I avungu re rogo gu gbaria nga Saxony, rogo gu ringara i aayambaha nga German Democratic Republic(GDR). Kpurani angia kporo nyemuse na ani adu na dawedawe pagume dagbarani, avungure aima ruga re na wene mangaapai. GDR angia gu gbata nga ga aKomunisti, sidu, badungu aboro Saxony yo aabingo pambori na nyanyakipaha te. Na tipa re, mi aidi kuti gupai nga Mbori ti ni te. Agu aida du ue nga, Mbori ho ti ni te gbiati gu nga ga birĩ zogarago aima du na ome kurii gimi raka vuru gu bambata agarã 18 nga ga gimi raka.

Tipagine gu birĩ zogarago nga ga Komunisti angba ti ni tire? Bambiko gupai aima ngba tire nga aboro dunduko du kina kubani sa. Kurigure, mi aidi kuti gupai nga aboro naakparaka ahe kina kubani sa, mbiko si narengbe ka digiso gupai nga ka kura aboro dunga ni aira kumuko aguyo ki ngia aira rungo ya. Sidu, mi afu tire zaza ka mangasunge rogo gu riigbu nangia ga paranga aboro nangia ga aKomunisti. Ho mi ada ni na garã re 14, mi aadia bakere regbo tipa kaa mangasunge girisorago ni dungura mi kpatakpata awaraga. Avuru gu gbata nangia ga Aue adu na ngbarago tipa gu ome mi aamangaha, sidu, gu irangbii du yo kini fu mosoro fere. Wa mi avura du kindi ni gude, mi aima ye ka ino bete kikindigipa aboro birĩ zogorago nga ga GDR yo. Mi aberẽ gupai nga mi aapekafuo agu asásá du ni wenehe, na gimi raka kumbatayo nika du ni bawenehe.

Gimi raka agberẽ wakina ikpiro gumba. Rogo gu garã nangia 1989, gu ngbanda rago i aayambaha nga Berlin Wall akuo, fuoho, gu birĩ zogarago nangia ga Komunisti naadu Putu yo ku uroyo kini gberẽ. Apai atona ka gberã gu ti mburu kuraha. Nibasa mi kini ini pa gu iraira mangaapai nangia ga GDR. Ni kpiapai, agu aboro naasongodanga gu birĩ zogarago nga komunisti ya, i adu ni ue aboro dagba aboro ringara. Ka pai ru wai ka manga wa gure? Anga ani nga akomunisti idi kuti nga aboro dunduko kina kubani te? Aira ziree du nga Komunisti? Mi atona ka bakabangire ni kerehe.

Sidu, mi adiberã re kusayo ti pa birĩ zogarago ki moi berã re kuti manzigo. Wa mi aduadu na rengba tipa ka wirika manzigo—na ki duadu na rengba ka ndu ku Yunivasiti yo—mi aberẽpa kura ni bataki abia. Kurigure, mi ambu gu wene gene raka nga gu mi awirikihe mbure ni gude. Gu pai paha anyaki bangire natona ti gu regbo re nga ka du na wene regbo, nga gu naakoda zio bakure na badungu adegude ti bangisa regbo sa. Ono manzigo gbiati gi ngbatunga gene raka re aadianga gimi bakabangirise kusayo te. Zavura agu apai mi anaaberãpaha anaaye na kina gunde fere. Ginipai nika manga kumbatayo? Na ndu gupai aboro araka ti ni nga gine?

 Fuo mi gbia akaragapai kuti gimi asanahe, kina iriwo rago nazi re. Rogo kura nyemu sa sukuru yo, ani asungu na kura agude sukuru tipa kaa sakapai tipa raka kumbatayo. Mandy * nangia gude sukuru ki du ni Dezire Yekova a. Rogo gu nyemu re ri afu wene rugute fere. Ri aya, “Andreas, ka mo aida ka gbia akaragapai kuti gamo asanahe tipa raka na gupai nika manga kumbatayo, si naida mo wiriki Ziazia Kekeapai dudunguro.”

Mi aaidanga aida kuti gupai re nzunzu te, ono mi adiberã tipa ka gbata akaragapai rogo Ziazia Kekeapai yo. Mandy aya fere mi ndu ka gedapai rogo Daniere kapita 2, gupai mi agedihe yo aima iriwo tire. Gi sangbanebi re sakipai ti kina genehe tipa agu aringara naadu na bakere ome kisusi rogo zegino, agu azogarago nga gu naarengbe ka du na bakere ome ti ni ki da kina kuti gi gaani regbo re. Mandy ayugu kura sangbaanebi fere nga gu nabipa gaani raka kumbatayo. Ono da du nakeke agu asangbaanebi re, na da du naarengbe ka gumba agu apai du kumbatayo si kini ringbisitihe kina kuho? Ya mo si rengbe ka du nga Mbori kinaho ti ni?

Mandy afu re fu Horst na Angelika, nga arogotise ni aDezire Yekova, i naaundo re mi gi rogo Fugo Mbori yo wenengai. Mi aye ka ino gupai ni kina wiri ipo nga aDezire Yekova nga gu yangada riigbu nga ga pambori namangasunge na rimo Mbori dedede, Yekova. (Atambuahe 83:18; Matayo 6:9) Mi awiriki gupai nga Yekova Mbori nafu gu maabangirise fu ngbatunga aboro dunduko nga ga raka nyeanye kindi rogo paradizo kpotosende. Atambuahe 37:9 naya: “Agu yo nasunguda Yekova i adia kumbo ringara.” Si aima ye ka ngba tire ka bi gupai nga gi maabangirise re fu agu aboro dunduko nga aguyo naida ka raka kuti ga Mbori arugute nga gu du rogo Ziazia Kekeapai yo.

Ono tie, mi aima sota na pa aria gimi gene raka tipa ka raka kuti agu arugute nga ga Ziazia Kekeapai. Du na diabese ni bataki manzigo aima sa re ni boro rukö, sidu, si aidi mi wiriki ka du na umbasitise mbata. Kurigure, si aadunga taata fere ka mbu wasiwasi mangaapai te. Mi nagasa bakere tambuahe fu Yekova tipa yugo zerangbaduse fere, inapai, gbiati rugatinapai koyo du agu aboro ni nasada tiyo ka manga gupai Ziazia Kekeapai ayugoho!

Gu birĩ zogarago nga ga Komunisti gbiati gu ida nga Mbori ti ni te naame gimi raka vuru gu bambata agarã 18 nangia ga gimi raka; Ziazia Kekeapai aima digo ni aria gimi raka. Gupai mi awirikihe aima dia gimi bakabangirise tipa raka kumbatayo na ki sa gimi raka si du na rogoyo ti ni. Rogo gu garã nangia 1993, mi azi bapatiza ki da ni Dezire Yekova na rogo gu garã nangia 2000, ani amangi rogatise na Tabitha, nangia zaza natungusipai. Ani nadia bakere regbo tipa kaa undo kura aboro tipa i ini Ziazia Kekeapai. Badungu aboro ani agbia yo gene tungusapai yo du apai tipa yo wakina gu naadu tipa re, nga aguyo du gu birĩ zogarago nga ga komunisti gbiati gu ida nga Mbori ti ni te na bakere ome kuriyo. Mi nagbia wasa ni bakerehe ho mi naayugo wai ni fuyo rengbe yo ka ino Yekova.

Ti tonatonaha, ho mi atona ka koda tire ni na aDezire Yekova, iriwoho aima zio avungure. Natona ti gu regbo re ka ndu kumbatayo, i aima ye ka bi wai du gimi kodatise na aDezire Yekova na wene sangbanaha kurii gimi raka. Mi na ngbarago nga, awere i nawirika Ziazia Kekeapai na kini ye kupati agu adunguratise nga ga aDezire Yekova.

Ani na Tabitha nagbia ngbarago rogo gaani wene rogatise mbiko ani naasada ka pekafuo agu arugute nga ga Ziazia Kekeapai sirisiri nga gu du tipa arogotise. Ni kpiapai, mangasunge kuti gu gaha rugute nga gu du tipa du ni ruruse koyo du badiarogatise ni nanyakasa gaani rogatise kina kumbatayo.—AEbere 13:4.

Mi agundenga berewe be raka te, na mi abakanga bangire berewe tipa raka kumbatayo te. Awere, mi nga papara agu aborokporo nga ga aidipase du rogo zegino dunduko, nga aguyo nagbia ngbarago be ndikidi zereda na kodatise. Agi aborokporo re namangapai na akurayo kina kubani sa. Gere nga gupai mi naidi kuti ni, na si nga gupai mi aaidaha rogo gimi raka nabaha.