1-2. Tipagine duhe ti ni ni wenepai furani ani wirikipai ti gu kpiapai nga ga Samusona?

 GINIPAI naye ku berãro yo ho mo agia gu rimo ni nga Samusona? Si nawiraha wa, mo naberã pa gu kumba naadu na bakere ome tiko. Kina rengo du. Ono Samusona aima manga agu adiaberã naadu ni gbegberẽhe nga gu naadu na gbegberẽ sangbanaha kuriko. Wa si avura duwo, Yekova amoiberãko tipa agu apai Samusona amangihe tipa ka irisoko, na Yekova amoi pa ga Samusona padu niruruse ku Baibiri yo tipa si undo rani.

² Yekova amangisunge na Samusona tipa ko undo Gako siasia aboro nangia aYisaraere. Tingbafuo dungu kama agarã fuo kpio Samusona, ga Mbori toro adu kugii Pauro ko rimisi rimo Samusona ku dagba agu akumba naadu na idapase. (Eb. 11:​32-34) Gu kpiapai nga ga Samusona ima rengba ka ngarasa rani. Ko akido kuti Yekova zavura ti kpakarakpakara regbo. Rogo gi kekeapai re, ani nika sakapai tipa gupai rengbe ani ka wirikaha be Samusona na wai rengbe gako kpiapai ka ngarasa rani.

3. Gini sunge i afuhe fu Samusona?

³ Ho i avungu Samusona ni, aFereseto naazogarago kurii gu riko aboro nangia aYisaraere na kini mbusi yo. (Abasa. 13:1) Gayo gbegberẽ zogarago aye na kere arungosiro kurii aYisaraere. Yekova asia Samusona ko ‘batasi aYisaraere be aFereseto.’ (Abasa. 13:5) Gipai re aima du ni kpakarakpakara sunge! Tipa ka manga gi kpakarakpakara sunge re, si aida Samusona kido kuti Yekova.

4. Waigu Yekova aundo Samusona ko batasi tiko be aFereseto? (Abasapungbanga 15:​14-16)

 ⁴ Oni bingo gu kpiapai nayugo gupai nga Samusona akido kuti Yekova tipa undo. Ti kura regbo sa, agu abanzengere nga ga aFereseto yo aye ka zio Samusona Rei yo, si nangera wa ka i ya Yuda yo naadu. Agu akumba naadu Yuda yo aagunde agunde, sidu, i adiberã kafu Samusona fu avurako. Ga Samusona aboro avo ko na agire ue, na ki ye na ko fu aFereseto. (Abasa. 15:​9-13) Wa si avura duwo, “ga Yekova Toro ki ye na bakere tandu” kurii Samusona na ko ki batasi tiko be agu agire re. Si du tie, “ko ki bi vovo biringangba dongi,” ko ki dihe na ki mangisunge na ni ka imo aFereseto bangeyo adu nga 1,000!—Oni gedi Abasapungbanga 15:​14-16.

5. Waigu pa manga Samusona sunge na biringangba dongi ayugu gupai nga ko adu na kido kuti Yekova?

⁵ I anaasonga vura na biringangba dongi te. Ono tipagine Samusona amangisunge ti ni na ni? Zanga kapa, Samusona aima ino gupai nga Yekova nika undo ko aundo ko dibe aFereseto zanga bipa gu ũvura nadu beko. Gi ruru kumba re amangisunge na ai gu ũsunge nadu beko tipa ka manga gupai Yekova akpinyemuhe. Samusona adibe agu akumba re dunduko bambiko ko akido kuti Yekova.

6. Ho ani amanga gaani asunge ni nga ga siokrasia, ginipai rengbe ani ka wirikaha be Samusona?

⁶ Ani ima rengba kadu na gu kido nga Yekova ima rengba kafu ome furani nga gu ani aidaha tipa ka manga gupai nga gu ko akpinyemuhe, ka si vura du nga gu sunge ko nafuhe furani re ima kpakara vurũ. Mbori ima rengba ka undo rani ngba gu gene rengbe ka zeresa kina ngba rani. Ka si du nga mo na kido kuti Yekova nga gu ko nafu ome fu Samusona, Ko ima rengba ka undo ro mo mangi gupai Ko akpinyemuhe.—Snz. 16:3.

7. Gini kpiapai nayugopa nyakapa manga ani pai kuti ga Yekova rugapai?

⁷ Dungu agu awirina nga aguyo namanga gu sunge mekarago nga ga aba irisombori ima yugo kido kuti Yekova. Bakuru kusayo, awirina anaakeka kpiarago na kini meke dungu vovo aBambu Kindo na gu kura abambu. Ono tie, wa duhe nga dungu aboro nazio bapatiza,  si aaida riigbu mangi ariapai. Agu awirina naangbe kumbatayo rogo apai yo amangi kparakpee na ki asadi kura vovo gene mangapai, wa gu nga ngbe agu arago i aima mehe na ki mbakadihe. Wirina du rimoko nga Robert nga gu ko mangisunge meka abambu rogo dungu papara zegino vuru gu dungu agarã susi kusayo ape gupai nga: “Ti tonatonaha, si aadunga taata fu aboro tipa i idi na gi bipai re te.” Ko andu kumbatayo ki pe gupai nga: “Si adu kia ti gupai ani aima digo nimangihe tipa dungu agarã. Ono awirina aima du na nyemu ka manga ariapai na si ni yuguyuguhe gbaiga nga Yekova ima fu maku kurii agu aariapai re.” Gere nga kpiapai sa gbua nayugo wai Yekova angbe kumbatayo fu gako aboro i mangi gupai ko akpinyemuhe. Ti aregbo dunduko, ani dunduko si aida ani naasana tirani nga ‘Ya mo mi naagbata gene ka bi ga Yekova arugapai na kidu regerege tipa ka manga ariapai tipa ka iriso ko ngba wene gene?’

8. Ti gu kura regbo sa Samusona adu na gomoro ime, ginipai ko amangihe?

⁸ Mo ima rengba ka tingidapa agu aregbo Samusona amangi agu apai naadu ni iiriwoho. Ko aimi bahu na beko na kusa, ko ki imi aFereseto 30 Asekerona yo. (Abasa. 14:​5, 6, 19) Samusona aima ino gupai nga ko aarengbanga ka manga gipai re nazanga gu undo nga ga Yekova te. Gipai re adu ni yuguyuguhe ti gu regbo ko adu na gomoro ime na ko ki imi aFereseto 1,000. Ginipai ko amangihe? Kuba gupai nga ko kido kuti tiko na ki ndu ka gbata ime ka mbiraha, ko asana Yekova tipa undo.—Abasa. 15:18.

9. Waigu Yekova akaragapai kuti ga Samusona sanahe tipa undo? (Abasapungbanga 15:19)

⁹ Yekova akaragapai kuti ga Samusona kparakpee ni undo ko Samusona ko gbia ime ngba iiriwo gene ka mbiraha. Ho Samusona ambirihe ni, “mbisimoko ki unga, ko ki bati.” (Oni gedi Abasapungbanga 15:19.) Si tie ziazia nga, gi vovo ime re adu kinaho kindi agarã kusa ti gu regbo ga Mbori toro adu kugii gu nebi nangia Samuere ko ke gu kitabu nga ga Abasapungbanga. Agu aYisaraere naabi gi ime re si nifu aima rengba ka tingida gupai nga ka i kido kuti Yekova, ko nika undo ruru airisiko aundo ti gu regbo du yo na zingo.

10. Ginipai si aida ani mangihe tipa ka gbia ga Yekova undo? (Oni bi sura a.)

¹⁰ Si naida ani kido kuti Yekova a ka si vura du vurũ nga ani na abirĩ nga ga sunge tirani na ki ima manga kura apai tingba ga Yekova sunge. Si naida ani du na umbasitise ki idi gupai nga ani rengbe ka manga gupai Yekova asana rani ani mangihe kinagu sa ka ani akido kutiko. Samusona agbia gu ome nga gu ko aaidaha ti gu regbo ko ambiri gu ime Yekova afuhe fuko, wakina Samusona, si naida ani di gu undo kugume Yekova afuhe furani tipa ani nye niruru rani fuko.—Mt. 11:28.

11. Waigu rengbe ani ka gbia bakere undo ti ga Yekova undo? Oni funga kpiapai.

¹¹ Ani bingo gu kpiapai nga ga Aleksey, nga wirinarani sa dagba agu awirinarani yo du Russia yo nga gu ko na hi kere arungosiro. Ginipai undo ko ko nye ni ruruko? Ko na diako ni naageda Ziazia Kekeapai dedede na kini mangi irisombori. Ko aya: “Mi naˈasada ka manga gimi wisigopai nisase na kini gedi Baibiri na aˈuru dũ. Awiso dunduko, ani ninaageda agu averesi du tipa aˈuru nibasasa na kini mangi kparakpee fu Yekova kina sa na diare.” Ginipai rengbe ani ka wirikaha ti gako kpiapai? Kuba gupai nga kaa kido kuti tirani, si naida ani kido kuti Yekova. Ngba gini gene? Nimanga  ani agu apai dedede nga gu rengbe ka nyakasa gaani idapase, wa gu nga geda Baibiri, kparakpee, nduge tipa adunguratise na kini tungusipai. Na Yekova nika fu gu undo furani si aidaha tipa kaa ndu kindi kumbatayo kaa irisoko. Mbori aima nyakasa Samusona na Ko ima rengba ka nyakasa rani a.

12. Waigu ga Samusona pabakure na Derira adu kia ti gu pabakure ko adu na ni na gu dee nangia boro Fereseto?

¹² Samusona angia kpakpa boro wakina rani, na ti kura aregbo, ko amangi gbegberẽ asiapai. Gbegberẽ diaberã kinaho sa nga gu ko amangihe nga gu nasa gupai nga ko gbia gbegberẽ sangbanaha. Fuo Samusona mangisunge ni basapungbanga tipa bete regbo, “ko ki nikpi nyemu gu de naadu rogo ngboongboorago Soreke yo, rimori angia Derira.” (Abasa. 16:4) Mbata fu gure, Samusona adu na mbakadapa rogatise na dee nangia boro Fereseto, ono gu mbakadapai re angia “sangba Yekova,” na “ko agbata pai kuti aFereseto.” Kusa, Samusona araki kua gu natakuari naadu Paresitina yo rogo gu gbata nangia Gaza. Ti gu regbo re du Mbori afu ome fu Samusona ko mofo ngbadimo bakporo, nga gu nasa gupai nga ka bakporo dunga berewe na ome ya. (Abasa. 14:​1-4; 16:​1-3) Ono tie, gupai naadu tipa Derira adu kia, mbiko si nangera wa ri angia Yisaraere, sidu, pa manga ko pabakure na ri aadunga tipa ka gbata gene ka sovura kuti aFereseto te.

13. Ginipai Derira amangi Samusona na ni?

¹³ Derira adi bakere marã be aFereseto tipa ka baga Samusona. Ya mo si rengbe kadu nga ko aima kpinyemu Derira ni bakerehe—na si ki sa gupai nga—ka ko iningo gupai ri aida ka mangaha ya? Derira anye kuti gupai kindi nga kaa sana Samusona ko pe ndu gupai ti ni du  ko ti ni nyanyaki, na ni yangaraha ko apehe furi. Si nafu kina gberãrago nga, Samusona amangi ingahe nga gu nasa ko ko zanga gako ome na ki gbarasi gako pagume na Yekova tipa bete regbo—Abasa. 16:​16-20.

14. Gini gbegberẽ sangbanapai Samusona agbiaha mbiko kidoko kuti Derira?

¹⁴ Samusona agbiatiko na gbegberẽ sangbanapai bambiko ko akido kuti Derira angianga kuti Yekova ya. AFereseto azi Samusona na ki sa ko ni iravurari. I aba ko ku bambukiso yo Gaza yo, nga gu gbata ko akuo ngbadimo ho. Agu aboro re amoi ko ni kanga na ki moi ko ko ni sa zende ahe. AFereseto aye na ko kupati kura gayo pumbo sa. I afu bakere motumo fu gayo ziree mbori nangia Dagona kini berẽ gupai nga ko du naundo yo i zi Samusona. I aye na Samusona bambukiso yo kupati gayo pumbo ko “nimangi ũmongo fu yo”—tipa i mamu ko.—Abasa. 16:​21-25.

15. Waigu Samusona ayugu gupai nga ko adu na kido berewe kuti Yekova? (Abasapungbanga 16:​28-30) (Oni bi gu sura duti kpotoho.)

¹⁵ Samusona aima manga kere ingahe, ono ko aambunga iriso Yekova te. Ko agbata gene tipa ka sovura kuti aFereseto nga gupai Yekova aaida ko mangihe. (Oni gedi Abasapungbanga 16:​28-30.) Samusona akpari fu Yekova nga: “Mi íri bape bangire du ue ti aFereseto.” Ndikidi Mbori akaragapai kuti ga Samusona kparakpee na ko ki gbia gako kparakpara ome berewe. Ni sangbana gipai re, Samusona aimi aFereseto bara gere ni dunguyo susi gu nadu mbata.

16. Ginipai rengbe ani ka wirikaha ti ga Samusona ingahe?

¹⁶ Wa vura duhe nga Samusona agbiatiko na gbegberẽ sangbana gako mangapai, ko aambunga asada ka manga gupai Yekova akpinyemuhe te. Ka si vura du nga ani mangi ingahe na i ki fu zahe furani watadu ani ki zanga gaani amamu, si aidanga ani mbu asada ka manga gupai Mbori akpinyemuhe te. Oni tingidi gupai nga, Yekova regerege ka mbupai furani. (Tam. 103:​8-10) Ka ani vura manga ingahe, Yekova ima rengba ka fu ome furani ani mangi gupai ko aida ani mangihe kina wai ko amangihe fu Samusona.

17-18. Tipagine du gu kpiapai nga ga Michael tini nipa wasa foro? (Oni bi sura a.)

¹⁷ Ani bingo gu kpiapai nga ga gu paranga wirina du rimoko nga Michael. Ko aamangasunge kakaka tingba ga Yekova sunge, ko angia moundo abaakumba na ni bazakigene.  Si nafu kina gberãrago nga, ko amangi ingahe na ni sangbanaha, ko azanga gako amomu rogo dungurati. Ko aya: “Dakuti gu regbo re, mi adu na dungu apai mi aamangaha tingba gimi sunge fu Yekova. Wakina ikpiro gumba, mi abi tire nga ka mi mangingo sunge berewe fu Yekova te. Mi aaberãnga gupai nga ko rengbe ka mbu re te, ono mi aabaka bangire nga singia gimi pagume na ko kina wai si adu mbata, na mi aabaka bangire singia mi adu na rengba berewe ka mangasunge fuko wai mi anaamangaha mbata.”

¹⁸ Si nipa ngbarago tie nga, Michael aambunga manga asadatise te. Ko ape gu kurapai nga: “Mi amoiberã re tipa mbakada gimi pagume dagba tire na Yekova ni kusuko mi kpotore yo fuko rogo kparakpee yo, kini mangi wisigopai na kini berẽkuriipai.” Fuo bete regbo kusa, Michael agbia gako amomu berewe rogo dungurati. Ko namangasunge awere ni bakumba na ni bazakigene. Ko aya: “Gu undo na ngarasaro mi aagbiaha gbe be abaakumba, aima undo re mi ini gupai nga Yekova nakpinyemu re kindi. Mi ima rengba ka mangasunge awere berewe rogo dungurati na gigiri sangbakpotoreyo. Gi kpiapai re ima yugo gupai fere nga Yekova nambupai fu gu boro mangi ndikidi saberã.” Ani ima rengba kadu na gu kido nga Yekova nika mangasunge amanga na ani na ki fu maku furani a, ka si vura du nga ani mangi aingahe, gupai si aidaha nga ani mbakadi gaani agene na kini ndu kumbatayo kaa kido kutiko.—Tam. 86:5; Snz. 28:13.

19. Waigu ga Samusona kpiapai nanyakasi ro?

¹⁹ Rogo gi kekeapai re, ani fugu bete gu iiriwopai namangi rogo ga Samusona raka yo. Ko angianga rengberengbe boro te; ono ko ambunga manga ome tipa ka iriso Yekova te, zavura tingbafuo gu ingahe ko amangihe na Derira. Na Yekova andu kindi kumbatayo kaa mangasunge na ko. Mbori aima mangasunge na Samusona berewe ngba iiriwo gene. Ko aabi ko kindi ni gu boro nadu na nyanyaki idapase, na i ki moi rimoko ku dagba gu ruru aboro yo du pa yo rogo AEbere kapita 11. Nairiwo wai duhe ni pangbarago ka ino gupai nga ani na iriso gu barani du ngbangbaturũ yo nga gu ko du na nyemu ka undo rani gbe, ho ani agbiatirani ni na akpakarapai na kini idi na gako undo! Wakina Samusona, ani zungadi Yekova nga: “Mo tíngidi pa re, mi nazungadi ro, mo nyákasi re.”—Abasa. 16:28.