1-2. (a) Waigu rengbe ani kadu ho ani aberã ni kuriipa ga Yesu raka na tungusapai? (b) Ginipai ani nika sakapai tipaha rogo gi kekeapai re?

 HO GAANI boro akpi ni, ani nazingo tipa ni ni kerehe! Ti bambataha, ani ima rengba kadu rogo bakere imisiri ho ani aberãpa agu auru ni naadu mbata fu ni kpi, gbe, ka si du nga gaani boro ambu nikerehe mbata fu ni kpi. Fuo bete regbo, ani ima rengba ka tona du na ngbarago berewe ho ani nikaa berã ni kurii gupai ni ayuguhe furani, gupai ni amangihe, watadu gupai ni apehe tipa ka ngarasa rani watadu ka sa rani ani momu.

² Wakina gure a, ani nadu na bakere gberãrago ho ani agedapa agu aigirã ni Yesu andu rogoho na ki kpi. Ti agu aregbo nga ga Tingida Pakpio Yesu, ani ninaadia regbo gbe kaa berãkuriipa wai nyakipa ga Yesu motumo tumori. (1 Kor. 11:24, 25) Ono tie, ani nadu na bakere ngbarago ho ani aberã ni kuriipa agu apai dunduko Yesu apehe na ki mangihe ho ko adu ni auru kpotosende. Ani nagbia ngarasaro a ho ani aberãpa gupai ni ko amangaha awere na gupai ko nika mangaha furani kumbatayo. Pa berã ani kurii agi apai re na pa gako nyemuse tipa rani ima rengba ka fõngbaduraniyo ani yugu gaani tambuahe rogo mangimangi pai yo, a wa ani nika bihe rogo gi kekeapai re.

3. Gini andu apai du berani tipa kadu na bakere tambuahe tipa motumo tumorii?

³ Ani nadu na bakere tambuahe ho ani aberã ni kuriipa ga Yesu raka na pakpio ko. Ho Yesu adu ni auru kpotosende, ko ayugupai fu aboro tipa gu wene amaku dunduko ga Mbori Kindo nika ye na ni. Ani ima kpinyemu agu apai Baibiri ayugoho tipa motumo tumorii na gu wene apai si nika ye na ni. Ani na bakere  tambuahe tipa motumo tumorii bambiko si nambu gene furani ani gbia ngbarago ti mbembedi pabakure na aYekova na Yesu. Agu aboro du na idapase kuti Yesu na maabangirise a tipa ka raka nyeanye kindi na ka bi gu gayo aboro berewe nakpiki. (Yo. 5:28, 29; Rom. 6:23) Pai ho ani namangihe tipa ka rẽ na agi amaku re te; na he ho ka ani tumo na ni fu Mbori na fu Kristo tipa agu apai dunduko i namangihe furani te. (Rom. 5:8, 20, 21) Ono ani ima rengba ka yugo pa bakio wai fuyo du ani na tambuahe. Waigu rengbe ani ka manga gupai re?

4. Waigu Maria Magadara ayugu gari tambuahe tipa gupai Yesu amangihe furi? (Oni bi sura.)

⁴ Oni bingo gu kpiapai nga ga gu dee Yudo rimori angia Maria Magadara. Ri aambu ni kerehe mbiko adaimona saba aambusa ri. Ri aima rengba ka bihe nga boro ho narengbe ka undo ri te. Sidu, oni berẽnga pa wai ri adu na tambuahe ho Yesu akusi ri ni kusayo ti gu maapai nga ga agu adaimona re! Gari tambuahe afõngbaduriyo tipa ri da ni pefuo ko na ri amangisunge na gari regbo, ome, gbiati gari ahe tipa ka songoda ko tingba sunge tungusapai. (Rk. 8:1-3) Wa vura duhe nga Maria aima du na bakere tambuahe tipa gupai Yesu amangihe furi nitiri, ri aarengbanga ka ino gupai nga Yesu nika manga bakere apai furi kumbatayo te. Si adu nga ko nika fu gako raka tipa aboro, “ya gu ni ka idi pa ko” ni nika gbia ngbarago ti raka nyeanye kindi. (Yo. 3:16) Wa si avura du wo, Maria ayugu gari tambuahe fu Yesu ni nye ri niruru ri. Ho i aarungosi Yesu ni ti ngbunduru ngua rungosi, Maria aru kina mbembedi bambiko ri aaida ka songoda ko na ka fu wasa fu agu aboro nadu ho. (Yo. 19:25) Fuo Yesu kpi, Maria gbiati kura adee aye na wene fũo ahe kupati murö tipa kpisido ko. (Mk. 16:1, 2) Yekova afu bakere mosoro fu Maria mbiko ri anye niruru ri fu Yesu. Ri adu na ngbarago ka gbia Yesu ho ko azingi ni be kpio na ki fura na ko​—nga gu momu dungu kura abawiriki aagbianga ha ya.​—Yo. 20:11-18.

5. Waigu rengbe ani ka yugo gaani tambuahe tipa agu apai dunduko aYekova na Yesu namangihe furani?

⁵ Ani rengbe ka yugo gaani tambuahe tipa agu apai dunduko aYekova na Yesu namangihe  furani nimanga ani sunge na gaani regbo, ome, gbiati gaani marã tipa ka songoda gu sunge nga ga Kindo. Ni kpiapai, ani ima rengba ka fu tirani tipa ka undo na meka agu arago i amangasunge na ni tipa ziazia irisombori na kini bandaha.

6. Tipagine rengbe ani ka ya ti ni wẽ motumo tumorii nga gamahe furani wa du ani ni basasa?

⁶ Ho ani aberãkuriipa bakio wai ni aYekova na Yesu nakpinyemurani, si nafõngbaduraniyo ani kpinyemu yo a. (1 Yo. 4:10, 19) Ani nakpinyemu yo ni bakerehe berewe gbe ho ani aino gupai ni nga Yesu akpi kina boro tipa rani. Gu mokedi nangia Pauro aima ino gipai re, na ko ki yugu gako tambuahe ho ko ake gupai ni fu aGaratio nga: ‘Wiri Mbori . . . akpi nyemu re, ki fu tiko tipa re.’ (Gara. 2:20) Rii mburu motumo tumorii, Yekova ima gbe ro koyo du ko ni tipa mo rengbe kadu ni bakureako. (Yo. 6:44) Mo nadu na bakere ngbarago kpotoroyo ka ino gupai nga, Yekova aima bi wenepai ku rogo ro yo na ko ki fu guhe naadu na bakere ginoho tipa wa ka mo du ni bakureako. Ya mo gipai re anyakasanga gamo nyemuse tipa aYekova na Yesu te? Sidu, ani ima rengba ka sana tirani nga, ‘Ginipai gu nyemuse re nika fõngbadure yo mi mangihe?’

7. A wa duhe rogo sura, waigu rengbe ani dunduko ka yugo gaani nyemuse fu aYekova na Yesu? (2 AKorindo 5:14, 15; 6:1, 2)

⁷ Gaani nyemuse tipa Mbori gbiati Yesu Kristo nafõngbaduraniyo ani yugu nyemuse fu kura aboro. (Oni gedi 2 AKorindo 5:14, 15; 6:1, 2.) Gene sa dagba agu akuraha yo ani ayugo gaani nyemuse ngbaha nga, ni manga ani sunge tungusapai zaaza. Ani nafura na ai gu boro ani agbia ni. Ani ahenga fugo na boro mbiko gupai nga rangi kpotoni watadu ngbatunga ni kia te. Na berewe a, ani nafura na aboro dunduko singia i nga airakumuko na ki ngia bawene abawirikipai, watadu i nga airarungo ki ngia agu aboro awirikanga pai ya. Ho ani afura ni na agu aboro dunduko ani agbia yo, gure nga ani  namanga gupai Mbori akpinyemuhe mbiko gupai ko akpinyemuhe nga “aboro bati dunduko, ki ye sa gu inahe nga ga rengo.”​—1 Tim. 2:4.

8. Waigu rengbe ani ka yugo nyemuse fu awirinarani?

⁸ Ani nayugo gaani nyemuse a fu Mbori gbiati Kristo ni yugo ani nyemuse fu awirinarani. (1 Yo. 4:21) Ani naberã dudunguro tipa agu ahe i aidaha na ani kini undo yo ti regbo aˈasada. Ani nafu wasa fuyo ho gayo boro nakpi ni, ani nandu kaa biyo ho i awoka ni, na ani namanga gupai rengbe omerani na ni ka ngarasa yo ho du yo ni na gberãrago. (2 Kor. 1:3-7; 1 Tesa. 5:11, 14) Ani nandu kindi kumbatayo kaa manga kparakpee tipa yo mbiko ani ima ino gupai nga “gu nyanyaki kpe nga ga ruru boro du na bakere tandu.”​—Yak. 5:16.

9. Gini kura gene rengbe ani ka yugo nyemuse ngbaha fu awirinarani?

⁹ Ani nayugo nyemuse a fu awirinarani ni manga ani nyanyaki asadatise tipa ka banda zereda dagbarani na yo. Ani naasada ka wirika ga Yekova kpiapai nga ga mbupai. Yekova aima du na nyemu ka mbu Wiriko ko kpi tipa gaani aingapai. Sidu, si naida ani du a na nyemu ka mbupai fu awirinarani ho i aingapai ni kuti rani. Ani akpingo nyemu kadu wa gu gbegberẽ kanga i nafura tipa ni rogo kura ga Yesu sanza yo sa te. Zavura tifuo baira gu kanga re mbupai fuko ti gako bakere bape, ko aambunga pai fu gu kura ko kanga naadu na gako bape beko tooni te. (Mt. 18:23-35) Ka si du nga zanga giatise aima kura dagba ro na boro rogo dungurati, ya mo mo rengbe ka manga bambata diandue tipa ka manga zereda mbata fu mo ndu tipa Tingida Pakpio Yesu? (Mt. 5:23, 24) Ka mo mangi gupai re, mo nika yugo gupai nga, mo na bakere nyemuse tipa aYekova na Yesu.

10-11. Waigu rengbe abaakumba ka yugo nyemuse fu aYekova na Yesu? (1 Petero 5:1, 2)

¹⁰ Waigu rengbe abaakumba ka yugoho nga i ima kpinyemu aYekova na Yesu? Gu nyanyakipa gene rengbe yo ka yugoho ngbaha nga, ni ngera yo fuo agu azingo nga ga ga Yesu akandoro. (Oni gedi 1 Petero 5:1, 2.) Yesu aima yugo gupai re gbaiga fu gu mokedi nangia Petero. Tifuo Petero oro rimo Yesu bara biata, ko adu na nyanyaki nyemupai tipa ka yugoho nga, ko ima kpinyemu ko. Tifuo i zingisi Yesu be kpio, ko asana Petero nga: “Simona, wiri Yoane, mo nakpi nyemu re?” Ani ima rengba kadu na gu kido nga, Petero aima rengba ka manga ai pai tipa ka yugo gako nyemuse fu Bairako. Yesu ape gupai fu Petero nga: “Mo nibánda gimi akandoro.” (Yo. 21:15-17) Na rogo ga Petero raka yo naabaha, ko angerefuo ga Gbia akandoro ni nyemuse, kini yugu gako nyemuse tipa Yesu.

¹¹ Abaakumba, rogo agu aposo yo du mbata fu Tingidapa Kpio Yesu na tifuoho, waigu rengbe oni ka yugo gupai nga, agu afugo Yesu ko apehe fu Petero na kina nyanyakipaha furoni? Oni rengbe ka yugo bakio wai oni nakpinyemu aYekova na Yesu ni dia oni regbo dedede kaa ngarasa awirina na kini mangi bakere apai tipa ka undo agu aboro naima zera rogo toro yo i karaga tiyo fuo Yekova. (Yeze. 34:11, 12) Oni ima rengba a ka ngarasa abawiriki Ziazia Kekeapai na gu kura aboro nakpinyemu rengo nga aguyo ye tipa Tingida Pakpio Yesu, ani naida ka sa yo i bi tiyo nga i ima dia yo kugume mbiko ani na gu maabangirise nga, i nika da ada ni apefuo Yesu a.

12. Tipagine pa berã ani kurii agu afugo Yesu apehe rogo gu yuru naadu mbata fu kpio ko afu wingbaduse ti ni furani? (Yoane 16:32, 33)

¹² Rogo gu yuru naadu mbata fu Yesu kpi, ko ape gupai fu gako abawiriki nga: “Oni narungo arungo zegino; ono oni wása awasa; mi di be zegino.” (Oni gedi Yoane 16:32, 33.) Ginipai naundo Yesu ko yugu wingbaduse ho avurako aaserekpo ko ni, na ko ki nye ni ruruko dati kpio?  Ko akido kuti Yekova. Pa ino Yesu gupai nga apefuo ko ni ka gbiatiyo na ngbatunga aˈasada wakina gure, ko asana Yekova ko kakuti yo. (Yo. 17:11) Ginipai gipai re afu wingbaduse ti ni furani? Bambiko Yekova nyaki kisusi avurarani dunduko. (1 Yo. 4:4) Yekova nabi apai dunduko. Ani na gu kido nga, ka ani du na kido kuti Yekova, ko nika undo rani ani dibe gaani agunde na ki yugu wingbaduse.

13. Waigu Yosefa boro Arimataya ayugu wingbaduse?

¹³ Oni bingo gu kpiapai nga ga Yosefa boro Arimataya. AYudo anidu na bakere irisa koyo du ko ni. Ko angia boro sa dagba ga aYudo agbia-ngbanga rogo gu bakere bambu-gumba ngbanga nangia ga aYudo. Ono tie, ti regbo ga Yesu tungusapai auru kpotosende, Yosefa adu na wingbaduse. Yoane ape gupai nga ko adu “ni ga Yesu bawiriki, . . . ni gbuko bambiko gunde aYudo.” (Yo. 19:38) Wa vura duhe nga, nyemu gu pangbanga nga ga Kindo adu kina ti Yosefa, ko aima õka gupai ti aboro nga ko adu na idapase kuti Yesu. Si nawira gupai nga, ko adu na gunde nga ka aboro ini gupai nga ko nga ga Yesu bawiriki, i airisanga ko berewe te. Ono Baibiri nape gupai furani nga, tifuo Yesu kpi, Yosefa “ki rimi arima zukazuka koyo du Pirato ni, ki sana ko tipa kangba Yesu.” (Mk. 15:42, 43) Yosefa aˈasadanga berewe ka õka gupai nga ko angia ga Yesu bawiriki te.

14. Ginipai si aida mo mangihe ka si du nga mo nasota na gupai nga ga gunde be aboro?

¹⁴ Ya mo mo nidu na gunde be aboro wa gu Yosefa adu na ni? Sukuru yo watadu basunge yo, ya mo mo nidu na zee tipa ka pe gupai nga mo nga boro sa dagba aDezire Yekova yo? Ya mo mo dindikodindiko tipa ka da ni batungusipai watadu ka zio bapatiza mbiko mo nabaka bangiro tipa gupai rengbe kura aboro ka berãha tipa ro? Ka mo mbunga agu abipai re si rugusi ro ti manga mo gupai mo nabihe nga si du ni ruruhe ya. Mo naamanga kparakpee fu Yekova kina boro ngbaduroyo. Mo sana ko ko fu wingbaduse foro tipa mo mangi gupai ko akpinyemuhe. Wa mo nikaa bi wai Yekova akaragapai kuti gamo akparakpee, mo nika du nyanyaki gbe na mo nika du na bakere wingbaduse.​—Yes. 41:10, 13.

15. Fuo Yesu kuru fu gako abawiriki, ginipai gayo ngbarago afõngbaduyo yo i mangihe? (Ruka 24:52, 53)

¹⁵ Abawiriki adu na bakere gberãrago ho Yesu akpi ni. Mo berẽnga patiro nga mo adu rogo gupai i adu rogoho. Anga i azanga kina bakurea yo sa te, i abi tiyo a nga i ima zanga gayo maabangirise. (Rk. 24:17-21) Ono tie, ho Yesu akuru ni fuyo, ko adi regbo tipa ka undo yo i rugutiyo na pa wai ko adigisi gu sangbanebi nga ga Baibiri. Ko afu nyanyakipa sunge fuyo a tipa i mangihe.  (Rk. 24:26, 27, 45-48) Ti gu regbo Yesu aga ku ngbangbaturũ yo tifuo auru 40 kusa, abawiriki aadunga berewe na bakere gberãrago te, ono i adu na bakere ngbarago. I adu na bakere ngbarago mbiko i aini gupai nga, Yesu adu ni unga ko na ko nika undo yo aundo i mangi gu sunge ko afuhe fuyo. Gayo ngbarago asa yo i naandu kindi kumbatayo kaa sambuo Yekova.​—Oni gedi Ruka 24:52, 53; Amo. 5:42.

16. Waigu rengbe ani ka wirika ga Yesu abawiriki?

¹⁶ Waigu rengbe ani ka wirika ga Yesu abawiriki? Ani ima rengba ka gbia ngbarago tingba iriso Yekova angianga kina ti agu aregbo sa nga ga Tingida Pakpio Yesu ya ono vuru garã yo dunduko. Gipai re naida gupai nga ani moi ga Mbori Kindo ni bambatapai rogo gaani raka yo. Ni kpiapai, badungu aboro namanga aˈariapai ti gayo ringbisa regbo mangaapai wa ka i ndu tipa tungusapai, adunguratise, na kaa manga gu irisombori nga ga aborokporo dedede. Gu kura aboro ima diaberã tipa ka zanga gbata bakere aũborose nga gu kura aboro aberãha nga si naidaha aida wo, i mangihe wo tipa wa ka i du na rengba kaa manga dungu apai rogo dungurati, watadu wa ka i ga kaa mangasunge tungusapai rogo gu ba du na bakere zingo abatungusipa Kindo rogoho. Wa vura duhe nga, ani naida aida na hipai tipa kaa ndu kindi kumbatayo kaa iriso Yekova, ko ima kidohe ka fu maku furani ni bakerehe ka ani moi agu apai nga ga Kindo ni bambatapai rogo gaani raka yo.​—Snz. 10:22; Mt. 6:32, 33.

17. Ginipai mo nadiberã tipa ka mangaha rogo agu aposo yo du mbata fu Tingida Pakpio Yesu na tifuoho? (Oni bi sura.)

¹⁷ Ani nangera kumbatayo tipa ka manga Tingida Pakpio Yesu Rago Ue, Zerekpe 4. Ono tie, si aidanga mo sungu asungo mbata da ti kina gu regbo re mo kini ru ka berãkuriipa ga Yesu raka na pakpio ko na gu nyemuse ko gbiati Yekova nayuguhe furani te. Mo naaberãkurii agu apai re dedede vuru agu aposo yo du mbata fu Tingida Pakpio Yesu na tifuoho. Ni kpiapai, mo ima rengba ka maa regbo tipa kaa geda na kaa berãkurii agu apai i nape paha rogo mwb19.4 kpe. 4, “Wai gu Mo Nika Mbakada Tiro Tipa Tingida Pakpio Yesu?” Wa mo nikaa gedapai tipa ga Yesu raka auru kpotosende, mo ngere tipa agu apai rogo Baibiri yo nga gu rengbe ka nyakasa gamo tambuahe, gamo nyemuse, gamo wingbaduse, gbiati gamo ngbarago. Fuo gure, mo asadi ka berãkuriipa agu agene rengbe mo ka yugo gamo tambuahe ngbaha. Mo ima rengba kadu na gu kido nga, Yesu nika bi agu apai dunduko na nyanyakipaha mo nika mangaha tipa ka tingidapa ko rogo agu aposo yo du mbata fu Tingida Pakpio Yesu na tifuoho.​—Yugo. 2:19.