I avungu re rogo gu garã nangia 1926 rogo gu gbaria nga Crooksville, Ohio, Amerika yo. Buba na nina aangianga aboro pambori te, ono i aya furani nga awiriyo muambe nga ani nindu andu ku kanisa yo. Mi andu ku rogo gu kanisa nga ga Mesodiste. Ho garãre adani nga 14, pasita atumo re mbiko mi aakpanga ti irisombori Rago Poso vuru gu garã re te.

Bara ti agu aregbo re, gaani murakporo rimori angia Margaret Walker nangia Dezire Yekova atona ka ye fuo nina ku kpurani tipa kaa fura na ri riipa Ziazia Kekeapai. Rogo kura uru sa, mi adiberã tipa ka sungo pati gi gayo sakapai re. Nina aberẽhe nga mi nika gbarasapa gari wirikapai, sidu, ri ki ya fere mi guari dimoyo. Ono mi amangi ome tipa ka gia gu gayo sakapai re. Fuo ye Margaret bara dunguhe, ri asana re nga, “Ya mo mo ini rimo Mbori?” Mi ki karagapai furi nga, “Aboro dunduko niima inoho ya si nga Mbori.” Ri aya, “Mo di gamo Ziazia Kekeapai na ki zaki Atambuahe 83:18.” Mi azakihe na ki bi gupai nga rimo Mbori nga Yekova. Mi aoro fuo abakureami na ki pe gupai fuyo nga, “Ka oni ga ku kpuroni yo, oni ngere rogo Atambuahe 83:18 rogo Ziazia Kekeapai tipa ka bi rimo Mbori.” Boro  ima rengba ka ya gure nga mi atona tungusapai nibasa.

Mi awiriki Ziazia Kekeapai na ki zi bapatiza rogo gu garã nangia 1941. Ngbutuko fuo gure, i asia re mi ni nungusi gu wisigo buku nga ga dungurati. Mi angarasi nina gbiati awirinami i ye, na i dunduko ki tona ka ye tipa wisigo buku. Ono wa si avura duwo, Buba aadunga na nyemu gipai re te.

Mi agbia dungu amomu rogo dungurati, na mi kidu na dungu abuku bere nga ga toro. Rogo uru sa, Buba aya beko kuti gimi abuku ki ya: “Mo bi agi ahe re dunduko? Mi naida mo kusihe kusayo rogo gi kporo re, na mo ima rengba ka kura na ni wa sa.” Mi aguari kporo ho na ki ga ku rogo gu kura gbaria mbembedi na Zanesville, Ohio yo, ono kini dogodi ku kporo yo dedede tipa kaa undo gimi aborokporo.

Buba aasadi ka ká na nina ti nduge kuba adunguratise yo. Ti gu kura regbo ho ri anaandu ni tipa dunguratise, ko ani oro fuori na ki gberi ku kporo yo. Ono ri ani oro ki kuru rogo kura ngbadimo na ki ndu ku ba dunguratise yo. Mi aya fu nina wẽ: “Ka mo bakingo bangiro ya. Omeko nika bata abata be otoka fuo ro.” Fuo bete regbo kusa, Buba ambu ka na nina ti adunguratise, ri ki tona nduge zanga kpakaraapai.

Rogo gu garã nangia 1943, gaani dungurati atona ka manga gu Gu Sukuru Nga ga Siokrasia, mi atona ka manga gu gumbapai nga ga agude sukuru. Gu rugute i anaafuhe fere fuo nyasa mi gimi gumbapai rogo sukuru aundo re mi ini wai ka fura wenengai.

Bara ti agu aregbo re, rikaaboro aaso gu vura nangia Ue Vura Nga ga Zegino. Rogo gu garã nangia 1944, I ayambu re mi ye tipa sunge asekere. Mi andu ku rogo gu ba nga Fort Hayes du Columbus, Ohio yo, i ki wisigi re na ki fuku awaraga fere. Mi ki pe gupai fu agu abanyaki naadu yo nga mi aidanga na sunge sekere te. I ambu re mi ki ga. Fuo bete aˈuru kusa, sekere aye fuo re ku kporo yo na ki pe gupai fere nga: “Corwin Robison, i kedi re na waraga mi ye ka zio ro.”

Fuo susa poso ue ba pe ngbanga yo, basapungbanga aya: “Ka i ya kina kuti re, ka mi saringba ro nga mo nye ku bambukiso yo nyeanye kindi. Pai ngbaro mo aida ka gumbaha?” Mi akaragapai nga: “Ako baira, si naida oni bire nga mi nga pasita. Gu ngbadimokporo nga ga aboro dunduko nga gimi basunge, mi ima tungusa gu wene pangbanga nga ga Kindo fu dungu aboro.” Basapungbanga ape gupai fu agbiangbanga nga: “Anga gaoni sunge ane tipa ka diaberã singia gi paranga re nga pasita watadu ko nga pasita te. Oni ane tipa ka diaberã singia ko rẽ na sunge asekere watadu ko arẽnga na ni te.” Mbata fu bebere saa susi, agbiangbanga aye na gayo dakutipai. Basapungbanga asaringbanga re tipa agarã bisue nga mi mangihe rogo gu bambukiso du Ashland, Kentucky Amerika yo.

Mi adi gimi bambata aposo ue ku rogo gu bambukiso du Columbus, Ohio yo, na ki sungu kina rogo gu bambukiso i amoi re ku rogoho. Mi akpari fu Yekova nga: “Mi arengbanga ka sungo ku bambukiso no tipa dungu agarã te. Mi ainongo gupai rengbe mi ka mangaha te.”

 Fuo girorago, ababanda aboro akusi re ku zegi. Mi andu fuo gu kura zizi boro naadu ni gbanga ko, na ani ki ru yo kaa ngera ku zegi yo ti bangiri bambu. Ko asana re nga, “Ginipai i nazi ro ti ni kumba?” Mi aya, “Mi nga Dezire Yekova.” Ko ki ya, “Mo nga Dezire Yekova? Tipagine tie du mo ti ni ane?” Mi ki karagaha nga, “aDezire Yekova asonga vura na ka imo aboro te.” Ko ki ya, “I moi ro ku bambukiso no mbiko mo aidanga ka imo boro te. I namaa kura aboro ku bambukiso yo mbiko imo aboro. Rogo gupai re ti ni te.” Mi aya, “Nirengo, rogoyo ti ni te.”

Fuani ko aya, “Mi di agarã 15 ku rogo gu kura bambukiso, yo du mi agedi bete gaoni awaraga ni.” Mi akpari nga, “Yekova, mo undo re tipa gi kumba re du na mi.” Rimo gu kumba re angia Paul, ko aya: “Ka boro dagba agi aboro re zadi ro, mo gumbaha fere. Mi ini wai mi nika ndu sunge ni.” Nirengo, mi aadunga na wiripai dagba tire na gu zizi aboro naadu yo 50 te.

Ho abangerekurii bambukiso adi re ni ki kedi re ku rogo gu bambukiso du Ashland yo, mi agbia nyanyaki awirina yo. Kodatise nayo aima undo re gbiati kura aboro tipa ani nye nyanyaki rogo toro yo. I anaafu sunge furani nga ga geda Ziazia Kekeapai na aposo dunduko, na ani anaambakada asanahe gbiati akaragapai tipa gu dunguratise awirina anaamangaha. Wirina adu a kinaho gako sunge angia ka ngerafuo gu dagbarago nga ga tungusapai. Ani adu rogo gu bakere vurobambu naadu na abarame rogoho. Gu wirina naangerafuo gu dagbarago nga ga tungusapai aniya fere: “Robison, mo nikaa ngerakurii gu barame du re na gu du yo re. Gu boro i nika niye na ni kurii gu ba re ni nga gamo dagbarago tungusapai. Mo duwa ka mo tungusipai funi mbata fu ni ga.” Gere nga gu gene ani anaatungusapai ngbaha ngba wene gene.

Gu Ue Vura Nga ga Zegino adigi rogo 1945, ono mi araki araka ku bambukiso yo fuo digo vura tipa bete regbo. Mi anaabaka bangire tipa gimi aborokporo mbiko Buba aima aya fere, “Ka mi do ro ane, mi ini gupai mi nika mangaha na agiyo re.” Fuo i kusi re, kina ngbare nazere ka bi gupai namangi. Wa vura duhe nga Buba aidanga na gaani pambori te, aboro saba rogo gaani ngbadimokporo anaandu tipa adunguratise na dawire sa ki ima zio bapatiza.

Ho gu vura nga ga Korea atona ni rogo 1950, i ayambu re berewe tipa mi ye tipa sunge asekere ku Fort Hayes yo ni uehe. Fuo mi mangi asada, sekere sa aya fere, “Mo gbehe ri gaoni badona.” Mi aya,  “Si ni bawenehe, ono mi amanganga sunge asekere te.” Mi adipai rogo 2 Timoteo 2:3 na ki ya, “Mi nga ga Kristo sekere.” Fuo onga ko tipa gbanga regbo, ko ki ya, “Mo ima rengba ka ga.”

Fuoho aaturõngo te, mi ki ndu tipa gu dunguratise nga ga aboro Betere rogo gu bakere dunguratise namangi Cincinnati, Ohio Amerika yo. Wiriba Milton Henschel aya furani wẽ ka wirina aida ka mangasunge nyanyaki tipa Kindo, riigbu ima rengba ka dia ni ku Betere yo. Mi afu tire tipa ka mangasunge Betere yo, i ki di re, na mi ki ndu ku rogo gu Betere du Brooklyn yo rogo Buza 1954. Mi ima raka ku Betere no tipa gbanga regbo.

Zingo sunge aamanganga re Betere yo te. Tipa dungu agarã, mi anaamangasunge ba gbingbida awaraga yo, ni bambakadi ahe, na arifungura. Mi aima mangasunge a ka dudua aba Kikindigi Adunguratise rogo gu bakere gbata nga New York.

Mi ima kpinyemu agu apai namanga dedede Betere ane, nga gu nakoda gu irisombori nga ga wiso, wisigo Ngbaõbambu Sinziri nga ga aboro Betere kodihe natungusapai rogo gu dungurati du mi rogoho. Ho mi aberã ni tipa agi apai re, mi nabihe nga si naida agi apai re du rogo agu angbadimokporo dunduko nga ga aDezire Yekova. Ho avunguagude na awiriyo asungo ni sa tipa ka wisigo agu averesi du tipa aˈuru ni basasa, kini mangi gu Irisombori Nga ga Aborokporo dedede, na kini mbakadi adungurati na kini karagapai baha yo gbiati tungusa wene pangbanga, si nawira wa gayo aborokporo dunduko nadu wenengai rogo toro yo.

Mi ima du na dungu abakureami Betere ane na rogo dungurati. Aguyo angia mbedimbedi aKristano na i ima ndu ka dia gayo mosoro ngbangbaturũ yo. Aguyo nga kura akandoro. Ono ga Yekova amoyambu dunduko kodihe na Aboro Betere nga kina kpakpa-aboro. Ho kpakarapai anikuru ni dagba tire na wirina, mi ani asadi dedede tipa zereda du dagbarani na ni. Mi aniberẽ kurii Matayo 5:23, 24 na ki bi wai si aida ani mangipai kuti agu azanga giatise du dagbarani. Anga taatapai ngaha boro ho mbupai te, dedede, kpakarapai naadunga fuo boro ya mo mbupai fere te.

Mbikopa garãre, si fere awere ni kpakarapai mi tungusipai kporo na kporo, ono mi ata mbunga ha te. Mi ima wirika gu pa aboro China nga Mandarin  na rago naangba tire tipa ka fura na aboro China rogoho bangirigene. Gu kura awiso kinaho mi anikparaka amagazini 30 watadu 40 fu agu aboro du na nyemu rengo.

Mi aima karaga tire a ku China yo ka bi boro mi afura na ni! Kura uru sa, kura bawene wiri degude atona ka moma ku ngbare wa ri aandu ku rogo gu rago i atakapandepa baga zuzu ngua ni. Mi amomu na ki fu Ngbaõbambu Sinziri furi na Awake! rogo pa China. Ri ki dihe bere na ki pe gupai fere nga rimori nga Katie. Tingbafuo gure, agu aregbo dunduko ri anaabi re, ri ani ye ka fura na mi. Mi ayugu rimo zuzu angua furi rogo pa-Ngirisi, na ri kini pehe fuore. Mi asaki rogo kura averesi yo furi a rogo Ziazia Kekeapai, na ri ki di gu buku nga Gini Apai Nzunzu Ziazia Kekeapai Ayugoho bere. Tingbafuo bete aposo, mi abingo ri berewe te.

Fuo bete adiwi kusa, gu kura degude naatakapande pa ahe adi magazini mi afuhe furi. Rogo gu kura poso, ri afu gari terefuni fere na ki ya fere, “Mo fura ku China yo.” Mi ki ya, “Mi ainongo boro China yo te.” Ono ri adari re mi ki fura na terefuni na ki ya, “Hello, mi nga Robison.” Gu boro naafura rogo terefuni aya, “Robby, mi du nga Katie. Mi aima yego ku China no.” Mi ki ya, “Ku China yo?” Katie ki karagaha fere nga “Ii. Robby, mo bi gu degude fu terefuni foro re? Tamere du nga ri. Mo ayugu dungu weneapai fere. Mi nahõpai bero mo yugupai furi kina wai mo ayuguhe fere.” Mi ki karagaha nga, “Katie, mi nika mangaha amanga. Tambuahe foro tipa ka undo re mi ini wari du mo ni.” Fuoho aaturõngo te, mi ki fura na tame Katie niyangaraha. Mi namaa bangire nga yo du agu adegude ue re ni, i nika wirikapai awirika tipa Yekova.

Mi ima manga ga gbia sunge tipa agarã nga 73. Mi na ngbarago wa ko aundo re mi zanga rimiso tire ku rogo sunge asekere na ki nye niruru re fuko. Na berewe a, atamere na adawire ape gupai fere nga i agbia wingbaduse ti gu regbo mi aagundenga be gu zinga nangia ga Buba ya. Nina gbiati awirinami sita azi bapatiza niyangaraha. Zavura kina Buba, kpotoko yo aima ariatihe, na ko ki niye aye tipa bete adunguratise mbata fu ko kpi.

Ka Mbori siaha, agu agumere gbiati agu abakureami nakpiki i akaragatiyo akaraga ku rogo unga rogo vovo zegino. Oni berẽnga kina pa gu ngbarago ani kadu na ni wa ani kaa iriso Yekova na gaani aboro ti aregbo dũ. *