MO BERẼNGA pa gu uru mo adu na ngbarago rogo gamo raka yo. Ya mo si angia gu uru mo amangi rogatise watadu gu uru mo abatika bambata wiro? Ya mo si angia gu uru mo akpara gamo raka fu Yekova na ki zi bapatiza? Mo ima rengba ka ya gu uru re nangia nyanyakipa uru nga ga ngbarago rogo gamo raka yo. Nairiwo gu ngbarago agu akuaro nga aidipase adu na ni ka bi gupai nga mo yuguhe gbaiga nga mo nakpinyemu Yekova na ngbaduroyo dũ, mbisimo ro, berãro, na gamo ome dũ!—Mk. 12:30.

Si nawira wa mo aima gbia bakere ngbarago ti mangasunge fu Yekova tona ho mo azi bapatiza ni. Ono tie, gu kura abatungusipa Kindo kinaho adunga gu ngbarago tiyo i adu na ni mbata ya. Tipagine duhe wo ti ni? Gini nduapai du berani tipa ka mangasunge fu Yekova na ngbarago ti aregbo dũ?

Gu pangbanga nga ga Kindo na gu gaha kidohe nga Yekova nika gbarasa gu gbegberẽ zegino du awere na ki ye na vovo zegino kubaha, si nasarani ani du na ngbarago. Kurigure, Zefania 1:14 nakido rani nga: “Gu bakere rago nga ga Yekova du mbembedi, si mbembedi ki niipisi tihe gbe.” Ono wa vura duhe wo, pa pido ani he tipa gbanga regbo ima rengba ka dia gu ngbarago ani adu na ni mbata na ki sarani ka ani mangingo ziazia sunge berewe fu Mbori ya.—Snz. 13:12.

Kodatirani na ga Mbori aboro naundo rani ani nimangisunge dedede fu Yekova na ngbarago. Nirengo, si rengbe kadu nga gu wene mangaapai nga ga ga Yekova amoyambu nga guhe naasa rani ani tona ka irisoko na ki undo rani ani tona ka mangasunge fu Mbori na ngbarago. (1 Pet. 2:12) Ono ginipai rengbe ka manga ka si du nga kuarani ni Kristano kuru rogo rengo mbiko ni arakanga ringbisihe na agu arugute nga ga Mbori te? Ho du pai ni wa gure, bete agu aboro naaye ku rogo rengo mbiko gu mangaapai nga ga ga Yekova aboro ima rengba kadu na bakere gberãrago na pa gayo ngbarago ki gberẽ.

Gu takapandepa bagaahe du rogo gi ga Satana zegino re ima arengba ka dia gaani ngbarago kusayo. Bakitingbanga namangasunge na gi gako zegino re tipa ka sarani ani bihe nga ani naida na agu ahe nzunzu adunga ani na sunge na ni ya. Ono tie, si naida ani tingidi agu afugo Yesu naya: “A nga boro sa ka ra fu abaira ue te; bambiko ni asóga gu ni sa, ki kpi nyemu gu ni; watadu ni aká kuti gu ni sa, ki payasi pa gu ni. Ka oni ata ra nga fu Mbori nira fu ũzegino a [ya].” (Mt. 6: 24) Ani arengbanga ka mangasunge fu Yekova na ngbarago na ti kina bangisa regbo kini asadi ka gbia agu ahe dunduko ani aidaha rogo gi zegino re te.

Mangasunge fu Yekova afunga rii ome agu aboro nakpinyemuko te. (1 Yo. 5:3) Mo tingidi gupai nga Yesu aya: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni. Bambiko kii nga gi gonga te, na gi tindiro ni aakpura ha.” (Mt. 11:28-30) Dia gu gonga nga ga sunge aKristano nazambuasi rani na kini fu ngbarago furani. Na ani na bakere ndupai berani tipa kadu na bakere ngbarago rogo ga Yekova sunge yo. Ani wisigingo nduapai awere biata nga gu rengbe ka sarani ani ‘dú na ngbarago rogo Mbori yo nga gaani bata.’—Abak. 3:18.

Ani namangasunge fu gaani Bafu-Unga, nga Mbori Ngbarago. (Amo. 17:28; 1 Tim. 1:11) Ani ima ino gupai nga Bakusirani du fu unga furani. Sidu, ani nikaa mangasunge fuko na ngbarago ti aregbo dunduko, ka si vura du nga agarã ima susa ni badunguhe tona ho ani azi bapatiza ni.

Mo bingo gupai naadu tipa Héctor mangisunge fu Yekova ni gu babiapai ninaata ata tipa agarã 40. Zavura “ti rago gbinza” ko, ko kindi na diabese. (Tam. 92:12-14) Kaza diako ima zogosa bete agu asunge ko anaamangaha fu Mbori, ono si agbarasanga pa gako ngbarago te. Ko aya: “Wa vura duhe nga si nga pa rungo ka bi wai ome diare abata be kaza na si aima da fere ni kpakarapai tipa ka ngerafuo ri, mi ambunga gipai re tipa si di gimi ngbarago rogo mangasunge fu ndikidi Mbori te. Pa ino mi gupai nga Yekova du naafu unga fere, na ko akusi boro nandu he ti ni, si nafu ndupai fere mi kpinyemuko ni bakerehe na kini mangisunge fuko na kpotoreyo dunduko. Mi namanga ome kindi tipa kaa tungusapai dedede, na kini mangi asadatise tipa gu maabangirise nga ga Kindo du ni nyanyakihe berãre yo tipa ka mi zanganga gimi ngbarago ya.”

Yekova ima fu motumo nga gu nasaha furani taata tipa ani raki gu raka nga ga ngbarago. Nirengo, “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Nirengo, Mbori rengbe arengba ka mbupai furani ti gaani ingapai na ani rengbe arengba ka gbia nyenye unga riimburu gu ga Mbori gamahe nga ga nyemuse nga ga Yesu motumo. Anga gure nga wene ndupai furani tipa kadu na ngbarago te? Na anga si naida gaani tambuahe tipa gu motumo re fõngbaduraniyo ani mangisunge fu Yekova na ngbarago te?

 Wirina du Mekisiko yo nga Jesús aya: “Mi angia kanga fu gimi sunge, ti gu kura aregbo, mi anaamangasunge tipa gbanga regbo, wa vura duhe nga si aadunga fere ni dingisoro tipa mi mangihe wo te. Mi aamanga gipai re tipa ka gbia bakere marã. Fuani, mi awirikipai tipa Yekova na wai ko afu bangisa Wiriko tipa aboro. Si afu bakere nyemu mangasunge fuko fere. Si du mi akpara gimi raka fu Yekova, na fuo manga mi sunge fu gu basunge re tipa agarã 28, mi adiberã tipa ka mbu sunge na ki tona mangasunge Kindo ti aregbo dũ.” Gure nangia tonatona agu agarã nga ga mangasunge fu Yekova na ngbarago.

Gu zuzuhe ani akusaha, sangbanaha nga ngbarago angianga rungo ya. Ya mo mo natingida wai gamo raka adumbata fu mo ini Yekova? Gu mokedi nangia Pauro atingidi aKristano Roma yo nga i ‘adu ni akanga ingapai’ ono i ima da “ni akanga rurupai.” I akusi gu zuzuhe nga ga “ziazia pai” nga gu ka rengbe ka fu nyenye unga fuyo. (Rom. 6:17-22) Ani a napekafuo gu gene raka du ni ziaziaha, si ayengo na gu rungo furani naye be gbegberẽ mangapai watadu zuu te. Nangba gu gene raka re!

Mo bingo gupai naadu tipa Jaime naidi kuti gupai nga Mbori ti ni te na ahe akuru nisaha, na ko arimisi tiko ku rogo mbaro takpata. Jaime atona ka ye sa agu adunguatise nga ga aKristano na rago angbatiko tipa wai i adiko kugume. Tipa ka mbu gu gako kuru gene raka re, si aidi ko sana Yekova tipa ko undo ko ko idi kuti padu ko ti ni. Ko aya, “Tooni tooni, mi aye ka ino gupai nga Barani kinaho nga boro nyemuse na nga Mbori inapai. Mangapai kuti ga Yekova arugute aima du ni bandahe fere. Ka mi aˈarianga gimi raka ya, ka mi aima kpi were, a wa si amangi tipa gu kura abakureami ani anaawirika takpata nayo. Agu agarã mi nagbia ngbarago rogoho nga agu agarã mi nadihe kuti mangasunge fu Yekova.”

Mo nabihe nga si naida ani du wai wa ani apido digido gi gbegberẽ zegino re? Mo tingidi gupai nga ani “narũ he fu Toro” na ani nika ‘ké nyenye unga.’ Sidu, “ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni.” (Gara. 6:8, 9) Mbiko gu undo nga ga Yekova, ani hinga pai ahi, ani mangisunge nyanyaki tipa ka sonosa agu asino si aidaha tipa ka bata ti regbo “bakere gberãngbi,” na ani nindu kumbatayo na mangasunge fu Yekova na ngbarago, zavura ti regbo aˈasada vurũ.—Yugo. 7:9, 13, 14; Yak. 1:2-4.

Ani rengbe kadu na kido nga Mbori nika fu mosoro afu tipa gaani hipai, mbiko ko ima ino gaani sunge gbiati gu nyemuse du ani na ni tipa rimoko. Ka ani amangasunge ti aregbo dunduko fu Yekova na ngbarago, ani nika du wakina gu bake papara Atambuahe nangia Davide naaya: “Mi namaa Yekova ku mbata yo a fere dedede; bambiko ko du ku kumbabere, mi awõ nga te. Si du kpotore yo nangi ti ni, mbisimore ki du pusiapusia; borore ki niraki zezeredi.”—Tam. 16:8, 9.