Ani ima rengba kadu ni fudifudi rani ho bakurearani ambu ni be kaza berãse. Ono ani rengbe ka yugoho nga ani naberãpa bakurearani aberã ni undo ani ni nimangipai kuti gu kere kpakarapai nga ga kaza berãse re. Waigu rengbe ani ka mangaha?

‘Mo ipisi tiro ka gia pai.’—YAKOBA 1:19.

Gene sa dagba gu wene agene yo rengbe mo ka undo bakureamo ngbaha nga ka degaturo ho ni aida ka fura ni. Ka mo naabingo ho nga si naida mo karagapai kuti agu apai dunduko ni agumbaha ya. Mo sa ni nibi gupai nga mo nadegaturo adega na mo naberã pani aberã. Mo asadi ka rugatiro na gupai namanga ni, na mo ki ne dakuti digisopai ni tiro. Mo tingidi gupai nga, ni ima rengba ka pe gupai si naaidanga ni pehe ya nga gu rengbe ni ka biratini abira ti ni kusa.—Eyobo 6:2, 3.

Mo ‘nyakasi’ ni—1 ATESARONIKO 5:14.

Bakureamo ima rengba kadu na bakabangirise, watadu ni ima rengba kaa sota na gu bipai nga sunge ti ni te. Ni tingida mo ni na gupai nga mo naberãpa ni aberã, mo ima rengba kadu nipa wasa na nipa ngarasa ro, si ki vura du vurũ nga mo ainongo gupai nzunzu ka mo pehe te.

“Badia ngbanya nakpi nyemu badiani na arago dunduko.”—ASANZA 17:17.

Mo fu undo rogo mangimangipai yo. Kuba gupai nga kadu na gu bipai nga mo ima ino wai ka undo, mo sanahe tipa ginipai rengbe mo ka mangaha. Ka si du nga si ni ba kpakarakpakaraha fu bakureamo  nipepa agu apai ni aidaha, mo pe pa gupai fu ni rengbe oni ka mangaha kina sa wa gu nga ka ndu wiri nunguro. Watadu ka fu tiro ka undo na ngbeka ahe, giriso arago, watadu gu kura asunge.—AGaratio 6:2.

Mo du na ‘hipai.’—1 ATESARONIKO 5:14.

Bakureamo arengbanga kadu ti aregbo dunduko na nyemu ka fura te. Mo pe gupai fu ni nga, mo nika du na ngbarago ka degaturo koyo du ni ni ho ni nika ida ka fura ni. Mbiko ga bakureamo kaza, ni ima rengba ka pe gupai watadu ka manga gupai rengbe ka imisa ro. Ni ima rengba ka ká gupai oni ambakadi paha watadu kadu na zinga na mo. Mo du na zerangbaduse gbiati rugatinapai wa mo nikaa fu gu undo fu ni ni aidaha.—Asanza 18:24.

“Mi naasada ti aregbo dunduko kadu ni gu bakure rengbe ri ka fura na ni ti aregbo dunduko. Ka si vura du nga pai ho rengbe mi ka mangaha kuti gari kpakarapai te, mi naasada ti aregbo dũ ka degature kuti gupai ri apehe. Ti kura aregbo, gupai ri naaidaha gbua nga boro degetuni fu ri, na gipai re nasari ri du wenengai.”—Farrah, a nakureari ambu be gu kaza naye na gu kpakarapai nga ga riahe gbiati bakere bakabangirise gbiati kaza berã.

“Gu kura nakureami sa na bakere nunga na nipa ngarasa ro. Ri nayamba re ku kpuri yo tipa wene ariahe. Gi gari bakere nyemuse re asaha fere taata tipa mi kusuko kpoto re yo. Gipai re ima ngarasa re nzunzu!”—Ha-eun, nambu be bakere gberãrago.

“Du na zerangbaduse na nyanyakipaha. Ho diare amanga gupai ni naba gberãrago tire, mi natingida tire na gupai nga gu kaza re du nasari ri naamangapai wa gere angianga ri ya. Gipai re naundo re ka mi dunga na zinga ya ono mi du na nunga koyo du ri ni.”—Jacob, diako ambu be bakere gberãrago.

“Diare aima du ni bakere pa undo na wasa fere. Ho bakabangirise afu ni rire, ri amanganga re ngbaome tipa mi mangi gupai mi aidanga ka mangaha ya te. Gere nayugo gupai nga ri nambu manga gupai ambu du ri na nyemu ka mangaha. Pa ri ima nyaka fere ni bakerehe gbe, mbiko gu gari wene asino nga ga mbupa kura gari apai gbiati zanga du na gbangbati.”—Enrico, nambu be kere bakabangirise.