Agu AYisaraere Naadu Mbata Anaasovura Aso—Tipagine Ani Asonga Vura ti ni Ya?
“KA ONI ká ka sovura kuti aboro France watadu ringara aNgirisi, oni dunduko nika kpi!” wo gu kura banzengere sa dagba agu abanzengere nga ga aboro Nazi atangbako kurii aDezire Yekova ti regbo gu Ue Vura Nga ga Zegino. Wa vura duhe nga agu abanzengere nga ga Nazi yo aru kinaho pati awirinarani, boro ho dagba awirinarani yo naidi ka kuo ga Yekova andiko te. Gere angia gu mangapai nga ga wingbaduse! Gere nga wene kpiapai tipa wai aDezire Yekova abi vura: Ani naká ka so agu avura nga ga gi zegino re. Zavura ho aboro aserekpo rani ni nga i nika imo rani ani naká ka rimiso tirani ku rogo agu apai nga ga birĩ-zogarago, ani naká ka rimiso tirani ku rogo agu atagbagapai nga ga gi zegino re.
Ono tie, anga agu aboro dunduko nayamba tiyo nga aKristano du na gi bipai re te. Dungu yo idi kuti gupai nga Kristano ima rengba ka banda gani ringara na si naidaha aida wo. I rengbe ka berã gupai nga, ‘Agu aYisaraere naadu mbata angia ga Mbori aboro na i anaasovura aso, si du tie, tipagine agu aKristano du areme asonga vura ti ni ya?’ Waigu rengbe mo ka karagapai? Oni ima rengba ka pe nga, gupai naadu tipa agu aYisaraere naadu mbata adu kia ti gu du tipa ga Mbori aboro du areme. Ani bingo ndu apai bisue du tipa gu kparakpara apai du dagba agu aYisaraere naadu mbata na ga Mbori aboro areme.
1. GU GA MBORI ABORO NAADU MBATA ANGIA RIKAABORO SA
Mbata kusayo, Yekova asia rikaaboro sa i du ni gako aboro nangia aYisaraere. Ko ayambu aYisaraere nga “oni adú ni gimi wene ũkumuko dagba kura rika aboro zegino dunduko.” (Gate 19:5) Mbori afu kparakpara ringara fuyo a. Sidu ho Mbori afu zinahe ni fu aYisaraere tipa i ndu ka sovura kuti kura rikaaboro, i andunga ka sovura watadu ka imo agu akurayo nairiso Yekova te. *
Areme, ruru airisimbori “dagba rika aboro dunduko, na angbatunga yo, na aboro, na angbatunga afugo dunduko.” (Yugo. 7:9) Ka si du nga ga Mbori aboro nandu areme tipa vura, i ima rengba ka sovura na ki imi akurayo airisi Yekova.
2. YEKOVA ANAAFU ZINAHE FU AYISARAERE I NDU KA SOVURA
Mbata kusayo, Yekova du nanaadiaberã tipa gini regbo na tipagine si aida aYisaraere ndu ti ni ka sovura. Ni kpiapai Yekova afu zinahe fu aYisaraere nga, i ndu na gako sapangbanga kurii agu aKanano nga aguyo nanaairiso adaimona kini mangi kere wasiwasi kodaba na kini fu awiriyo ni motumo. Yekova afu rugapai fu aYisaraere i gbarasi agi aboro nanaamanga gbegberẽ apai re rogo Ringara Mokido, tipa gupai nga ka aYisaraere mangingo gi gbegberẽ apai re a ya. (Pa Mot. 18:24, 25) Ho aYisaraere asungu ni rogo Ringara Mokido, Mbori anifu zinahe fu aYisaraere tipa i ndu tipa vura ka banda aYisaraere be avura yo. (2 Sam. 5:17-25) Ono tie, Yekova aambunga aYisaraere tipa i mangi diaberã nitiyo ka ndu tipa vura te. Ho i anidiberã ni nitiyo ka ndu, sangbanaha anidu ni kerehe kuriyo. Geda 14:41-45; 2 Peka 35:20-24.
Areme, Yekova afunga zinahe fu aboro i ndu tipa vura te. Areme, aboro nasovura tipa gayo nyemu apai, angianga gupai Mbori akpinyemuhe ya. I nasovura mbiko i naida bakere kpotosende, bakere marã watadu ka sonosa agu apai nga ga birĩ-zogarago. Na ginipai tigaha du tipa agu aboro naya i nasovura tipa rimo Mbori watadu ka banda gayo pambori na kini imi avura Mbori? Yekova nika banda ruru airisiko na ki gbarasi avura yo kumbatayo ti regbo gu vura nga ga Aramegido. (Yugo. 16:14, 16) Ti regbo gu vura re, ga Mbori aborovura nika ngia gu gako aborovura du ngbangbaturũ yo angianga agu airisiko du auru kpotosende ya.—Yugo. 19:11-15.
3. AYISARAERE AAIMONGO AGU ABORO NAADU NA IDAPASE KUTI YEKOVA TE
Ya mo agu aboro nasovura areme nabanda gu raka nga ga agu aboro du ni ruruyo wa gu Yekova abanda gu raka nga ga Raba na gari aborokporo ho ko asovura ni kuti Yereo?
Mbata kusayo, gu riivura nga ga aYisaraere anaayugo inopai fu agu aboro nanaayugo idapase kuti Mbori na kini imi kina agu aboro Yekova anisari ngbangayo kuti kpio. Oni bingo akpiapai ue. Wa vura duhe nga Yekova afu zinahe i gbarasi Yereo, aYisaraere abatasi Raba na gari aborokporo mbika gari idapase. (Yos. 2:9-16; 6:16, 17) Kusa, i aagbarasanga gu bagbata nga ga Gibona te mbiko aboro Gibona ayugu ndikidi gunde ti Mbori.—Yos. 9:3-9, 17-19.
Areme, agu aringara nasovura ambunga pai fu agu aboro du na idapase te. Na zavura i na imo agu aboro angianga abanzengere ya.
4. AYISARAERE AAPEKAFUO AGU ARUGAPAI NANGIA GA MBORI TIPA VURA
Mbata kusayo, Yekova aaida agu abanzengere nga ga aYisaraere yo sovura ringbisihe kuti gako arugapai. Ni kpiapai, ti kura aregbo, Mbori anipe gupai fuyo nga i “tingidi pa zereda” fu gu bakporo i andu ka sovura kutini. (Pa Rug. 20:10) Yekova anaaida gupai be agu abanzengere nga ga aYisaraere yo a nga i du ni gigiri yo na ki banda gayo bataya si du ni gigirihe na kini pekefuo ga Yekova arugute du tipa ruru mangaapai. (Pa Rug. 23:9-14) Wa vura duhe nga, agu abanzengere naanidu pati aYisaraere anaapi na adee ngbaome rogo gu gbata i anizihe, Yekova anaaidanga aYisaraere naamanga ngbatunga pai wa gure te. Zavura i anaamanganga rogotise na gu dee i anizi ri re te, da kinaho diwi sa animangi ni tingbafuo zio yo gu gbata re.— Pa Rug. 21:10-13.
Areme, dungu aringara aima dakuti gupai nga si naida i nasovura kuti andiko nga ga vuru. Wa vura duhe nga agi andiko re tipa ka banda aboro ringara, si nipa gberãrago nga, dedede i na kuo agu andiko re akuo.
5. MBORI ASOVURA TIPA GAKO ABORO
Ya mo Mbori nasovura areme na gu kura rikaaboro wa gu ko asovura na aYisaraere kuti Yereo?
Mbata kusayo, Yekova asovura tipa aYisaraere, na dedede, ko anaamanga iiriwoapai tipa i du na diabese. Ni kpiapai, waigu Yekova aundo aYisaraere i di gu gbata nga Yereo? Vurube gu rugapai nga ga Yekova, ho aYisaraere ata “ngbayo ni bakere wawa gbe, ngapa bakporo ki tiwi atiwa ku sande kpaserekpasere,” si ki saha fuyo taata i zi gu bakporo re. (Yos. 6:20) Na waigu i adibe gu vura i asoho na aboro aAmono? “Yekova ki nimo ka bafa bakindigi morogumba ngbangbaturũ yo ku auru yo. . . Agu yo nakpiki be morogumba i nange ti agu yo awiri aYisaraere aimi yo ni basape.”—Yos. 10:6-11.
Areme, Yekova asonga vura fu awiri aboro te. Gako Kindo, na du Yesu ni Bakindo nga gaha, “aenga nga rogo gi zegino te re.” (Yo. 18:36) Ono tie, Satana du du na pagbia kurii agu azogarago nga ga wiri aboro. Gu gbegberẽ avura namanga rogo zegino areme nayugo gu gbegberẽ boro nga Satana.—Rk. 4:5, 6; 1 Yo. 5:19.
NDIKIDI AKRISTANO NAIDA KA MANGA ZEREDA DAGBAYO NA AKURAYO
A wa ani nabihe, bakere kparakpara pai kinaho dagba rani areme na gu aYisaraere naadu mbata. Ono tie, anga kina gi kparakparapai re nga gu yangada nduapai nasarani ka ani ndu nga tipa vura ya te. Kura nduapai kinaho. Ni kpiapai, Mbori ape gupai nga rogo yangara arame, agu aboro ko nika yugopai fuyo “i awírika nga pa sovura berewe a te,” na i asonga vura a te. (Yes. 2:2-4) Kurigure, Kristo ape gupai nga, gako abawiriki adu nga ni “aboro zegino” te; i arimisongo tiyo kurogo gu vunduvundu apai nga ga zegino te.—Yo. 15:19.
Kristo angarasi apefuoko i mangi pai susi gure. Ko ape gupai fuyo nga i ne agu asino rengbe ka ndu na yo sa kpipai, zinga, na vura. (Mt. 5:21, 22) Kurigure, ko ape gupai fu apefuoko nga i du ni “aboro azarõ” watadu ni amangi zereda na kini kpinyemu avurayo.—Mt. 5:9, 44.
Waigu rengbe ani ka manga gipai re? Ani aidanga ka sovura te, ya mo boro ho rogo dungurati ani abi ni nga ni nga vurarani? Si naida ani mangi asadatise nyanyaki tipa ka nyasa riipa ngbatunga bipai wa gure ka si du nga ani na ni.—Yak. 4:1, 11.
Ani arimisongo tirani kurogo agu avura nga ga zegino te, kuba gure, ani namanga asadatise nyanyaki tipa kadu na nyemuse dagbarani. (Yo. 13:34, 35) Ani di nga berã adia ka zanga rimiso tirani kurogo vura yo a wa ani kaa ngera kumbatayo tipa gu uru Yekova nika nyasariipa vura nyeanye kindi.—Tam. 46:9.
^ Ti kura aregbo, gu ngbatunga nga ga aYisaraere asovura dagbatiyo, ono wa vura duhe wo, rago aangbanga ti Yekova na gu vura i asoho re te. (1 Aba. 12:24) Ono wa vura duhe wo a, Yekova anaaida aida na gu vura re bambiko gu kura angbatunga dagba aYisaraere yo anisamungu kutiko watadu i animangi kere ingapai.—Abasa. 20:3-35; 2 Peka 13:3-18; 25:14-22; 28:1-8.
