1. Gini nyanyakipa diaberã si aida aboro dunduko mangihe?

 AREME, nyanyakipa diaberã kinaho si aida aboro mangihe. Ya mo i asongoda Yekova Mbori ni gu Bazogo rẽ ka zoga zegino, watadu i nika songoda gbegberẽ vurako nga Satana Bakitingbanga? Aboro dunduko si aida i sia da i nika songoda ni, i arengbanga ka nye bebere rago gbua te. Gu diaberã i nika diaha nika yugoho singia i araka nyeanye kindi watadu i arakanga te. (Mt. 25:31-33, 46) Ti regbo “bakere gberãngbi” i nika nogodahe tiyo singia tipa bata watadu tipa gbarasahe.—Yugo. 7:14; 14:9-11; Yeze. 9:4, 6. 

2. (a) Ginipai AEbere 10:35-39 angarasa rani ani mangihe? (b) Waigu rengbe gu buku nga Yugoti ka undo rani?

² Oni gedi AEbere 10:35-39. Ka mo sia ka songoda gu zogarago nga ga Yekova, mo ima manga gu diaberã nga ga tatamana. Awere, mo na nyemu ka undo kura aboro i mangi wene siapai. Mo ima rengba ka mangasunge na gu pangbanga du rogo gu buku nga Yugoti tipa ka undo yo. Gu bawene buku re nayugo gupai nika manga agu aboro nasoga Yekova, ono si nayugopa gu bawene amaku a ko nika fuhe fu agu aboro nasongoda gako zogarago niruru yo. Si naida aida a ani wisigipai tipa gi nyanyakipa arengo re. Ka ani mangihe wo, si nika nyakasa gaani diaberã tipa ani naandu kindi kumbatayo kaa iriso Yekova. Kurigure, ani ima rengba ka mangasunge na gupai ani nawirikihe tipa ka undo kura aboro i mangi wene siapai na ki nye kutini.

3. Ginipai ani nika sakapai tipaha rogo gi kekeapai re?

³ Rogo gi kekeapai re, ani nika wisigopai tipa agi asanahe re: Ginipai nika manga fu agu aboro nasongoda ga Mbori zogarago? Ono ginipai tigaha nika manga agu aboro sia ka songoda zamba nyarinde, a wa i nasakipai tipaha rogo gu buku nga Yugoti?

4. Gini badona aboro gu mokedi nangia Yoane abihe si naru na Yesu ngbangbaturũ yo?

⁴ Rogo gu yuguyugupai i ayuguhe fu gu mokedi nangia Yoane, ko abi abadona aboro ue nga aguyo naasongoda ga Yekova zogarago na kini gbia agu amaku nga ga nyenye unga. Rogo gu bambata badona, aboro adu rogoho nga 144,000. (Yugo. 7:4) I adi yo auru kpotosende no i ndu kadu rogo zogarago watadu Kindo na Yesu ngbangbaturũ yo. I nika zogarago na ko ku auru kpotosende. (Yugo. 5:9, 10; 14:3, 4) Rogo gu yuguyugupai re, Yoane abiyo i naru na Yesu rii Bagangara Siona ngbangbaturũ yo.—Yugo. 14:1.

5. Ginipai nika manga fu gu yangara mbedimbedi aKristano nga 144,000?

⁵ Natona ti rago amokedi kada ku awere, i aima digo nisia akutu aboro i da ni papara agu aboro du bangeyo nga 144,000. (Rk. 12:32; Rom. 8:17) Ono tie, i aya fu Yoane wẽ, kina yangara mbedimbedi aKristano watadu tooni badona nga ga aboro nika du ni ungayo auru kpotosende ane ti yangara arame. Gi “yangara” yo re nika gbia gayo yangara “dikadika he” nga gu nayugo gupai nga Yekova ima ida na yo mbata fu bakere gberãngbi. (Yugo. 7:2, 3; 12:17) Fuo bete regbo ti regbo bakere gberãngbi, i nika dia gi yangara mbedimbedi yo re ku ngbangbaturũ yo i kodi tiyo na gu yangara yo du yo nga 144,000, nga aguyo naima kpi niruru yo. Yo du i nika zogarago ni na Yesu rogo ga Mbori Kindo.—Mt. 24:31; Yugo. 5:9, 10.

6-7. (a) Gini kura badona aboro berewe Yoane abihe, na ginipai ani awirikaha tipa yo? (b) Tipagine si aida yangara mbedimbedi aKristano gbiati “bakere rimbasa aboro” naangera kumbatayo ti ni tipa digisidigisi gupai du rogo Yugoti kapita 7?

⁶ Tifuo Yoane bi gu badona nga ga ngbangbaturũ, ko abi “bakere rimbasa aboro.” Baibiri apenga pa gu bange aboro du rogo gi badona re te, si kia ti gu nga ga 144,000. (Yugo. 7:9, 10) Ginipai ani awirikaha tipa yo? Yoane aya: “Agi yo re nga agu yo naakuru rogo bakere gberãngbi, i azundu gayo aremu, ki vurusi he ni kure Wiri Kandoro.” (Yugo. 7:14) Tingbafuo gi “bakere rimbasa aboro” re bati ti regbo bakere gberãngbi, i nika raka auru kpotosende ane kini gbia ngbarago ti bawene amaku.—Tam. 37:9-11, 27-29; Snz. 2:21, 22; Yugo. 7:16, 17.

⁷ Si ngia i ima sia rani ani ga ku ngbangbaturũ yo watadu ani nye kina auru kpotosende ane, ya mo ani nabi tirani rogo gupai i nasakihe du ni kekehe rogo Yugoti kapita 7? Si naida aida ani bi tirani rogoho. Nairiwo gu bawene regbo nika ngiaha fu agu abadona aboro ue nga ga ga Mbori amoyambu re! Ani nika du na bakere ngbarago nga ani asia ka songoda ga Yekova zogarago. Gini kurapai berewe gu buku nga Yugoti apehe furani tipa bakere gberãngbi?—Mt. 24:21.

8. Waigu bakere gberãngbi nika tona, na waigu badungu aboro nika mangapai?

⁸ A wa i agumbaha rogo gu kekeapai nasusi, barambeda, aboro birĩ-zogarago nga ga gi zagino yo re nika zubo Babera Duna Bakere Ome Ti Ni nga bariwara ngbii ziree pambori. (Yugo. 17:16, 17) Gi mangapai re nika ngia tonatona bakere gberãngbi. Ono ya mo badungu aboro atona kaa iriso Yekova ni sangbana gipai re? Oó. Kuba gure, Yugoti kapita 6 nayugo gupai nga ti gu kere regbo re, agu aboro airisongo Yekova ya nika gbata bandahe be aboro birĩ-zogarago gbiati gu sunge bagaahe nga ga gi zegino re, nga agu apai i aringbisaha kuti agangara. Wa duhe nga i asongodanga ga Mbori Kindo te, Yekova nika bi agu aboro re nga i nga asogoko.—Rk. 11:23; Yugo. 6:15-17.

9. Waigu ga Mbori aboro nika du kia ti regbo bakere gberãngbi, na sangbanaha nika ngia gine?

 ⁹ Ni rengo, ga Yekova ruru amoyambu nika du kia ti gu kere regbo nika ngia ga bakere gberãngbi re. I nika ngia gu yangara badona aboro auru kpotosende ane nikaa iriso Yekova Mbori kindi na ki ká ka songoda “nyarinde.” (Yugo. 13:14-17) Pa ru yo nyanyaki nika sa gupai nga agu aboro nasoga Yekova zingi. Ni sangbana gipai re, gu badona nga ga rikaaboro nika zubo ga Mbori aboro rogo kpotosende dunduko. Baibiri nayamba gi zubohe re nga si nga gu zubohe nga ga Gogo boro Magogo.—Yeze. 38:14-16.

10. A wa i nagumbaha rogo Yugoti 19:19-21, waigu Yekova nika mangapai tipa gu zubohe nika du kuti gako aboro?

¹⁰ Waigu Yekova nika mangapai kuti gi kere zubohe re? Ko nape gupai furani nga: “Gi ngariangaria zinga adu ni zingisizingisi he.” (Yeze. 38:18, 21-23) Yugoti kapita 19 nagumbapa gupai nika manga fuo gure. Yekova nika keda Wiriko tipa ko banda Gako aboro na ki dibe avura yo. Rogo gi zubohe re, Yesu nika kodatiko kuti “agu arikavura du ngbangbaturũ yo”—nga ruru amaraika gbiati agu aboro du bangeyo nga 144,000. (Yugo. 17:14; 19:11-15) Sangbana gi vura re nika ngia gine? I nika gbarasa agu aboro dunduko na agu abadona nasoga Yekova!—Oni gedi Yugoti 19:19-21.

11. Gini nyanyakipa pai du rogo gu buku nga Yugoti?

¹¹ Oni berẽnga pa wai gu ruru aboro nika du auru kpotosende ane nika du, nga aguyo nika bata ti gu regbo Mbori nika gbarasa gbegberẽ aboro dunduko! Nairiwo gu regbo ngbarago nika ngiaha re! Wa vura duhe nga bakere ngbarago nika du ngbangbaturũ yo ho i nika gbarasa Babera Duna Bakere Ome Ti Ni ni, gu kura pai kina ho berewe nika ye na bakere ngbarago. (Yugo. 19:1-3) Si nga nyanyakipa pai du rogo gu buku nga Yugoti nga—“rago diade nga ga Wiri Kandoro.”—Yugo. 19:6-9.

12. A wa duhe rogo Yugoti 21:1, 2, gini regbo gu rogatise nga ga Wiri Kandoro nika manga ti ni?

¹² Gini regbo diadee nika manga ti ni? I nika dia agu aboro dunduko du bangeyo nga 144,000 ku ngbangbaturũ yo mbata fu i so gu vura nga Aramegido. Ono tie, anga gure nika ngia regbo tipa gu rogatise nga ga Wiri Kandoro te. (Oni gedi Yugoti 21:1, 2.) Gu rogatise nga ga Wiri Kandoro nika manga tingbafuo so yo gu vura nga Aramegido na ki gbarasi avura Mbori dunduko.—Tam. 45:3, 4, 13-17.

13. Ginipai gu rogatise nga ga Wiri Kandoro ayugoho nzunzu fu agu aboro du rogoho?

¹³ Ginipai gu rogatise nga ga Wiri Kandoro ayugoho nzunzu fu agu aboro du rogo yo? Rogatise nga gupai naye na kumba gbiati dee i du kina sa, wakina gure a, gu rogatise nga ga Wiri Kandoro nika ye na gu Bakindo nga Yesu Kristo gbiati gu dee ‘nadia kumbari’ nga agu aboro du bangeyo nga 144,000 i du kina sa. Gi nyanyakipa pai re nika sigira gu vovo zogarago nika zogarago ku auru kpotosende ane tipa agarã 1,000.—Yugo. 20:6.

14-15. Ginihe Yugoti kapita 21 aringbisa agu aboro du bangeyo 144,000 kutini? (Oni bi gu sura duti kpotoho.)

¹⁴ Fuo gure, Yugoti kapita 21 naringbisa agu aboro du bangeyo nga 144,000 kuti bawene bakporo i ayambaha nga “vovo Yerusarema.” (Yugo. 21:2, 9) Gi bakporo re na amburu he 12 nga ambia “na rimo bawe na ue nga ga agu amokedi bawe na ue nga ga Wiri Kandoro yo.” Tipagine gipai re angba ti ni ti Yoane? Bambiko ko abi rimoko ni kekehe rii mbia sa dagba  agu ambia re. Nairiwo gu bakerepa momu nangiaha re!—Yugo. 21:10-14; Ef. 2:20.

¹⁵ Gi bakporo re angeranga wa ai kura bakporo te. Gaha gene bakporo ni ziazia dahabu, angbadimoho 12 ki ngia ambia fongo, i fongo gaha angapa na amburu he ni agu ambia dunduko kiipa genoho gbe gbiati ruru ringbisaahe. (Yugo. 21:15-21) Ono Yoane abi gupai nga he kinaho naakpa kindi! Gere nga gupai Yoane apehe: “Mi abi nga yekaru rogo ho te, bambiko Gbia Mbori du na tandu apai dũ, na Wiri Kandoro, nga gaha yekaru. Bakporo adu nga na zingo ima uru, na zingo ima diwi ka hasa ri he te: bambiko ga Mbori taarimo nahasa rago yo, Wiri Kandoro nga gaha tara.” (Yugo. 21:22, 23) Agu aboro nika du rogo Vovo Yerusarema nika du na Yekova. (Eb. 7:27; Yugo. 22:3, 4) Rogo gi gene re, aYekova na Yesu nga gu yekaru du rogo gu bakporo re.

16. Gini weneapai nika manga fu aboro ti regbo Zogarago Tipa Agarã Kutu nga ga ga Mbori Kindo?

¹⁶ Si ni bawenepai fu mbedimbedi aKristano i berẽpa gi bakporo re. Ono tie, si naida agu aboro du na maabangirise ka raka auru kpotosende ane duadu a na nyemu gu bakporo re. Ti regbo Zogarago Tipa Agarã Kutu nga ga ga Mbori Kindo, Vovo Yerusarema nika ye na dungu amaku ku auru kpotosende. Yoane abi agi amaku re si nifu wa di nga ga “ime unga.” Na ‘angua unga’ adu ti ngbadi kubani na kubani nga gu naakusa akpehe “tipa husa arikaaboro.” (Yugo. 22:1, 2) Agu aboro dunduko nikaa raka ti gu regbo re nika du na momu ka gbia undo ti gu weneapai re. Tooni tooni, agu aboro dunduko nagiasangba Yekova nika da ni rengberengbe yo. Sidu tie, kaza adunga berewe na ima, na aume be rungo te.—Yugo. 21:3-5.

17. A wa Yugoti 20:11-13 ayugoho, ada nika gbia undo ti Zogarago Tipa Agarã Kutu?

¹⁷ Ada nika gbia undo ti gi weneapai re? Gu bambata aboro nika gbia undo nga gu bakere rimbasa aboro nika bata ti regbo Aramegido na agu agude dunduko i nikaa vunga ra rogo vovo zegino. Ono Yugoti kapita 20 nafu gu kidohe a nga, i nika zingisa kpikpi aboro azingisa. (Oni gedi Yugoti 20:11-13.) Gu “ruru aboro” nakpiki bakuru kusayo kodihe na gu “iraira yo” nga aguyo naagbianga momu tipa ka wirikapai tipa Yekova ya, i nika zingisayo azingisa i raki auru kpotosende ane. (Amo. 24:15; Yo. 5:28, 29) Ya mo gipai re nayugo gupai  nga aboro dunduko i nika zingisayo i raki auru kpotosende ane ti regbo Zogarago Tipa Agarã Kutu? Oó. Gu gbegberẽ aboro naima ká gu momu nga ga iriso Yekova mbata fu i kpi, i azingisanga yo te. I aima gbia momu na i ki ima yugo gupai nga i arẽnga ka raka rogo Paradizo auru kpotosende ane te.—Mt. 25:46; 2 Tesa. 1:9; Yugo. 17:8; 20:15.

18. Apai nika du wai auru kpotosende ti digido agarã 1,000?

¹⁸ Ti digido agarã 1,000, agu aboro dunduko nikaa raka auru kpotosende nika du ni rengberengbe yo. Gu ingapai ani adihe ti Adamu adunga berewe na maapai kurii agu aboro nikaa raka te. (Rom. 5:12) I nika dia gu motiwa nga ga ga Adamu ingapai kusayo dunduko. Sidu, gipai re nayugo gupai nga agu aboro nika du auru kpotosende nika du ni “ungayo” bambiko i nika du ni rengberengbe yo ti digido agarã 1,000.—Yugo. 20:5.

19. Tipagine si aida yangara asada aida ti ni?

¹⁹ Ani ima ino gupai nga Yesu aima nye niruru ko fu Mbori zavura ho Satana aˈasadi ko ni vurũ. Ono ya mo rengberengbe aboro dunduko anye niruru yo fu Yekova ho Satana nikaa manga ome ni tipa ka asada yo? Aboro nibasasa si aida i karagapai kuti gi sanahe re tipa tiyo ho i nika zaka Satana ni rogo gu due zanga mburuhe ti digido agarã 1,000. (Yugo. 20:7) Agu aboro nika du niruru yo ti regbo gu yangara asada re, nika gbia nyenye unga na ni yangaraha i nika gbia ndikidi ranirii. (Rom. 8:21) Agu aboro na samungu kuti Yekova i nika gbarasa yo kusayo nyeanye kindi kodihe na Bakitingbanga gbiati gako adaimona.—Yugo. 20:8-10.

20. Ga mo bipai nga gine tipa gu wene sangbaanebi du rogo gu buku nga Yugoti?

²⁰ Gamo bipai nga gine tifuo fugo mo gu bete apai du rogo gu buku nga Yugoti? Ya mo mo na ngbarago ka bi tiro nga mo naraka ti gu bawene regbo nga ga gi sangbaanebi re? Ya mo gipai re asanga ro mo du na nyemu ka yamba kura aboro i kodi tiyo na ani tipa ziazia iriso nga ga gaani Mbori te? (Yugo. 22:17) Awere, wa ani niima sakapai tipa agu apai nika manga kumbatayo re, ani na ngbarago na ani naida ka pe kina gupai gu mokedi nangia Yoane apehe nga: “Amina. Mo yé, Gbia Yesu!”—Yugo. 22:20.