mo akpara gamo raka ni fu Mbori na ki zi bapatiza, mo na gu mamu bero nga ga fu nyanyakipa he fu Bamo. Ko ima fu agu ahe foro dunduko du ni wenehe, agu aregbo nga ga ngbarago, nga gu mo nagbia ngbarago ti ni. Kuba gure, guhe rengbe mo kafu he fu Baira ngbangbaturũ na kpotosende nga guhe adu nga beko ya nga​—pa manga mo sunge fuko niruru ro. (Eyo. 1:8; 41:11; Snz. 27:11) Gere nga gu bawene gene rengbe mo ka raka gamo raka ngbaha. Zanga kapa, gamo nyemuse tipa Yekova nga gu bawene ndupai tipa ka zio bapatiza.

18. Gini asanahe rengbe mo ka sana tiro na ni?

¹⁸ Waigu rengbe mo ka karagapai kuti gu sanahe nga, Mo azio bapatiza? Kina ro sa rengbe ka karagapai kuti gu sanahe re. Ono mo ima rengba ka gbia undo ka mo sana tiro na gu sanahe nga, ‘Tipagine mi aziongo bapatiza ti ni ya?’ (Amo. 8:36) Mo tingidipa agu andu apai biata ani nasakipai tipaha. Ni bambataha, mo kpinyemu rengo na rurupai. Mo sananga tiro nga, ‘Ya mo mi naida ka bi gu uru aboro dunduko nikaa gumba rengo na kini mangi gupai du niruru he?’ Ni uehe, mo kpinyemu Yesu Kristo. Mo sananga tiro nga, ‘Ya mo mi naida Wiri Mbori du ni gimi Bakindo, na ya mo mi naida ka pekafuo gako kpiapai?’ Biatapai nga gu nyakipaha kisusi nga, mo kpinyemu Yekova. Mo sananga tiro nga, ‘Ya mo mi naida ka sa kpoto Yekova yo si ngi ni iriso mi ko?’ Ka gamo karagapai kuti agu asanahe re du nga ii, tipagine tie mo aziongo bapatiza ti ni ya? Gine tie naká na mo ti zio bapatiza?​—Amo. 16:33.

19. Tipagine si aidanga mo du ti ni na ndundu ka zio bapatiza ya? Oni funga kpiapai. (Yoane 4:34)

¹⁹ Ka si du nga mo na ndundu tipa ka zio bapatiza, mo makia gu kpiapai Yesu amangisunge na ni. (Oni gedi Yoane 4:34.) Oni bingo gupai nga, Yesu aringbisi manga gupai Bako akpinyemuhe kuti riahe. Tipagine? Riahe ni wenehe tipa rani. Yesu aima ino gupai nga agu apai dunduko Yekova asana rani ani mangihe si ni wenehe tipa rani. Yekova aidanga ani mangi gupai nga gu rengbe ka imisa rani te. Ya mo gupai Yekova aidaha tipa ro nakoda pa zio mo bapatiza? Ii. (Amo. 2:38) Mo ima rengba kadu na gu kido nga, mangapai kuti gako arugute ka zio bapatiza nika undo ro aundo. Ka si du nga mo na ndundu tipa ka ri bawene riahe te, tipagine tie du mo ti ni na ndundu tipa ka zio bapatiza?

20. Ginipai ani nika sakapai tipaha rogo gu kekeapai ngbefuo gere?

²⁰ Tipagine kura aboro aziongo bapatiza ti ni ya? Dungu yo ima rengba ka karagapai wa gere, “Mi ata mbakadanga tire te.” Ono gu rengo du ho nga, gu diaberã nga ga kpara gamo raka fu Yekova na ki zi bapatiza nga gu nyanyakipa diaberã rengbe mo ka mangaha. Si naida mo berẽ wenengai tipa gu diaberã re, na si nika dia regbo adia na ome tipa mo rẽ ka zio bapatiza. Ono ka si du nga mo na ndikidi nyemu ka zio bapatiza, ginipai si aida mo mangihe awere ka mbakada tiro? Ani nika sakapai tipa gu sanahe re rogo gu kekeapai ngbefuo gere.