1. Waigu gaani ngbarago aru riipa gu gaani “azingo nga ga toro”?

 ANGA ndikidi ngbarago nga kadu na wene bipai nga gu nata ye nigo ago te. Ndikidi ngbarago rengbe ka nye rogo ga boro raka yo naabaha. Waigu rengbehe kadu wo? Yesu asaki gupai naadu rogo gu gako Yugopai Naadu Rii Bagangara yo nga: “Aboro ngbarago nga agu aboro inipa gu gayo azingo nga ga toro.” (Mt. 5:3, NW) Yesu aima ino gupai nga i akusi aboro na gu bakere nyemupai rogoyo yo nga ga ino Bakusiyo nga Yekova Mbori na kini irisiko. Gu re gu nga gaani “zingo nga ga toro.” Na mbiko gupai nga Yekova nga “betedi Mbori,” watadu Mbori ngbarago, agu aboro nairisoko ima rengba a kadu na ngbarago.—1 Tim. 1:11.

2-3. (a) Ringbisihe kuti Yesu, ada berewe rengbe kadu na ngbarago? (b) Ginipai ani nika sakapai tipaha rogo gi kekeapai re, na tipagine si aidaha aida ti ni?

² Ya mo ani rengbe kadu na ngbarago sa kina gu ka ani aagbianga tirani na akpakarapai ya? Oó. Rogo gu ga Yesu yugopai naadu rii bagangara yo, ko ape gupai rengbe ka zeresa kina ngbarani. Zavura agu aboro “narungo”—singia mbiko i na bakere gberãrago tipa gayo aingapai watadu mbiko i na kere akpakarapai rogo gayo raka yo ima rengba kadu na ngbarago. Yesu ape kina gu bangisapai re tipa agu aboro “i arungosi yo tipa rurupai,” watadu agu aboro i ‘agumba dungu apai kuti rimo yo’ mbiko i nga apefuo Kristo. (Mt. 5:4, 10, 11) Ono waigu rengbe boro kadu nzunzu na ngbarago rogo ngbatunga apai wa gure?

³ Yesu ayugu gupai furani nga, ngbarago ayengo mbiko pa zanga du boro na akpakarapai rogo raka yo te, ono si naye ti mbisa ani gaani azingo nga ga toro na kini mbedi na Mbori. (Yak. 4:8) Waigu rengbe ani ka mangaha wo? Rogo gi kekeapai re, ani nika sakapai tipa apai biata si aida ani mangihe tipa kadu na ndikidi ngbarago.

4. Gini bambatapai si aida ani mangihe tipa kadu na ndikidi ngbarago? (Atambuahe 1:1-3)

⁴ BAMBATAPAI: Tipa kadu na ndikidi ngbarago, si naida ani naageda Fugo Mbori na kini wisigihe. Yesu aringbisi Fugo Mbori kuti gu riahe nga ga borose. Si naida aboro gbiati anya ririahe ari tipa kaa raka. Ono kina aboro sa rengbe ka geda Fugo Mbori, na si naida aida i mangi gipai re. Si du nga ndu gupai Yesu aya ti ni wẽ: “Boro anye nga ni ungani mbiko kina riahe te, ono mbiko agu apai dunduko naye ngba Mbori yo.” (Mt. 4:4) Sidu, si aidanga uru ti sa zanga ani gedi Fugo Mbori nga Baibiri du na nyanyakipaha te. Bake papara Atambuahe abi gupai nga: ‘Boro ngbarago nga gu boro du gani ngbarago rogo gu rugute nga ga Yekova, ni namakia pa gako rugute uru na yuru.’—Oni gedi Atambuahe 1:1-3.

5-6. (a) Gini apai rengbe ani ka wirikaha rogo Ziazia Kekeapai? (b) Ngba gini agene rengbe geda Ziazia Kekeapai ka undo rani?

⁵ Bambiko gupai nga Yekova ima kpinyemu rani, ko ima yugo gupai furani rogo Baibiri yo si aida ani mangihe tipa kaa raka na ngbarago. Ani nawirikapa gako ringbisapai tipa gaani raka. Ani nawirikapa wai rengbe ani ka mbeda na ko na gupai rengbe ani ka mangaha tipa ko mbupai furani ti gaani aingapai. Na ani nawirikapa gu bawene maabangirise ko nakidopaha kumbatayo. (Yere. 29:11) Agi arengo ani awirikaha rogo Baibiri yo re nahiiso kpotorani yo na ngbarago!

⁶ Ani ima ino gupai nga, Baibiri ima hibe arugute tipa agu apai ani amangaha naˈauru dunduko rogo raka yo. Ho ani amangapai ni kuti agu arugute re, ani ima rengba ka gbia ngbarago. Ai gu regbo mo nika du na gberãrago mbiko agu akpakarapai du rogo raka yo, mo di  bakere regbo kaa geda Fugo Yekova na kini berẽkuriihe. Yesu aya: “Aboro [ngbarago] nga agu yo ti gure, nagia ga Mbori pai, ki nika kuti ni!”—Rk. 11:28.

7. Waigu rengbe mo ka gbia bakere undo ti gu regbo mo adiaha kaa geda Fugo Mbori?

⁷ Ho mo ageda Fugo Mbori ni, mo di regbo tipa ka gbia ngbarago ti gupai mo agedaha. Tipa ka yugoho na kpiapai, ya mo mo agbianga tiro na gipai re? Boro pasi gu riahe ningba angba tiro gbe. Ono mbiko gupai nga regbo bero tipa ka rihe te watadu mo naberãkurii kura apai si kini gbe berãro kusayo, mo kini ri gu riahe re ni kina wiri ipo ka regbo adunga bero mo ini pa ngbanya gu riahe re ya. Fuo nyasa mo gu riahe re, mo kini ye ka bi gupai nga, mo ima ri gu riahe re ni kina wiri ipo na mo kini bihe nga si naaida mo zeredi azereda kaa rihe tipa ka gbia ngbarago ti ni. Kina ngbatunga gupai re rengbe kadu tipa geda Ziazia Kekeapai. Ti kura aregbo, ani nagedaha ni kina boro ipo si ki sa gupai nga ka ani gbianga ngbarago ti wirika agu apai Yekova aida ka yugoho furani rogoho ya. Mo di regbo ka gbia ngbarago ti geda Fugo Mbori; mo naabi agu apai ngba bangiro mo agedapai tipaha, mo berẽpa gu woro afugo du rogo gupai mo agedaha, na mo ki berẽkurii agu apai mo nagedihe. Ka mo mangi agi apai re, mo nika du na bakere ngbarago.

8. Waigu ‘ruru kangara moyambu’ adigiso gayo sunge? (Oni bi rukutu kekeapai a.)

⁸ Yesu amoi ‘ruru kangara moyambu’ i naafu agu ariahe furani nga ga toro ti wene regbo, na i nariga rani ariga wenengai rogo toro yo. * (Mt. 24:45) Ziazia Kekeapai ga Mbori toro adu kugii pa kehe nga bangua he rogo agu apai yo dunduko ruru kangara moyambu akusaha. (1 Tesa. 2:13) Agu ariahe nga ga toro re naundo rani ani ini agu aberã nga ga Yekova nga gu i nayuguhe rogo Ziazia Kekeapai. Si du nga ndu gupai ani ninaageda agu amagazini ti ni nga Ngbaõbambu Sinziri na Awake! gbiati gu kekeapai du rogo jw.org. Ani kini mbakadi tirani tipa agu adunguratise namanga bebere aposo gbiati agu namanga ti digido aposo. Na ani nabi agu ambakadapai nga gu ninaakura na adiwi dunduko nga ga JW Terevizioni^® ka singia si ho rogo gaani fugo. Ka ani aandu kindi kumbatayo kaa geda Ziazia Kekeapai na kini wisigihe, si nika sa gupai nga ani du na rengba ka manga gu uepai si aida ani mangihe tipa kadu na ndikidi ngbarago.

9. Gini uepai nga gu naye na ndikidi ngbarago?

⁹ UEPAI: Tipa kadu na ndikidi ngbarago, si naida ani raki ringbisihe kuti ga Yekova arugute. Bake papara Atambuahe akepai nga: “Aboro [ngbarago] nga agu yo dunduko nagunde ti Yekova, nata ngba gako agene!” (Tam. 128:1) Gunde ti Yekova nayugo gupai nga si naida ani fu irisa fuko ni bakerehe si ki sa rani ani ne manga gupai rengbe ka ba gberãrago tiko. (Snz. 16:6) Sidu, ani nandu kindi kumbatayo kaa manga gupai rengbe omerani na ni tipa kaa pekafuo ga Yekova arugute nga gu du tipa rurupai na irairapai a wa i nasakipai tipaha rogo Baibiri yo. (2 Kor. 7:1) Ani nika du na ngbarago ka ani aamanga agu apai Yekova akpinyemuhe na kini ká agu apai ko asogaha.—Tam. 37:27; 97:10; Rom. 12:9.

10. Ringbisihe kuti ARomo 12:2, ginipai si aida ani mangihe?

¹⁰ Oni gedi ARomo 12:2. Boro ima rengba ka ino gupai nga, Yekova du na pagbia beko ka diaberã tipa gupai du ni ruruhe na gu du ni irairaha, ono si naida aida a ni mangi diaberã tipa ka pekafuo ga Mbori arugute. Ni kpiapai, boro ima rengba ka ino gupai nga, airangbii du na rengo beyo ka maa andiko nibipa wai boro  azubo bangiri bagene na aũnduge. Ono ni ima rengba ka zanga ida ka giasangba yo. Ni sangbanaha, ni ima rengba kaa zubo bangiri bagene ni kere ipiipihe kisusi wai si aida ni naazubo. Ani nayugo gupai rogo gaani mangaapai yo nga, ani ima ida kuti gupai nzunzu nga pekafuo ga Yekova arugute nga bawene gene raka kisusi. (Snz. 12:28) Davide aima bihe wakina gure, si du nga ndu gupai ko aya ti ni tipa Yekova: “Mo nayugo gene unga fere; ngbarago du bara bangiro rengbe, rogo kumbabero du aũngbarago ni nye anye kindi.”—Tam. 16:11.

11-12. (a) Ho du ani ni na akpakarapai watadu gberãrago, gini pai si aida ani du na rubangirise tipaha? (b) Waigu rengbe agu afugo du rogo AFiripoio 4:8 ka undo rani ho ani asia aũngbarago ni?

¹¹ Ho du ani na akpakarapai watadu gberãrago, ani ima rengba ka ida ka manga gupai rengbe ka undo rani ani mbu bakabangirani tipa gaani akpakarapai. Gbegberẽpai ho ti berã ani kurii gaani akpakarapai te, ono si naida ani du na rubangirise tipa ka zanga manga gupai Yekova asogaha.—Ef. 5:10-12, 15-17.

¹² Rogo gu waraga yo gu mokedi nangia Pauro akehe fu agu aKristano naadu Firipoi yo, ko azungodi agu aKristano re i naandu kindi kumbatayo kaa berãpa agu apai “du ni ruru he, . . . agu apai du ni wene sino, . . . agu apai nangba bangirise, . . . [gbiati] ziazia pai.” (Oni gedi AFiripoio 4:8.) Wa vura duhe nga Pauro aakenga agi apai re gbe tipa aũngbarago te, ono agu apai ko akehe re ima rengba kadu na maapai kurii agu aũngbarago ani asia ha. Mo asadingo gipai re: Ai gu ba gu fugo akura rogoho rogo gu veresi re nga “agu apai,” mo moingo agi afugo re kubaha “agu abia,” “agu avidio,” “agu awaraga,” watadu “agu ambaro nga ga avidio.” Manga gipai re nika undo ro mo ini gini gu rengbe ka ngba bangiri Mbori na gu arengbanga ka ngba bangiriko ya. Ani naida ka pekafuo ga Yekova arugute. (Tam. 119:1-3) Sidu, na sangbakpotoraniyo ni gigirihe, ani ima rengba ka manga gu kurapai nga gu naye na ndikidi ngbarago.—Amo. 23:1.

13. Gini biatapai nasa gupai nga ani du na ndikidi ngbarago? (Yo. 4:23, 24)

¹³ BIATAPAI: Mo moi iriso Yekova ni bambatapai rogo gamo raka yo. Wangia Yekova Bakusirani, si naida aida ani irisiko. (Yugo. 4:11; 14:6, 7) Sidu, gu nyanyakipa pai du rogo gaani raka yo nga ka iriso Yekova ngba gu gene ko aida ani irisiko ngbaha, nga “ni toro na rengo.” (Oni gedi Yoane 4:23, 24.) Ani naida ga Mbori ziazia toro ngbembatayo furani rogo gaani iriso tipa gaani iriso du na ngbanya dagbaha na agu arengo du rogo Fugoko yo. Si naida gaani irisombori du ni bambatapai furani ka si vura du vurũ nga ani naraka rogo agu aba i naima rugusa bete gaani asunge rogoho watadu i naima rugusa gaani asunge dunduko rogoho. Awere, awirinarani bangeyo naima susa 100 i nabayo ku bambukiso yo mbiko gupai gbua nga i nga aDezire Yekova. * Wa vura duhe wo, i na ngbarago tipa ka manga ai gupai rengbe yo ka mangaha tipa ka manga kparakpee, ka wisigopai, na ka pepa gaani Mbori gbiati gako Kindo fu kura aboro. Ho aboro abisirapa rani ni watadu kini rungosi rani, ani ima rengba kadu na ngbarago nga Yekova naundo rani ani hipai na ko nika fu mosoro afu furani.—Yak. 1:12; 1 Pet. 4:14.

14. Ginipai namangi paranga wirina Tajikistan yo, na tipagine?

¹⁴ Gu ndikidi akpiapai namangi rogo raka yo ima yugo gupai nga, agi apai ani nasakipai  tipaha biata re naye aye na ndikidi ngbarago, ka kina gini apai vura du tipa rani vurũ. Oni bingo gupai namangi Jovidon Bobojonov du rogo gu ringara nga Tajikistan garãko adu nga 19, nga gu ko naká ka rimo sunge abanzengere. Rogo Tanvuo 4, 2019, i adiko kpuko yo ngbaome na ki bandako bambukiso yo tipa adiwi, na i kini mangi ko wakina bamangi gbegberẽ apai. I ape pa gi iraira mangapai re rogo apangbanga rogo dungu aringara. I ape gupai nga, i ata ko tipa ka sako ngbaome ko rimi sunge abanzengere na ko mangi zungahe tipa ka nye ni ruruko sa fu kina gako ringara na ko vo roko abanzengere. Fuo gure, bambu-gumba-ngbanga ape gupai nga, ko nga ingahe na i ki kedi ko ku rogo gu bambukiso aboro amanga kere nyanyaki asunge rogoho, da kinaho ni yangaraha gu bazogo nga ga gu ringara re ambupai ni fuko na ki fu zinahe tipa i kusi ko bambukiso yo. Rogo agu apai dunduko namangi re, Jovidon abanda gako padu ni ruruse na gako ngbarago. Waigu ko amangi gipai re? Ni berãko pa gu gako azingo nga ga toro ti aregbo dunduko.

15. Waigu Jovidon anaagbia agu ariahe nga ga toro ho ko adu ni bambukiso yo?

¹⁵ Ho Jovidon adu ni bambukiso yo, ko aandu kindi kumbatayo kaa wirikapai tipa Yekova, wa si avura du vurũ nga Ziazia Kekeapai watadu ai gaani awaraga aadunga beko te. Waigu gipai re arengbe ka manga wo? Agu awirina naadu rogo gu dagbarago re anaaye na riahe nga ga borose fuko na kini ke agu averesi nga  ga uru ti kpoto agu ahe gu riahe re anidu rogoho. Sidu, ko adu na rengba kaa geda Baibiri na kini berẽkuriihe na aˈuru dunduko. Fuo i kusi ko bambukiso yo, ko afu gi rugute re fu agu aboro ata gbianga tiyo kindi na dungu aˈasada ya, ko aya: “Si ni nyanyakipa pai oni mangisunge na gaoni ranirii ni bakerehe gbe tipa ka kiiso gaoni inohe tipa Yekova nigeda oni Fugoko gbiati gaani awaraga.”

16. Jovidon amoiberãko kuti ginipai?

¹⁶ Wirinarani araki ringbisihe kuti ga Yekova arugute. Kuba gupai nga ko nye kaa berã kina kurii iraira nyemuapai na kini mangi gupai du ni gbegberẽhe, ko amoiberãko kuti Yekova na kuti gupai Yekova abihe na nyanyakipaha. Jovidon aima kpinyemu gu bawene kusikusiahe nga ga Mbori. Ko anaazinga na awiso dunduko kini gi fugo azire ami ni bibia. Yuru, ko anaabi diwi gbiati akerekuru. Ko aya: “Agu agamahe be Yekova re anaasa re mi du na ngbarago na kini gbia ngarasaro.” Ho du ani ni na bakere tambuahe tipa agu ahe dunduko nga ga borose gbiati agu arugute nga ga Baibiri Yekova afuhe furani, ani nadu na ngbarago, na gu ngbarago re rengbe ka undo rani ani hipai.

17. Waigu rengbe agu afugo du rogo 1 Petero 1:6, 7 ka undo gu boro rengbe ka gbia ti ni na apai wakina gu Jovidon agbia tiko na ni?

¹⁷ Jovidon amoi iriso Yekova a ni bambatapai. Ko aima ino pa nyakapa bandako gako padu ni ruruse fu ndikidi Mbori. Yesu aya: “Mo irisi Gbia nga gamo Mbori, mo ra fu kina ko sa.” (Rk. 4:8) Baira abanzengere gbiati abanzengere aaida Jovidon mbu du ni Dezire Yekova. Ono kuba gure, ko anaamanga kparakpee kakaka na aˈuru dunduko na ayuru dunduko kini sana Yekova ko undo ko ko nye niruru ko. Jovidon anye niruru ko ko ki vura gbiatiko na gbegberẽ mangaapai vurũ. Ni sangbanaha, ko ima rengba awere kadu na ngbarago nga ko na guhe beko naadunga beko mbata fu i ziko, ki ta ko, na ki ba ko ku bambukiso yo ya—ko awere na nyanyaki idapase.—Oni gedi 1 Petero 1:6, 7.

18. Waigu rengbe ani ka banda gaani ngbarago?

¹⁸ Yekova ima ino gupai nzunzu ani aidaha tipa kadu na ndikidi ngbarago. Ka mo mangi agu apai biata nga gu naye na ndikidi ngbarago, mo ima rengba ka banda gamo ngbarago ka akpakarapai vura du vurũ. Na mo ima rengba a kadu na rengba ka ya: “Rago nangba ti agu aboro du gayo Mbori nga Yekova!”—Tam. 144:15.