DOREEN adu ni zigbä zigbä ri ho ri agi gupai ni nga i bi gu kere kaza ti kumbari nahi ti berã, ho garãko adu ni gbua nga 54. Amunganga aya fu ko kina bete adiwi nye fu ko tipa ko kpi. * Ri aya, “Mi aarengbanga ka ida kuti gupai mi agihe te, gu nadu tire aima nyasa tipa dungu aposo. Mi aabihe wa gupai namanga kura boro kia, angianga ani ya. Mi aambakadanga tire te.”

Si nafu kina gberãrago nga, gu gene Doreen amangipai ngbaha ima nge areme ti aboro. Kere kaza nga gu nandu sa kina kpio rengbe ka zio ai boro ti ai regbo. Gupai ngba nga, badungu aboro du na nyemu ka mbuti gu boro i akpinyemu ni ho gu kere kaza azio ni ni nga gu nandu sa kina kpio. Wa vura duhe wo, mbuti boro na kaza nga bakpakarakpakara sunge. Ginipai rengbe aborokporo ka mangaha tipa ka fu wasa na ka ngerafuo gu gayo boro i akpinyemu ni du na kere kaza nga gu nandu sa kina kpio? Wai gu rengbe agu aboro nambuti borokaza ka diabe gu dungu aberã du yo na ni ti gu regbo i ambu ti borokaza? Ho boro ambeda ni na kpio, ginipai rengbe yo kaa berẽpaha? Ni bambatapai, ani wisigingo ndu gupai du mbuti gu kaza nandu sa kpio ti ni ni gupai du ni kpakarakpakaraha areme.

Aboro-birĩ-inohe nga ga husa kaza ima zogosa bete pakpio aboro. Kama agarã kusayo, zavura rogo agu aringara naima sona, bagizo raka nga ga aboro adu ni kina wiri guruhe. Aboro aakpiko ni kina wiri ipo be akaza watadu béno. Abambungua adu ni kina wiri betehe, na badungu aboro kina gayo aborokporo anaambu tiyo na i kini kpiki kina kporo.

Areme, sona kumbatayo rogo pa kusa adawa ima sa gupai nga amunganga sovura nyanyaki kuti kaza tipa ka gizasi raka nga ga boro. Agu akaza naana digiso ga boro raka ni kina wiri ipo ti agu aregbo nasusi kusayo ima rengba ka dia dungu agarã awere. Ono tie, pa raka boro ni gbangaha ayugongo gupai nga ni ima hu te. Dedede, aboro kaza na dungu apai tiyo nga gu nasayo  ka i rengbenga ka ngerafuo tiyo ya. Ngerafuo ngbatunga agi aboro re ima da ni gupai du ni mbumbuhe na kini idi dungu apai.

Ni sangbana gipai re, badungu aboro akpingo berewe kporo gbe te, kina bambungua yo. Badungu aboro areme aruganga tiyo na pa wai boro asamba ka kpi te, kina bete aboro gbua naabi boro ni ni kpi. Si du, gunde be gupai boro ainongo pai tipaha ya ima rengba tie ka zeresa pa gu ome rengbe boro ka mangaha ka ngerefuo gu gani borokporo du na kaza. Ginipai rengbe ka undo?

A wa ani nibihe ti gu kpiapai nga ga Doreen, badungu aboro si afuda yo ni kerehe ho kere kaza azio gayo boro ni nga gu nandu sa kina kpio. Ginipai rengbe ka undo ro mo mbakadi tiro tipa ku mbatayo ti gu regbo du mo na bakere bakabangirise, gunde, na rungo wa gure? Ruru moyambu nga ga Mbori akparikpee ki ya: “Mo yúgu pa geda gaani arame fu rani, ani di tatamana ku kpotorani yo.” (Atambuahe 90:12) Nirengo, si naida nyanyaki kparakpee fu Yekova Mbori tipa ko ‘yúgu pa geda gamo arame foro’ ni tatamana tipa wa ka mo mangisunge ngba wene gene na gu yangara arame du gu boro mo akpinyemu ni kindi ni unga ni.

Gipai re naida wene mbakadatise. Ka si du nga gu boro kaza re ima rengba ka peka agu apai foro ni aidaha tipa tini, si adu ni pa tatamana tipa ka sana ni tipa ni gumbapa gu boro ni aida ni naamanga diaberã funi ho pai nika dia ni be ni. Pa saka ni pai zukazuka tipa gupai ni aidaha, singia ni naida ka nye kporo, i dingiso ni ku bambungua yo, watadu ka sia gu ngbatunga husa ni aidaha ima rengba ka zogosa bete gu zangagiatise rengbe ka kura dagba agume nga aguyo rengbe ka asadatiyo ka manga diaberã kuba gu boro nawoka nga gu ni pai naima diabe ni. Pa fura aborokporo gbaiga mbu regbo kumbatayo nasayo i moi berãyo tipa gupai rengbe yo ka mangaha tipa ka ngerafuo gu boro nawoka. Ziazia Kekeapai naya: “Yo adu nga rugapai ni ya, apai yo na kina gberãrago.”—Asanza 15:22.

Dedede gu bambata sunge nga ga gu boro nangerafuo borokaza nga ka fu wasa. Gu boro naima mbeda na kpio naida ka ino gupai nga aboro nakpinyemu ni akpi, ni nisani te. Ngba gini gene rengbe mo ka manga gipai re? Si naida kaa gedapai fu ni watadu kaa bibia fu ni, mo sia gu waraga na bia nga gu rengbe ka fu wasa gbiati ngbarago fu ni. Badungu aboro nagbia wasa ho gayo borokporo azio beyo ni na kini fura fuyo zezeredi.

Si ni wenepai kaa pe pa agu aboro naye kaa bi ni funi. Kura tingidapai sa atingidi gupai nga: “Tue nga gu yangara he nakiso dagba agu abarapa boro du bisue nga gu ni aino apai na ni. Tue nagia pai agia ka borokaza vura kaa ngera wa ni nara ara vuru, sidu, ka mo ya  gumbanga gupai nga gu mo arengbanga ka gumbaha ho du ni ni ni unga ni ya.”

Ka rengba du, si naida oni nimangi kparakpee kina sa. Ziazia Kekeapai nagumba gupai nga ti kura regbo sa, gu mokedi nangia Pauro gbiati gako abadiasunge adu rogo kere kpakarakpakarapai, na i aainongo nga i abata te. Gini undo i agbataha? Pauro azungodi abadiangbako nga: “Oni nimongo unda rani ni gaoni zungadihe.” (2 AKorindo 1:8-11) Gu kparakpee naye ngbaduseyo na nyanyakipaha ti gu regbo du boro ni kere fudifudi ni berãni yo na ti regbo kere kaza.

Pakpio gaani boro nga pa rungo kisusi. Si duhe tini nga kpio nga gu he aboro aidanga ha ya. I aambakadanga rani ani ni nikpiki te. (ARomo 5:12) Fugo Mbori nayamba kpio nga “vura.” (1 AKorindo 15:26) Sidu, gbegberẽpai ho ti zanga ani berã gupai nga gaani boro akpingo te te.

Wa vura duhe wo, berãpa gupai rengbe ka manga ima rengba ka undo aborokporo i moi berãyo tipa ka mangapai ngba taata gene. Bete gu kura apai rengbe ka manga gu du ni tangaratangara rogo gu sanduki nga, “ Gu Yangara Poso Nga ga Raka.” Ono tie, anga agi apai re dunduko rengbe ka manga fu aborokaza dunduko te, na anga si namanga aboro dunduko kina kubani a te. Wa vura duhe wo, badungu aboro kaza nagbiatiyo na kina gi bangisa bete agi ariapai re.

Tingbafuo kpio gaani boro, si ima rengba ka du ni patatamana tipa ka sana gu mbembedi bakure nga gu ni naaima ida ka fu undo mbata kusayo. Gu boro naambu ti borokaza gbiati aborokporo ima rengba ka ida i kido yo na gupai nga, gu asada gayo boro aandu rogoho ima nyasa, na ni ambunga berewe te. Bakusi aboro nakido rani nga, “kpikpi aboro aina nga pai te, kura mosoro du nga fu yo a te.”—Batungusipai 9:5.

Kido kuti Yekova nga nyanyakipa pai—angianga kina ti regbo kere kaza sa ya, ono zavura tifuo kpio gu boro re. Ko rengbe ka undo ro vuru be wene afugo na mangaapai nga ga kura aboro. Doreen aya: “Mi aaidanga ka ká ga aboro undo te, aboro aima fu undo furani kpaima. Mi na kumbami aima ida kuti gupai zanga kapa nga, Yekova du naya furani, ‘Mi kinaho tipa ka undo roni rogo gi kpakarapai re.’ Bangire agonga ti ni te.”

Nirengo, Yekova nga wene bangerefuo boro. Ni du ko ni Bakusirani, ko ima rugatiko na pa gaani fudifudiapai gbiati gaani arungo. Ko ima rengba ka fu gu undo na ngarasaro nga gu si aidaha tipa ani dibe gaani akpakarapai. Gu ngba kisusi nga, barambeda, ko nika dia kpio kusayo na ki zingisi agu abirioni aboro du payo berãko yo. (Yoane 5:28, 29; Yugoti 21:3, 4) Fuo gure, aboro dunduko nika gumba fugo gu mokedi nga Pauro nga: “Ako kpio, wari du ga diabese ni? Ako kpio, ga egetera wari?”—1 AKorindo 15:55.