1. Mburu gaani maabangirise rii gine, na tipagine rengbe ani ka pehe ti ni wo?

 YEKOVA ima fu gu bawene maabangirise furani nga ga nyenye unga. Gu kura aboro na maabangirise ka raka ngbangbaturũ yo nyeanye kindi ni agu atoro kaa kpingo ya. (1 Kor. 15:50, 53) Na gu kura nyanyakipa maabangirise berewe nga gu du tipa raka nyeanye kindi auru kpotosende na wene kpotose gbiati ngbarago. (Yugo. 21:3, 4) Singia ani nangera kumbatayo tipa ka raka nyeanye kindi ngbangbaturũ yo watadu auru kpotosende, gaani maabangirise na nyanyakipaha furani.

2. Ginihe nga maabangirise?

² Gu fugo nga ‘sungudo,’ watadu maabangirise i namangisunge na ni rogo Baibiri yo, rogo yo ima rengba kadu nga, “kadu na maabangirise nga weneapai nika manga.” Ani ima rengba kadu na gu kido nga gaani maabangirise tipa kumbatayo nika da ada ti rengo mbiko si naye be Yekova. (Rom. 15:13) Ani ima ino gupai ko nakidohe tipaha, na ani ima ino gupai nga ko naabanda gako akidohe ti aregbo dunduko. (Geda 23:19) Ani na gu kido nga Yekova na kina nyemu ka manga agu apai dunduko ko nakidohe nga ko nika mangaha na ko na kina ome ka mangaha wo. Sidu, gaani maabangirise ayengo gbua mbiko agu apai ani aberã ha watadu agu apai ani aida si mangi te, gaani maabangirise naye riimburu gupai ani naima inoho nga si nga rengo.

3. Ginipai ani nika sakapai tipaha rogo gi kekeapai re? (Atambuahe 27:14)

³ Gu Barani du ngbangbaturũ yo ima kpinyemu rani na ko naida ani du na kido kutiko. (Oni gedi Atambuahe 27:14.) Ho du gaani maabangirise ni ni nyanyakihe kuti Yekova, ani nadu na rengba ka hi aˈasada na kidu na ngarã gbiati ngbarago ka kina ginipai vura manga rani vurũ. Ani bingo wai gaani maabangirise abanda rani. Ni bambataha, ani nika fugöpai tipa wai du maabangirise wakina ũzadahe na wakina kpakpari vura. Na fuo gure, ani ki sakipai tipa wai rengbe ani ka nyakasa gaani maabangirise.

4. Waigu du maabangirise wakina ũzadahe? (AEbere 6:19)

⁴ Rogo gu waraga yo gu mokedi nangia Pauro akehe fu aEbere, ko aringbisi gaani maabangirise kuti ũzadahe. (Oni gedi AEbere 6:19.) Pauro anaata dedede bangiri abaime, sidu, ko aima ino gupai nga i anaamangasunge na aũzadahe tipa si naundo bakurungba ka ti rindongo ya. Ti kura regbo sa, ko adu rogo kurungba ho bakere bavugumo atona ka manga ni. Ti regbo gu bavugumo re, ko abi abasikisi kurungba i ni bafu amarã ũzadahe ku ime yo tipa ka sa kurungba ka si ndunga ka fõ tihe ti kere ambia ya. (Amo. 27:29, 39-41) Wakina wai ũzadahe ni naanyakasa bakurungba, gaani maabangirise nabanda rani ani nye mbembedi na Yekova tipa gupai nga ka ani bitikpanga kusayo ho ani agbiatirani ni na agu akpakarapai du wakina kere bavugumo ya. Gaani maabangirise nasa rani ani nye zezeredi ho ani agbiatirani ni na akpakarapai bambiko ani ima ida kuti gupai nga apai nika ngbaangba. Oni tingidi gupai nga, Yesu aima pe gupai nga i nika rungosi rani arungosi. (Yo. 15:20) Sidu, paberã ani kuriipa agu apai dunduko Yekova nakidohe tipaha nika undo rani ani naandu kindi kumbatayo kaa irisoko.

5. Waigu maabangirise aundo Yesu ho ko agbiatiko ni na kpio?

⁵ Oni bingo wai maabangirise aundo Yesu ko nye ni ruruko ko ki vura ino gupai vurũ nga ko nika kpi kere iigirã kpio. Rogo gu uru nangia ga Pendekote rogo gu garã nangia 33, Fuo Batikayo Kristo, gu mokedi nangia Petero adi pai rogo gu sangbanebi yo du rogo gu buku nga Atambuahe nga gu nasakapa wai Yesu adu zezeredi na kidu na kido, si naya: “Borore aráka na maabangirise. Bambiko mo ambu nga mbisimore Adisi yo te, mo afu nga Ziazia Ko ko bi zirã a te. . . . Mo ambíisa re ni ngbarago yo du mo ni.” (Amo. 2:25-28; Tam. 16:8-11) Wa vura duhe nga Yesu aima ino gupai nga ko nika kpi, ko aima du na nyanyaki maabangirise nga, Mbori nika zingisako azingisa be kpio na ko nika duadu na gu ngbarago nga ga kodatiko na Bako ngbangbaturũ yo.—Eb. 12:2, 3.

6. Ginipai kura wirina sa apehe tipa maabangirise?

⁶ Gu gaani maabangirise nga ga aKristano ima undo badungu awirinarani tipa i hipai. Oni bingo gu kpiapai nga ga gu ruru wirina nga Leonard Chinn nga gu ko naraki England yo. Ti regbo gu Bambata Vura nga ga Zegino, i aba ko ku bambukiso yo tipa gupai nga ko aká ka rimo sunge abanzengere. Tipa adiwi ue, i abandako rogo wiri tooni bambukiso, na fuo gure, i amangi ko ngbaome ko naamanga kere nyanyaki asunge. Kusa, ko ake gupai nga, “Gupai namangi re aundo re mi ini pa bakio wai ani aida na maabangirise tipa ka hipai. Ani na agu akpiapai nga ga Yesu, ga amokedi, na ga anebi na ani na gu nyanyakipa akidohe du rogo Baibiri yo. Agi apai re dunduko nafu bakere maabangirise furani tipa kumbatayo na kini nyakasi rani tipa ani hipai.” Maabangirise adu wakina ũzadahe fu Leonard, na si ima rengba kadu wakina ũzadahe furani a.

7. Waigu aˈasada anyakasa gaani maabangirise? (ARomo 5:3-5; Yakoba 1:12)

⁷ Ho ani ahi aˈasada ni na kini bi wai Yekova aundo rani, ani naye ka ino gupai nga ko ima ida na gaani pai na gipai re nasa gaani maabangirise si du nyanyaki gbe. (Oni gedi ARomo 5:3-5; Yakoba 1:12.) Na gaani maabangirise naye kadu ni nyanyakihe gbe kisusi wai si adu ti gu bambata regbo ani aidi na wene pangbanga ti ni. Satana naida gupai nga, gaani aˈasada furii omerani, ono na ga Yekova undo, ani ima rengba ka hi agu aˈasada re dunduko ni basasa na kidu na diabese.

8. Waigu du maabangirise wakina kpakpari vura? (1 ATesaroniko 5:8)

⁸ Ziazia Kekeapai naringbisa gaani maabangirise a kuti kpakpari vura. (Oni gedi 1 ATesaroniko 5:8.) Banzengere navo kpakpari vura tipa  ka banda rini tipa ka avurani asadingo ka imisa ni ya. Rogo gu gaani vura yo ani asoho kuti Satana, si naida ani banda berãrani be ga Satana azubohe. Ko namangasunge na badungu ahe ni bakiakia tipa ka asada rani na ka gbarasa gaani aberã. Kina wai kpakpari vura abanda rii banzengere, gaani maabangirise nabanda gaani aberã tipa wa ka ani nye niruru rani fu Yekova.

9. Ginipai namanga ho aboro adunga ni na maabangirise ya?

⁹ Gaani maabangirise nga ga nyenye unga nika undo rani ani naamangapai ni tatamana na kini mangi agu asiapai nga ga tatamana. Ono ka ani mbu gaani maabangirise si rungbura na ani ki tona kaa berã sa kina kurii gaani nyemuapai, bangirani ima rengba ka go ti gaani maabangirise nga ga nyenye unga. Oni bingo gupai naadu tipa gu bete aKristano naaraka rogo gu Korinda naadu mbata. I azanga gayo idapase kuti ga Mbori nyanyakipa kidohe—nga gu maabangirise nga ga zingabekpio. (1 Kor. 15:12) Pauro ake gupai nga, agu aboro aidanga kuti zingabekpio ya, naraka sa tipa ka mbisa kina gayo nyemuapai. (1 Kor. 15:32) Areme, gu badungu aboro adunga na maabangirise kuti ga Yekova akidohe ya, namanga ai gupai rengbe yo ka mangaha tipa ka sa gayo raka si du na ngbarago awere. Ono ani kia mbiko ani na maa gaani kido kuti agu apai Mbori nakido pa ha kumbatayo. Gaani maabangirise wakina kpakpari vura nga gu nabanda gaani aberã na kini undo rani tipa ka ani naaberãnga sa kina tipa tirani ya, nga gupai naima rengba ka gbarasa gaani pagume na Yekova.—1 Kor. 15:33, 34.

10. Waigu rengbe maabangirise ka undo rani ti iraira aberã?

¹⁰ Gaani maabangirise ima rengba a ka banda rani ti gu berãpai nga ka ani rengbe nga ka sa ngbarago ti Yekova te. Ni kpiapai kura aboro ima rengba ka ya: ‘Mi adu nga dagba agu aboro yo nika raka nyeanye kindi te. Wene boro nga mi ki nyasi koyo te. Mi adunga na rengba ka raka kuti ga Mbori arugute te.’ Oni tingidi gupai nga, gu ga Eyobo ziree bafu wasa nangia Erifaza amangisunge na kina gu ngbatunga berãpai re na Eyobo. Erifaza aya: “Gini he nga boro, rengbe ka du ni gigiri ni?” Kuri gure, ko agumba gupai tipa Mbori nga: “Mo ngére, Mbori akida nga kuti gako ziazia yo te; du nga angbangbaturũ ni gigiri he bangiriko a te.” (Eyo. 15:14, 15) Nga gu riko kere aziree! Mo tingidi gupai nga, Satana du naida mo naaberã ngba gu gene re. Ko ima ino gupai nga, ka mo nye kaa berã kindi wakina gure, mo ima rengba ka zanga gamo maabangirise. Sidu, si naida mo ká ngbatunga agu aziree re na ki moiberãro kuti ga Yekova akidohe. Ka mo ya dunga na kapa nga ko naida mo raki nyeanye kindi ya te na ko nika undo ro mo da ti gamo sasa.—1 Tim. 2:3, 4.

11. Tipagine si aida ani du tini na zerangbaduse wa ani asungodo gupai nga gaani maabangirise digisitihe?

¹¹ Si naadunga taata ti aregbo dunduko ka banda gaani maabangirise si du nyanyaki te. Ani ima rengba ka zanga du na zerangbaduse wa ani apido Mbori ko digisi gako akidohe. Ono tie, mbiko gupai nga Yekova nye anye kindi, wai ko abi regbo kia ti wai ani abihe. (2 Pet. 3:8, 9) Ko nika manga gupai amanga ko nakidohe tipaha ngba bawene gene kisusi, ono ko ima rengba ka zanga mangapai ti gu regbo ani aida ko mangihe ti ni. Ginipai rengbe ka undo rani ani banda gaani maabangirise nyanyaki wa ani asungudo Mbori nizerangbaduse ko digisi gako akidohe?—Yak. 5:7, 8.

12. Ringbisihe kuti AEbere 11:1, 6, waigu i naringbisi maabangirise kuti idapase?

¹² Ani nika banda gaani maabangirise si du nyanyaki ka ani nye kindi na Yekova, mbiko ko nga gu boro rengbe ka sa gaani maabangirise si da ti rengo. Tipa gupai nga ani du na maabangirise, si naida ani du na idapase nga Yekova kinaho na “ko nafu mosoro fu agu yo nagbata ko.”  (Oni gedi AEbere 11:1, 6.) Ka ani idi kuti gupai nzunzu nga Yekova kina ti ni, ani nika du na bakere kido nga ko nika manga agu apai dunduko ko nakido paha. Ani sakingo pai tipa agene rogo mangimangipai yo nga gu rengbe ani ka nyakasa gaani pagume ngbaha na Yekova na ki banda gaani maabangirise ni nyanyakihe.

13. Waigu rengbe ani ka mbeda na Mbori?

¹³ Mo naamanga kparakpee fu Yekova, na kini gedi Fugoko. Wa vura duhe nga ka ani bingo Yekova te, ani ima rengba ka mbeda na ko. Ani ima rengba ka fura fuko rogo kparakpee yo na kidu na gu kido nga ko nika degatuko adega furani. (Yere. 29:11, 12) Ani rengbe ka degaturani fu Mbori nigeda ani Fugoko na kini berẽkuriihe. Wa ani nikaa gedapai tipa wai Yekova angerefuo agu aboro naadu ni ruruyo fuko mbata kusayo, gaani maabangirise nika nyaka gbe. Agu apai dunduko du rogo Fugo Mbori yo “i ake he tipa gaani wirikapai, ani moi bangirani mbiko gu zera nga ga kekeapai na wasa.”—Rom. 15:4.

14. Tipagine si aida ani berẽ ti ni kuriipa agu apai Yekova namangihe fu kura aboro?

¹⁴ Mo berẽkuriipa wai Yekova nabanda gako akidohe. Mo bingo gupai Yekova amangihe fu aAbarayama na Sara. I ada ti gu garã ka boro aavunganga agude na ni ya. Wa si avura du vuru nga Mbori aima kido yo nga i nika vunga gude avunga. (Bam. P. 18:10) Waigu Abarayama amangipai? Baibiri naya: “Abarayama amoi bangiriko ti kidohe, ki idi pa ha aida, si du du ko ti ni ni ba fu dungu rika aboro.” (Rom. 4:18) Wa vura duhe nga Abarayama aainongo wai ga Mbori akidohe nika da ti rengo te, ko aima du na gu kido nga, Yekova nika digiso Gako kidohe adigiso. Rago aagberãnga ti gu ruru kumba re te. (Rom. 4:19-21) Ngbatunga agu apangbanga re nayugo gupai furani nga, ani ima rengba kadu na kido nga Yekova ti aregbo dunduko nikaa digiso gako akidohe adigiso, ka si vura kaa ngera furani vurũ wa gupai kaa manganga ya.

15. Tipagine si aida ani berẽ tini kuriipa agu apai Mbori naima mangaha furani?

 ¹⁵ Mo berẽkuriipa agu apai Yekova namangihe foro. Mo berẽkuriipa wai mo nagbia undo nitiro ti wai agu akidohe du rogo Fugo Mbori yo na digisitihe. Ni kpiapai, Yesu akidohe nga Bako nika fu agu ahe afu furani ani aidaha tipa kaa raka. (Mt. 6:32, 33) Yesu ima kido ro a nga, Yekova nika fu ziazia toro afu foro ho mo asanahe ni tipaha. (Rk. 11:13) Yekova ima banda agu akidohe re. Nibipa ro, si nawiraha wa mo ima rengba ka berãpa gu kura akidohe nga gu ko na bandaha. Ni kpiapai, ko kidohe tipa ka mbupai foro, ka fu wasa foro, na ka fu guhe foro mo aidaha tipa mo nye mbembedi na ko. (Mt. 6:14; 24:45; 2 Kor. 1:3) Ho mo aberã ni kuriipa agu apai Mbori naima mangaha foro, mo nika nyakasa gamo maabangirise kuti agu apai ko nika mangaha foro kumbatayo.

16. Tipagine du maabangirise ti ni ni nyanyakipa gamahe?

¹⁶ Gaani maabangirise nga ga nyenye unga nga nyanyakipa gamahe be Mbori. Ani nangera tipa bawene apai kumbatayo—nga gu du ani na gu kido nga si nika manga amanga. Gaani maabangirise namangapai wakina ũzadahe, si naundo rani ani hi aˈasada, ani ru nyanyaki ti regbo arungosiro, na zavura ki gbiatirani na kpio. Gaani maabangirise namangapai wakina kpakpari vura, si nabanda gaani berã tipa ani ká gupai du ni irairaha na ki kakuti gupai du ni ruruhe. Gi maabangirise Baibiri apepaha furani re naundo rani ani ini Mbori wenengai na si nayugo pa bakio wai furani ko nakpinyemu rani. Ani nagbia bakere undo ho ani abanda gaani maabangirise ni si du nyanyaki.

17. Tipagine gaani maabangirise aye ti ni na ngbarago?

¹⁷ Gu mokedi nangia Pauro afu gu ngarasaro rogo gako waraga yo fu aRomo nga, “Rago angba ti roni na maabangirise.” (Rom. 12:12) Rago aangba ti Pauro mbiko ko aima du na gu kido nga ka ko nye ni ruruko, ko nika gbia nyenye unga ngbangbaturũ yo. Ani ima rengba a kadu na ngbarago na gaani maabangirise bambiko ani ima du na gu kido nga, Yekova nika banda gako akidohe abanda. A wa Bake papara Atambuahe akehe, “rago nangba ti gu ni . . . namaa bangirini koyo du Yekova ni nga gani Mbori, . . . naka kuti gako pai yososo kindi.”—Tam. 146:5, 6.