1-2. Ginipai si aida ani naandu kindi kumbatayo kaa mangaha tifuo bapatiza? Oni sakingo rogoyo.

 BARA wai mo naagiriso kpuro? Isoke, mbata fu mo ga koyo ti bambata regbo, mo aima girisoho wenengai. Ono tie, ginipai rengbe ka manga ka si dunga mo agirisongo ho berewe te? A wa oni nainihe, nvutu gbiati biriko ima rengba ka hihe ni kina wiri ipo. Tipa ka banda gamo kporo si du ni gigirihe, si naida mo naagirisoho dedede.

² Si naida a ani naandu kindi kumbatayo kaa ruga gaani aberã na gaani asino. Rengo ngaha nga, mbata fu ani zi bapatiza, ani aima manga ome ni bakerehe gbe ka manga aˈariapai rogo gaani raka yo tipa ka ‘gíriso tirani be gu meteka dunduko nga ga borose na toro.’ (2 Kor. 7:1) Awere tie, si naida ani pekefuo gu rugute nangia ga gu mokedi nangia Pauro nga ‘oni dú ni vovo roni.’ (Ef. 4:23) Tipagine si aida ani naandu ti ni kindi kumbatayo kaa ruga gaani mangaapai? Bambiko gu mangaapai nga ga gi zegino re ima rengba ni kina ipo ka sa rani ka ani dunga nigigiri rani bara bangiri Yekova ya. Tipa kaa sa ngbarago kindi ti Yekova, si naida ani naawisigo gaani aberã dedede, asino rani, na gaani nyemuapai.

3. Ginipai pa “mbakada berãroni berewe” ayugoho? (ARomo 12:2)

³ Ginipai si aida ani mangihe tipa ka mbakada berãrani berewe, naida ka ya, ka manga ariapai ti gu gene ani aberã ngbaha? (Oni gedi ARomo 12:2.) Gu pa-Giriki i asaha nga ka “mbakada berãroni berewe” rogoyo ima rengba kadu nga “ka giriso berãroni.” Sidu tie, gipai re ayugongo gupai nga si naida ani mangi kina tooni weneapai gbua te. Si naida ani berẽpa  gu ngbatunga boro nga ani kpotorani yo na ki mangi ai gu ariapai si aidaha tipa wa ka ani mangipai kuti ga Yekova arugute wa rengbe omerani na ni. Si naida ani naamanga gipai re angia bara sa gbua ya ono kaa mangaha amanga kindi.

4. Waigu rengbe ani ka ne gupai nga ka gi sino raka nga ga gi zegino re dunga na maapai kurii gaani aberã ya?

⁴ Ho ani nika da ni nirengberengbe aboro, ani nika du na rengba kaa sa ngbarago ti Yekova rogo agu apai yo dunduko ani kaa mangaha. Wa du rago re, si naida ani naamanga asadatise nyanyaki tipa ka sa ngbarago ti Yekova. Oni bingo gupai Pauro apehe rogo ARomo 12:2 nga, si naida ani mbakadi berãrani berewe tipa ka ino gupai Mbori aida ani mangihe. Kuba gupai nga ka mbu gi gbegberẽ zegino re si du na maapai kurii rani, si naida ni bambataha, ani wisigi tirani ka ino bakio wai ani ambu ga Mbori berãpai, angianga ga zegino ya, si du na maapai kurii gaani asasa na gaani adiaberã.

5. Waigu rengbe ani ka wisigo gaani aberã nibipa wai ga Yekova uru ambeda? (Oni bi sura.)

⁵ Ani bingo kpiapai. Yekova naida gupai nga ani ni “ngere tipa ye gu uru nga ga Mbori.” (2 Pet. 3:12) Mo sananga tiro nga: ‘Ya mo gu gene mi araka ngbaha nayugo gupai nga mi ima rugatire na gupai nga gi zegino re nika digo barambeda? Ya mo gimi adiaberã nibipa nduge ku yunivasiti yo watadu tipa gini sunge mi nika siaha nayugo gupai nga iriso Yekova nga nyanyakipa pai fere rogo gimi raka yo? Ya mo mi na gu idapase nga Yekova nika ngera angera fuore gbiati gimi aborokporo, watadu mi nabaka bangire abaka kindi tipa aũborose?’ Yekova na bakere ngbarago ho ko abi rani ni ani ni asadi ka manga gupai ko akpinyemuhe rogo agu apai yo dunduko ani amangaha.​—Mt. 6:25-27, 33; Frp. 4:12, 13.

6. Gini apai si aida ani naandu kindi kumbatayo kaa mangaha?

⁶ Si naida ani naawisigo gaani aberã dedede na tifuo gure kini mangi agu aˈariapai si  aidaha. Pauro aya fu aKorindo wẽ: “Oni wísigi tironi si ngia oni rogo idapase yo; oni ásadi tironi.” (2 Kor. 13:5) Ka nyaka rogo “idapase yo” nayugo gupai nga si naida ani mangi dungu apai susi gu nga kaa ndu tipa adunguratise nga ga aKristano na kini tungusipai dedede. Si a nakoda agu apai ani aberã tipaha, agu apai du ani na nyemuhe, na gu nduapai nasa rani ani mangipai. Sidu, si naida ani naandu kindi kumbatayo kaa mbakada berãrani berewe ni geda ani Fugo Mbori, kini wiriki ka berã wa gu ko aberã na tifuo gure, kini mangi agu apai si aidaha tipa ka sa ngbarago ti Yekova.​—1 Kor. 2:14-16.

7. Ringbisihe kuti AEfeso 4:31, 32, gini kurapai berewe si aida ani mangihe, na tipagine rengbehe kadu ti ni ni kpakarakpakaraha?

⁷ Oni gedi AEfeso 4:31, 32. Gu kura nyanyakipa ariapai si aida ani mangihe nga ka ‘ukadi vovo borose.’ (Ef. 4:24) Si naida ani mangi ome nyanyaki tipa ka manga gipai re. Agu apai si aida ani mangi ome nyanyaki ka dia behe nga agu asino du wa iimi afugo, zinga, na erã. Tipagine rengbe gipai re ti ni kadu ni kpakarakpakaraha? Bambiko tarã kura gbegberẽ asino aima zio baha tirani. Ni kpiapai, Baibiri nape gupai nga kura aboro kinaho ‘nazinga niipo’ na kini ‘fu tiyo sa zinga.’ (Snz. 29:22) Gu boro du na ngbatunga gi gbegberẽ asino re tini si nawiraha wa si nika ida ni naamanga nyanyaki asadatise amanga kindi tipa ka manga ariapai, zavura tifuo zio ni bapatiza vurũ, a wa gi kpiapai du kusende re ayugoho.

8-9. Waigu ga Stephen kpiapai ayugo gupai nga si naida ani naamanga ome amanga kindi tipa ka mbu kuru borose?

⁸ Si adu ni kpakarakpakaraha fu wirina du rimoko nga Stephen ko za tiko ti zinga. Ko aya, “Zavura tifuo zio mi bapatiza, mi aamanga asadatise kindi ka za tire ti zinga. Ni kpiapai, ti kura regbo sa, ho mi aatungusapai ni kporo na kporo, mi ado fuo iradĩ nga guko nadĩ radio rogo gimi tarambiri. Ho mi ambedi ni na ko, ko aba gu radio re sande na ki zubo. Ho mi apepa wai ni mi agbia gimi radio berewe fu agu aboro nadu na mi, bakumba rogo gu badona re asana re nga, ‘Stephen, wa ka mo niziko ginipai ka mo nimangi ko na ni?’ Gu sanahe re asa re mi berẽ na si ki fõngbadu re yo mi naamanga ome kindi tipa kadu ni boro zereda.” b

⁹ Ga Stephen kpiapai nayugo gupai furani nga ani ima rengba ka yugo gbegberẽ sino ni kina ipo zavura tifuo ani berẽ gupai nga ani aima mbuhe. Ka pai mangi ro wa gure, ka rago gberẽnga tiro na mo ki berẽ gupai nga mo nga gbegberẽ Kristano ya. Zavura gu mokedi nangia Pauro aya: “Wa mi nikpi nyemu manga wenepai, gbegberẽpai nimbedi na mi.” (Rom. 7:21-23) AKristano dunduko nga kpakpa aboro du na bete gbegberẽ asino tiyo, nga gu naima rengba ka karaga tihe berewe wakina nvutu na biriko nga gu rengbe ka birikosi kpurani. Si naida ani naamanga ome amanga kindi tipa ka nye gigiri. Waigu rengbe ani ka manga gipai re?

10. Waigu rengbe ani ka sovura kuti agu asino du ni gbegberẽhe? (1 Yoane 5:14, 15)

¹⁰ Mo kparikpee fu Yekova tipa gu sino du ni kpakarakpakaraha foro ka manga ariapai ti ni, mo du na gu kido nga ko nika gia gamo kpe agia na ki undo ro. (Oni gedi 1 Yoane 5:14, 15.) Wa vura duhe nga Yekova adianga gu sino re kusayo tiro ngba iiriwo gene te, ko ima rengba ka nyakasa ro tipa ka mo yugungo gu sino re berewe ya. (1 Pet. 5:10) Ti kina gu bangisa regbo re, mo mangipai na ngbanya  kuti gamo akparakpee, ni zanga mo manga agu apai rengbe ka sa gupai nga gu kuru borose re karaga tihe berewe. Ni kpiapai, mo du na rubangirise tipa agu avidio mo abihe, agu ambakadapai nga ga terevizioni, watadu agu apangbanga mo agedaha nga gu nataasapa agu asino mo amanga ome tipa ka mbuhe kusayo. Na ka mo nyenga kaa berã kina kurii iraira nyemuapai ya.​—Frp. 4:8; Koro. 3:2.

11. Gini apai rengbe ani ka mangaha tipa kaa ndu kindi kumbatayo kaa ukadi vovo borose?

¹¹ Wa vura duhe nga mo ima mbu kuru borose, si ni nyanyakipa pai ka sonosa vovoho. Waigu rengbe mo ka manga gupai re? Mo mangihe ni gamo sasa ka wirika Yekova wa mo awirikapai tipa asinoko. (Ef. 5:1, 2) Ni kpiapai, ho mo ageda pangbanga ni rogo Baibiri yo nga gu nayugopa wai Yekova ambupai, mo sananga tiro nga, ‘Ya mo mi naambupai fu kura aboro?’ Ho mo agedapai ni tipa ga Yekova nunga koyo du airarungo ni, mo sananga tiro nga, ‘Ya mo mi na kina ngbatunga gu bipai re tipa awirinami nga aguyo du na zingo aũborose, na ya mo mi nayugoho rogo gimi mangaapai yo?’ Mo naandu kindi kumbatayo kaa mbakada berãro wa mo aukadi vovo borose, na mo du na zerangbaduse wa mo amangaha wo.

12. Waigu Stephen abi gu ome du Baibiri na ni ka aria ga boro raka?

¹² Stephen, i nifura tipa ko kusayo, abi gupai nga yeeye ko adu na rengba ka ukadi vovo borose. Ko aya: “Natona ti gu regbo mi azi bapatiza, mi aaima gbia tire na dungu apai nga gu naaida mi zatire ti gimi zinga. Mi ima wirika wai ka mangapai singia ka guari pati agu aboro naˈasada ka sa re mi zingi watadu ka rugusa gupai re mbata fu si gberẽ kina kumbatayo. Badungu aboro kodihe na diare, ima tambua re tipa wai mi amangapai kuti agu apai re. Kina ngbare ninaazera tipa tire! Mi afunga taarimo fu tire tipa agi aˈariapai mi namangihe ti asino re re te. Kuba gure, mi ima ida kuti gupai nga agi apai re nayugo gupai nga Baibiri ima rengba ka aria sino aboro.”

13. Ginipai nika undo rani ani sonosi gu nyemuapai du ni wenehe? (AGaratio 5:16)

¹³ Oni gedi AGaratio 5:16. Yekova ima fu gako ziazia toro furani tipa si undo rani ani sovura tipa ka manga rurupai kidu na diabese. Ho ani awisigo Fugo Mbori ni, ani nambu ga Mbori toro si du na maapai kurirani. Ani nagbia ziazia toro a ho ani andu ni tipa gaani adunguratise. Ba agu adunguratise yo nga ga aKristano re, ani ima rengba ka dia regbo na awirinarani nga aguyo naˈasada nyanyaki ka manga gupai du niruruhe wakina rani, na gipai re nga pa ngarasaro. (Eb. 10:24, 25; 13:7) Na ho ani andu ni fuo Yekova rogo kakaka kpee yo na ki zungodi ko tipa ko undo rani ani dibe kura arungbura, ko nika fu gako ziazia toro furani tipa si nyakasi rani ani naasovura kindi. Wa vura duhe nga si nawira wa gi mangapai re asanga gbegberẽ nyemuapai si gbandaka kusa yo te, si nika undo rani ani ne mangaapai kuti gi iraira nyemuapai re. AGaratio 5:16 naya, agu aboro napeka toro i ‘amánga nga gu nyemuhe nga ga borose’ te.

14. Tipagine duhe ti ni ni nyanyakipa pai kaa sonosa gu nyemuapai du ni wenehe kindi?

¹⁴ Ho ani atona kaa manga agu apai ni nga gu naundo rani ani du na wene pagume na Yekova, si ni nyanyakipa pai tipa ani kakuti mangaha wo na kini sonosi gu nyemuapai du ni wenehe. Tipagine? Mbiko vurarani sa dagba avurarani yo ambunga sovura kuti rani te. Gu vurarani re nga kadu ngba asada yo tipa ka manga gupai du ni irairaha. Zavura tifuo zio ani bapatiza, ani ima rengba ka bi gupai nga ani kindi na nyemu agu apai si aida ani nehe,  nga gu nakoda baake, gbegberẽ mbirabuda, watadu biko kpia kundiri aboro. (Ef. 5:3, 4) Paranga wirina ni Kristano aya: “Pai sa dagba agu apai yo du ni kpakarakpakaraha mi naasota na ni nga, mi naabi akumba akuare na kina nyemuyo. Mi aberẽ gupai nga gu nyemupai re nika go ago kusayo yee, ono mi kindi na gu nyemupai re.” Ginipai rengbe ka undo ro ka sidu nga gu nyemu irairapai du tiro ima du ni nyanyakihe gbe?

15. Tipagine duhe ti ni nipa ngarasaro ka ino gupai nga aboro ima rengba ka “hi” iraira nyemuapai? (Oni bi sura.)

¹⁵ Ho mo asovura ni ka zatiro ti gu nyemupai du ni irairaha nga gu du ni nyanyakihe gbe, mo tingidi gupai nga mo nisaro te. Baibiri naya: “A nga asada ye sa roni te, kina gu ka boro hi he ahi.” (1 Kor. 10:13a) Gu kura sasa fugo nga ga Baibiri nasa gipai re ngba gi gene re: “Asada ho rengbe ka ye sa roni nga gu arengbanga ka manga aboro ya te.” I ake gipai re fu agu aKristano nga akumba na adee naaraka Korinda yo. Agu akurayo adu mbata ni airisikpiahe, azapu tiyo na akumba na ni akpibuda. (1 Kor. 6:9-11) Ya mo mo naberã gupai nga fuo zio yo bapatiza i aadunga na ai iraira nyemuapai nga gu si aaida i sovura kutini te? Pai wa gure aadunga te. Ni rengo, i dunduko nangia mbedimbedi aKristano, ono i angia kpakpa aboro. Zanga kapa, si aaida aida i naasovura kindi kuti iraira nyemuapai ti aregbo dunduko. Gipai re ima rengba kadu ni pa ngarasaro furani. Tipagine? Bambiko si nayugo gupai nga ai gu iraira nyemupai mo asovura kuti ni, kura boro aima sovura kuti ni kidu na diabese. Ni rengo, oni ima rengba ka ru “nyanyaki rogo idapase yo, niini he ya ngbatunga agi ahipai re namanga awirinaroni.”​—1 Pet. 5:9.

16. Gini kerepai si aida ani nehe, na tipagine?

¹⁶ Oni ne gu kerepai nga kaa berã gupai nga boro ho berewe ka rugu tini na gu kpakarapai oni agbia tironi na ni te. Pa berã oni ngba gi gene re ima rengba ka sa gupai nga oni dakuti gu digisopai nga maabangirise berewe tipa  roni te, na ome tironi berewe tipa ka sovura kuti iraira nyemuapai te. Baibiri nape kurapai kia. Si naya: “Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.” (1 Kor. 10:13b) Sidu tie, zavura ho du irairapai nyemupai ni ni nyanyakihe gbe, ani ima rengba ka nye niruru rani fu Yekova. Na ga Yekova undo, ani ima rengba ka ne manga gupai du ni gbegberẽhe.

17. Wa vura duhe nga ani arengbanga ka ne du na iraira nyemuapai te, ginipai rengbe ani kadu na zatise ti ni?

¹⁷ Bambiko ani nga kpakpa aboro, ani arengbanga ka ne du na iraira nyemuapai te. Ono ho du ani ni na iraira nyemuapai ani ima rengba ka nehe ni kina ipo, kina wai Yosefa amangihe ho ko azubo ni be dia Potifaro. (Bam. P. 39:12) Si aidanga mo mangi gu gbegberẽpai du nyemuhe tiro te!

18-19. Gini asanahe rengbe ani ka sana tirani na ni wa ani amanga asadatise tipa ka mbakada berãrani berewe?

¹⁸ Rogo gi kekeapai re, ani ima wirika gupai nga, tipa ka mbakada berãrani berewe, si nayugo gupai nga si naida ani sa gaani aberã na mangaapai si sa ngbarago ti Yekova. Sidu, si naida ani wisigi tirani dedede na kini sana tirani nga: ‘Ya mo mi namangapai ngba gu gene nayugo gupai nga mi ima ino gupai nga gu regbo ani araka ti ni ima mbeda ka digo? Ya mo mi namanga sonakumbatayo ni ukadi mi vovo borose? Ya mo mi nambu ga Yekova toro tipa si naanungusa gimi raka tipa wa ka mi sovura kuti gu nyemuapai nga ga borose?’

¹⁹ Ho mo awisigo tiro ni, ka mo berẽnga gupai nga si naida mo du ni rengberengbe boro ya. Ka mo bi gupai nga pai kina ho si aida mo mangi ariapai rogoho, ka rago gberẽnga tiro ya. Kuba gure, mo pekefuo gu rugute du rogo AFiripoio 3:16 nga gu naya: “Ani tá ni kina gu rugute da ani ti ni.” Ka mo mangihe wo, mo nika du na gu kido nga Yekova nika fu maku kurii gu ome mo amangaha tipa kaa mbakada berãro berewe.