1. Rogo gupai yo nga ka du na rugatise nga gine? (2 Timoteo 4:5)

 HO ANI agbiatirani ni na arungosiro, gaani padu niruruse fu Yekova na gako riigbu ima rengba kadu ni asadiasadihe. Waigu rengbe ani ka diabe ngbatunga agu akpakarapai re? Si naida ani du na rugatise, kini ngere, na ki ru nyanyaki rogo idapase yo. (Oni gedi 2 Timoteo 4:5.) Ani nabandapa gaani du na rugatise ni nye ani zezeredi, kini berẽ ziazia, na kini asadi kaa bi apai wa gu Yekova abihe. Ho ani amangaha ni wo, gaani abipai adunga na maapai kurii gaani aberã te.

2. Gini apai ani nika sakapai tipaha rogo gi kekeapai re?

² Rogo gu kekeapai nadu mbata fu gere, ani asakipai tipa akpakarapai biata nga gu rengbe ani ka gbiatirani na ni nga gu ayengo rogo dungurati ya. Rogo gi kekeapai re, ani nika sakapai tipa akpakarapai biata nga gu rengbe ka asada pa gaani du ni ruruse fu Yekova rogo dungurati. Agu akpakarapai re nga (1) ho ani abihe ni nga kuarani Kristano ima mangapai na ani ngba gbegberẽ gene, (2) ho ani agbia rugute ni, na (3) ho ani aasada ka inido tirani ni na agu aˈariapai i amangaha rogo riigbu. Waigu rengbe ani ka banda gaani pa du na rugatise na ki nye niruru rani fu Yekova na gako riigbu ho ani agbiatirani ni na ngbatunga akpakarapai wa gure?

3. Waigu rengbe ani ka mangapai ka ani bi gupai nga kuarani Kristano mangi furani gbegberẽ?

³ Ya mo mo abingo ho nga kuaro Kristano mangipai na mo ngba gbegberẽ gene isoke, gu boro du adu na pagbia be ni wa bakumba? Si nawiraha wa, gu wirina re aaidanga aida ka ba gberãrago ti ro te. (Rom. 3:23; Yak. 3:2) Wa vura du he wo, si  nawiraha wa gani mangaapai aima ba gberãrago tiro. Rame aima rengba tigaha ka kpangba bangiro yo mo kini berẽ tipa gupai re. Mo aima rengba ka bakabangiro nga, ‘Ka si dunga wirina rengbe ka mangapai ngba gi gene re, ya mo boro ga Mbori riigbu du nzunzu nga gere?’ Wo du nzunzu Satana aida ani berẽ. (2 Kor. 2:11) Ka ani tona kaa berã ngba gi gene re, ani ima rengba ka mbu iriso Yekova na ki mbu gako riigbu. Sidu, ka ani bi gupai nga wirina mangipai na ani ngba gbegberẽ gene, waigu rengbe ani ka banda gaani padu na rugatise ki ne ka berã ngba gu gene Satana aida ani berẽ ngbaha re?

4. Waigu Yosefa abanda gako padu na rugatise ho i amangipai ni na ko ngba gbegberẽ gene, na gini apai rengbe ani ka wirikaha ti gako kpiapai? (Bambata Pai 50:19-21)

⁴ Ka mo nyenga na zinga ya. Ho Yosefa adu ni ni sosono gude, awiribako amangi fuko gbegberẽ. I asogoko, na zavura aguyo ki idi ka imoko. (Bam. P. 37:4, 18-22) Niyangaraha, i abagiko ni kanga. Ni sangbana gipai re, Yosefa agbia tiko na kere aasada nga gu nadi agarã wa 13. Yosefa aima rengba ka berã gupai nga Yekova akpingo nyemuko te. Na ko aima rengba ka bakabangiriko singia Yekova aima mbuko ti gu regbo ko aaida na undo re. Ono ko aanyenga na zinga te. Kuba gure, ko abandapa gako du na rugatise ni nye ko zezeredi. Ho ko adu ni na momu tipa ka manga fu awiribako gbegberẽ, ko aza tiko ti mangaha wo, ono kuba gure, ko ayugu nyemuse fuyo na ki mbupai fuyo. (Bam. P. 45:4, 5) Yosefa amangipai ngba gi gene re mbiko ko aima du na rengba ka berã ziazia. Ko aaberãnga kina tipa gako akpakarapai sa te, ono ko aaberã tipa gupai Yekova akpinyemuhe. (Oni gedi Bambata Pai 50:19-21.) Ginipai ani awirikaha? Ka si dunga boro mangipai na mo ngba gbegberẽ gene, ka mo nyenga na zinga kuti Yekova watadu kaa bakabangiro singia ko ima mbu ro ya. Kuba gure, mo berẽkuriipa wai ko aundo ro mo hi asada. Kurigure, ho kura aboro amangapai ni na mo ngba gbegberẽ gene, mo asadi ka dada gayo azangarengba na nyemuse.—1 Pet. 4:8.

5. Waigu Miqueas abanda gako padu na rugatise ho ko abi gupai ni nga i amangipai na ko ngba gbegberẽ gene?

⁵ Ani wisigingo kpiapai nga gu du ti gi gaani regbo re nga ga bakumba du South America yo du rimoko nga Miqueas. b Ko natingida pa gu regbo atingida ho ko abihe ni nga kura awirina naadu na kina pagbia beyo rogo ga Yekova riigbu amangipai na ko rogo gbegberẽ gene yo. Ko aya: “Mi aadunga mbata ni fudifudi re wa gure te. Mi aima du rogo bakabangirise. Mi aarengbanga ka ra yuru te, na mi akpari ni aume mbiko mi abihe nga pai ho mi arengbe ka mangaha te.” Wa si avura duwo, Miqueas abanda gako padu na rugatise na ko ki mangi asadatise nyanyaki ka za tiko ti agu abipai ko adu na ni. Ko amangi kparakpee bara dunguhe, kini sana Yekova tipa ko fu gako ziazia toro fuko na ome tipa ko hipai. Ko amangi wetekapai a rogo gaani awaraga tipa agu apai narengbe ka undo ko. Ginipai ani awirikaha? Ka si dunga mo nabihe nga wirina mangi foro ngba gbegberẽ gene, mo nye zezeredi na ki asadi ka za tiro ti ai gu gbegberẽ abipai ka mo du na ni. Mo arengbanga ka ino agu apai gu boro adu rogoyo nga gu nasa ni ni fura watadu ni mangipai ngba gu gene ni amangipai ngbaha re te. Sidu, mo fura fu Yekova rogo kparakpee yo, na ki sanako ko undo ro mo naabi apai kina ngba gu gene ko abihe ngbaha. Pa manga mo ho wo nika undo ro mo berẽ gupai nga wirinamo aaidanga aida ka manga ro na gupai du ni gbegberẽhe te na si ima rengba ka undo ro mo mbupai funi. (Snz. 19:11) Mo tingidi gupai nga, Yekova ima rugatiko na gupai du mo rogoho na ko nika fu gu ome afu foro mo aidaha tipa ka hipai.—2 Peka 16:9; Batu. 5:8.

6. Tipagine duhe ti ni ni nyanyakipa pai ani rugu tirani na gupai nga Yekova naruga rani bambiko ko ima kpinyemu rani? (AEbere 12:5, 6, 11)

⁶ Ho Yekova aruga rani ni si ima rengba ka sarani ani du na bakere gberãrago. Ono ka ani aaberã kina pa wai du ani na gberãrago, ani ima rengba ka tona kaa berã gupai nga gu rugute re arẽnga te, na si abingo pa rani te watadu si ima du ni kere iigirã ha. Gipai re ima rengba ka sa rani ka ani rugunga tirani na nyanyakipa pai ya, nga Yekova naruga rani bambiko ko ima kpinyemu rani. (Oni gedi AEbere 12:5, 6, 11.) Na ka ani aaberã kindi kina kurii pa wai gu rugute re nisa rani ani du na gberãrago, ani nika saha taata fu Satana ko zubo rani. Ko naida gupai nga ani ká rugute, na gu gberẽ berewe nga, ani turũsi tirani ti Yekova na ti dungurati. Ka singia i afu rugute foro waigu rengbe mo ka banda gamo padu na rugatise?

7. (a) A wa i nayuguhe rogo sura, waigu Yekova amangisunge na Petero tifuo ko di rugute kugume? (b) Ginipai mo awirikaha ti ga Petero kpiapai?

⁷ Mo di rugute kugume, na ki mangi agu aʹariapai si aidaha. Bara dunguhe, Yesu arugu Petero ku bangiri kura amokedi. (Mk. 8:33; Rk. 22:31-34) Si nawiraha wa zee aima zio Petero tigaha gbe! Wa si avura duwo, Petero anye kindi niruru ko fu Yesu. Ko adi rugute kugume na ki wirikipai ti gako aingahe. Ni sangbana gupai re, Yekova afu mosoro fu Petero tipa gako padu niruruse na ki fu nyanyakipa asunge fu ko rogo dungurati. (Yo. 21:15-17; Amo. 10:24-33; 1 Pet. 1:1) Ginipai rengbe ani ka wirikaha ti ga Petero kpiapai? Ani gbiati kura aboro nagbia undo ho ani aberãnga ni gbe kina kurii wai zee nizi rani ya, ono kuba gure, ani nagbia undo ho ani adia rugute ni kugume na ki mangi agu aˈariapai si aidaha. Ho ani amangaha ni wo, ani nada gbe ni wene ũsunge fu Yekova na fu awirinarani.

8-9. Tifuo Bernardo gbia rugute, waigu ko adu ti tonatonaha, ono ginipai naundoko ko rugu gako berã?

⁸ Oni bingo gupai namangi Bernardo, nga wirina du Mozambique yo. I adiko kusa yo ti sunge abaakumba. Waigu Bernardo adu ti bambataha? Ko aya, “Mi akpipai bambiko mi aaidanga gu rugute i afuhe fere te.” Ko aabakabangiriko tipa wai kura aboro rogo dungurati nika biko. Ko aya, “Si adi re adia na bete adiwi tipa mi tona kadu na ruru bipai tipa gupai re, na ki kido kuti Yekova na gako riigbu berewe.” Ginipai naundo Bernardo ko du na ruru bipai?

⁹ Bernardo aima ruga gako berã. Ko aya: “Ho mi aamangasunge ni ni bakumba, mi amangisunge na AEbere 12:7 tipa ka undo kura aboro i du  na ruru bipai tipa ga Yekova rugute. Awere, mi asana tire nga, ‘Da si aida ni mangisunge na gi veresi re?’ Ga Yekova amoyambu dunduko—kodihe na mi.” Tifuo gure, Bernardo amangi gu kura aˈariapai tipa ka sonosa gako kido berewe kuti Yekova na Gako riigbu. Ko aageda Baibiri ni bakerehe na kini di regbo ni bakerehe kaa berã dudunguro kurii agu apai ko aagedaha. Wa si avura du nga ko aabakabangiriko kindi tipa wai awirina aabiko, ko aatungusapai atungusa na yo na kini fu akaragapai ti regbo agu adunguratise nga ga dungurati. Fuo bete regbo kusa, i akaraga sunge abaakumba berewe fu Bernardo. Wakina Bernardo, ka singia mo gbia rugute, ka mo asadingo kaa berã ni bakerehe tipa kina wai zee nazi ro ya, mo di rugute kugume, na ki mangi agu aˈariapai si aidaha. c (Snz. 8:33; 22:4) Ka mo mangihe wo, mo ima rengba kadu na gu kido nga, Yekova nika fu mosoro afu foro tipa ka mo kutiko niruru ro na kuti gako riigbu.

10. Gini ariapai ga Yekova riigbu amangihe nga gu naaima rengba ka asada ga kura aYisaraere padu niruruse?

¹⁰ Agu aˈariapai riigbu amangaha ima rengba ka asada gaani padu niruruse. Ka ani aadunga na rubangirise ya, ani ima rengba kambu he si kpara rani ti Yekova. Ni kpiapai, oni berẽnga pa wai apai aˈariatihe fu aYisaraere. Mbata fu Yekova fu aNdiko fuyo, abariikporo du nanaamanga agu apai si aaida aboromotumo mangihe. I anaadua abamotumo na kini fu amotumo fu Yekova tipa gayo aborokporo. (Bam. P. 8:20, 21; 12:7; 26:25; 35:1, 6, 7; Eyo. 1:5) Ono ho i asigira aNdiko ni, si aaidanga abariikporo naamanga agu apai re berewe te. Yekova amoi aboromotumo rogo gu ngbadimokporo nangia ga Arona tipa i naafu amotumo. Naatona ti gu regbo re kaa ndu kumbatayo, ka gu bariikporo naadunga rogo gu ngbatunga nangia ga Arona ya atona ka mangapai wa boromotumo, ka i anirengbe ka imo ni kusayo. d (Pa Mot. 17:3-6, 8, 9) Isoke, ya mo gi ariapai re nangia gu ndu apai nasa Kora, Datana, Abirama, gbiati agu abazogo nadu 250 i samungu kuti Moize na Arona? (Geda 16:1-3) Nirengo, ani ainongo gupai nzunzu namangi te. Ono gupai ani nainihe nga, Kora na gu kura akumba naadu na ko aanyenga niruru yo fu Yekova te. Ka si dunga agu aˈariapai riigbu amangaha naˈasada pa gamo du niruruse, ginipai rengbe mo ka mangaha?

11. Ginipai ani awirikaha ti gu kpiapai nangia ga kura aRevi nangia awiri Koata?

¹¹ Oni songodi agu aʹariapai wenengai riigbu amangaha. Ti gu regbo awiri aYisaraere aandu gayo nunguro ngbakungbo yo, awiri Koata anaangera wenengai fuo gayo nyanyakipa sunge. Ti agu aregbo dunduko aYisaraere aandu ku rogo gu kura abataya, kura awiri Koata, nanaatinda sanduki mokido ka pera na ni mbatayo fu aboro dunduko. (Geda 3:29, 31; 10:33; Yos. 3:2-4) Nga gu bawene momu nangia ha re! Ono tie, apai aˈariatihe fuyo ho aYisaraere anye ni kaa raka Ringara Mokido yo. Si aaidanga i naatinda Sanduki Mokido berewe dedede te. Sidu, ti gu regbo Soromo azogorago ni bakindo, i afu gu sunge fu kura awiri Koata nga sunge bibia, aguyo kini mangisunge ni ababanda ngbadimo, agu akurayo kini banda bambu igaahe. (1 Peka 6:31-33; 26:1, 24) Pai ho nayugo gupai nga awiri Koata akpakanahe watadu kini idi na gu kura nyanyakipa asunge mbiko i adu mbata na kparakpara sunge beyo te. Ginipai rengbe ani ka wirikaha? Mo songodi agu aˈariapai na ngbaduro yo dunduko ga Yekova riigbu amangaha kodihe na ai gu du na maapai  kurii gamo sunge. Mo gbia ngbarago ti ai gu sunge i nafuhe foro. Mo tingidi gupai nga anga gamo sunge nasa gupai nga mo du na nyanyaki paro fu Yekova te. Yekova nabi gamo giasangba na nyanyakipa ha gbe kisusi ai gu sunge mo amangaha.—1 Sam. 15:22.

12. Waigu Zaina adu ho i akusi ri ni Betere yo na ki kedi ri ni kparakpara nazakigene?

¹² Oni bingo gu kpiapai nga ga Zaina, nga gu wirina nagbia ariapai ti gari sunge, nga gu momu ri anaabihe na nyanyakipa ha gbe. I afu gu sunge nga ga kparakpara abazakigene furi tingbafuo ri mangi sunge Betere yo tipa agarã naima susa 23. Ri aya: “Gu ariapai nangia ga gimi sunge re aima zigbä re ni bakerehe. Mi atona ka bi tire nga sunge tire te na mi aasana tire kindi nga, ‘Ginipai mi amangihe ni gbegberẽhe?’” Gu nagberẽ agberã berewe nga, kura awirina rogo dungurati afubee kuti gari gberãrago ni peyo gupai furi nga: “Wa ka si angia wene boro nangia mo ka riigbu akusi nga ro Betere yo te.” Tipa bete regbo, rago aima gberã ti Zaina nikerehe si ki sa gupai nga ri naakpara na ayuru dunduko. Ono ri aya: “Mi aambunga tire tipa ka tona du na kapa kuti riigbu watadu ga Yekova nyemuse te.” Waigu Zaina adu na rengba ka banda gari padu na rugatise?

13. Ginipai Zaina amangihe tipa ka diabe gari iraira abipai?

¹³ Zaina aima du na rengba ka diabe gari iraira abipai. Ngba gini gene? Ri agedi kekeapai rogo gaani awaraga yo nga gu naasakapai tipa kina gupai ri aandu rogoho nga gu naundo ri ri hipai. Gu kekeapai nga, “Mo Ima Rengba ka Diabe Gberãrago!” nadu rogo gu Ngbaõbambu Sinziri nangia ga Wegebe 1, 2001, si aima undo ri ni bakerehe. Gu kekeapai re asakipai tipa wai gu bake Baibiri nangia Marako arengbe kaa sota na kina ngbatunga abipai wa gure ho ko agbia aˈariapai ni nga ga sunge. Zaina aya, “Ga Marako kpiapai nangia gu dawa mi aaidaha tipa ka diabe gimi gberãrago.” Zaina anye mbembedi na anakureari. Ri aambunga kodatiri watadu ki mbu tungusapai na awirina te, na ri aadunga na gberãrago tipa tiri te. Ri ada kuti gu digisopai nga, ga Yekova toro du namangasunge rogo gako riigbu na agu aboro nangbembatayo rogo apai yo aaberãpa ri aberã ni bakerehe gbe. Ono ri aini gupai a nga si naida ga Mbori riigbu mangi gupai du ni wenehe tipa ga Yekova sunge du ni mangimangihe.

14. Gini ariapai riigbu amangihe nga gu Vlado aasota ka inido tiko na ni, na ginipai naundo ko?

¹⁴ Si aima kpakara fu Vlado, du garãko nga 73,  nga bakumba Slovenia yo, ho i akodi gu dungurati ni ko adu rogoyo na gu kura dungurati na i ki kisi gu Bambu Kindo i anaamanga dunguratise rogoho. Ko aya: “Mi aaruganga tire na ndu gupai i akisi bawene Bambu Kindo ti ni wa gure te. Rago aima gberã tire bambiko ani ambakadi gu Bambu Kindo re barambeda. Mi nga basengua, na mi aima mbakada gu kura vovo ahe. Na berewe, pa koda yo dungurati aaida kura dungu aˈariapai nga gu naadunga taata furani nga sosono aboro ya.” Ginipai naundo Vlado ko songodi gu rugapai re? Ko aya: “Pa mangapai kuti agu aˈariapai ga Yekova riigbu amanga ti aregbo dũ naye na amaku. Si nambakada rani tipa bakere aˈariapai kumbatayo.” Ya mo mo nasota na agu aˈariapai ye mbiko pa koda dungurati watadu pa aria gamo sunge? Mo du na gu kido nga Yekova ima rugatiko na gamo abipai. Ho mo asongoda ngbatunga agu aˈariapai re ni na ki ka kuti Yekova niruru ro na gu riigbu ko amangasunge na ni, nirengo, mo nika gbia maku agbia.—Tam. 18:25.

15. Waigu rengbe ani ka banda gaani padu na rugatise ho ani agbia akpakarapai ni rogo dungurati?

¹⁵ Wa ani ambeda gbe na digido gi sino raka re, si naida ani ini gupai nga ani ima rengba ka gbia tirani na akpakarapai nga gu naye kina rogo dungurati. Agu akpakarapai re ima rengba ka asada gaani padu niruruse fu Yekova. Sidu, ani duwa ka ani banda gaani padu na rugatise. Ka mo bi gupai nga kuaro Kristano mangi foro gbegberẽ, ka mo kpingo pai ya. Ka mo gbia rugute, ka mo berẽnga gbe kina kurii gu zee zi ro ya, mo di gu rugute re kugume, na mo ki mangi agu aˈariapai si aidaha. Na ho ga Yekova riigbu amanga aˈariapai ni nga gu du na maapai kuriro, mo dihe na ngbaduroyo dunduko na ki mangipai kuti gu rugapai re.

16. Waigu rengbe mo ka bandapa gamo kido kuti Yekova na gako riigbu?

¹⁶ Mo ima rengba ka bandapa gamo kido kuti Yekova na gako riigbu ho du gamo padu niruruse ni ni asadiasadihe. Ono tipa ka mangaha wo, si naida mo banda gamo padu na rugatise, naida ka ya, ka nye zezeredi, kini berẽ ziazia, na ki asadi kaa bi apai wa gu Yekova abihe. Mo diberã ka wisigopai tipa agu aboro du payo rogo Baibiri yo, nga aguyo namangipai kidu na diabese rogo ngbatunga apai wa gure na mo ki berẽkurii gayo akpiapai. Mo mangi kparakpee fu Yekova tipa undo. Na ka mo ya kparanga tiro kusayo ti dungurati ya. Fuo gure, ka kina ginipai vura manga, Satana adunga na rengba ka kpara ro kusayo ti Yekova na Gako riigbu te.—Yak. 4:7.