1. Ngbutuko mbata fu Petero kpi, ginipai Yekova amangisunge na ko ko mangihe?

 GU MOKEDI nangia Petero amangisunge fu Yekova ni ruruko tipa dungu agarã, ko aata na Yesu ti regbo gako sunge tungusapai, ko atona tungusapai fu agu aboro nangianga aYudo ya, na kusa, ko ada ni boro sa dagba aboro riigbu bipasunge. Ti digido gako raka ho ko ainihe ni nga ko ima mbeda ka kpi, Yekova afu bakere sunge fuko ko mangihe. Ono ga Petero sunge aadigongo kina kuho te. Bara rogo gu garã nangia 62 kuti 64 Fuo Batikayo Kristo, Yekova amangisunge na ko ko ke awaraga ue—agu buku du rogo Baibiri yo nga 1 Petero na 2 Petero. Petero adu na gu maabangirise nga, agi awaraga re nika undo aKristano tingbafuo ko kpi.—2 Pet. 1:​12-15.

2. Tipagine si aaida agu awaraga aida ti ni Petero akehe?

² Petero ake gako awaraga ti gu regbo awirina ‘arungo be dungu aasada.’ (1 Pet. 1:6) Gbegberẽ akumba aaida ka ye na aziree yugopai gbiati bibiriko mangaapai ku rogo gu dungurati nangia ga aKristano. (2 Pet. 2:​1, 2, 14) Si adu nga agu aKristano naaraka Yerusarema yo nika gbiatiyo na “digida apai dunduko”—i nika gbarasa gu gbata re na agu abanzengere nga ga aRomo yo nika gbarasa gu zogarago nga ga aYudo. (1 Pet. 4:7) Zanga kapa, agu awaraga Petero akehe aundo aKristano i bi wai i arengbe ka hi agu aˈasada i aagbiatiyo na ni na si ki mbakadi yo tipa agu aˈasada naadu kumbatayo. b

3. Tipagine si aida ani wisigi agu awaraga ti ni Petero akehe?

³ Wa vura duhe nga Petero ake gako awaraga fu agu aKristano  naaraka ti gu regbo re, Yekova amoi agi awaraga re si du ni papara Fugoko. Sidu, ani ima rengba ka gbia undo awere ti agu awaraga re. (Rom. 15:4) Wakina agu aKristano re, ani naraka rogo gu zegino hibe bibiriko mangaapai, na ani nagbiatirani agbia na agu aˈasada rengbe ka saha furani ni mbumbuhe ani irisi Yekova. Kurigure, bara mbeda, ani nika gbiatirani na bakere gberãngbi nga gu kii kisusi gu nadigisi gu zogarago nangia ga aYudo. Ani nagbia nyanyakipa atingidapai rogo agu awaraga yo ue Petero akehe. Agi awaraga re nika undo rani ani naasungudo ga Yekova uru, ki dibe gunde be aboro, na ki sonosi nyanyaki nyemuse tipa akuarani. Ngbatunga agu atingidapai du rogo agu awaraga re ima rengba ka undo abaakumba i bi wai rengbe yo ka undo awirina rogo dungurati i nye nyanyaki.

4. A wa i nayuguhe rogo 2 Petero 3:​3, 4, ginipai rengbe ka rungburasi gaani idapase?

⁴ Agu aboro ke rani kirikiri nga agu aboro aidanga kuti gupai Baibiri apehe tipa kumbatayo ya. Agu aboro nasoga rani ima rengba ka sawia rani mbiko ani ima pe gupai tipa dungu agarã nga digido gi sino raka re naye. Gu kura ababisirapa apai nape gupai nga, digido gi sino raka re ayengo te. (Oni gedi 2 Petero 3:​3, 4.) Ka ani gi ngbatunga gupai re ngba gu boro ani atungusapai funi, gaani badiasunge, watadu gaani borokporo, si ima rengba ka rungburasi gaani idapase. Petero asakipai tipa gupai rengbe ka undo rani.

5. Ginipai nika undo rani ani du na ruru bipai nibipa digido gi sino raka re? (2 Petero 3:​8, 9)

⁵ Gu kura aboro ima rengba ka bihe nga Yekova namangapai yee tipa ka digiso gi gbegberẽ sino raka re. Afugo Petero ima rengba ka undo rani ani du na ruru bipai, mbiko si natingida rani na gupai nga Yekova nabi regbo kia ti wai aboro abihe. (Oni gedi 2 Petero 3:​8, 9.) Bangiri Yekova, agarã kutu wakina uru sa. Yekova na zerangbaduse, na ko akpingo nyemu ai boro kpi wa sa te. Ono tie, ho gako uru nika da ni, gi sino raka re nika digo adigo. Si ni momu furani tie ani mangisunge na gu regbo nye koyo tipa ka tungusapai fu aboro dunduko auru kpotosende.

6. Waigu ani ‘angera’ kindi tipa ye ga Yekova uru? (2 Petero 3:​11, 12)

⁶ Petero angarasi rani ani ‘naangera’ tipa ga Yekova uru. (Oni gedi 2 Petero 3:​11, 12.) Waigu rengbe ani ka manga gupai re? Rogo aˈuru dunduko, ani ima rengba ka berãpa wai raka nika du rogo vovo zegino. Mo berẽnga pa tiro mo nigbidi gigiri wege, kini ri gu riahe du ni wenehe tipa kpotose, kini di gamo aborokporo gbiati agumero kugume wa i nikaa zingisa yo be kpio, na kini yugupai fu agu aboro naima raka dungu agarã kusayo tipa wai agu asangbanebi du rogo Baibiri yo adigisitihe. Pa berã mo kurii agi apai re nika undo ro mo naasungudo Yekova kindi na kidu na gu kido nga ani naraka rogo yangara arame. Ni ‘ino’ ani pa agu apai nika manga kumbatayo, si nika sa gupai nga ani ‘bánda tirani’ be ziree abayugupai.—2 Pet. 3:17.

7. Waigu rengbe gunde be aboro kadu na maapai kurirani?

⁷ Mbiko ani ima ino gupai nga ga Yekova uru nika ye barambeda, ani naˈasada ka manga agu apai dunduko rengbe na omerani tipa ka gumba wene pangbanga fu kura aboro. Ono ti kura aregbo, ani ima rengba kadu na gunde tipa ka fura. Tipagine? Mbiko ani nadu na gunde tipa gupai rengbe aboro ka pehe tipa rani watadu ka manga rani na ni. Gipai re aima manga Petero. Rogo gu yuru i aarungosi Yesu, Petero aima gunde ka pe gupai nga ko angia boro sa dagba ga Yesu abawiriki na ki pe gupai bara dunguhe nga ko ainongo Yesu te. (Mt. 26:​69-75) Ono kusa, Petero adibe gako gunde na ki ke gupai na kido nga: “Ka oni gúnde nga be aboro ya, ka oni dú nga ni fudifudi roni a ya.” (1 Pet. 3:14) Afugo Petero nakido rani na gupai nga, ani ima rengba ka diabe gunde be aboro.

8. Ginipai rengbe ka undo rani ani dibe gunde be aboro? (1 Petero 3:15)

 ⁸ Ginipai rengbe ka undo rani ani dibe gunde be aboro? Petero ape gupai furani nga: “Oni kpára Kristo kpotoroni yo ni gaoni Gbia.” (Oni gedi 1 Petero 3:15.) Gipai re nakoda gupai nga ka berãkuriipa gu bangiriba gbiati ome du be gaani Gbia nga Bakindo nga Kristo Yesu. Ka si du nga mo naagunde agunde ho mo aida ka pepa wene pangbanga ni fu boro, mo tingidi pa gaani Bakindo. Mo bi ko ngba bangiro ko ni zogorago ngbangbaturũ yo na dungu amaraika ki ke ko kirikiri. Mo tingidi gupai nga ‘i asia pa ahe fuko dunduko ku ngbangbaturũ yo na ku sende no’ na ko nika du ‘na ani ti arago dũ, ki da ti digida zegino.’ (Mt. 28:​18-20) Petero azungudi rani ani ‘mbakadi tirani dedede’ ka songodapai ku bara gaani idapase yo. Ya mo mo nakpinyemu ka tungusapai fu boro basunge yo, sukuru yo, watadu rogo kura ba? Mbu regbo kindi koyo, mo berẽpa gu regbo rengbe mo ka manga gipai re ti ni na mo ki mbakadi gupai mo nika pehe. Mo mangi kparakpee tipa wingbaduse na kidu na gu kido nga Yekova nika undo ro aundo mo dibe gunde be aboro.—Amo. 4:29.

9. Ti kura regbo sa, waigu Petero azanga yugo nyemuse? (Oni bi sura a.)

⁹ Petero awiriki wai ka yugo nyemuse. Ko adu kinaho ti gu regbo Yesu aya ni wẽ: “Vovo rugute fu mi fu roni nga, oni kpi nyemu akuaroni akpi;  a wa mi akpi nyemu roni, oni kpi nyemu akuaroni a wo.” (Yo. 13:34) Wa si avura wo, kusa, Petero aká ka ririahe na agu awirinako naangianga aYudo ya mbiko ko aagunde agunde be agu aKristano nangia aYudo. Gu mokedi nangia Pauro ayambu gipai Petero amangihe re nga mangapai ‘nigbuko,’ watadu mangapai ni biriki. (Gara. 2:​11-14) Petero aima dia gu rugute nangia ga Pauro kugume na ki wirikipai ti ni. Rogo gu gako awaraga yo ue ko akehe, ko anyakasi gupai nga, si aidanga ani nabihe gbua nga ani na nyemu awirinarani te ono si naida ani yugu gu nyemuse re.

10. Ginipai naundo rani ani du na “wene kpi nyemu awirina”? Oni sakingo rogoyo. (1 Petero 1:22)

¹⁰ Petero ape gupai nga, si naida ani du na “wene kpi nyemu awirina” rogo dungurati. (Oni gedi 1 Petero 1:22.) Ani nika du na ngbatunga gi nyemuse re ho ani nikaa mangapai ni kuti agu apai dunduko ani awirikaha ti “gia sangba rengo.” Gi rengo re nakoda gu yugopai nga, “Mbori akpara nga aboro te.” (Amo. 10:​34, 35) Ka si du nga ani nayugo nyemuse fu kina bete aboro rogo dungurati na ka ani ayugongo ho fu agu akurayo ya, gure nga ani amanganga pai kuti gu ga Yesu rugute du tipa nyemuse te. Si nirengo nga, wa gu si adu tipa Yesu, ani ima rengba kadu mbembedi gbe na gu kura aboro, na ka ani adu nga mbembedi gbe na agu akurayo ya. (Yo. 13:23; 20:2) Ono Petero atingidi rani na gupai nga, si naida ani “kpí nyemu” awirinarani dunduko mbiko i nga papara gaani aborokporo.—1 Pet. 2:17.

11. Ginipai ‘pakpí nyemu akuarani kakaka kpotorani yo’ ayugoho?

¹¹ Petero azungodi rani ani ‘kpí nyemu akuarani akpi kakaka kpotorani yo.’ Rogo gi bangiri ba re, kadu na nyemuse “kakaka” nayugo gupai nga ka kpinyemu boro ka si vura du vurũ nga si ima kpakara ka yugo nyemuse fu ni. Ni kpiapai, na ka si du nga wirina imisi rani ngba kura gene? Ti bambata ha, ani ima rengba ka ida ka mangapai na ni kina wai ni namangipai na ani kuba gupai nga ka yugo nyemuse fu ni. Ono tie, Petero aima wirika gupai be Yesu nga irobape asanga ngbarago ti Mbori te. (Yo. 18:​10, 11) Petero akepai nga: “Ka oni káraga nga gbegberẽpai fu gbegberẽpai ya, na gberãngba yo fu gberãngba yo a ya; ono ku ba gure oni káraga kina maku.” (1 Pet. 3:9) Ka si dunga mo na kakaka nyemuse, mo nika du na wene sino na kini berẽpa aboro zavura aguyo ba gberãrago tiro.

12. (a) Gini kurapai kakaka nyemuse nika fõngbaduraniyo ani mangihe? (b) Ginipai mo nadiberã ka mangaha a wa i nayuguhe rogo gu vidio nga Oni Banda gu Bawene Gamahe Nga Zereda?

¹² Rogo ga Petero bambata waraga yo, ko amangisunge na gu fugo nga oni kpinyemu akuaroni “akpi kakaka.” Ngbatunga gu nyemuse re nadada “badungu ingaapai” angianga bete aingapai ya. (1 Pet. 4:8) Isoke si nawiraha wa Petero aima tingida gupai Yesu ayuguhe fuko dungu agarã kusayo nibipa mbupai. Ti gu regbo re, si nangera wa Petero aberẽ gupai nga ko angia wene boro ho ko afu gu berẽpai ni nga ko rengbe ka mbupai fu wirinako “bara saba.” Ono Yesu ayugu gupai fuko—na furani a nga—si naida ani mbupai “bara saba bawe bara saba,” nayugo gupai nga digido mbupai ti ni te. (Mt. 18:​21, 22) Ka si du nga si ima kpakara foro ka mangapai kuti gi rugute re, ka rago gberẽnga tiro ya! Ga Yekova amoyambu dunduko nga aboro zangarengba na si aima kpakara fuyo ti kura aregbo i mbupai. Gu nyanyakipa pai duho si aida mo mangihe nga, si naida mo mangi ai gupai rengbe mo ka mangaha tipa ka mbupai fu wirinamo na ki mangi zereda na ni. c

13. Ginipai rengbe ka saha ni kpakarakpakaraha fu abaakumba i gbia regbo ka ngarasa awirinayo?

¹³ Ni rengo, bangiri Petero aagongo ti gupai Yesu apehe fuko tifuo Yesu zingi be kpio te, ko  aya: “Mo nibánda gimi akandoro.” (Yo. 21:16) Ka singia mo nga bakumba, mo ini gupai nga, agu arugapai re nabipa ro abi a. Ono tie, si ima rengba ka kpakara fu bakumba ni gbia regbo ka manga gi nyanyakipa sunge re. Ni bambatapai, si naida abaakumba bihe nga i nangera angera fuo gayo aborokporo rogo borose yo na rogo toroyo. I namaa wene kpiapai a rogo sunge tungusapai na mbakada adunguratise gbiati bakere adunguratise na kini mangi apaparaha. Kura abaakumba na undo a na mangasunge na gu Rondo Du Tipa Sakapai na Amunganga watadu gu rondo du tipa mekaarago nga Local Design/Construction Department. Ni rengo, abaakumba na dungu asunge beyo i amangaha!

14. Ginipai rengbe ka fõngbadu abaakumba yo i ngarasi akandoro? (1 Petero 5:​1-4)

¹⁴ Petero angarasi akurako abaakumba nga, “Oni mbú ti ga Mbori rimbasa akandoro.” (Oni gedi 1 Petero 5:​1-4.) Ka singia mo nga bakumba, ani ima ino gupai nga mo ima kpinyemu awirinamo na mo naida aida ka ngarasa yo. Ono ti kura aregbo, mo ima rengba ka bihe nga apai ima nge tiro ni kerehe watadu mo ima du na mbugo tipa ka manga gipai re. Ginipai rengbe mo ka mangaha? Mo pepa gamo abakabangirise dunduko fu Yekova. Petero akepai nga: ‘Ka boro amanga pa aboro, ni mangi he wa ni namanga ha ni gu ome Mbori nafuhe.’ (1 Pet. 4:11) Awirinamo ima rengba kaa gbiatiyo na agu akpakarapai nga gu arengbanga ka nyasa kusayo rogo gi zegino re ya. Ono mo tingidi gupai nga “baira ababanda akandoro,” nga Yesu Kristo ima rengba ka undo yo susi gu rengbe mo ka mangaha. Ko ima rengba ka manga gipai re awere na rogo vovo zegino. Gupai Yekova aida abaakumba mangihe nga ka kpinyemu awirinayo, ka ngarasa yo, na kadu ‘ni kpiapai fu rimbasa akandoro.’

15. Waigu kura bakumba sa ninaangarasa akandoro? (Oni bi sura a.)

¹⁵ William, nga gu wirina niima mangasunge ni bakumba tipa gbanga regbo ima rugatiko na nyakapa ngarasa akandoro. Ho gu ririkaza nga Korona atona ni, ko gbiati akurako abaakumba amoi gupai ni bambatapai nga kaa yamba agu aboro nadu rogo gayo badona nga ga tungusapai na aposo dunduko. Ko aya: “Badungu awirina naaraka kporo nisayo, na i ki ima tona niipo kaa berã gbegberẽ aberã.” Ho du wirina ni na kpakarapai, William ninaadega tuko wenengai tipa ka ino ginipai du ni na bakabangirise tipaha na guhe du ni na zingoho. Fuo gure, ko naasada ka gbia bete agu awaraga na avidio du rogo gaani bangiriba nga ga Internet, nga gu rengbe ko  ka mangasunge na ni ka ngarasa gu wirina re. Ko aya: “Awirina naida na ngarasaro awere kisusi gu niidu mbata. Ani ninaamanga sunge nyanyaki ka undo agu aboro angianga awirinarani ya tipa i wirikipai tipa Yekova; si naida ani mangi kina gu bangisa ome re tipa ka undo awirinarani i nye rogo rengo yo.”

16. Ngba gini agene rengbe ani ka mangapai ngbaha kuti agu apai ani nawirikihe rogo ga Petero awaraga?

¹⁶ Ani saki kina bete apai gbua nga gu rengbe ani ka wirikaha rogo agu awaraga yo ue Petero akehe. Isoke mo ima bi gu bangiriba mo akpinyemu ka manga ariapai rogoho. Ni kpiapai, ya mo mo nakpinyemu kaa berãkuriipa agu amaku dedede nika du rogo vovo zegino? Ya mo mo moi sasa tipa ka manga dezirepai basunge yo, sukuru yo, watadu ti kura aregbo nga gu mo ambakada nga tiro ambakada tipa ka manga dezirepai ti ni ya? Ya mo mo bi agu agene nga gu rengbe mo ka yugo nyemuse ngbaha fu awirinamo ni bakerehe? Abaakumba, ya mo oni diberã tipa ka ngerafuo ga Mbori akandoro na nyemuhe? Mo wisigi tiro na ki bi gu bangiriba rengbe mo ka manga ariapai rogoho, ono ka rago gberẽnga tiro ya. “Gbia,” na wenesino tiko na ko nika undo ro aundo mo mangi ariapai. (1 Pet. 2:3) Petero akido roni nga: “Mbori . . . asá roni tigako oni du teketeke, ki nyakasi roni, ki ngarasi roni.”—1 Pet. 5:10.

17. Ka ani kakuti iriso Yekova na ki mbuko ko raba rani, sangbanaha nika ngia gine?

¹⁷ Ti. kura regbo sa, Petero abi he nga ko arẽnga tipa kadu na Yesu te. (Rk. 5:8) Ono mbiko gu undo nga ga nyemuse Petero agbiaha be aYekova na Yesu, ko akakuti pekafuo Kristo. Ni sangbanaha, Yekova ambu Petero ko rimi “ku rogo gu nyenye ngbi nga ga gaani Gbia, nga Batasirani Yesu Kristo.” (2 Pet. 1:11) Nga gu riko bawene mosoro! Ka singia mo kpatakara kuti iriso Yekova wa gu Petero amangihe na ki mbu tiro Yekova raba ro, mo nika gbia gu mosoro agbia a nga ga nyenye unga. Mo nika ‘dia gu digida he nga ga gaani idapase, nga batasa mbisimorani.’—1 Pet. 1:9.