1-2. Tipagine rengbe gu kura averesi nga ga Ziazia Kekeapai kada ti ni na nyanyakipaha furani gbe ho apai aˈariatihe ni rogo gaani raka yo?

 HO ABORO amanga rogatise ni, dedede bakumba namanga gumbapai fuyo nga gu du tipa rogatise. Agu apai i asakapai tipaha rogo gu gumbapai re ninaadunga ni vovoho fu yo te. Ono tona ti gu regbo re ka ndu kumbatayo, agu atingidapai re nadu na nyanyakipaha fuyo gbe. Tipagine? Bambiko i nikaa mangasunge na ni wangia yo arogotise.

² Kina gu bangisapai re du tipa agu arogotise nga aKristano ho i ada ni ni avunguagude. Tipa dungu agarã, i aima digo nigi dungu agumbapai tipa sonosa agude. Ono awere tie, agu arugute du rogo agu agumbapai re nadu na nyanyakipaha fuyo gbe. I nika vunga wiriyo nga gu ru si aida i sonosi ru. Nairiwo gu riko bakere tindiro re! Sidu, ho apai aˈariatihe ni rogo gaani raka yo, gu kura averesi naye kada na nyanyakipaha furani. Gere du nga ndupai sa airisi Yekova ageda Ziazia Kekeapai ti ni, na kini berẽkuriihe “dedede” rogo gayo raka yo naabaha a wa i apehe fu agu abakindo nangia ga aYisaraere yo i mangihe.—Pa Rug. 17:19.

3. Ginipai ani nika sakapai tipaha rogo gi kekeapai re?

³ Avunguagude oni na bakere momu sa dagba amomu yo rengbe Kristano kadu na ni, nga ka yugopai fu awironi tipa Yekova. Ono si naida oni mangi gu kurapai amanga susi gu gbua nga kaa fu kina inohe fuyo tipa Mbori. Oni naida ka undo awironi i kpinyemu Yekova dudunguro. Ginipai rengbe oni ka mangaha tipa ka rimiso nyemu Yekova ku ngbadu awironi yo? Rogo gi kekeapai re, ani nika sakapai tipa bangua arengo nga ga Baibiri biama nga gu rengbe ka undo roni wangia oni avunguagude. (2 Tim. 3:16) Ani nika bi wai a kura aKristano nga avunguagude nagbia undo ti mangapai kuti agu arugute nga ga Baibiri.

4. Gini bambata rugute sa rengbe ka undo avunguagude i rimisi nyemu Yekova ku ngbadu awiriyo yo? (Yakoba 1:5)

⁴ Bambata rugute: Oni gbata ga Yekova rugapai. Oni sana Yekova ko fu tatamana furoni tipa oni undo awironi i sonosi nyemuse tipa ko. (Oni gedi Yakoba 1:5.) Ko nga gu yangada wene Boro rengbe ka fu arugute. Badungu nduapai duhe ti ni wo. Ani makianga pai tipa agu ue. Bambatapai nga, Yekova ima du na bakere inohe kisusi nibi padu ni vungugude. (Tam. 36:9) Na ue pai nga, agu arugute nga ga tatamana ko afuhe naye na aundo ti aregbo dũ.—Yes. 48:17.

5. (a) Gini ahe nga ga toro ga Yekova riigbu nakusihe tipa si undo avunguagude? (b) A wa i nayuguhe rogo vidio, ginipai mo nawirikihe ti gu gene Wiriba Amorim gbiati diako asonosi awiriyo ngbaha?

⁵ Vurube Fugo Yekova na gako riigbu, ko nafu badungu ariahe nga ga toro du mburuhe rii Ziazia Kekeapai nga gu rengbe ka undo roni oni sonosi awironi i kpinyemu Yekova. (Mt. 24:45) Ni kpiapai, oni nika bi arugute nga gu rengbe oni ka mangapai kutini rogo gu kekeapai ninaakura timburu kuraha nga “Help for the Family,” nga gu i aima digo ni gbingbida ha rogo gu magazini nga Awake! tipa dungu agarã, na si awere kinaho rii wege rogo gaani bangiriba nga ga Internet. Berewe a, badungu avidio duho i nakusihe rogo jw.org du na sasana aboro rogoho gbiati mangimangi akpiapai nga gu rengbe ka undo avunguagude i mangipai kuti ga Yekova arugute wa i asonosa awiriyo. *—Snz. 2:4-6.

6. Waigu kura baagude sa abi agu arugute ko gbiati diako agbiaha be ga Yekova riigbu?

⁶ Badungu avunguagude aima yugo gayo tambuahe tipa gu undo Yekova afuhe yo vurube gako riigbu. Baagude du rimoko nga Joe aya: “Sonosa agude biata rogo rengo yo nga taatapai te. Ani na diare naamanga kparakpee fu Yekova ti aregbo dunduko tipa ko undo rani. Na ani anaabi gupai dedede nga, kekeapai watadu vidio anikuru kina boro ti wene regbo tipa ka undo rani ani mangipai kuti gu kpakarapai ani anidu rogoho. Ani aima digo ni kido ti aregbo dunduko kina kuti ga Yekova arugute.” Joe gbiati diako bi gupai nga gu kekeapai  gbiati avidio re naundo awiriyo i mbedi na Yekova.

7. Tipagine duhe ti ni ni nyanyakipa pai fu avunguagude i mangi ome tipa ka maa wene kpiapai? (ARomo 2:21)

⁷ Ue rugute: Oni du ni wene kpiapai. Agude ninaabi agu apai sirisiri avunguyo amangaha na dedede, i naawirika gayo kpiapai. Rengo ngaha nga, anga vungugude ho du ni rengberengbe ni te. (Rom. 3:23) Ono tie, si naida avunguagude mangi asadatise wa rengbe ome yo na ni tipa ka maa wene kpiapai fu awiriyo. (Oni gedi ARomo 2:21.) Kura baagude sa agumba gupai tipa agude nga: “Agude wakina katoo, i nadia agu asino nga ga agu aboro du patiyo dunduko.” Ko agbia kurapai kutini nga: “Ho ani amanganga agu apai ni dunduko ani ayugoho fuyo ya, i ima rengba ka gumbapaha furani.” Sidu tie, ka ani aaida awirani kpinyemu Yekova, si naida gaani nyemuse tipa ko du ni nyanyakihe na ki du ni yuguyuguhe.

8-9. Ginipai oni awirikaha ti agu apai Andrew gbiati Emma agumbaha?

⁸ Badungu agene duho rengbe avunguagude ka yugopai ngbaha fu awiriyo tipa i kpinyemu Yekova. Oni bingo gupai paranga wirina du garãko nga 17 nga Andrew apehe: “Ti aregbo dunduko, avungure ninaanyakasapa wai fere nyakipa kparakpee. Ayuru dunduko, Buba ninaamanga kparakpee na mi, ka si vura du nga mi niima manga gimi kparakpee nitire vurũ. Avungure naagumba gupai furani ti aregbo dũ nga: ‘Oni ima rengba ka fura fu Yekova bara dunguhe wa oni aidaha.’ Bambiko gupai re, kparakpee ima da awere na nyanyakipa ha fere, si taata fere awere ka manga kparakpee fu Yekova na kini biko wa gu Buba niima kpinyemu re.” Avunguagude, oni naatingida gupai ti aregbo dũ nga, gaoni nyemuse tipa Yekova ima rengba ka undo awironi i kpinyemuko a.

⁹ Ani wisigingo gu kpiapai a nga ga Emma. Ho bari ambuyo ni na kporo ko aima dia bakere bape be dungu aboro si aaida nari karagaha. Emma aya: “Dungu aregbo anidu kinaho marã anidu be nina gbua tooni ono ri anaafura dedede tipa wai Yekova angerafuo gako amoyambu. Mi anaabi gu gene abi ri aaraka gari raka ngbaha nga gu nayugo gupai nga ri aima ida nzunzu kutini. Nina anaamanga gupai ri ayuguhe fere.” Ginipai ani awirikaha? Avunguagude ima rengba ka yugopai na gayo kpiapai zavura ho du yo ni rogo akpakarapai vurũ.—Gara. 6:9.

10. Gini amomu badungu agu aYisaraere nangia avunguagude adu na ni beyo tipa kaa fura na awiriyo tipa Yekova? (Pa Fu Rugute ni Ue he 6:6, 7)

¹⁰ Biata rugute: Oni naafura na awironi dedede. Yekova arugu agu aYisaraere nadu mbata i naayugopai fu awiriyo tipa ko dedede. (Oni gedi Pa Fu Rugute ni Ue he 6:6, 7.) Agu avunguagude re aima du na dungu amomu rogo uru yo tipa kaa fura na awiriyo na kini rimisi nyemu Yekova ku ngbaduyo yo. Ni kpiapai, paranga Yisaraere aima rengba ka dia dungu asaa kaa undo bani ti rũko ahe watadu keahe. Dawirini aima rengba ka dia bakere asaa rogo uru yo kaa undo nani ti rungo ahe, tuko ahe, gbiati kura asunge nga ga kporo. Wa avunguagude gbiati agude anaamangasunge kina sa, i aima rengba kaa fura tipa dungu nyanyakipa apai. Ni kpiapai, i aima rengba ka fura tipa ga Yekova wenesino na wai ko aundo gayo ngbadimokporo.

11. Gini momu du agu aKristano nga avunguagude na ni tipa kaa fura na awiriyo?

¹¹ Areme, raka kia ti wai si adu mbata. Rogo dungu aringara, avunguagude gbiati agude arengbanga ka dia regbo kadu wa sa rogo uru yo naabaha te. Avunguagude rengbe kadu basunge yo na agude kidu sukuru yo. Sidu, si naida avunguagude mangi asadatise ka gbia regbo  tipa wa ka i rengbe kaa fura na awiriyo. (Ef. 5:15, 16; Frp. 1:10) Gu irisombori nga ga aborokporo nafu gu ngbatunga momu re. Paranga wirina du rimoko nga Alexander aya: “Ti aregbo dunduko buba ninaamanga mbakadapai tipa gu irisombori nga ga aborokporo, na ko ninaaidanga ai pai gberesipa gu regbo ani adiaha kina sa re te. Tingbafuo gu wisigopai re, ani naadia regbo kaa fura.”

12. Ginipai si aida bariikporo asadi ka mangaha ti regbo gu irisombori nga ga aborokporo?

¹² Ka si du nga mo nga bariikporo, ginipai rengbe mo ka mangaha ka sa gu irisombori nga ga aborokporo tipa awiro gbia ngbarago agbia ti ni? Si angba gbe ka oni wisigi gu gaani vovo buku kina sa na awironi nga Mo Raki Nyeanye Kindi na Ngbarago! Gu wisigopai re nika fu bawene momu tipa wene fugodagbase. Ka oni aida gupai nga awironi pekepa agu apai i aberãha na pa gayo abakabangirise furoni, sidu, ka oni mangingo sunge na gu regbo nga ga gu irisombori nga ga aborokporo re tipa kaa bisira yo watadu ka rugayo ya. Na ka oni asadingo ka zinga ka si du nga awironi napeka gayo abipai nga gu adunga na ngbanya kuti gu bangua arengo nga ga Ziazia Kekeapai ya. Kuba gure, oni du na ngbarago nga i nape kina boro rengo tipa agu apai i aberãha, na oni ki ngarasi yo i naakusuko agu apai du ngbaduyo yo zanga gunde. Oni rengbe ka undo awironi sa kina gu ka oni ini wai nzunzu i aberã.

13. Gini kura amomu berewe du avunguagude na ni tipa ka undo awiriyo i mbedi na Yekova?

¹³ Avunguagude, oni gbata amomu rogo uru naabaha tipa ka undo awironi i mbedi na Yekova. Si aidanga oni sungu asungo ka pido kina regbo wisigo Baibiri tipa ka yugopai fuyo tipa gaani Mbori nyemuse te. Oni bingo gupai nagude du rimori nga Lisa apehe: “Ani namangasunge na agu ahe du pati rani dunduko ka yugopai fu awirani tipa Yekova. Ni kpiapai, ho gaani ango amanga gupai ni nasa gupai nga awirani momu, ani nape gupai fuyo nga si nayugo gupai nga Yekova nga Mbori ngbarago na ko nasaha furani taata ani du na ngbarago na kini gbia ngbarago ti gu weneapai namanga a.”

14. Tipagine duhe ti ni ni nyanyakipa pai fu avunguagude i undo awiriyo i sia abakure nitatamana? (Asanza 13:20)

¹⁴ Biama rugute: Oni undo awironi i sia wene  abakure. Fugo Mbori nayugo gupai ayugo ziazia nga, abakurearani ima du na maapai kurirani—singia wene maapai watadu gbegberẽhe. (Oni gedi Asanza 13:20.) Avunguagude, ya mo oni ini ada nga abakurea awironi? Ya mo oni abingo yo na ki di bete regbo na yo? Ginipai rengbe oni ka mangaha tipa ka undo awironi i zi bakure na agu aboro nakpinyemu Yekova? (1 Kor. 15:33) Oni ima rengba ka undo awironi i zi wene abakure ni yamba oni agu aboro du na wene pagume na Yekova i ye ku kpuroni oni gbiati awironi mangi apai na yo.—Tam. 119:63.

15. Ginipai rengbe avunguagude ka mangaha tipa ka undo awiriyo i naazio wene abakure?

¹⁵ Baagude du rimoko nga Tony napepa gupai ko gbiati diako amangihe tipa ka undo awiriyo i zi wene abakure. Ko aya: “Tipa dungu agarã, mi na diare aima yamba dungu awirina nibakiakia parangayo na sosono yo ku kpurani. Ani ninaari riahe kina sa na ki nimangi gu irisombori nga ga aborokporo kina sa. Gere nga gu bakere gene rengbe boro ngbaha ka ino agu aboro nakpinyemu Yekova na kini irisiko na ngbarago. Si adu nipa maku furani kaa dia ababi adungurati, amokedi gbiati kura aboro ku kpurani. Awirani ima wirikapai gbe ti agu akpiapai i apekehe, gu kakaka nyemupai i ayuguhe, na gu kakaka sunge i amangihe ti ngba ga Yekova sunge, agi apai re dunduko naundo awirani i mbedi na Yekova.” Avunguagude, oni dinga berã adia ka undo awironi i naazio wene abakure.

16. Ginipai rengbe ka manga ka gude ya ni aidanga ka iriso Yekova berewe te?

¹⁶ Na ka si du nga, zavura agu aome dunduko mo namangihe, kura wiro sa kini ya, ni aidanga ka iriso Yekova te? Ka mo danga kuti gu digidopai nga mo nga gu vungugude adunga na diabese ya te. Yekova ima fu gu gamahe furani dunduko kodihe na wiro nga ga ranirii—nga tandu siapai, ka sia ka iriso Mbori watadu ka zanga irisoko. Ka wironi diberã ka mbu Yekova, ka mo mbunga gu maabangirise nga rogo kura uru sa ni akaraga tini akaraga ya. Oni tingidipa gu sanza du tipa ingiingi paranga. (Rk. 15:11-19, 22-24) Gu paranga re amangi dungu gbegberẽ apai, ono ti yangaraha  ko akaragatiko. Kura aboro rengbe ka ya, “Gure gbua nga sanza. Ya mo wire rengbe ka karaga tini berewe fuo Yekova?” Ii, ni ima rengba ka karaga tini! Nirengo, gere nga gupai namangi tipa gu paranga du rimoko nga Elie.

17. Waigu ga Elie kpiapai angarasa roni?

¹⁷ Elie ape gupai tipa avunguko nga: “I aima manga ome gbe ka rimiso nyemu Yekova ku ngbadureyo gbiati Fugoko nga Baibiri. Ono tie, ho mi ada ni ni paranga gude, mi atona ka samungu.” Elie atona ka raka gu raka nga ga biriki, na ko aima ká agu aome dunduko avunguko aamangaha tipa ka undoko rogo toro yo. Tingbafuo ko guari kporo, ko arimisi tiko kurogo gbegberẽ mangaapai. Wa si avura du wo, ti kura aregbo, ko anaasakapai asaka tipa Baibiri na boro sa dagba abakureako. Elie aya: “Kina wai mi anaafura tipa Yekova ni bakerehe fu bakureami, kina wo mi atona ka berãpa Yekova ni bakerehe gbe. Yeeye, gu tunga rengo nga ga Baibiri naadu ngbadureyo nga gu avungure amangisunge kakaka ka rũhe yo ka si asonanga ya, atona kaa sona.” Fuo bete regbo kusa, Elie akaraga tiko ku rogo rengo yo berewe. * Oni berẽnga pa gu ngbarago avunguko arengbe kadu na ni nga, i atona yugopai fuko mbuko kindi tooni tipa ko kpinyemu Yekova!—2 Tim. 3:14, 15.

18. Waigu oni abi agu avunguagude namangasunge nyanyaki ka yugopai fu awiriyo tipa i kpinyemu Yekova?

¹⁸ Avunguagude, i ima fu bawene momu furoni nga ka sonosa vovo rikaaboro nga airisi Yekova. (Tam. 78:4-6) Taata sunge nga gipai re te, ani natambua roni nzunzu tipa gu nyanyaki sunge oni amangaha tipa ka undo awironi re! Ka oni andu kindi kumbatayo kaa manga bakere asadatise ka undo awironi i kpinyemu Yekova na kini yugupai fuyo i gisangbako, oni ima rengba kadu na gu kido nga gu Barani du ngbangbaturũ yo nga boro nyemuse nika duadu na ngbarago.—Ef. 6:4.