1. Ginipai si aida ani inihe, na ginipai rengbe ani kadu na kido tipaha?

 SI NAIDA aida ani ini gupai nga kura aboro nika soga rani asoga ho ani atungusapai ni. Gu sogote re ima rengba ka kio ni bakerehe kumbatayo. (Dan. 11:44; 2 Tim. 3:12; Yugo. 16:21) Wa vura duhe wo, ani ima rengba kadu na kido nga Yekova nika fu gu undo afu ani aidaha. Tipagine? Yekova aima digo ni undo gako amoyambu ti aregbo dunduko tipa i mangi gayo asunge—ka agu asunge re vura kpakara wai vurũ. Tipa ka yugoho na kpiapai, ani bingo bete apai namangi rogo gu raka yo nangia ga gu nebi nangia Yezekere, nga guko natungusipai fu agu aYudo i aziyo ku Babera yo.

2. Waigu Yekova asakipai tipa agu aboro si aaida Yezekere tungusipai fuyo, na gini apai ani nika sakapai tipaha rogo gi kekeapai re? (Yezekere 2:3-6)

² Gini ngbatunga aboro si aaida Yezekere tungusipai fuyo? Yekova aya tipa yo, i nga “aboro zanga zee,” aboro “nyakari,” na ni “asamungu.” I angia kere aboro wakina akiwe na kidu ni kerehe yo wakina angerembia. Si nga ndu gupai Yekova aya ti ni fu Yezekere bara dunguhe wẽ: “Ka mo gunde nga” ya! (Oni gedi Yezekere 2:3-6.) Yezekere aima du na rengba ka manga gako sunge tungusapai bambiko (1) Yekova du nakedi ko, (2) ga Mbori toro afu gu ome fuko ko aaidaha, na (3) agu afugo nga ga Mbori anyakasi gako idapase. Waigu agi apai du biata re aundo Yezekere? Na waigu si aundo rani areme?

3. Gini afugo tigaha naima nyakasa Yezekere, na waigu Yekova akido ko nga Ko nika songoda ko asongoda?

³ Yekova aya fu Yezekere wẽ: “Mi kedi ro.” (Yeze. 2:3, 4) Agu afugo tigaha re aima ngarasa Yezekere. Tipagine? Bambiko Yezekere aima tingida gupai nga Yekova ape ngbatungapai wakina  gure fu Moize na Yesaya ho ko asiayo ni ni Gako anebi. (Gate 3:10; Yes. 6:8) Yezekere aima ino wai a Yekova aundo agu anebi nadu ue re tipa i mangi gayo kpakarakpakara asunge. Sidu, ho Yekova aya ni bara ue fu Yezekere wẽ: “Mi kedi ro,” gu nebi re aima du na wene ndupai tipa ka kido kuti ga Yekova songodahe. Kurii gure, rogo gu buku nga ga Yezekere, ani nabi agu afugoyo bara dunguhe nga: “Sangba Yekova aye fere.” (Yeze. 3:16) Ni rengo, Yezekere aima du na gu kido nga Yekova du nakedi ko. Ba Yezekere angia boromotumo. Si nawiraha wa ko aima yugopai fu Yezekere tipa wai Yekova agumba gupai fu Gako anebi nga Ko nikaa undoyo aundo ti aregbo dunduko. Ni kpiapai, Yekova aya fu Yisaka, Yakobo, na Yeremaya wẽ: “Mi dú na mo.”—Bam. P. 26:24; 28:15; Yere. 1:8.

4. Gini afugo wasa tigaha si awiraha wa si aima nyakasa Yezekere?

⁴ Waigu badungu aYisaraere amangipai kuti gu pangbanga Yezekere aatungusaha? Yekova aya: “Ngbatunga aYisaraere adéga nga tuyo foro te; bambiko i akpi nga nyemu ka dega tuyo fere te.” (Yeze. 3:7) Pa ká aboro Yezekere, gure angia i aaká kina boro Yekova. Agu afugo re akido Yezekere na gupai nga, pa ká aboro ko aayugongo gupai nga ko aamanganga gako sunge wenengai ni nebi te te. Yekova akido Yezekere berewe nga, ho gu pangbanga sapangbanga ko aatungusaha re nika da ni ti rengo, aboro “aina ha ya nebi adu dagba yo yo.” (Yeze. 2:5; 33:33) Zanga kapa, agu afugo wasa re aima fu gu ome fu Yezekere ko aaidaha tipa ka manga gako sunge tungusapai wenengai.

5. Ginipai Yesaya 44:8, apehe nga si nika fu wingbaduse furani?

⁵ Ani nagbia ome a ti ino gupai nga Yekova du kedi rani. Ko nayugo irisa furani niyamba ko rani nga gako “adezire.” (Yes. 43:10)  Nairiwo gu riko bakere momu nga ha re! Kina wai Yekova aya fu Yezekere: ‘Ka mo gúnde nga ya,’ Yekova nazinahe furani nga: “Ka oni kío nga a ya.” Tipagine si aidanga ani gunde ti ni be asogo rani ya? Wakina Yezekere, Yekova du kedi rani na Ko nasongoda rani asongoda.—Oni gedi Yesaya 44:8.

6. (a) Waigu Yekova nakido he tipa ka songoda rani? (b) Ginipai nafu wasa furani gbiati ome?

⁶ Yekova nakidohe nga ko nika undo rani aundo. Ni kpiapai, mbata fu Yekova ya wẽ: “Oni nga gimi adezire,” ko aya: “Ho mo ka asusa ni rogo aime mi adú na mo; na rogo adi, si afú nga ri ro te; ho mo ka ata ni rogo we mo agbí nga te, mirãwe arita nga ro a te.” (Yes. 43:2) Wa ani amanga gaani sunge tungusapai, ti kura aregbo, ani ima rengba ka gbiatirani na akpakarapai wakina fúfú ime na ki gbia aasada wakina mirãwe. Ono na ga Yekova undo, ani nikaa tungusapai kindi. (Yes. 41:13) Kina wai si adu ti regbo Yezekere, badungu aboro areme naká gu pangbanga re aká. Ono anga si wo mbiko ani atungusanga pai wenengai te te. Ani nagbia wasa na ome ti ino gupai nga Yekova na ngbarago ho ani andu ni kindi kumbatayo niruru rani kaa tungusa gako pangbanga. Gu mokedi nangia Pauro aya: “Gu ni ka dia gani mosoro tigani rengbe na gani nyanyaki sunge.” (1 Kor. 3:8; 4: 1, 2) Wirina niima ima kuti sunge anazakigene aya: “Si nafu ngbarago fere ka ino gupai nga Yekova nafu mosoro afu furani tipa agu aome ani amangaha.”

7. Waigu Yezekere adu ho ko aaberã ni kurii gu yuguyugupai ko abihe? (Oni bi gu sura duti kpotoho.)

⁷ Yezekere aima bi wai du ga Mbori toro na bakere ome ti ni. Gupai Yezekere abihe rogo gako yuguyugupai yo aundo ko ko ini gupai nga ziazia toro aaundo agu amaraika du na bakere ome ti yo na kini tura andu bakere ngbagidavura. (Yeze. 1:20, 21) Waigu Yezekere amangipai? Ko ake gupai namangi re. “Ho mi abi he ni, mi ki ti ni kpakpure ku sande.” Iriwoapai aima ti ti Yezekere nikerehe si ki sa gupai nga ko ti kusande. (Yeze. 1:28) Kusa, ho Yezekere aaberã ni kurii gu iiriwo yuguyugupai re, si aima nyakasa gako kido nga, na gu undo nga ga ga Mbori ziazia toro, ko ima rengbe ka manga gako sunge tungusapai.

8-9. (a) Ginipai namangi fu Yezekere ho Yekova afu gu zinahe ni fuko nga ko “rú ku ari”? (b) Waigu Yekova anyakasi Yezekere tipa gako kpakarakpakara dagbarago?

⁸ Yekova azinahe fu Yezekere nga: “Wiri boro, mo rú ku ari ngba nduro, mi ki fura na mo.” Gu zinahe re gbiati ga Mbori toro afu gu ome fu Yezekere ko aaidaha tipa ka ru kuari. Yezekere akepai nga: “Toro ki rimi ku kpotore yo ki rugu re ngba ndure.” (Yeze. 2:1, 2) Kusa, na rogo ga Yezekere sunge tungusapai naabaha, “be” Mbori anungusi ko—naida ka ya ga Mbori ziazia toro anungusi ko. (Yeze. 3:22; 8:1; 33:22; 37:1; 40:1) Ga Mbori toro anyakasi Yezekere tipa gu sunge i afuhe fuko nga ka tungusapai fu ‘airanyakari na nyanyaki ngbadu aboro’ yo. (Yeze. 3:7) Yekova aya fu Yezekere wẽ: “Mi sa kpakpuro nyanyaki kuti kpakpuyo, ngbanda kpakpuro nyanyaki kuti ngbanda kpakpuyo. Mi mangi kpakpuro wa banyanyaki he susi mbia we; ka mo gúnde nga be yo ya, ka mo ayúngura nga be ngera yo a” ya. (Yeze. 3:8, 9) Si wa ka i ya, Yekova aagumba gupai fu Yezekere nga: ‘Ka mo mbunga gu nyakarii nga ga aboro si ba gberãrago tiro ya. Mi anyakasa ro.’

⁹ Fuo gure ngbutuko, ga Mbori toro atumba Yezekere na ki ndu na ko kurogo gako dagbarago nangia ga tungusapai. Yezekere akepai nga, “Be Yekova ki du ti re nyanyaki.” Si adi gu nebi re na poso sa tipa ko wiriki na ki rugutiko na gu pangbanga si aaida ko tungusihe tipa wa  ka ko tungusipai na kido. (Yeze. 3:14, 15) Tifuo gure, Yekova aya fuko, mo ndu ku rogo ngboongboorago, yo du ‘toro arimi ni ku kpoto ko’ yo. (Yeze. 3:23, 24) Yezekere aima du regerege ka tona gako sunge tungusapai.

10. Gini undo ani aidaha tipa ka manga gaani sunge tungusapai, na tipagine?

¹⁰ Gini undo ani aidaha tipa kaa ndu kumbatayo na gaani sunge tungusapai? Tipa ka karagapai kuti gu sanahe re, oni berẽnga pa gupai namangi Yezekere. Mbata fu ko tona gako sunge tungusapai, ga Mbori toro afu gu ome fuko ko aaidaha. Wakina gupai nadu tipa Yezekere, areme a, ani natungusapai mbiko gu undo ga Mbori toro afuhe furani. Tipagine? Bambiko Satana nasovura kuti rani tipa ani mbu gaani sunge tungusapai. (Yugo. 12:17) Dungu aboro naberã gupai nga Satana ima du na ome tiko nikerehe na ka ani songa vura na ko ki di beko te. Ono vurube gaani sunge tungusapai, ani nadia adia beko! (Yugo. 12:9-11) Rogo gini gene? Ho ani atungusapai ni, ani nayugo gupai nga ani agundenga be agu aserekpohe nga ga Satana te. Ai gu regbo ani atungusapai, gure nga ani ima diabe Satana. Ginipai nada furani ziazia ho ani aino gupai ni nga ani ima rengba kindi kaa tungusapai zavura ho avurarani asoga rani ni vurũ? Gupai du ziazia nga, Yekova nafu ome furani vurube gako ziazia toro na ko naida aida na gaani pai.—Mt. 5:10-12; 1 Pet. 4:14.

11. Ginipai ga Mbori toro nika mangaha furani, na waigu rengbe ani kaa ndu kindi kumbatayo kaa gbiaha?

¹¹ Gini kurapai berewe ani awirikaha ho ani aberãkuriipa wai ni Yekova afu gu ome fu Yezekere ko aaidaha tipa ka tungusapai? Ga Mbori toro ima rengba ka fu gu ome furani ani aidaha tipa ka diabe ai gu kpakarapai rengbe ani ka gbiatirani na ni gene tungusapai yo. (2 Kor. 4:7-9) Ginipai tie rengbe ani ka mangaha tipa kaa ndu kindi kumbatayo kaa gbia ga Mbori toro? Si naida ani kpatagara kuti kparakpee tipaha, kidu na gu kido nga Yekova nika gia gaani akpee agia. Yesu ayugu gupai fu gako abawiriki nga: “Oni sána he tipa he, . . .  oni gbáta he, . . . oni ngóka ngbadimo.” Ni sangbanaha, Yekova nika fu “ziazia toro fu agu yo nasana ko” tipaha.—Rk. 11:9, 13; Amo. 1:14; 2:4.

12. Ringbisihe kuti Yezekere 2:9–3:3, wari gu gu kaikai waraga re aye ni na ginipai nadu rogoyo?

¹² Ga Mbori toro afu gu wingbaduse fu Yezekere ko aaidaha tipa ka tungusapai. Ono anga gure nangia gu yangara pai te. Afugo Mbori anyakasi ga Yezekere idapase a. Rogo yuguyugupai yo, Yezekere abi bese si nazadi kaikai waraga. (Oni gedi Yezekere 2:9–3:3.) Wari gu gu kaikai waraga re aye ni? Ginipai nadu rogoho? Waigu si azambuasi Yezekere? Ani bingoho. Gu kaikai waraga re aye yo du ga Mbori mbatabakindo ni. Si nawiraha wa, Yekova amangisunge na maraika sa dagba agu amaraika nadu biama Yezekere abi yo mbata kusayo tipa ni fu gu kaikai waraga re fuko. (Yeze. 1:8; 10:7, 20) Gu kaikai waraga re adu na afugo Mbori rogoho—na si adu na gu pangbanga rogoho nangia ga sapangbanga si aaida Yezekere takipandehe fu agu asamungu i aga na yo nizizi yo. (Yeze. 2:7) Gu pangbanga re adu ni kekehe ti kpakpu gu waraga re na giihe yo.

13. Ginipai Yekova aya fu Yezekere ko mangihe na kaikai waraga, na tipagine si adu ti ni ninzinziri he?

¹³ Yekova aya fu gako nebi wẽ ko ri gu kaikai waraga re na “ki hisi [vuko] na ni.” Yezekere agisangba ki riti gu kaikai waraga re naabaha. Ginipai gi papara yuguyugupai re ayugoho? Si aaida Yezekere rugutiko na gu pangbanga wenengai ko aandu ka tungusaha. Si aaida ko idi kuti gu pangbanga re tipa wa ka si fõngbadu ko yo tipa ko tungusipai. Fuo gure, kura iiriwopai amangi. Yezekere aye ka ino gupai nga gu kaikai waraga re adu ni “nzinziri [he] wa nzeme anyege.” (Yeze. 3:3) Tipagine? Tipa Yezekere, gu momu nga ka rukuba Yekova adu ni nzinzirihe, watadu ni bawenehe. (Tam. 19:8-11) Ko adu na bakere ngbarago nga Yekova aidihe fuko ko mangisunge ni gako nebi.

14. Ginipai naundo Yezekere ko du regerege tipa ka dia gako sunge?

¹⁴ Kusa, Yekova aya fu Yezekere wẽ: “Gu gimi apai dunduko nga gu mi akagumba foro mo di he ku kpotoro yo, ki gi he ni turo.” (Yeze. 3:10) Na agu arugapai re, Yekova aya fu Yezekere ko asadi ka tingida agu apai du ni kekehe rogo gu kaikai waraga re na ki berẽ wenengai kuriihe. Ho Yezekere amangi gupai re ni, gako idapase ada ni nyanyakihe. Na berewe a, gu kekeapai nadu rogo gu kaikai waraga re afu gu nyanyakipa pangbanga fuko si aaida ko tungusihe fu aboro. (Yeze. 3:11) Ho Yezekere arugutiko ni wenengai na ga Mbori pangbanga na ki idi kutini, ko aima du regerege tipa ka tona tungusapai na kini ndu kindi kumbatayo daho ko anyasi gako sunge ni.—Tam. 19:14.

15. Tipa ka hipai, ginipai si aida ani ‘di he ku kpotorani yo’?

¹⁵ Tipa ka hipai ti ngba gaani sunge tungusapai, si naida a ani mbu fugo Mbori si naanyakasa gaani idapase. Si naida ani ‘di gupai ku kpotorani yo’ naabaha Yekova agumbaha furani. Areme, Yekova nafura furani rogo Fugoko yo nga Baibiri. Waigu rengbe ani ka sa gupai nga Fugo Mbori naandu kindi kumbatayo kaa du na maapai kurii berãrani, gaani abipai, gbiati gupai nafõngbadurani yo ani mangipai?

16. Waigu rengbe ani ka hiso ngbadurani yo na Fugo Mbori?

¹⁶ Ho ani aririahe ni na si kini sãtihe vurani yo, kpotorani nada ni nyanyakihe. Na ho ani awisigo Fugo Mbori ni na kini berẽkuriihe, gaani idapase nada ni nyanyakihe. Gure nga gupai Yekova aida ani wirikihe. Ho daha ni ti  Fugo Mbori, Yekova naida gupai nga ani ‘hisi vurani yo na ni,’ du rogo yo nga, ka rugatirani na rogo Fugoko yo wenengai. Ani rengbe ka mangaha wo vurube kparakpee, gedapai, na berãkuriipai. Bambatapai nga, si naida ani mangi kparakpee tipa ka mbakada kpotorani yo ka gbia ga Mbori aberãpai. Tifuo gure, ani ki gedi gu pangbanga nga ga Baibiri. Na ani ki ru ka berã dudunguro kurii gupai ani nagedihe. Ginipai nika ngia sangbanaha? Kina wai ani nikaa berãkuriipai ni bakerehe gbe, kina wo a ani nika ruga tirani na rogo Fugo Mbori yo na si ki nyakasi gaani idapase.

17. Tipagine duhe ti ni ni nyanyakipa pai ani berẽkurii gupai ani agedaha rogo Baibiri yo?

¹⁷ Tipagine duhe ti ni ni nyanyakipa pai ka geda Baibiri na kini berẽkuriihe? Pa manga ani he wo nika fu gu ome ani aidaha tipa ka tungusa gu pangbanga nga ga Kindo awere na ka takapandepa gu fofoi pangbanga du tipa sapangbanga nga gu ani narengbe ka tungusaha barambeda kumbatayo. Berewe a, ho ani aberã ni kuriipa ga Yekova wene asino, ani naye kadu na nyanyaki pagume na ko. Nisangbana gipai re, ani nika gbia ngbarago nzunzu ti gupai du ni nzinzirihe watadu du ni wenehe—nga zereda na rengbabepai.—Tam. 119:103.

18. Ginipai agu aboro du rogo gaani dagbarago nika ye ka inoho, na tipagine?

¹⁸ Yezekere angia nebi, ono ani nga anebi te. Ono tie, ani ima diaberã ka ndu kindi kumbatayo kaa tungusa ga Yekova pangbanga nga gu ko abandaha rogo Fugoko yo da kina ho sunge tungusapai nika nyasa ni dunduko kuti wai ko aidaha. Ho regbo sapangbanga nika da ni, agu aboro du rogo gaani dagbarago adunga na rengba ka pe gupai nga i aagianga zahe te watadu Mbori aabingo yo na kikiipa yo te te. (Yeze. 3:19; 18:23) Kuba gure, i nika ino gupai nga gu pangbanga ani aatungusaha re aye be Mbori.

19. Ginipai nika fu ome furani tipa ani mangi gaani sunge tungusapai wenengai?

¹⁹ Ginipai nika fu ome furani tipa ani mangi gaani sunge tungusapai wenengai? Kina gu bangisa apai biata nga gu nanyakasi Yezekere re. Ani nandu kumbatayo kindi kaa tungusapai mbiko ani ima ino gupai nga Yekova du kedi rani, gako ziazia toro nafu ome furani, na Fugo Mbori nazambuasi rani. Ga Yekova undo nafõngbadurani yo ani mangi gaani sunge tungusapai na ki hipai “da ho ragoho ka diga ni.”—Mt. 24:13.