1. Waigu ani ainoho nga Yekova naida kadu mbembedi na ani?

 YEKOVA nayamba rani ani mbedi na ko. (Yak. 4:8) Ko naida kadu ni gaani Mbori, Barani, na ni Bakurearani. Ko na karagapai kuti gaani akparakpee na kini undo rani ti kpakarakpakara aregbo. Na ko namangasunge na gako riigbu tipa si niyugupai furani na kini banda rani. Ono ginipai rengbe ani ka mangaha tipa ka mbeda na Yekova?

2. Waigu rengbe ani ka mbeda na Yekova?

² Ani ima rengba ka mbeda na Yekova ni kpara ani fuko na kini gedi Fugoko na kini berẽkuriihe. Wa ani nikaa manga wo, ani nika hii be nyemuse na kidu na tambuahe fuko. Si nika sa rani ani gisangbako na kini fu gu iriso fuko rẽ na ko. (Yugo. 4:11) Wa ani kaa ino Yekova gbe, kinawo a ani kaa kido kutiko na gako riigbu nga gu ko amangasunge na ni ka fu undo furani.

3. Wai du Bakitingbanga aida ka kpara rani kusayo ti Yekova, na ginipai rengbe ka undo rani ka ani mbunga gaani Mbori na gako riigbu ya? (Atambuahe 31:13, 14)

³ Ono tie, Bakitingbanga naida ka kpara rani kusayo ti Yekova, gbe, ho ani agbiatirani na akpakarapai ni. Gini birĩ ko amangasunge na ni? Ko na asada ka sarani yeeye ka ani du nga na kido kuti Yekova na gako riigbu ya. Ono ani ima rengba ka banda tirani be gako zubohe. Ho du gaani idapase ni na kido kutiko ni nyanyakihe, ani ambunga gaani Mbori na gako riigbu te.—Oni gedi Atambuahe 31:13, 14.

4. Ginipai ani nika sakapai tipaha rogo gi kekeapai re?

⁴ Rogo gi kekeapai re, ani nika sakapai tipa akpakarapai biata nga gu rengbe ka ye zegiyo angianga rogo dungurati ya; na  si dunduko naima rengba ka rungburasi gaani kido kuti Yekova na gako riigbu. Waigu agi akpakarapai re na rengbe ka kpara rani kusayo ti Yekova? Na gini apai rengbe ani ka mangaha ka ká gi ga Satana asadatise re?

5. Waigu rengbe akpakarapai ka sarani ka ani kidongo kuti Yekova na gako riigbu ya?

⁵ Ti kura aregbo, ani nagbiatirani na akpakarapai—wa gu nga sogote be gaani aborokporo watadu ho i ambu rani ni ti gaani sunge. Waigu agi akpakarapai re na rengbe ka sarani ka ani kidongo kuti ga Yekova riigbu ya, na ki kpara rani tiko? Ho ani ahi kpakarapai ni tipa gbanga regbo, ani ima rengba kadu zanga maabangirise na kidu na bakere gberãrago. Ho gipai re amanga ni, Satana namangasunge na agi amomu re tipa ka sa rani ani bi tirani nga Yekova akpingo nyemurani te. Bakitingbanga naida gupai nga ani naabihe nga Yekova watadu Gako riigbu nasa gupai nga ani naarungo. Ngbatunga pai wa gure aima manga kura aYisaraere Ezipeta yo. Ti tonatonaha, i aima ida kuti gupai nga Yekova nasia aMoize na Arona tipa i kusiyo tii sunge kanga. (Gate 4:29-31) Ono kusa ho Faro asa gayo raka ni si du ni kere kpakarakpakaraha, i abira aMoize na Arona tipa gayo akpakarapai, i ape gupai fuyo nga: ‘Oni gbarasi rimorani bangiri aFaro na gako amoyambu, ki moi basape ku be yo i imi rani na ni.’ (Gate 5:19-21) I abira ga Mbori ruru amoyambu. Na gberẽ gupai re! Ka si du nga mo ima hi kpakarapai tipa gbanga regbo, waigu rengbe mo ka banda gamo kido kuti Yekova na gako riigbu ni nyanyakihe?

6. Ginipai ani awirikaha be gu nebi nangia Abakuka tipa wai ka hi akpakarapai? (Abakuka 3:17-19)

⁶ Mo uka kpotoroyo fu Yekova rogo kparakpee yo, na ki ngere koyo du ko ni tipa undo. Gu nebi nangia Abakuka agbiatiko na dungu akpakarapai. Ti kura regbo, ko aima tona ka kapa singia Yekova naberãpa ko aberã. Ko akusuko kpotoko yo fu Yekova rogo kparakpee yo. Ko aya: “Ako Yekova, mi ka akpara ni gbanga ha waĩ tipa undahe, ka mo agia nga ha ya? . . . Ki ningere ku ri fudifudipai?” (Abak. 1:2, 3) Yekova aima karagapai kuti gu kparakpee nga ga gako ruru moyambu. (Abak. 2:2, 3) Tingbafuo Abakuka berẽ dudunguro tipa wai Yekova abatasi gako aboro, ko adu berewe na ngbarago. Ko ada kuti gu digisopai nga Yekova aima ngerafuo ko na ko nika undo ko aundo ko hi aˈasada. (Oni gedi Abakuka 3:17-19.) Ginipai ani awirikaha? Ho mo agbia tiro ni na akpakarapai, mo kpari fu Yekova na ki pe wai fuko mo abi apai. Mo ngere koyo du ko ni tipa undo. Ka mo mangihe wo, mo ima rengba kadu na gu kido nga Yekova nika fu gu ome afu foro mo aida na ni tipa ka hipai. Na ho mo nika bi gako undo ni, gamo idapase kutiko nika nyaka.

7. Ginipai agume Shirley aaida ka sari ri idi kutini, na ginipai na sari ka ri zanganga gari idapase kuti Yekova ya?

⁷ Mo nimangi agu apai naundo ro mo nye mbembedi na Yekova. Oni bingo wai manga gipai re aundo Shirley, nga wirina du Papua New Guinea yo, ho ri agbia tiri ni na akpakarapai. b Ga Shirley aborokporo angia airarungo, na ti kura aregbo, i anaasota asota tipa ka gbia riahe rengbe arengba. Kura gumeri nga kumba aˈasadi ka sa ri ka ri kidongo kuti Yekova ya. Ko aya: “Mo nape gupai nga ga Mbori ziazia toro naundo ro, wari gu du gu undo ni nga ha re? Gamo aborokporo kindi nga airarungo. Mo na gbarasa gamo regbo kuti sunge tungusapai.” Shirley ape gupai nga: “Mi asana tire nga: ‘Ya mo Mbori naberã  parani watadu ko aberãnga parani te?’ Tingbafuo gure, mi amangi kparakpee fu Yekova na ki peke agu apai fuko dunduko naadu berãre yo. Mi aambunga geda Baibiri na gaani awaraga te, mi aandu kindi kumbatayo kaa tungusapai na kini ndu tipa adunguratise.” Si aaimanga te ri ki tona ka bi gupai nga Yekova aangera angerafuo gari aborokporo. Gari aborokporo aaranga na gomoro te, na i adu na ngbarago. Shirley aya: “Mi abi gupai nga Yekova akaragapai kuti gimi akparakpee.” (1 Tim. 6:6-8) Ka mo aamanga agu apai nasa ro mo mbedi na Yekova, mo ambunga akpakarapai watadu kapa si kpara ro ti Yekova te.

8. Ginipai rengbe ka manga tipa agu awirina nangbembatayo rogo ga Yekova riigbu?

⁸ Vurube aũgbataka apangbanga, gbiati internet, avurarani na gbaraga ziree na iraira apangbanga tipa agu awirina nangbembatayo rogo apai yo rogo ga Yekova riigbu. (Tam. 31:13) I aima zio kura awirina ki kiti ngbangayo nga amangi gbegberẽ apai nga yo. Agu aKristano naadu rogo bambata sakama agarã agbiatiyo na kina ngbatunga pai wa gure ho i akitingbanga Pauro ni nirairaha na ki zi ko. Waigu agu aKristano re amangipai?

9. Waigu gu kura aKristano amangipai ho i aba Pauro ni ku bambukiso yo?

⁹ Bete agu aKristano naadu rogo bambata sakama agarã ambu songoda gu mokedi nangia Pauro ho i abako ni ku bambukiso yo Roma yo. (2 Tim. 1:8, 15) Tipagine? Ya mo zee aziyo mbiko gupai nga aboro abi Pauro nga bamangi gbegberẽ apai du nangia ko? (2 Tim. 2:8, 9) Watadu i aagunde nga, i ima rengba ka zioyo a? Ani ainongo ndu gupai nasayo i du wo te, ono oni berẽ nga pa wai Pauro adu. Ko aima hi dungu akpakarapai na ki moi gako raka ngbapai tipa yo. (Amo. 20:18-21; 2 Kor. 1:8) Si aidanga ani du wa agu aboro nambu Pauro ti gu regbo ko aaida na gayo undo ya te! Ginipai si aida ani moihe ku berãrani yo ho i arungosi agu awirina ni nangbembatayo rogo apai yo?

10. Ginipai si aida ani tingidihe ho i arungosi agu awirina ni nangbembatayo, na tipagine?

¹⁰ Mo tingidipa ndu gupai i arungosi rani ti  ni na gu boro nasaha si nimangi. Ue Timoteo 3:12 naya: “I arúngosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.” Si aidanga iriworago ti tirani ka bi gupai nga Satana nazubo agu aboro nangbembatayo rogo apai yo te. Ko naida agi awirina re mbu pa gayo du niruru yo na ko naida ka gundesi rani a.—1 Pet. 5:8.

11. Ginipai ani awirikaha ti gu kpiapai nga ga Onesiforo? (2 Timoteo 1:16-18)

¹¹ Oni naandu kindi kumbatayo kaa undo awirinaroni na kini ka kutiyo. (Oni gedi 2 Timoteo 1:16-18.) Rogo bambata sa kama agarã, gu Kristano rimoko angia Onesiforo amangipai kia ho i aba Pauro ni ku bambukiso yo. ‘Zee amanga nga ko mbiko ga Pauro azogbo te.’ Ono kuba gure, Onesiforo agbata Pauro, na ho ko agbia ko ni, ko agbata gene tipa Pauro gbia guhe ko aidaha. Ni manga Onesiforo ho wo, ko amoi gako raka ngbapai yo. Ginipai ani awirikaha? Si aidanga gunde be aboro sa rani ani zanga undo agu awirinarani i arungosi yo te. Kuba gure, si naida ani songodi pai ku bara yo yo, na ki mangi ai gupai rengbe ani ka mangaha tipa ka undo yo. (Snz. 17:17) I naida na gaani nyemuse na undo.

12. Ginipai ani awirikaha be agu awirinarani du Russia yo?

¹² Oni bingo wai agu awirinarani du Russia yo aundo agu awirinayo nga aidipase du bambukiso yo. Ho i andu ni na yo ka sarangbanga yo, dungu awirina naye ku bambu ngbangayo ka undo yo. Ginipai ani awirikaha? Ho i ape ziree ni tipa agu awirina nangbembatayo, ka zioyo, watadu kini rungosi yo, si aidanga ani gunde te. Oni kpari tipa yo, oni ngerefuo gayo aborokporo, na ki gbata agu agene rengbe oni ngbaha ka undo yo.—Amo. 12:5; 2 Kor. 1:10, 11.

13. Waigu rengbe sawia he ka sarani ka ani du nga na kido kuti Yekova na gako riigbu ya?

¹³ Agu agumerani angianga aidipase ya, gaani abadiasunge, watadu akuarani sukuru yo ima rengba ka sawia rani mbiko gupai nga ani na tungusapai na ani na raka kuti ga Yekova arugute. (1 Pet. 4:4) I ima rengba ka ya: “Mi ima kpinyemuro wangia mo boro, ono gaoni pambori ambunga gene fu aboro i naamanga gupai i akpinyemuhe te, na gaha gene mangapai ni kuruhe.” Aguyo ima rengba ka bisirapa wai ani amangapai na agu aboro i nakusi yo rogo dungurati kusayo kini ya: “Waigu rengbe mo ka yamba tiro nga boro nyemuse?” Ngbatunga afugo wa gure ima rengba ka sarani ani tona kaa kapa singia ga Yekova arugute ni wenehe. Ani ima rengba kaa bakabangirani nga: ‘Ya mo Yekova nasana rani ani mangi gupai ka ani arengbanga ka mangaha ya? Ya mo gako riigbu na ká na ani ti manga dungu apai?’ Ka si du nga mo nagbia tiro na ngbatunga apai wa gure, waigu rengbe mo ka nye mbembedi na Yekova na gako riigbu?

14. Waigu si aida ani mangipai ho kura aboro asawia rani ni mbiko raka ani kuti ga Yekova arugute? (Atambuahe 119:50-52)

¹⁴ Mo diberã kaa manga gupai Yekova aya si du ni ruruhe. Eyobo nga gu kumba naamangapai kuti agu arugute nga ga Yekova si ki vura du vurũ nga i asawiako tipa mangaha wo. Gu kura aboro namangi tiyo nga i angia abakurea Eyobo aˈasadi ka sa Eyobo ko idi kuti gupai nga pa mangako gupai du ni ruruhe watadu ko amanganga ha te, si anyakanga fu Mbori te. (Eyo. 4:17, 18; 22:3) Ono Eyobo aká ka ida kuti agu aziree re. Ko aima ino gupai nga, ga Yekova arugute tipa gupai du ni ruruhe na gupai du ni irairaha ni kina ruruhe, na ko aima diaberã tipa kaa mangaha. Ko aambunga kura aboro tipa i di pa gako du niruruse kusayo te.  (Eyo. 27:5, 6) Ginipai ani awirikaha? Ka mo mbunga sawiahe si saro mo tona ka kapa kuti ga Yekova arugute ya. Mo berẽ kusayo tipa agu apai mangi rogo gamo raka yo. Si na wiraha wa ka i ya, mo aima bi gupai bara dunguhe nga, gamo raka ni wenehe mbiko manga gupai Yekova aya si du ni ruruhe? Mo diberã ka songoda riigbu na kaa manga gupai si apehe. Ka mo mangihe wo, ka aboro vura kaa sawia ro asawia wai vurũ si asa nga ro mo mbu iriso Yekova te.—Oni gedi Atambuahe 119:50-52.

15. Tipagine i asawia Brizit ti ni?

¹⁵ Oni bingo gu kpiapai nga ga gu wirina du rimori nga Brizit, du India yo. Agumeri asawia ri tipa gari idapase. Ngbutuko fuo ri zi bapatiza rogo 1997, kumbari nangianga idipase ya azanga gako sunge. Kumbari adiberã nga ko gbiati diako na awiriyo nga adegude ga kaa raka fuo avunguko rogo kura gbata. Ono Brizit agbia tiri na kura kpakarapai berewe. Bambiko kumbari aamanganga sunge te, ri aamangasunge ti aregbo dũ tipa kaa ngerafuo gari aborokporo. Kurigure, baturõ gu dungurati nambedi na yo adu wa akirometere 350. Si nipa gberãrago tie nga, agume kumbari aasoga ri tipa gari idapase. Si nafu kina gberãrago nga gu sogote re aandu kindi kumbatayo na si ki sa gupai nga Brizit guari na gari aborokporo ki ga kurogo gu kura ba. Fuo gure, kumbari akpi ni tunguotunguoho. Kusa, tooni wiiri nga degude akpi be kansa garãri adu nga 12. Gu nagberẽ agberã berewe nga, agume Brizit abira ri tipa agu apai namangi re. I ape gupai nga wa ka ri aadanga ni Dezire Yekova ya, ka gu gbegberẽ apai re amanginga ri te. Ono, ri aandu kindi kumbatayo kaa kido kuti Yekova na ki nye mbembedi na gako riigbu.

16. Waigu Brizit agbia amaku mbikopa nye ri mbembedi na Yekova na gako riigbu?

¹⁶ Wa Brizit aaraka tuturũ ti dungurati, babi adungurati angarasi ri ri natungusapai kina rogo gu rago ri araka rogoho na kini mangi adunguratise kina kpuri yo. Ti tonatonaha, ri abihe nga si aima kpakara. Ono ri amangipai kuti gu rugapai i afuhe furi. Ri aatungusa wene pangbanga fu kura aboro, na kini mangi dunguratise kina kpuri yo, na ri asia regbo  tipa ka manga gu irisombori nga ga aborokporo na awiiri. Sangbanaha angia gine? Brizit adu na rengba ka tona wisigo Baibiri na dungu aboro na dungu gari abawiriki Baibiri aima zio bapatiza. Rogo 2005 ri atona ka mangasunge ni nazakigene. Ri agbia amaku tipa kido kuti Yekova na tipa nye niruru ri fu gako riigbu. Awiiri nairiso Yekova ni ruruyo, na adungurati awere ue rogo gu rago re! Brizit ima ida kuti gupai nga Yekova naundo ri ri dibe agu akpakarapai re, na ki hi agu asawiahe naye be gari aborokporo.

17. Ginipai si aida ani diberã ka mangaha?

¹⁷ Satana naida ka sarani ani idi kuti gupai nga Yekova nambu rani ho du ani ni rogo akpakarapai, na ka ani nye rogo gako riigbu raka nika du ni kpakarakpakaraha furani. Satana naida ani du nagunde ho i ape ziree ni ti rimo agu awirina nangbembatayo na kini rungosi yo, na kini ba yo ku bambukiso yo. Na ho i asawia rani ni, ko naida ka ani kidongo kuti ga Yekova arugute na Gako riigbu ya. Ono tie, ani ima inopai tipa gu gako gbegberẽ abiriki re, na ka ko nangingo rani te. (2 Kor. 2:11) Mo diberã ka ká gu ga Satana aziree re na ki nye niruru ro koyo du Yekova na Gako riigbu ni. Mo tingidi gupai nga, Yekova ambunga ro te. (Tam. 28:7) Sidu tie, ka pai du nga ho nga gu nika kpara ro kusayo ti Yekova ya!—Rom. 8:35-39.

18. Ginipai ani nika sakapai tipaha rogo gu kekeapai ngbefuo gere?

¹⁸ Rogo gi kekeapai re, ani sakipai tipa agu akpakarapai rengbe ani ka gbiatirani na ni zegiyo angianga rogo dungurati ya. Ono tie, gaani kido kuti Yekova na gako riigbu ima rengba kadu ni asadiasadihe ho ani agbiatirani ni na agu akpakarapai du kina rogo dungurati. Waigu rengbe ani ka mangapai nadiabese kuti agu akpakarapai re? Ani nika sakapai tipaha rogo gu kekeapai ngbefuo gere.