1-2. Ginipai rengbe ani kaa bakabangirani na ni tipa gaani akparakpee?

 YA MO mo abakingo bangiro nga singia Yekova nakaragapai kuti gamo akparakpee? Kangia wo duhe, mo nisaro te. Dungu awirina nga akumba na adee aima pe kina gu bangisa pai re, gbe, ho du yo ni rogo kere kpakarapai. Ka si du nga ani nambu ambu, si ima rengba kadu furani a ni kpakarakpakaraha ani bi wai Yekova akaragapai kuti gaani akparakpee.

² Ani nika fugö ndu gupai si aida ani du ti ni na gu kido nga Yekova nakaragapai akaraga kuti agu akparakpee nga ga airisiko. (1 Yo. 5:15) Ani nika sakapai a tipa agi asanahe re: Tipagine si narengbe kadu ti ni ti kura aregbo wa ka i ya Yekova akaraganga pai kuti gaani akparakpee te? Ngba gini agene Yekova akaragapai kuti akparakpee areme?

3. Tipagine Yekova aida ani kpari ti ni fuko?

³ Ziazia Kekeapai nakido rani nga Yekova imo kpinyemu rani ni bakerehe gbe na ani na nyanyakipa rani fuko. (Agai 2:7; 1 Yo. 4:10) Si nga ndu gupai ko ayamba rani ti ni ani sana ko tipa undo rogo kparakpee yo. (1 Pet. 5:6, 7) Ko naida kadu mbembedi na ani tipa ka undo rani ani mangipai kuti agu akpakarapai ani agbia tirani na ni.

4. Waigu ani aino gupai nga Yekova nakaragapai akaraga kuti agu akparakpee nga ga airisiko? (Oni bi sura a.)

⁴ Rogo Baibiri yo, ani ninaageda gupai dedede nga, Yekova akaragapai kuti agu akparakpee nga ga airisiko. Ya mo mo rengbe ka berãnga pa kpiapai? Kpiapai sa nga ga Bakindo Davide. Rogo gako raka yo naabaha, ko adu na dungu gbegberẽ avurako ti ni, na ko anaasana Yekova dedede tipa undo rogo kparakpee yo. Ti kura regbo sa, ko asana Yekova nga: “Ako Yekova,  mo gí gi kpetambuahe; mo yé turo sa gimi akpesarawati! Mo káraga pai fere ni ga yososopai na ga rurupai a!” (Tam. 143:1) Yekova aima karagapai kuti ga Davide akparakpee na ki batasi ko. (1 Sam. 19:10, 18-20; 2 Sam. 5:17-25) Davide aima rengba ka pe gupai zanga kapa nga: “Yekova du mbembedi na agu yo dunduko nakpara fu ko.” Ani ima rengba kadu a na kina gu bangisa kido re.​—Tam. 145:18.

5. Ya mo Yekova anaakaragapai kuti agu akparakpee nga ga agu airisiko naadu bakuru kusayo ngba gu gene i anaida na ni? Oni funga kpiapai. (Oni bi sura a.)

⁵ Yekova ima rengba ka zanga karagapai kuti gaani akparakpee ngba gu gene ani aida na ni. Gere nangia gupai naadu tipa gu mokedi nangia Pauro. Ko asana Mbori tipa ko di ‘kiwe tii kpotoko yo.’ Bara biata, Pauro akpari kina boro tipa gu kpakarapai nzunzu ko aagbiatiko na ni. Ya mo Yekova akaragapai kuti agu akparakpee re? Ii, ono angianga ngba gu gene Pauro aakido tipaha ya. Kuba gupai nga Yekova di gu kpakarapai re kusayo, Ko afu gu ome fuko ko aaida na ni tipa kaa ndu kumbatayo kindi kaa irisoko ni ruruko.​—2 Kor. 12:7-10.

6. Ti kura aregbo, tipagine rengbehe kadu ti ni wa Yekova akaraganga pai kuti gaani akparakpee te?

⁶ Ani ima rengba a ka gbia karagapai nga gu du kia ti gu pai ani aida na ni. Ani ima rengba kadu na gu kido nga Yekova ima ino gu wene gene nzunzu duho tipa ka undo rani. Ko ima rengba ‘ka manga pai bakere gbe si ki moi pai susi gu ani aõ.’ (Ef. 3:20) Tipa gi ndupai re, ko ima rengba ka karagapai kuti gaani akparakpee ti gu regbo watadu ngba gu gene ani aberãnga ha nga wo si nika du ya.

7. Tipagine rengbehe kadu ti ni nga si naida ani aria gupai ani akpara tipaha? Oni funga kpiapai.

⁷ Ani ima rengba ka aria gupai ani akpara tipaha tingbafuo ino ani gupai Yekova akpinyemuhe ziazia. Oni bingo gu kpiapai nga ga Martin Poetzinger. Ngbutuko tingbafuo Wiriba Poetzinger mangi rogatise, i aba ko ku bataya zizi aboro yo ti regbo gu vura nga ga Nazi. Ti tonatonaha, ko aasana Yekova tipa i kusiko bataya zizi aboro yo ti regbo vura wa ka ko ga ka ngerafuo diako na ki tona gako sunge tungusapai kaa ndu na ni kumbatayo. Ono tie, tingbafuo aposo ue, ko aabingo gopai ho naayugo gupai nga Yekova nazaka gene fuko i kusiko te. Sidu, ko atona ka manga kparakpee nga: “Yekova mo yugu gupai fere si aida mi mangihe.” Ko atona ka berãkurii pa gu kpakarapai agu awirina naadu bataya yo aasusa rogo yo. Dungu yo aabakabangiriyo tipa adiayo na awiriyo. Wiriba Poetzinger akpari  tie nga: “Yekova tambuahe foro tipa gi vovo sunge re. Mo undo re mi nyakasi awirinami na kini ngarasi yo.” Ko amangi agarã ribua ku bataya yo na kini mangi kina boro gipai re!

8. Gini nyanyakipa pai si aida ani tingidihe ho ani amanga kparakpee ni?

⁸ Si naida ani tingidi gupai nga ga Yekova ringbisapai kinaho ko aida si mangi ti gu regbo ko na ringbisipaha kutini. Gu ringbisapai re nakoda nyasariipa agu apai nyeanye kindi naye na bakere rungo areme​—apai wa gu nga gu gberãngo naye be gu mangaapai nga ga ome zegino, kaza, na kpio. Yekova nika digiso gi gako ringbisapai re vurube gako Kindo. (Dan. 2:44; Yugo. 21:3, 4) Ono tie, dakuti gu regbo re, Yekova nambu Satana kindi ko naazoga gi zegino re. b (Yo. 12:31; Yugo. 12:9) Ka si du nga Yekova nika nyasariipa gu kpakaraapai nga ga aboro awere, si ima rengba ka ngera wa ka i ya gu zogarago nga ga Satana na kina wiri diabese. Sidu, wa ani kaa sungudo Yekova ko digisi kura gako akidohe, gere ayugongo gupai nga ko nika mbu rani zanga undo te. Ani makianga bete agu apai Yekova amangaha tipa ka undo rani.

9. Waigu Yekova narengbe ka undo rani ho ani aida ka manga adiaberã ni? Oni funga kpiapai.

⁹ Ko nafu tatamana furani. Yekova nakido he ka fu gu tatamana furani ani aidaha tipa ka manga wene adiaberã. Ani naida na ga Mbori tatamana gbe ho ani aida ka manga agu adiaberã ni nika du na maapai kurii gaani raka, wa gu nga si ngia ani nye ni abakuparanga watadu ani mangi rogatise. (Yak. 1:5) Oni bingo gu kpiapai nga ga gu nakuparanga du rimori nga Maria. c Ri anaagbia ngbarago ti sunge anazakigene ti gu regbo ri agbia wirina ni kumba. Ri aya: “Wa gaani pabakure aasona kumbatayo, kinawo a ani atona ka kpinyemu tirani. Mi aima inoho nga si naida mi mangi diaberã. Mi amangi kparakpee ni bakerehe tipa gipai re. Mi aaida na ga Yekova rugapai, ono mi aima ino gupai nga Yekova amanganga diaberã fere te.” Ri abi gupai nga Yekova aima karagapai kuti gari akparakpee tipa tatamana. Ngba gini gene? Ri amangi wetekapai rogo gaani awaraga, na gipai re naundo ri ri gbia karagapai kuti agu asanahe ri adu na ni. Ri adegeturi a kuti gu wene arugute nangia ga nari. Gu rugute re aundo Maria ri wisigi gari aberãpai. Na ni yangaraha, ri adu na rengba ka manga wene diaberã.

10. Ringbisihe kuti AFiripoio 4:13, ginipai Yekova nika mangaha tipa ka undo airisiko? Oni funga kpiapai. (Oni bi sura a.)

¹⁰ Ko nafu ome furani tipa ani hipai. Kina wai Yekova amangihe fu gu mokedi nangia Pauro, ko ima rengba kafu gu ome furani ani aidaha  tipa ka hi aasada. (Oni gedi AFiripoio 4:13.) Oni bingo wai Yekova aundo wirina du rimoko nga Benjamin ko hi akpakarapai. Ho Benjamin adu ni ni wiri paranga ko na gako aborokporo aaraka rogo gu bataya nga ga ayeaye vuru Afirika. Benjamin aya: “Mi anaakpara dedede fu Yekova kini sanako ko fu ome fere tipa mi mangi gupai nafu ngbarago fuko. Yekova akaragapai kuti gimi akparakpee ni fu ko gu zereda fere nga ga berãse yo, wingbaduse tipa kaa ndu kindi kumbatayo kaa tungusapai, na awaraga nga gu naundo re mi nye nyanyaki rogo toro yo.” Ko ape kurapai nga: “Geda apangbanga tipa kura aDezire Yekova na kini ini pa wai Yekova aundo yo i hipai anyakasi gimi diaberã tipa mi nye niruru re.”

11-12. Waigu Yekova narengbe ka sia ka mangasunge na gu gaani aborokporo nga ga toro yo tipa ka karagapai kuti gaani akparakpee? (Oni bi sura a.)

¹¹ Ko namangasunge na gaani aborokporo nga ga toro yo. Rogo gu yuru naadu mbata fu Yesu fu ungako ni motumo, ko akpari kakaka. Ko akpari fu Yekova tipa ko batasi ko be gu gbarasa rimo nga gu aboro aabihe nga ko na irisa tipa rimo Yekova te. Kuba gupai nga Yekova mangi gipai re, ko aundo Yesu nikeda ko wirinako sa dagba agu awirinako nga amaraika tipa ko ye ka ngarasa ko. (Rk. 22:42, 43) Yekova ima rengba ka undo rani a ho wirinarani nayambu rani ni na terefuni watadu wirinarani ima rengba ka ye ka bi rani a. Ani dunduko ima rengba ka gbata momu tipa ka pe “wene fugo” fu akuarani aidipase.​—Snz. 12:25.

¹² Oni bingo gu kpiapai nga ga gu wirina du rimori nga Miriam. Bete aposo tingbafuo kpio kumbaku Miriam, ri asungu kporo yo nisari kidu zanga maabangirise na kidu na bakere gberãrago. Ri aakpara akpara a kindi na ri aaida ka fura na boro. Ri aya: “Ome aadu nga ti re tipa ka yamba boro te, ono mi akpari fu Yekova. Ho mi aakpara ni na kini mangi kparakpee, gi terefuni akpari. Bakumba naadu, bawene bakurearani.” Miriam agbia wasa be gu bakumba re na diako. Ri ima ida kuti gupai nga Yekova du nasa gupai nga gu wirina re yambuhe.

13. Oni funga kpiapai tipa wai Yekova narengbe ka mangasunge na agu aboro airisongo ko ya tipa i karagapai kuti gaani akparakpee.

¹³ Ko ima rengba ka mangasunge na agu aboro airisongo ko ya. (Snz. 21:1) Ti kura aregbo,  Yekova ima rengba ka karagapai kuti gu kparakpee nga ga gako aboro ni sa ko agu aboro airisongo ko ya i undo gako aboro. Ni kpiapai, Yekova asa Bakindo Arutasasata ko idihe fu Nemaya ko karaga tiko ku Yerusarema yo tipa ka undo na bungia bakporo. (Nem. 2:3-6) Areme a, Yekova ima rengba ka sa agu aboro nga aguyo airisongo ko ya i undo rani ho du ani ni rogo kpakarapai yo.

14. Ginipai ngba tiro tipa gu kpiapai nga ga Soo Hing? (Oni bi sura a.)

¹⁴ Wirina du rimori nga Soo Hing abi gupai nga Yekova aundo ri vurube gari munganga. Wiiri aambu be dungu akaza nga ga berãse. Ho ko agbiatiko ni na kere béno, ri gbiati kumbari ambu gayo sunge tipa ka ngerafuo ko. Ni sangbana gipai re, i atona ka gbiatiyo na zingo marã. Soo Hing ape gupai nga ri abi tiri nga ri arengbanga ka hi agu akpakarapai re te. Ri akusuko kpoto ri yo fu Yekova, na ki sana ko tipa undo. Gu munganga re adiberã tipa ka undo ri na gari aborokporo. Mbiko gipai re ri agbia undo be irangbii na ki gbia gu kporo naadu na ginoho kusende ka raka rogoho. Kusa, Soo Hing ape gupai nga: “Ani aima abi be Yekova rogo gipai re yo. Ko nzunzu ‘ninagia kpetambuahe!’”​—Tam. 65:2.

15. Ginipai naundo kura wirina sa tipa ri ini gupai nga Yekova aakaragapai akaraga kuti gari akparakpee?

¹⁵ Ani agbia nga karagapai kuti gaani akparakpee dedede ngba iiriwo agene te. Ono agu akaragapai ani agbiaha nga kina boro gupai ani aidaha tipa ka nye niruru rani fu gu Barani du ngbangbaturũ yo. Sidu, mo moiberãro tipa ka bi wai Yekova akaragapai kuti gamo akparakpee. Wirina du rimori nga Yoko aabihe wa Yekova aakaraganga pai kuti gari akparakpee te, ono tingbafuo gure ri atona ka ke agu apai ku sande ri aasana Yekova tipaha. Tingbafuo bete regbo, ri adi gari waraga na ki tona ka ngera rii agu apai ri akekehe na ri ki bi gupai nga Yekova ima karagapai kuti gari dungu akparakpee, na zavura gu bangiri aima go ti ni. Dedede, si naida ani di regbo ka berãkuriipa wai Yekova akaragapai kuti gaani akparakpee.​—Tam. 66:19, 20.

16. Waigu rengbe ani ka yugo idapase ho ani amanga kparakpee ni? (AEbere 11:6)

¹⁶ Ani nayugo idapase angianga kinaho sa ani amanga kparakpee ni Yekova ya, ono ni dia ani gako karagapai a kuti gaani akparakpee kugume ka si vura du kina wai vurũ. (Oni gedi AEbere 11:6.) Oni bingo gu kpiapai  nga ga Mike na diako nga Chrissy. I adu na gu sasa nga ga mangasunge Betere yo. Mike aya: “Ani afu rimorani na diare tipa ka mangasunge Betere yo tipa dungu agarã na ani akpari fu Yekova tipa gi sasa re bara dunguhe, ono i aayambanga rani te.” Mike na Chrissy adu na gu kido nga Yekova ima ino wari ko aida ka mangasunge ni na yo wenengai tingba gako sunge. I aandu kindi kumbatayo kaa manga gupai ome yo arẽ na ni, kini mangisunge ni abazakigene rogo gu ba naadu na zingo abatungusipai rogoho na kini undo gu sunge mekaarago nga ga siokrasia. Areme i namangasunge biko adungurati. Mike aya: “Yekova akaraganga pai kuti gaani kparakpee ngba gu gene ani aida na ni te, ono ko ima karagapai kuti gaani akparakpee ngba gu gene du ni bawenehe susi gu ani aberãnga ha nga ko nika mangaha wo ya.”

17-18. Ringbisihe kuti Atambuahe 86:6, 7, ginipai rengbe ani kadu na kido tipaha?

¹⁷ Oni gedi Atambuahe 86:6, 7. Gu bake papara Atambuahe nangia Davide aima du na gu kido nga Yekova aima gia gako akparakpee na ki karagapai kuti ni. Mo ima rengba kadu na kina gu bangisa kido re a. Agu akpiapai i nasakipai tipaha rogo gi kekeapai re nakido rani na gupai nga Yekova ima rengba kafu gu tatamana na ome furani ani aidaha tipa ka hipai. Ko ima rengba ka mangasunge na gu gaani aborokporo nga ga toro yo watadu agu aboro nga aguyo airisongo ko awere ya tipa i undo rani ngba kura gene.

¹⁸ Dedede, wa vura duhe nga Yekova ima rengba ka zanga karagapai kuti gaani akparakpee ngba agu agene ani aidaha, ani ima ino gupai nga ko na karagapai akaraga. Ko nika fu guhe furani ani aidaha na kina boro ti gu regbo ani aidaha ti ni. Mo naandu kindi kumbatayo kaa kpara fu Yekova rogo idapase yo, kidu na gu kido nga Yekova nika ngera angerafuo ro awere na ko ‘kini nimbisi gu nyemuhe nga ga unga ahe dunduko’ rogo gu vovo zegino nika ye.​—Tam. 145:16.