Delphine, ani afura tipa ri rogo gu kekeapai nasusi, abi gupai nga gari bakabangirise asari ri ni mbiri buda ni bakerehe. Ziazia Kekeapai azangahe ti mbira buda ni betehe te, ono si naya: “Ka mo dú nga dagba abambiri imekakue yo ya.” (Asanza 23:20) Gbegberẽ mbira buda aima ye na gu kpakarapai nga ga kpotose, na ki ima gbarasa pa rogatise, na badungu amirioni aboro nakpi na agarã dunduko. Aboro ima rengba ka ne badungu agi akpakarapai re ka i pekefuo agu arugute nga ga Ziazia Kekeapai.

Delphine aima pekafuo agu arugute re. Sangbari awere nga: “Mi aye ka bi gupai nga ka buda dinga gimi bakabangirise kusayo te. Mi amangisunge na gu patatamana du rogo AFiripoio 4:6, 7, nga gu naya: ‘Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe.’ Ayuru dunduko gimi bakabangirise anaandu kina kumbatayo, ho si anidu ni wo, mi anikpari fu Yekova. Mi anigumba pa gimi apai dunduko fu ko, kodihe na gu zinga mi adu na ni, gberãrago, gbiati imisiri, na mi anisana ko ko undo re mi du na wene bipai. Ho wiso anida ni, mi anidi berã ka mbu gu gbegberẽ berãpai re. Gu sino nga ga kparakpee fu Yekova aundo re mi du na ruru bipai. Mi adiberã ka zanga mbira buda berewe. Bambiko mi abi gu zereda mi agbiaha na nyanyakipaha, na mi aaidanga ka zangaha te.”

Wasiwasi mangaapai nga gu bangua he naye na badungu fudifudiapai gbiati gbegberẽ apai. Ono agu arugute  nga ga Ziazia Kekeapai ima rengba ka undo rani ani ne ngbatunga agu akpakarapai re, si nagumba gu banguapai naye na ni—ni kpiapai, ba nyemuro ti boro gbiati bi kundiri aboro. Paranga kumbagude ani ayamba ko nga Samuel aya: “Si ni taatapai tipa ka ba nyemuro ti boro. Ti kura aregbo nyemu kura boro arengbanga ka du tire te, ono ho mi abihe ni nga mi ima ngba ti degude—si asaha taata fere mi tona agu abuga nabanyemu re ti ni.” Samuel abi gupai nga i anaakita ngbanga ko ti aregbo dunduko nga ko naba agu abuga naba nyemuko ti adee—zavura ti gu regbo ko anabanga nyemuko ti adegude ya—ho i anikiti ngbanga ko ni wo, si anisa ko ko ndu ka ba nyemu ko tie nzunzu ti adegude. Gi mangaapai re aasanga ko wenengai te. Sangba ko awere nga: “Si adu ni gbegberẽpai bambiko si akusi gu gbegberẽ sino rogo re yo nga ga gbangbati.”

Samuel agedipai du tipa paranga aboro rogo gaani bangiriba nga ga Internet nga jw.org. Na ko kini berẽpa Asanza 20:11, nga gu naya: “Gude nayugo pa tini nzunzu ni kina gani mangapai, watadu gani sunge zanga biriki ki du ni ruru he.” Wai gu gipai re aundo? Samuel aye ka bi gupai nga ba nyemuko ti adegude aadunga ni ziaziaha watadu niruru he te. Sangba ko awere nga: “Gu paranga boro namanga ngbatunga gipai re, nasonosa agu asino nga gu du ni gbegberẽhe tipa du ni gbegberẽ badiarogatise. Mi atona ka berãpa wai gu dee mi nika diari narengbe ka du ka ri bi re mi ni ba nyemu re ti kura dee. Mi aye ka da kuti gupai nga ngbatunga gu mangapai re na kina kerepai ti ni. Gu rengo duho nga, pa duhe taata ka ba nyemuro ti boro, asangaha si du ni rurupai te.” Samuel aima aria sino ko. Pa ne ko ba nyemuko ti adee ima undo ko ko ne wasiwasi mangaapai.

Antonio adu rogo kerepai tipa ka manga bari: Bi kundiri aboro aima zio baha ti ko. Wa vura duhe vuru nga ko aima dia gu dee ko akpinyemu ri ni bakerehe, ko anaabi tiko ko ni ti ku rogo gu mangaapai nga ga bi kundiri aboro dedede. Ko agumba gupai nga pa berãko kurii 1 Petero 5:8 aima undo ko. Si naya: “Oni dú na rugatise ki ningere; bambiko wa bahu nata ki nipoi, nigbata boro ka rita ni, kina wo vuraroni nga bakitingbanga nata.” Antonio aya: “Agu asura nga ga kundiri aboro pati rani kirikiri, na agu asura re nanye berã boro yo ka si aguari nga ya. Gu veresi re aundo re mi berẽpa wari du mburu gi asada re ni. Si aaida mi wiriki ka tingida gupai ni ipo nga, agu asura kundiri aboro re naye be bakitingbanga. Awere, mi ima ino gupai nga kina Yekova sa rengbe ka sa re mi ‘dú na rugatise ki ningere,’ tipa mi sovura kuti agu apai re berãre yo, ngbadure yo, na rogo gimi rogatise.” Antonio agbia gu undo ko aaidaha, na niyangaraha ko ima mbu gako wasiwasi mangapai. Na gipai re aima undoko ko ne kere kpakaraapai.

Si tie ziazia nga, Ziazia Kekeapai nafu agu arugute naundo rani ani ne kere kpakaraapai. Ono na ginipai tie du tipa agu akpakarapai naima ziobaha na kini ndu kindi kumbatayo? Ani bingo wai Fugo Mbori narengbe ka undo rani ani mbakadi ngbatunga agu akpakarapai re.