1. Ginipai badungu rani asota na ni?

 YA MO mo amangingo gu sásá nga ga toro na mo kini sota ka da ti ni? b Kangia wo duhe, mo ni saro te. Ni kpiapai, Philip aaida ka mbakada gako gene kparakpee na bange wai ko anaamangaha, ono ko aasota asota tipa ka gbia regbo ka manga kparakpee. Gu sásá Erika amoihe nga kaa da pati gu dunguratise nga ga tungusapai bangiri regbo yo; ono ri anaada kindi kusa pati dunguhe. Tomáš aasadi bara dunguhe tipa ka geda Baibiri nabaha. Ko aya: “Mi anaagbianga ngbarago ti geda Baibiri te. Mi aˈasadi he bara biata, ono mi anaadigo kina ti Pa Amotumo.”

2. Tipagine si aidanga rago gberẽ tirani ti ni ka si du nga ani moi gu sásá nga ga toro zanga ani da ti ni ya?

² Ka si du nga sásá kinaho mo ata da nga ti ni ya, ka rago gberẽnga tiro ya. Tipa ka da ti gu sásá du ni taataha, si naida na regbo gbiati nyanyaki asadatise. Gu rengo du ho nga, ka si du nga mo namanga asadatise tipa ka da ti gamo sásá, si nayugo gupai nga mo nabi gamo pagume na Yekova na nyanyakipaha na kini asadi ka fu guhe fuko du ni wenehe. Yekova nabi gu ome mo amangaha na nyanyakipaha. Ono gu rengo du ho nga, ko aidanga mo mangi gupai nga gu omero arẽnga na ni ya te. (Tam. 103:14; Mika 6:8) Sidu, ho mo amaa sasa ni, si naida mo bi gupai nga mo ima rengba ka da ti ni. Tingbafuo mo moi sásá, ginipai rengbe mo ka mangaha tipa kada ti ni? Ani sakingo pai tipa bete aberãpai.

3. Tipagine du nyemu ka mangapai ti ni na nyanyakipaha?

³ Si ni nyanyakipa pai tipa mo du na nyemu ka da ti gamo sásá.  Ho du mo ni na nyemu kada ti gamo sásá mo nika mangasunge nyanyaki tipa ka da ti ni. Gu nyemupai du ani na ni tipa ka da ti gaani sásá wakina gu wege nasa kurungba si ndu ka da rogo gu ba si andu ku rogo ho. Ka wege aaya kindi, si nawira ha wa bakama kurungba nika da ada rogo gu ba ni andu kurogo ho. Na ka gu wege re aaya na bakere ome, ni ima rengba ka da ni kina boro ipo. Wakina gure a, ka ani du na bakere nyemu ka da ti gaani asásá, si na wira wa ani da ada ti ni. Wirina du rimoko nga David du El Salvador yo aya: “Ka mo du na nyemupai mo naasada tiro nyanyaki. Mo mangi asadatise tipa ka pai du nga ho nika rugusa ro ti da mo ti gamo sásá ya.” Sidu, ginipai rengbe mo ka mangaha tipa kadu na kakaka nyemu ka mangapai?

4. Ginipai rengbe ani ka manga kparakpee tipaha? (AFiripoio 2:13) (Oni bi sura a.)

⁴ Mo mangi kparakpee tipa bakere nyemu mangapai. Yekova ima rengba ka undo ro mo du na nyemu ka da ti gamo sásá vurube gako toro. (Oni gedi AFiripoio 2:13.) Ti kura aregbo, ani namaa sásá bambiko ani ima ino gupai nga si naida ani moi sásá, na gipai re nga wenepai. Ono tie, ani ima rengba ka zanga du nzunzu na nyemu ka da ti ni. Gere nga gupai naadu tipa wirina sa du Uganda yo du rimori nga, Norina. Ri amoi gu sásá nga ri naida ka tona wisigo Baibiri na boro, ono gari nyemupai tipa ka da ti gi sásá re aadunga ni nyanyakihe gbe te, bambiko ri aaberã gupai nga ri nga wene nayugupai te. Ginipai naundo ri? Ri ape gupai nga: “Mi atona ka sana Yekova tipa ko undo re mi kiisi nyemu ka wisigo Baibiri na boro. Ti kina gu bangisa regbo re, mi amangi asadatise tipa ka mbakada gimi abirĩ yugopai. Tingbafuo bete adiwi, mi abi gupai nga gimi nyemupai aima sona. Kina rogo gu garã re, mi atona wisigo Baibiri na aboro ue.”

5. Ginipai rengbe ani ka berãkuriihe nga gu rengbe ka undo rani ani kiisi gaani nyemupai tipa ka da ti gaani sásá?

⁵ Mo berẽkurii gupai Yekova namangihe foro. (Tam. 143:5) Gu mokedi nangia Pauro aaberã kuriipa ga Yekova weneringise koyo du ko ni, na gipai re asako ko du na nyemu ka mangasunge fu Yekova nyanyaki gbe. (1 Kor. 15:9, 10; 1 Tim. 1:12-14) Wakina gure a, ka mo aaberã gbe kurii gupai Yekova namangihe foro, mo nika du na bakere nyemu ka da ti gamo sásá. (Tam. 116:12) Oni bingo gupai naundo wirina sa Honduras yo ri da ti gari sásá nga ga da ni nazakigene. Ri aya: “Mi aaberã kuriipa wai Yekova nakpinyemu re. Ko aundo re mi gbia gako aboro. Ko nangerafuo re na kini banda re. Ho mi aberẽ ni kurii gipai re, si anyakasi gimi nyemuse tipa Yekova na mi kini idi ka manga nyanyaki asadatise tipa ka tona sunge abazakigene.”

6. Gini kurapai rengbe ka undo rani ani kiisi gaani nyemupai?

⁶ Mo berẽkuriipa agu aundo mo narengbe ka gbiaha ka mo da ti gamo sásá. Oni bingo gupai naundo Erika ani nifura tipa ri kusayo, nibipa gu gari sásá nga ga da bangiri regbo yo. Ri aya: “Mi aye ka bi gupai nga mi aazanga dungu apai mbiko da mi batungusapai yo kusa. Ono ho mi anida ni mbata fu regbo da, mi anirengbe ka fu sene fu awirina na ki di regbo na yo. Na mi anirengbe a ka degature kuti gu wene aberãpai  nga gu narengbe ka undo re mi gbia ngbarago na ki mbakadi gimi sunge tungusapai.” Erika amoiberã ri kuti agu aundo du ti da ti regbo, na gipai re aundo ri ri da ti gari sásá. Gini amaku rengbe mo ka maaberã ro tipaha? Ka si du nga gamo sásá nabipa geda Baibiri watadu kparakpee, mo berẽpa wai si nika nyakasa gamo pabakure na Yekova. (Tam. 145:18, 19) Ka si du nga gamo sásá nga ka sonosa agu asino nga ga aKristano, mo berẽpa wai si narengbe ka mbakada gamo pagume na kura aboro. (Koro. 3:14) Mo keke ndu agu apai kusande mo aida ka da ti ni ti gu sásá re. Na mo naabi agu apai mo akekehe re dedede. Tomáš, i nifura tipa ko kusayo aya: “Ho du dungu nduapai ni tipa mi asadi ka da ti gimi sásá, mi namangasunge nyanyaki tipa ka da ti ni.”

7. Ginipai naundo Julio na diako i da ti gayo sásá?

⁷ Mo naadia regbo na agu aboro rengbe ka ngarasaro mo da ti gamo sásá. (Snz. 13:20) Oni bingo gupai naundo Julio na diako i da ti gayo sásá nga ga tungusapai ni bakerehe gbe. Ko aya: “Ani asia agu abakure rengbe ka songoda rani na gaani sásá, na ani anaasakapa gaani sásá na yo. Dungu yo aima da ti ngbatunga agu asásá re, na i aima rengba ka fuka agu aberãpai furani rengbe ka undo rani. Abakurearani anaasana rani tipa wai gaani ambakadapai aandu, na i anaangarasa rani ti agu aregbo ani anaida na ni.”

8. Ginipai rengbe ka manga ka si du nga ani namangapai kuti gaani sásá kinaho du ani ni na nyemuhe? (Oni bi sura a.)

⁸ Kina rengo ngaha nga, kura auru kinaho ani naadunga na nyemu ka mangapai ya. Ya mo gipai re nayugo gupai nga ani arengbanga ka mangapai ka da ti gaani sásá te? Oó. Tipa ka yugoho na kpiapai: Wege ima rengba kadu nga gu ome natura kurungba si ndu ka da rogo gu ba si andu kurogo yo. Ono tie, gu ome du ti awege ni bakiakia, na gu kura auru kinaho wege arengbanga kadu ya. Ya mo gipai re nayugo gupai nga bakama kurungba arengbanga kaa ndu te? Anga wo du he te. Ni kpiapai, gu kura akurungba na makana ti ni; agu akuraha kidu na akapi. Bakama kurungba ima rengba ka mangasunge na makana watadu kapi tipa kaa ndu ku rogo gu ba ni andu kurogo yo. I ima rengba ka ringbisa gaani nyemupai kuti wege; kura auru ho si ni nyanyakihe, kura auru ka si adu nga ni nyanyakihe ya. Na gu kura auru, ani ima rengba ka zanga du na nyemupai tipa kada ti gaani sásá. Sidu, ka si du nga ani namangapai tipa ka da ti gaani sásá kina ho du ani ni na nyemu ka mangapai, ani ima rengba ka zanga da ti ni. Kina wai bakama kurungba na rengbe ka gbata kura gene tipa ka da rogo gu ba ni andu ku rogoho, ani ima rengba kada ti gaani sásá ho adu nga ani ni na nyemu ka mangaha ya. Kina rengo ngaha nga gipai re adu nga taata te, ono mo nika du na ngbarago ho mo nika da ni ti gamo sásá. Mbata fu ani sakipai tipa gupai rengbe ani ka mangaha, ani sakingo pai tipa gu sanahe rengbe ka kura.

9. Ya mo si naida ani naasada kindi ka da ti sásá ka si vura du vurũ nga nyemu ka da ti ni tirani te? (Oni sakingo rogoyo.)

 ⁹ Yekova naida ani irisiko na ngbarago na kpotorani yo dunduko. (Tam. 100:2; 2 Kor. 9:7) Ya mo si naida ani naamangapai tipa ka da ti gaani sásá ka si du nga nyemuhe tirani te? Oni bingo gu kpiapai nangia ga gu mokedi nangia Pauro. Ko aya: “Mi namanga borore, ka sa ha ni kanga fere.” (1 Kor. 9:25-27) Zavura ho Pauro aadunga ni na nyemu ka manga gupai Yekova aakpinyemu ko mangihe ya, ko anaazio tiko azio ka mangaha. Ya mo Yekova adu na ngbarago na gupai Pauro anaamangaha fuko? Ii! Na Yekova aima fu maku fuko tipa gu ome ko aamangaha.​—2 Tim. 4:7, 8.

10. Gini aundo du ti manga ome tipa ka da ti gaani sásá ka si vura du vurũ nga ani na nyemupai te?

¹⁰ Wakina gure a, Yekova na ngbarago ka bi rani ho ani amangapai ni ka da ti gaani sásá ka si vura du vurũ nga nyemuhe tirani te. Ko na ngbarago bambiko wa vura duhe nga ani namanga agu apai dedede adunga ani na nyemu ka mangaha ya, ko ima ino gupai nga ani namangaha bambiko ani ima kpinyemu ko. Kina wai Yekova afu maku fu Pauro, ko nika fu maku afu furani tipa gu ome ani amangaha. (Tam. 126:5) Na wa ani nikaa gbia ga Yekova amaku, ani nika du na bakere nyemu ka mangaapai. Wirina ni dee du Poland yo du rimori nga Lucyna aya: “Ti kura aregbo, mi naaidanga ka ndu gene tungusapai yo te, gbe, ho du mi ni na mbugo. Wa vura duhe wo, gu ngbarago mi naagbia tingbafuo ndu mi gene tungusapai yo nga bawene gamahe.” Ani bingo gupai rengbe ani ka mangaha ka si du nga nyemu ka mangapai tirani te.

11. Waigu Yekova narengbe ka undo rani ani nyakasi gaani zatise?

¹¹ Mo mangi kparakpee tipa zatise. Gu fugo nga zatise, i naamangasunge na ni dedede ka yugopa gu ome du ani na ni ka zatirani ti gu pai du ni gbegberẽhe. Ono tie, si naida na zatise tipa si undo rani ani mangi gupai du ni wenehe, gbe, ka si du nga gupai ani amangaha re ima kpakara watadu ani na nyemu ka mangaha te. Mo tingidi gupai nga, zatise nga papara zuzu toro, sidu, mo sana Yekova ko fu gako ziazia toro foro tipa mo sonosi gi nyanyakipa sino re. (Rk. 11:13; Gara. 5:22, 23) David i nifura tipa ko kusayo asakipa wai kparakpee aundo ko. Ko aaida kaa manga wisigo pai nisase dedede. Ko aya: “Mi anaasana Yekova tipa ko undo re tipa mi sonosi zatise. Mbiko gako undo, mi aima du na rengba kadu na wene mbakadapai nga ga wisigopai na kini ndu na ni kindi kumbatayo.”

12. Waigu Batungusipai 11:4 aundo rani ani da ti gaani asásá?

¹² Ka mo sungudi nga kinaho apai nika du ni wenengai ya. Rogo gi zegino re, regbo adu nga ho apai nika du ni wenehe dunduko te. Ka si du nga ani nika sungudo gu regbo apai nika du ni wenehe dunduko, ani ima rengba ka zanga da ti gaani sásá. (Oni gedi Batungusipai 11:4.) Wirina du rimoko nga Dayniel aya: “Regbo ho du apai dunduko ni wenehe te. Ani nasa apai si du ni wenehe ho ani atona mangapai ni.” Wirina du Uganda yo du rimoko nga Paul ape gu kura ndupai si aidanga ani naagbisigo pai ti ni ya, ko aya: “Ho ani atona mangapai ni akpakarapai ki vura du vurũ, gure nga ani nafuhe fu Yekova ko fu maku kuriihe.”​—Mara. 3:10.

13. Tipagine duhe ti ni ni wenepai ka tonaha na rukutu asásá?

¹³ Mo tonaha na gu sásá du tooni. Ani ima rengba ka zanga du na nyemupai mbiko gaani sásá ima rengba kaa ngera wa gu pai niima kpakara ka da ti ni. Ka singia gipai re nga rengo nibi gupai du tipa ro, ya mo mo rengbe ka kparaka gamo sásá ku rogo rukutu he yo? Ka si du nga gamo sásá nga mo naida ka sonosa kura sino, tipagine ka mo aatona nga yugo gu sino re ti ni rogo rukutu agene yo ya? Ka si du nga gamo sásá nabipa geda Baibiri, ya mo mo  rengbe ka tona gedaha ni maa mo guru regbo kaa gedaha vuruhe yo? Tomáš, i nifura tipa ko ti tonatonaha aasota asota na gako sásá nga ga geda Baibiri dunduko vuru garã yo sa. Ko aya: “Mi abi gupai nga gu gene mi asia ka gedaha ngba aima du ni ipo fere. Mi adiberã ka asadaha berewe, ono ti gi regbo re, mi aageda papara kapita na auru dunduko na kini berẽkuriihe. Ni sangbana gipai re, mi atona ka gbia ngbarago ti gi geda Baibiri.” Wa Tomáš atona kaa gbia ngbarago ti geda Baibiri, ko atona kaa gedaha tipa gbanga regbo. Niyangaraha, ko agedi Baibiri dunduko. c

14. Ginipai rengbe ka manga nga gu rengbe ka saha ni kpakarakpakaraha mo da ti gamo sásá?

¹⁴ Si ni gupai nafu kina gberãrago nga, ka si vura du nga ani ima du na nyemu mangapai na kidu na zatise, apai kinaho nika sa rani ka ani da nga ti gaani sásá ya. Ni kpiapai, “rago gbia kuti mamu” ima rengba ka dia gaani regbo na berãrani ani kidu na kina wiri bete regbo gbua ka mangapai ka da ti gaani sásá. (Batu. 9:11) Ani ima rengba ka gbiatirani na akpakarapai nga gu rengbe ka sa rani ani du na gberãrago na ka ome adunga tirani ya. (Snz. 24:10) Wa du ani nga kpakpa aboro ani ima rengba ka manga gu ingahe nga gu nika sa ha furani ni kpakarakpakaraha ani da ti gaani sásá. (Rom. 7:23) Watadu ani ima rengba kadu na mbugo. (Mt. 26:43) Ginipai rengbe ka undo rani ho adu nga apai ni furani wenengai ya?

15. Ka si du nga ani nagbia tirani na akpakarapai ya mo gere nayugo gupai nga ani na diabese te? Oni sakingo rogoyo. (Atambuahe 145:14)

¹⁵ Mo tingidi gupai nga, ka pai mangi nga gu sa ro ka mo da nga ti gamo sásá ya, gipai re ayugongo gupai nga mo mbu manga asadatise ka da ti ni ya te. Baibiri nape gupai nga ani ima rengba ka gbiatirani na akpakarapai bara dunguhe. Ono tie, si nayugo gupai ayugu ziazia nga ani ima rengba ka da ti gaani sásá berewe, gbe mbiko ga Yekova undo. (Oni gedi Atambuahe 145:14.) Gu wirina du rimoko nga Philip i nifura  tipa ko mbata kusayo, ape gupai nga, “Mi namaanga berãre kuti agu aregbo mi adanga ti gimi sásá ya te. Kuba gure, mi namaa berãre tipa gu regbo mi nika tona manga asadatise ka da ti gimi sásá berewe.” David i nifura tipa ko kusayo aya: “Mi naasada nga ka bi agu apai nasa re ka mi da nga ti gimi sásá ya ni akpakarapai te, ono ni momu tipa ka yugo wai mi nakpinyemu Yekova.” Ho mo aasada ni ka da ti gamo sásá si ki vura du vurũ nga si ni kpakarakpakaraha, mo nayugoho fu Yekova nga mo naida ka sa ngbarago tiko. Nairiwo wai du Yekova na ngbarago ho ko abi ro ni mo ni asadi ka da ti gamo sásá!

16. Ginipai rengbe mo ka wirikaha ka si du nga pai mangi nga gu sa ro ka mo da nga ti gamo sásá ya?

¹⁶ Mo bi agu apai nasa ro ka mo da nga ti gamo sásá ya ni gupai mo narengbe ka wirikapai ti ni. Mo berẽ tipa gupai namangi, na ki sana tiro nga, ‘Ginipai rengbe mi ka mangaha tipa gupai nga ka gipai re mangingo berewe ya?’ (Snz. 27:12) Ti kura aregbo, ka si du nga si ima kpakara foro mo da ti gamo sásá, si nayugo gupai nga si aarengbanga tipa mo moi gu sásá re te. Ka si du nga mo bihe nga gipai re nga rengo tipa ro, mo berẽ berewe tipa gamo sásá ka bihe singia si rẽarẽ tipa mo moi gu sásá re. d Ka si du nga mo adanga ti sásá nga gu mo arengbanga ka da ti ni ya te, Yekova abingo ro nga mo na diabese te te.​—2 Kor. 8:12.

17. Tipagine si aida ti ni ani moi pa gupai ku berãrani yo nga gu ani naima da ti ni?

¹⁷ Mo berãpa agu apai mo naima da ti ni. Baibiri nape gupai nga “Mbori ni iraira ko te. Bangiriko ago nga ti gaoni sunge te.” (Eb. 6:10) Sidu, si aidanga bangiro go a ti gupai mo namangihe te. Mo berẽkuriipa agu asásá mo naima da ti ni​—wa gu nga sonosa wene pabakure na Yekova, fura fu kura aboro tipa ko, watadu zio bapatiza. Kina wai mo amangi sonakumbatayo ki da ti gamo asásá nga ga toro bakuru kusayo, mo ima rengba kaa ndu kumbatayo kaa manga sonakumbatayo tipa ka da ti gu gamo sásá du awere.​—Frp. 3:16.

18. Ginipai si aida ani tingidipa mangaha wa ani nikaa mangapai ka da ti gaani sásá? (Oni bi sura a.)

¹⁸ Mbiko gu undo nga ga Yekova, mo ima rengba ka da ti gamo sásá, kina wai bakama kurungba nidu na ngbarago ka da rogo gu ba ni andu kurogo yo. Oni tingidi gupai nga, dungu agu aboro ninaakama kurungba ninaagbia ngbarago ti gayo nunguro. Wakina gure a, mo asadi ka bi wai Yekova naundo ro mo da ti gamo sásá na gipai re nika undo ro mo du na ngbarago wa mo nikaa mangapai ka da ti gamo sásá. (2 Kor. 4:7) Ka omero aabatanga ya, mo nika gbia bakere amaku.​—Gara. 6:9.