1, 2. (a) Wai du ini ani he nga aboro rengbe arengba kada ni abakurea Mbori? (b) Ginipai ani nika wisigopai tipaha rogo gi kekeapai re?

TONA kina ti gu regbo i avunga rani ti ni ki da ti gu regbo ani ka kpi ti ni, ani naida na nyemuse. Aboro naida na gu pagume du ni mbembedi he, angianga kina gu nyemuse du dagba kumba na dee ya. Kurigure, ani naida Yekova kpinyemu rani. Dungu aboro aidanga kuti gupai nga aboro rengbe kadu na mbembedi pagume na Mbori te mbiko ani abingo ko te na ko nga gu Mbori Du na Tanduapai Dũ. Ono ani ima ino gu rengo du tipa gipai re!

² Ziazia Kekeapai nayugo gupai nga aboro ingapai kinaho naima da ni abakurea Mbori. Gayo kpiapai na nyanyakipaha na si naida ani wirikipai ti ni, mbiko sonosa gu ngbatunga pagume re nga gu nyanyakipa sasa rengbe ani ka maaha rogo raka yo. Ga Abarayama kpiapai nayugo gupai nga ko aima du na gu ngbatunga gu pagume re. (Oni gedi Yakoba 2:23.) Wai du Abarayama ambedi na Mbori? Guhe naundo ko ko du na gu pagume re angia idapase. Nirengo, Ziazia Kekeapai naya tipa Abarayama “ko du ni ba fu agu yo  dunduko naida pa Mbori.” (Rom. 4:11) Ani bingo wai ga Abarayama idapase aundo ko ko du na wene pagume na Mbori. Na ani ni basasa si aida ani sana tirani nga, ‘Wai du rengbe mi ka wirika ga Abarayama idapase na ki nyakasi gimi pagume na Yekova?’

3, 4. (a) Oni sakingo pai tipa gu nyanyakipa asada duwa si nga gu asada na aasadi ga Abarayama idapase. (b) Tipagine Abarayama aida ka fu Yisaka ti ni ni motumo?

³ Oni bingo kpia sosono bakumba rironiyo wa ko andu yee ri bagangara yo. Ko nandu gu nunguro nga kere nunguro rogo gako raka yo. Gu nunguro re fu ngbatunga agu aboro du garãyo wa gako were te. Si rengbe kadu nga garã Abarayama adu nga 125, ono ko du kindi na ome rogoko yo. ^[1] Paranga gudu fuoko napeka ko si awira wa garãko nga 25. Wiriko nga Yisaka du tindi nyake. Abarayama na sape beko gbiati guhe ko nika ziga we na ni. Yekova sanako tipa ko fu bangisa wiriko ni motumo!—Bam. P 22:1-8.

⁴ Si nawira gure angia gu kere asada Abarayama agbiatiko na ni rogo gako idapase yo. Kura aboro naya gbegberẽpai du Mbori amangihe re nga ka sana Abarayama tipa pai wa gure, na aguyo kini ya ko aidi ka manga gipai re mbiko ko akpingo nyemu wiriko te. I nape gipai re mbiko i na idapase te na i aruganga tiyo na wai idapase amangasunge te. (1 Kor. 2:14-16) Anga Abarayama agisangba Mbori zanga ino gupai ko aamangaha te. Kuba gure, ko agisangba Mbori mbiko ko aabi gupai abi naamanga. Mbiko gu bangirise nga ga idapase, ko abi gupai nga gu Bako du ngbangbaturũ yo nga Yekova, ko arengbanga ka sana gako ruru moyambu tipa gupai rengbe ka imisa ni nyeanye kindi te. Abarayama aima ino gupai nga ka ko gisangba Yekova, ko nika fu maku fuko gbiati wiriko. Mburu gu idapase re aaru riipa gine? Inohe gbiati agu apai namangi.

5. Si nawira wa Abarayama awirikipai tipa Yekova wai, na ginihe gu inohe re amangiko na ni?

⁵ Inohe. Wa vura duhe nga ko asono ku Ura yo, nga gu ga aKasado bagbata naahi be irisokpiahe, Abarayama aima ino Yekova. Wai du gipai re amangi, wadu he nga bako nangia Tera angia irisikpiahe? (Yos. 24:2) Ziazia Kekeapai afuranga nzunzu tipaha te, ono si nape gupai nga Abarayama angia riko nga ga ngbatunga Seme nangia wiri Noa nangia gu kumba naadu na bakere idapase. Seme araki daho garã Abarayama adani nga 150 ko ki kpi. Ani ainongo ho nzunzu te singia Abarayama awirikipai tipa Yekova be Seme. Ono tie, si rẽarẽ boro berẽ gupai nga Seme aima pe agu apai ko ainihe tipa Yekova fu gako aborokporo. Si rengbe kadu nga gu inohe re aima dati Abarayama na ki zi ngbaduko yo. Ko akpinyemu gu Mbori ko awirikipai tipa ko, na gu inohe re naundo ko tipa ko sonosi idapase.

6, 7. Gini apai nanyakasi ga Abarayama idapase?

⁶ Agu apai namangi. Wai du Abarayama aye ka ino agu apai nanyakasi gako idapase kuti Yekova? Aboro nape gupai nga berãpai nasa boro ni bipai na gupai boro abihe kini sani ni mangipai. Gupai Abarayama awirikihe tipa Mbori afõngbadukoyo ko gunde ti Mbori na kidu na bakere irisa tipa ko mbiko ‘Yekova nga Mbori nga Bahe kisusi, nga baira ngbangbaturũ na kpotosende.’ (Bam. P. 14:22) Ziazia Kekeapai nayamba gu bakere irisa re nga “gunde ti Mbori” na si ni nyanyakipa pai tipa ka sonosa wene pagume na Mbori. (Eb. 5:7; Tam. 25:14) Gu ngbatunga gunde ti Mbori re nasa boro ni mangipai.

⁷ Mbori aya fu gu sosono bakumba nangia Abarayama na Sara re i guari Ura yo ka ndu ku rogo gu kura ringara. Na si adu nga i nika raka yo rogo abamburoko nyeanye kindi. Ni gia Abarayama sangba Mbori, ko azakigene  fu Mbori tipa ko fu maku fuko na ki bandako. Ni kpiapai, Abarayama aagunde nga i nika dia bawene diako nga Sara beko na ki imiko tipa ri. Mburu gako gunde adu kina ti ni, ono Abarayama aambunga ngbatunga gu bakabangirise re si diko kusayo ti giasangba Yekova te. Yekova ko abanda Abarayama na Sara ngba iˈiriwo gene bara dunguhe. (Bam. P. 12:10-20; 20:2-7, 10-12, 17, 18) Agu apai re du nyakasi ga Abarayama idapase.

8. Wai du rengbe ani ka gbia inohe gbiati gu birĩ rengbe ka nyakasa gaani pagume na Yekova?

⁸ Ya mo ani rengbe ka sonosa wene pagume na Yekova? Ii, ani ima rengba! Gu inohe ani aida na ni gbiati agu apai ani aida na ni si, kina ti ni. Abarayama adu na kina wiri bete tatamana nga gu du awere rogo Ziazia Kekeapai. (Dan. 12:4; Rom. 11:33) Fugo Mbori na agu aũkumuko rogoho rengbe ka kiiso gaani inohe tipa “Baira ngbangbaturũ na kpotosende” na si naundo rani tipa ani sonosi irisa tipa ko na kini kpinyemuko. Wa gu ngbatunga gunde ti Mbori re afõngbaduraniyo tipa ani gisangba Mbori, ani nagbia inohe mbiko ani ima bi wai giasangbako amangasunge. Ani bi gupai nga gako arugute nabanda rani na ko nafu maku furani na kini nyakasi rani. Ani ima ino gupai nga mangasunge fu Mbori na ngbaduraniyo dunduko nasa gaani raka si du na rogoyo ti ni, zereda na kini fu ngbarago furani. (Tam. 34:8; Snz. 10:22) Wa ani kaa kiiso gaani inohe gbiati birĩ, gaani idapase kuti Yekova gbiati gaani pagume na ko nikaa kio kina kumbatayo a.

9, 10. (a) Ginihe si aidaha tipa pabakure du ni nyanyakihe? (b) Ginihe nayugo na ni nga Abarayama abipa gako pabakure na Yekova na nyanyakipaha na ki nyakasihe?

⁹ Pabakure ima rengba kadu ni nyanyakipa he. (Oni gedi Asanza 17:17.) Ono tie, anga pabakure wa guhe rengbe ani ka ngbehe tipa ka maaha gbua ku vuru gaani bambuyo si nimbakadihe te. Pabakure wakina rakirakihe nga gu naida i ningere angera fuani na kini rigihe ka si du nga mo naida si ndu kumbatayo. Abarayama abipa gako pabakure na Yekova na kikiipaha na ko aima bandaha. Wai du ko amangi gipai re?

¹⁰ Abarayama aabingo tiko nga gu inohe ko adu na ni tipa gunde ti Mbori bakuru kusayo gbiati giasangba aima rengba kuho te. A wa ko gbiati gako bakere aborokporo andu ku Kanana yo, ko aandu kumbatayo kindi na mbu Yekova ko ningbe fuko kumbatayo rogo adiaberã yo, tona ti wiri tooni he ki da ti bakerehe. Garã sa mbata fu i batika Yisaka ho garã Abarayama adu ni nga 99, Yekova aya fu Abarayama wẽ ko yepe pito agu akumba dunduko du kpuko ho. Ya mo Abarayama atikango kuti gu zinahe re watadu ka asada ka ne manga gupai re? Oó, ko akido kuti Mbori na ki mangi gupai re “ni kina gu rago re.”—Bam. P. 17:10-14, 23.

11. Tipagine Abarayama aabakabangiriko ti ni tipa Sodomo na Amora, na wai du Yekova aundo ko?

¹¹ Mbiko wa Abarayama asaha ni sinoko  kaa giasangba Yekova zavura rogo rukutu apai, ko asa gako pabakure na Mbori ni wenehe na si ki nindu kumbatayo. Ko abihe nga ko ima rengba ka fura na Yekova tipa apai dunduko, na ka sanako tipa undo zavura ti gu regbo ko asota na sanahe. Ni kpiapai, ho ko aini gupai ni nga Mbori naida ka gbarasa agu agbata nangia Sodomo na Amora, ko aabakabangiriko nga ruru aboro ima rengba ka kpi wa sa na gbegberẽyo. Si rengbe kadu nga Abarayama aabakabangiriko tipa gumeko nangia Roto na gako aborokporo naaraka Sodomo yo. Abarayama asana gako sanahe na bakere umbasitise na kidu na kido kuti Mbori nga “Basapungbanga zegino dunduko.” Yekova ayugupai fu Abarayama na zerangbaduse tipa wai du Ko na inapai, na wai ko aino gupai du ngbadu boro yo, gbiati wai ko agbata ruru aboro tipa ka bandayo zavura ti regbo sapangbanga.—Bam. P. 18:22-33.

12, 13. (a) Wai du ga Abarayama inohe gbiati agu apai namangi aundo ko kusa? (b) Gini nayugo na ni nga Abarayama aima du na kido kuti Yekova?

¹² Zanga kapa, gu inohe gbiati agu apai Abarayama ainihe aima undoko ko banda pa gako wene bakure na Yekova. Kusa, ho ko agbiatiko ni na nyanyaki asada ho Yekova ayani fuko ko fu wiriko nangia Yisaka ni motumo, ko arengbe arengba ka berãkurii wai ko naini gu Bakureako du ngbangbaturũ yo re. Ani karaganga tirani awere fuo gu ruru kumba re wa ko aasota tipa ka zora rii gu tumbatumba arago du ringara Moriya yo re. Ya mo ko aberãha nga Yekova ima aria sinoko na ki da ni gbegberẽ boro adunga na inapai ya? Abarayama aarengbanga ka ida kuti gupai re te! Wai du ini ani gipai re?

¹³ Mbata fu aAbarayama kparatiyo ti agu amoyambu nagasi yo, ko aya: ‘Oni nyé tigaoni erẽ na dongi; ani nandu na kina wire koyo, ka irisa Mbori yo, ki yega fuo roni berewe.’ (Bam. P. 22:5) Ginipai Abarayama aagumbaha na gipai re? Ya mo ko aananga gako amoyambu, ka ya fuyo Yisaka nika karagatiko akaraga baraho ko aima inoho ni nga ko nandu ka fu Yisaka ni motumo? Oó. Ziazia Kekeapai nape gupai furani naadu ri Abarayama yo. (Oni gedi AEbere 11:19.) Abarayama aima inoho ‘ya Mbori rengbe na zingisa [Yisaka azingisa] zavura be kpio.’ Nirengo, Abarayama aima du na idapase kuti zingabekpio. Ko aima inoho nga Yekova naasako ko na Sara i vungu ngba gbinza yo. (Eb. 11:11, 12, 18) Ko aima rugatiko na ni nga pai ho rengbe ka gasa Yekova te. Si du ko adu na kido ti ni nga ka kina ginipai vura manga rogo gu kpakarakpakara uru re vurũ, Mbori nika gasa wiriko agasa fuko tipa ga Yekova akidohe dunduko digisitihe. Si du si airiwongo ti ni ya ka bi gupai nga i nayamba Abarayama nga “ba fu agu yo dunduko naida pa Mbori”!

14. Gini kpakarapai mo agbia tiro na ni wa mo amangasunge fu Yekova, na wai rengbe ga Abarayama kpiapai ka undo ro?

¹⁴ Na ginipai du tipa rani tigaani? Nirengo, Mbori asananga rani areme ani mangipai wa gure te. Ono ko nasana rani ani gisangbako zavura ho du gako azinahe ni furani ni  kpakarakpakaraha tipa ani mangipai kutini watadu ani agianga tirani na ndu agu apai duhe ti ni wo te. Ya mo pai ho Mbori asana ro tipaha du ni kpakarakpakaraha foro mo mangihe? Fu kura aboro, si rengbe kadu nga tungusapai. Si rengbe ka dunga zee namanga yo amanga tipa ka tungusa wene pangbanga fu gu boro i ainongo ni ya. Tipa kura aboro, gayo kpakarapai nga aboro nabiyo kia, wa sukuru yo na basunge yo. (Gate 23:2; 1 Tesa. 2:2) Ya mo mo naabi tiro wa Abarayama wa mo andu ti gu zorozororago nga Moriya, nga mo namanga gupai niima du ni mbumbuhe foro? Kangia wo duhe, mo wiriki gu wingbaduse nangia ga Abarayama gbiati gako idapase! Berãkurii agu akpiapai nga ga gu ruru akumba na adee re ima rengba ka fõngbaduraniyo ani wiriki yo na ki mbedi na Yekova wa Bakurearani.—Eb. 12:1, 2.

15. Wai du rengbe ani kadu na kido nga Abarayama abiranga tiko tipa du ko ni ruruko fu Yekova te?

¹⁵ Ya mo mo naberãha nga Abarayama abiratiko tipa du ko ni ruruko fu Yekova? Mo bingo wai Ziazia Kekeapai nasakipai tipa gako digido raka: “Rame Abarayama ki rengbe, ko ki kpi wa ko aima gbe, kuru gbinza kumba nangia ko, garãko ange ange ki susi.” (Bam. P. 25:8) Ho garã Abarayama adani nga 175, omeko aima bata, ono ko arengbe ka ngera kusayo kidu na ngbarago nga ko aima raka gako raka wenengai. Si angia gu raka mburuhe adu riipa gako pagume na Yekova Mbori. Ono tie, ho ani agedapai ni nga “kuru gbinza kumba nangia ko, garãko ange ange ki susi,” si aidanga ani dakuti digisopai nga ko aima rengba be raka, na nyemu raka aadunga berewe tiko kumbatayo te te.

16. Gini ngbarago Abarayama nika du na ni Paradizo yo?

¹⁶ Ziazia Kekeapai nafura tipa Abarayama nga: “Ko angere tipa gu bakporo du na nyanyaki mburuhe ti ni, du baduaha nga Mbori ni bamangihe a.” (Eb. 11:10) Abarayama aima ida kuti gupai nga uru aduadu ho ko ki bi gu gbata re nga ga Mbori Kindo, si nizogorago kurii kpotosende na nirengo, ko abihe abi! Ya mo mo rengbe ka berã wai Abarayama nika du ti gu regbo ko nika raka rogo Paradizo auru kpotosende na kini ndu kumbatayo na nyakasa gako pagume na Yekova? Nairiwo gu ngbarago ko nika du na ni ka ino gupai nga gako kpiapai aima undo ga Yekova amoyambu vuru agu akutu agarã nangbefuo kpioko re! Paradizo yo, ko aino gupai aino nga gu gene Mbori akaraga Yisaka ngbaha fuko angia “kpiapai” nga ga bakerepai. (Eb. 11:19) Ko nika inoho aino a nga gu imisiri ko adu na ni wa ko mbakadatiko ka fu Yisaka ni motumo aima undo amirioni ruru aboro i bi gu bangisa imisiri Yekova adu na ni ho ko afu Wiriko ni nga Kristo Yesu ni motumo. (Yo. 3:16) Ga Abarayama kpiapai ima undo rani naabarani tipa ani du na bakere tambuahe tipa motumo, nga gu bakere mangapai nga ga nyemuse naamanganga mbata rogo gu pangbanga nga ga aboro ya!

17. Gamo diaberã nga gine, na gini ani nika wisigoho rogo gu kekeapai ngbefuo gere?

¹⁷ Ani dunduko si aida ani diberã tipa ka wirika ga Abarayama idapase. Wa ani kaa ndu kumbatayo tipa ka ino Yekova wenengai, gure nga ani nadu ni rururani fuko na ki gbia bakere inohe mbiko manga ani sunge fuko ni rururani. (Oni gedi AEbere 6:10-12.) Yekova dunga adu ni bakurearani nyeanye kindi! Rogo gu kekeapai ngbefuo gere, ani nika wisigopai tipa akpiapai berewe biata nga ga gu ruru aboro naadu na wene pagume na Mbori.