Gu kura aboro nabaka bangiriyo singia i ima aria gu Fugo Mbori du ni kekehe. Gu nebi nangia Yesaya agumba gupai nga Fugo Mbori “anyé anye kindi.” (Yesaya 40:8) Tipagine rengbe ani ka du na gu kido ti ni nga i ima banda ga Mbori akidohe ni ruruhe?

Mbori na ome tiko ka banda Fugoko na ka sa gupai nga ka aboro iräsingo ho ya. Ho i aake Ziazia Kekeapai ni ni bee bakuru kusayo, agu aboro naakehe anaageda bangiri afugo nibasasa tipa ka i rimisingo gu kurapai ku rogoho watadu ka dia gu kuraha kusayo ya. Wa vura duhe wo, aboro ni rengberengbe yo te, kura abakeapai aima manga bete ainga he.

Badungu akutu agu akekeapai nibee nga ga Ziazia Kekeapai du ho. Ka kuraha sa du na bete kparakparapai rogoho, i naringbisaha kuti agu akuraha na ki bi gini gu du ni ruruhe.—Tipa ka wirika badungu apai, mo bi gu kekeapai nga “Has the Bible Been Changed or Tampered With?” rogo jw.org.

Ni kpiapai, mo makianga pai tipa gu kuru awaraga i ayambaha nga Kaĩkaĩ Waraga Baime Tikpo agu aboro nga bedouins akuru baraha simbia yo mbembedi na Baime Tikpo rogo 1947. Gi kuru kekeapai re na papara Ziazia Kekeapai rogoho nga gu i akehe agarã susi akutu ue kusayo. Abainipai aringbisi gi kuru kekeapai ni bee re na gu Ziazia Kekeapai du berani areme. Ginipai i agbiaha?

Bakere abawirikipai abi gupai nga agu apai du rogo Fugo Mbori areme si nandu sa na gu i akehe ni bambata ha nibee. * Wisigo gi kuru kekeapai nibee re nafu gu gopai nga, agu apai ani agedaha areme rogo Ziazia Kekeapai yo nga boro gu ndikidi pangbanga nga ga Mbori. Ani ima rengba kadu na gu kido nga Mbori ima mangasunge nyanyaki tipa ka banda agu apai du rogo Ziazia Kekeapai yo si du ni ruruhe furani areme.

Sidu, ani ima rengba ka geda Fugo Mbori ki du na gu bakere kido nga si ni ruruhe. Na gipai re berãrani yo, ani makianga pai tipa gupai rengbe ani ka wirikaha tipa Mbori be gako anebi.