1-2. Ka si du nga mo ata dunga regerege tipa bapatiza te, tipagine si aidanga mo du ti ni na gberãrago ya? (Oni bi gu sura duti kpotoho.)

 KA SI DU nga mo nakpinyemu ka zio bapatiza, mo ima maa bawene sasa tipa tiro. Ya mo mo regerege awere ka zio bapatiza? Ka mo bihe nga mo ima du regerege na abaakumba ki idihe, ka mo du nga na ndundu ka zio bapatiza ti gu regbo naye kumbatayo ya. Ka mo mangihe wo, mo nika du na gu raka du ni bawenehe tingba ga Yekova sunge.

² Ono ya mo boro penga gupai foro nga, si naida mo mangi bakere sonakumbatayo mbata fu mo zi bapatiza? Watadu ya mo mo bingo gupai re wo nitiro? Ka si du nga mo ima bihe wo, ka mo dunga na gberãrago ya. Mo ima rengba ka manga sonakumbatayo na ki da ti gu nyanyakipa sasa re, ka si vura du vurũ nga mo nga paranga boro watadu sosono boro.

3. Gini sanahe gu banyaki nangia boro Etiopia asana Firipo na ni, na gini sanahe nakura? (Amokedi 8:36, 38)

³ Oni gedi Amokedi 8:36, 38. Banyaki ni boro Etiopia asana Firipo nangia batungusipai nga: “Gine naza re ti bapatiza?” Gu kumba nangia boro Etiopia re aima du na nyemu ka zio bapatiza, ono ya mo ko adu nzunzu regerege tipa gu nyanyakipa diandue re?

4. Waigu boro Etiopia ayugu gupai nga ko aima diaberã kaa ndu kindi kumbatayo kaa wirikapai?

⁴ Gu kumba nangia boro Etiopia re andu “ku Yerusarema yo ka irisa Mbori.” (Amo. 8:27) Sidu, si nawiraha gbe nga, ko aima dia gu pambori nangia ga aYudo kugume. Zanga kapa, ko aima wirikapai tipa Yekova rogo Kuru Ndiko. Wa si avura du wo, ko adu kindi na bakere nyemu ka wirika dungu apai. Ho Firipo agbia gu banyaki re ni bangiri gene, ginipai Firipo abi ko ko nimangihe? Ko aageda gupai gu nebi nangia Yesaya akehe. (Amo. 8:28) Gu re angia gu nyanyakipa arengo nga ga Baibiri. Gu banyaki re aarengbanga kina be agu abangua rengo nga ga Baibiri  te, ko aaida kaa ndu kindi kumbatayo kaa wirikapai.

5. Ginipai boro Etiopia amangihe nibi gupai ko awirikihe?

⁵ Gu kumba nangia boro Etiopia re angia nyanyakipa banyaki fu Kandake nangia nakindo Etiopia; ko adu “ni ira gari ũkumuko dunduko.” (Amo. 8:27) Sidu, si nawira gupai nga, ko aima du na badungu apai tiko ko aamangaha. Ono wa si avura du wo, ko aadia regbo adia kaa iriso Yekova. Ko aarengbanga kina be agu arengo ko aawirikaha te; ono ko amangipai kuti gupai ko awirikihe. Sidu, ko aru Etiopia yo ka ndu gbanga nunguro tipa ka ndu ka iriso Yekova rogo gu yekaru naadu Yerusarema yo. Gu nduge re aaida na bakere regbo gbiati marã, ono gu kumba re aaida aida ka iriso Yekova, ka si avura ida kina ginipai vurũ.

6-7. Waigu gu nyemuse nangia ga boro Etiopia tipa Yekova aasona kina kumbatayo?

⁶ Gu boro Etiopia re awiriki bete nyanyakipa vovo arengo, gu sa dagba agu arengo yo re angia ka ino gupai nga Yesu nangia Masiya. (Amo. 8:34, 35) Nirengo, gu banyaki re aima du na ngbarago ka wirikapai tipa gupai Yesu amangihe fuko. Ginipai ko amangihe tifuo ko wiriki agu apai re? Ko aima rengba ka nye kina wai ko adu, ni gu boro nasa ti ni ku rogo gu pambori nangia ga aYudo na aboro kidu na irisa koyo du ko ni. Wa si avura du wo, gako nyemuse tipa aYekova na Wiriko aima sona. Ngbadukoyo afõ ko ko mangi nyanyakipa diaberã tipa ka zio bapatiza ki da ni pefuo Yesu Kristo. Firipo abi gupai nga, gu kumba re aima du regerege, ko kini bapatiza ko.

⁷ Ka mo pekefuo gu kpiapai nangia ga boro Etiopia, mo ima rengba kadu regerege tipa ka zio bapatiza. Mo ima rengba ka pe gupai a na ndikidi kido nga, “Gine naza re ti bapatiza?” Ani bingo wai rengbe mo ka manga kina gu bangisapai gu kumba nangia boro Etiopia re amangihe: Ko aandu kindi kumbatayo kaa wirikapai, ko amangipai kuti gupai ko awirikihe, na ko kini ndu kindi kumbatayo kaa sonosa gako nyemuse tipa Mbori.

8. Ginipai Yoane 17:3 apehe nga si si aida mo mangihe?

⁸ Oni gedi Yoane 17:3. Ya mo agi afugo Yesu re aundo ro mo diberã ka wirika Baibiri? Gipai re nga rengo tipa dungu rani. Ya mo kina gu bangisa afugo re nape gupai furani nga ani naandu kindi kumbatayo kaa wirikapai? Ii. Ani ambunga ‘ino . . . bangisa ndikidi Mbori’ te. (Batu. 3:11) Ani nikaa wirikapai tipa ko nyeanye kindi. Na wa ani nikaa wirikapai ni bakerehe tipa Yekova, kina wo a ani nikaa mbeda na ko gbe.​—Tam. 73:28.

9. Ginipai si aida ani mangihe tifuo ani wiriki agu abangua yugopai nga ga Baibiri?

⁹ Ho ani atona wirikapai ni tipa Yekova, gupai ani awirikaha gbua nga, gu bangua ayugopai nga ga Baibiri. Rogo gu waraga yo gu  mokedi nangia Pauro akehe fu aEbere, ko afura tipa agu abangua ayugopai re nga si gbua nga ‘mburu tonatona apai.’ Ko aagumbanga gupai nga, pa “bambata tonatona apai” anyakanga te te; ono ko aaringbisa ha kuti momu nya nga gu nazambuasi tooni gude. (Eb. 5:12; 6:1) Ono ko angarasi aKristano a i naandu kindi kumbatayo kaa wirika badungu apai kisusi gu bangua ayugopai nga ga Baibiri na kaa wirika dudunguro arengo rogo Fugo Mbori yo. Ya mo mo sonosi nyemupai tipa gu dudunguro ayugopai du rogo Baibiri yo? Ya mo mo na nyemu kaa manga sonakumbatayo kindi, kaa wirikapai kindi tipa Yekova na gako ringbisaapai?

10. Tipagine duhe ti ni ni kpakarakpakaraha fu kura aboro ka wirikapai?

¹⁰ Tipa badungu rani, si ima du ni kpakarakpakaraha furani ka wirikapai. Gamo bipai nga gine tipa wirikapai? Ya mo mo awiriki wai ka gedapai na ka wisigopai wenengai sukuru yo? Ya mo mo agbia ngbarago ti wirikapai na kini bihe nga mo ima wirika dungu apai? Watadu ya mo mo ada kuti gupai nga, mo nga gu boro ainongo ka wirikapai rogo abuku yo ya? Ka si du wo, mo nisaro te, dungu kura aboro nabi tiyo kina wo. Ono tie, Yekova ima rengba ka undo ro. Ko ni rengberengbe ko na ni bawene Bayugupai kisusi.

11. Waigu Yekova ayugo gupai nga ko nga Bakere “Bayugupai”?

¹¹ Yekova naya tipa tiko ko nga gamo bakere “Bayugupai.” (Yes. 30:20, 21) Ko nga gu Bayugupai du na zerangbaduse, wenesino, gbiati rugatinapai. Ko nangera tipa gu weneapai du rogo agu agude yo ko ayugopai fuyo. (Tam. 130:3) Na ko aidanga ani mangi bakere apai kisusi gu rengbe ani ka mangaha ya te. Mo tingidi gupai nga, ko nambakadi duduro, nga bawene gamahe. (Tam. 139:14) I akusi rani na gu nyemupai nga ga wirikapai. Bakusirani naida ani naandu kindi kumbatayo kaa wirikapai nyeanye kindi​—na kini gbia ngbarago ti ni. Sidu, si ni patatamana ka ani ‘kpi nyemu’ agu arengo nga ga Baibiri awere. (1 Pet. 2:2) Mo moi agu asasa nga gu mo narengbe ka da ti ni, na mo kini gedi Ziazia Kekeapai na kini wisigihe dedede. (Yos. 1:8) Na ga Yekova undo, mo nika wirika wai ka gbia ngbarago ti gedapai na wirikapai tipa ko ni bakere he.

12. Tipagine si aida ani wisigipai ti ni tipa ga Yesu raka na gako tungusapai?

¹² Mo naadia regbo dedede kaa berãkuriipa ga Yesu raka na gako tungusapai. Si ni nyanyakipa pai tipa ani naapeka fuo Yesu teketeke ka ani aaida ka iriso Yekova, gbe, ti gi kpakarakpakara aregbo re. (1 Pet. 2:21) Yesu ape gupai fu gako abawiriki nga, i nika gbiatiyo agbia na akpakarapai. (Rk. 14:27, 28) Ono ko aima du na gu kido nga, ndikidi apefuo ko nika nyeanye ni ruruyo wa gu ko amangihe. (Yo. 16:33) Mo wiriki futufutuapai tipa ga Yesu raka, na ki moi asasa tipa ka wirika ko rogo agu apai yo mo amangaha rogo gamo raka yo na auru dunduko.

13. Ginihe si aida mo naasana Yekova kindi tipaha, na tipagine?

¹³ Inohe ni saha nga gu yangarapai si aidaha te. Gu ndupai mo aida na inohe ti ni nga ka wirikapai ni bakerehe tipa Yekova na ki sonosi agu asino du wa nyemuse tipa ko gbiati idapase kuti ko. (1 Kor. 8:1-3) Wa mo nikaa ndu kumbatayo kaa wirikapai tipa Yekova, mo naasanako kindi ko undo ro mo du na bakere idapase. (Rk. 17:5) Ko nakaragapai akaraga kuti gu ngbatunga akparakpee re. Pa du mo na ndikidi idapase rii ndikidi inohe nika undo ro mo mangi sonakumbatayo.​—Yak. 2:26.

14. Waigu gu mokedi nangia Petero anyakasi ndu gupai duhe ti ni ni nyanyakipa pai tipa ani mangipai kuti gupai ani awirikaha? (Oni bi sura a.)

¹⁴ Gu mokedi nangia Petero anyakasi pa wai duhe ni nyanyakipa pai tipa apefuo Kristo naandu kumbatayo kindi kaa mangapai kuti gupai i awirikaha. Ko apepa gu pangbanga du  rogo Ziazia Kekeapai nga gu du tipa Noa. Yekova ape gupai fu Noa nga, Ko nika gbarasa gu gbegberẽ aboro naadu ti regbo ko na ime akangbii. Pa ino Noa gupai nga ime akangbii aaye, aangianga gu yangarapai narengbe ka batasa ko na gako aborokporo te. Oni bingo gupai nga Petero afura tipa gu regbo naadu mbata fu ime akangbii na ‘ho i ambakadi bakurungba ni.’ (1 Pet. 3:20) Nirengo, Noa na gako aborokporo amangipai kuti gupai i awirikihe be Mbori nime yo kurungba nga gu naadu ni bakiki he. (Eb. 11:7) Fuo gure, Petero aringbisi gupai Noa amangihe kuti bapatiza, ko akepai nga: “Rogo ndikidi kpiahe yo ime nga gu he nabatasa roni, nga bapatiza.” (1 Pet. 3:21) Sidu, ani ima rengba ka ringbisa gu sunge mo amangaha awere ka mbakada tiro tipa bapatiza kuti gu sunge Noa na gako aborokporo amangihe tipa dungu agarã ka me kurungba. Ginipai si aida mo mangihe tipa kadu regerege tipa bapatiza?

15. Waigu ani ayugo gupai nga ani ima manga ndikidi saberã?

¹⁵ Gu bambatapai si aida ani mangihe nga, ka saberã rani nzunzu ti gaani aingapai. (Amo. 2:37, 38) Ho ani amanga ndikidi saberã ni, si nasa gupai nga ani mangi ndikidi aˈariapai. Ya mo mo mbu manga agu apai naba gberãrago ti Yekova, wa ngbatunga agu apai nga, raka wasiwasi raka, vugundö, mangasunge na afugo sengahe watadu gbegberẽ afugo? (1 Kor. 6:9, 10; 2 Kor. 7:1; Ef. 4:29) Ka si du nga mo ata mbunga agi apai re te, si naida mo naandu kindi kumbatayo kaa manga asadatise tipa kaa manga aˈariapai. Mo fura na gu boro nawirika Baibiri na mo, watadu mo sana abaakumba rogo dungurati tipa undo na arugapai. Ka si du nga paranga boro nga mo na mo naraka kindi na avunguro kporo, mo naandu kindi kumbatayo kaa sanayo tipa undo tipa ka mbu ai gu gbegberẽ mangaapai rengbe ka ká na mo ti zio bapatiza.

16. Ginipai si aida ani mangihe ka ani aida kaa iriso Yekova dedede?

¹⁶ Si ni nyanyakipa pai tipa kaa manga agu apai nga ga toro. Gere nakoda nduge tipa agu adunguratise nga ga aKristano na kini fu akaragapai. (Eb. 10:24, 25) Na ho mo nika rẽ ni tipa kaa ndu kaa tungusapai, si nikaa ida mo namanga gipai re dedede a. Ka mo aatungusapai ni bakerehe, kina wo a mo nikaa gbia ngbarago ti ni ni bakerehe. (2 Tim. 4:5) Ka si du nga paranga boro nga mo na mo naraka na avunguro  kindi kporo, mo sananga tiro nga: ‘Ya mo si naida avungure naatingida re atingida na gupai nga si naida mi ndu tipa adunguratise watadu ka ndu gene sunge tungusapai yo? Watadu ya mo mi namanga agi apai re nitire zanga i pehe ape fere?’ Nimanga mo agi apai re nitiro, mo nayugo gupai nga mo ima du na idapase na mo ima kpinyemu Yekova Mbori na kidu na bakere tambuahe tipa agu ahe dunduko ko nafuhe foro. Agi apai re nga, agu apai nga ga “sinombori,” si nga agu agamahe mo afuhe fu Yekova. (2 Pet. 3:11; Eb. 13:15) Mbori na ngbarago na agu agamahe ani afuhe fuko na ngbaduraniyo dunduko. (Oni ringbisinga ha na 2 AKorindo 9:7.) Ani namanga agi apai re mbiko ani nadu na ngbarago ho ani afu guhe ni fu Yekova ngba kisusi.

17-18. Gini nyanyakipa sino nika undo ro mo mangi sonakumbatayo na ki zi bapatiza, na tipagine? (Asanza 3:3-6)

¹⁷ Wa mo nikaa manga sonakumbatayo tipa ka zio bapatiza, mo nika gbiatiro agbia na akparakapai. Gu kura aboro ima rengba ka sawia ro tipa gamo vovo idapase, na zavura i ima rengba ka soga ro watadu ka rungosi ro. (2 Tim. 3:12) Isoke si rengbe kadu nga mo namanga nyanyaki asadatise tipa ka mbu manga gupai mo naima ino gupai nga si ni irairaha, ono ti kura aregbo, mo kini mangihe amanga berewe. Watadu mo ima rengba kadu na zanga zerangbaduse na kidu na gberãrago mbiko mo nabihe nga gamo sasa kindi tuturũ. Ginipai nika undo ro mo hipai? Gu nyanyakipa sino nga​—nyemuse tipa Yekova.

¹⁸ Gamo nyemuse tipa Yekova nga gu bawene sino kisusi nga gu du mo na ni. (Oni gedi Asanza 3:3-6.) Gu bipai gi nyemuse re nika sa ro mo du na ni agonga wa regbo nikaa susa te. Na ka mo du na gi sino re, mo ambunga iriso Yekova ho mo agbia tiro ni na akpakarapai te. Baibiri ninaafura dedede tipa ga Yekova bangabanga nyemuse fu gako ruru amoyambu. Pa du ko na weneringise watadu bangabanga nyemuse nayugo gupai nga ko ambunga gako amoyambu watadu ka mbu kpinyemu yo te. (Tam. 100:5) I ambakadi ro rogo kpia Mbori yo. (Bam. P. 1:26) Waigu rengbe mo ka yugo gu ngbatunga nyemuse re?

19. Waigu rengbe mo kadu na bakere tambuahe tipa agu apai dunduko Yekova namangihe foro? (AGaratio 2:20)

¹⁹ Mo tonaha nidu mo na tambuahe. (1 Tesa. 5:18) Rogo aˈuru ni basasa, mo sananga tiro nga, ‘Waigu Yekova nayugu nyemuse koyo du mi ni?’ Tifuo gure, mo ki fu tambuahe fu Yekova rogo gamo akparakpee yo, na ki gumbapa agu apai ko namangihe foro. Si naida mo rugutiro na gupai nga, Yekova namanga weneapai foro mbiko ko ima kpinyemu ro, kina wai gu  mokedi nangia Pauro aye ka rugatiko na gipai re tipa Yekova. (Oni gedi AGaratio 2:20.) Mo sananga tiro nga, ‘Ya mo si naida mi yugu gimi nyemuse fuko a?’ Nyemuse tipa Yekova nika undo ro mo naandu kindi kumbatayo kaa ká aˈasada na kini hi akpakarapai kidu na diabese. Gu nyemuse re nika fõngbaduroyo tipa mo naamanga agu apai nga ga toro dedede, kini yuguhe fu gu Bamo du ngbangbaturũ yo nga mo nakpinyemuko na aˈuru dunduko.

20. Ginipai si aida mo mangihe tipa ka kpara gamo raka fu Yekova, na waigu du gi diaberã re na nyanyakipaha?

²⁰ Fuo bete regbo kusa, gamo nyemuse tipa Yekova nika fõngbaduroyo mo mangi kparakpara kparakpee fuko. Mo nika manga gamo kparatise fu Mbori. Mo tingidi gupai nga, bara sa kindi mo na kpara tiro fu Yekova, mo nika du na gi bawene maabangirise re: Mo ima rengba kadu fuko nyeanye kindi. Ho mo akpara gamo raka ni fu Yekova, mo namanga kidohe tipa kaa irisoko ti wene aregbo na gbegberẽ aregbo. Si naida mo mangi gu kidohe re bara sa. Ni rengo, ho ani amanga kparatise ni fu Yekova, gure nga ani namanga nyanyakipa diaberã. Ono mo berẽnga kurii gipai re: Mo nika manga dungu adiaberã rogo gamo raka yo, agu akuraha nika du ni bawenehe, ono diaberã ho mo nika mangaha nika ngba kisusi gu nga ka kpara gamo raka fu Yekova te. (Tam. 50:14) Satana nika asada ka rungburasi gamo nyemuse tipa gu Bamo du ngbangbaturũ yo, ko kidu na gu maabangirise nga, mo anyenga niruru ro fuko te. Ka mo ya mbunga Satana ko du na diabese ya! (Eyo. 27:5) Gamo nyemuse tipa Yekova nika undo ro mo banda gamo kidohe tipa kaa iriso Yekova nyeanye kindi na kini mbedi gbe na gu Bamo du ngbangbaturũ yo.

21. Tipagine rengbe ani ka nya ti ni, bapatiza nga yangara pai te ono si nga tonatonaha?

²¹ Fuo manga mo gamo kparatise fu Yekova, mo fura na abaakumba rogo dungurati tipa gu nyanyakipa diandue mo aida ka mangaha re. Ono si naida mo naatingida gupai ti aregbo dunduko nga, anga bapatiza nga yangara apai te, ono si nga tonatonaha. Si nga tonatona gu raka nga ga iriso Yekova nyeanye kindi. Sidu, mo nyakasi gamo nyemuse tipa gu Bamo du ngbangbaturũ yo awere. Mo moi asasa tipa gamo nyemuse naanyaka naˈauru dunduko. Ngbatunga gi diandue re nika fõngbaduroyo tipa mo zi bapatiza. Si nika ngia bawene uru. Ono gere gbua nga tonatonapai. Gamo nyemuse tipa Yekova na Wiriko naandunga andu kindi kumbatayo kaa sona nyeanye kindi!