Rosie aya: “Mi naabaka bangire dedede tipa apai, si kini iriwo ki susi wai nzunzu duhe.” Gini veresi rogo Ziazia Kekeapai naundo? Gu kuraha sa nga Matayo 6:34: “Ka oni wisigi nga pai tie tipa gu pai nikadu gba ya; bambiko kina gba nikawisiga pai tipa ha ni saha. Gu gbegberẽpai nga ga gu rago kina ha rengbe tipa ha.” Rosie agumba gupai nga, agu afugo Yesu re aundo ri tipa ri mbu bakere baka bangiri tipa gupai rengbe ka manga gba. Ri agbia kurapai berewe kuti ni nga, “gimi kpakaraapai adu kina kubaha, ka mi agbianga kuraha berewe ni baka mi bangire tipa agu apai ata manganga ya watadu nga gu nikaa amanganga ya.”

Bakere bakabangirise aima fu rii Yasmine. “Mi anaakpara rogo kura auru rogo aposo yo, kura ayuru kinaho mi anaaranga ya. Mi abi tire nga gbegberẽ aberã aafu ri ome re.” Gini veresi nafu undo? Ri agedi 1 Petero 5:7: “Oni bá agu apai nafuda roni ku auru ko yo; mbiko ko naberã pa roni.” Yasmine aya: “Wa regbo aasusa, mi akakuti manga kparakpee fu Yekova, na ko aima karagapai kuti gimi kparakpee. Mi abi tire wa ka i tumba kina ba rõrõi tindiro pagore. Gimi gbegberẽ aberã ninaaye aye ti aregbo ni basasa, ono mi ima ino wai awere ka mangapai na ni.”

Paranga degude du rimori nga Isabella aya: “Gbisigopai nga gupai naye rogo kure yo mbiko buba na kina bangisapai a. Mi nambupa nyanyakipa apai ka manga kina gupai anyakanga paha ya—wa gu nga ka sungo gbua watadu ka bi kina Terevizioni. Gi sino re ni kere gbegberẽhe mbiko si naye na bakere bakabangirise na ki sa boro ka ni mangingo sunge na wene surungbaha ya.” Isabella aya, gupai naaundo ri gu du rogo 2 Timoteo 2:15, nga gu naya: “Mo ké na mbakada pa tiro bangiri Mbori, ko idi pa ro wa gu mangisunge adu nga na zee ya, niyugu ga rengo pai nzunzu.” “Mi aidanga zee zi Yekova na gimi sunge mbiko gupai nga mi nagbisigo pai te.” Ri ima manga bakere ariapai.

Wakina gure a, Kelsey agumba gupai nga: “Mi naagbisigo pa gimi sunge ki da ti kina yangara regbo. Mi anaakpara, kini zanga rame, ki du na bakere bakabangirise. Gipai re aaundongo re te.” Kelsey agbia undo rogo Asanza 13:16: “Bangbasia namanga sunge dunduko na inahe, ono iramungo nagbandaka pa mungo gbayaga.” Ri agumba wai pa berã ri kurii gi veresi re aundo ri: “Si ni patatamana ka mbakadatise mbu regbo kumbatayo. Mi awere na waraga rii gimi mbisa tipa ka kekapa gimi asunge du kumbatayo, na gipai re naundo re mi mbakadi gimi aregbo asunge angianga ka mbu apai ki da kina ti yangara regbo ya.”

Kirsten aya: “Ani akparaka na kumbami, ko kini mbu re na agude biama.” Ginipai du rogo Ziazia Kekeapai naye ka undo ri? Asanza 17:17 naya: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.” Kirsten agbata undo be agu awirinari du rogo dungurati. Ginihe ri agbiaha? “Agi abadiangbare re afu undo fere rogo dungu agene! Agu akurayo anaaye na ariahe gbiati ambumbudo fere. Bara biata, bete aboro aundo re gbiati awire tipa ani guari rogo gu kporo ani adu rogoho ka ga ku rogo kuraha. Boro sa aundo re mi gbia sunge. Abadiangbare adu dedede kina patire.”

Delphine, ani ni fura tipa ri mbata, asovura na padu ri ni sari. Fuo ri zanga ahe dunduko, ri aya: “Mi abihe nga aboro dunduko du na gayo aboro, ono kina re ki du ni sa re.” Papara Ziazia Kekeapai sa naundo ri nga Atambuahe 68:6: “Mbori namaa gu ni zanga gume ku dagba aborokporo.” Ri agumba gupai nga: “Mi aini gupai nga gi veresi re afuranga tipa kina ndikidi kporo awere te. Kuba gure, mi aye ka rugatire na gupai nga, Mbori nafu kporo furani nga ga toro, nga gu ba nga ga ndikidi bandahe na ndikidi nyemuse koyo du agu aboro ni nakpinyemu Yekova. Ono mi aye ka ino gupai nga, mi arengbanga ka mbeda koyo du kura aboro ni mbata fu mi mbedi na Yekova te. Sidu, Atambuahe 37:4 aundo re na gupai nga: ‘Ga ngbarago dú rogo Yekova yo a, ko afú agu ahe foro du nyemu he kpotoro yo.’”

Ni yangaraha, ri aya: “Mi aye ka bi gupai nga si aida mi zi tire nyanyaki kuti Yekova. Ko du ni wene ko kisusi. Mi kini tangara agu apai rengbe mi ka gbia ngbarago tiní wa sa na kura aboro, tipa wa ka mi zi bakure na agu aboro nakpinyemu Yekova. Mi awiriki ka bi gu weneapai du rogo kura aboro yo na kini mbupai fuyo tipa gayo azangarengba.”

Si ni rengo nga agu aboro nairiso Mbori i nga kpakpa aboro. ADezire Yekova nasovura na kpakaraapai wakina kura aboro a. Ono Ziazia Kekeapai nangarasa aboro tipa i undo akurayo ho du gene adu ni. Si ni patatamana ka zio pa bakure na ngbatunga agu aboro re. Ono tie, ya mo Ziazia Kekeapai rengbe ka undo rani ani sovura kuti gu kpakarapai ani arengbanga ka mbakadaha awere ya, ngbatunga gu du wa bangabanga kaza watadu rungo?