1. Gini bete amaku ani agbiaha mbiko pa du ani ni papara ga Yekova riigbu?

 SI NIPA maku furani kadu ni papara ga Yekova riigbu ti gi kere kpakarakpakara yangara arame re. Raka rogo gi zegino re nada ni ba kpakarakpakaraha gbe, ono tie, Yekova ima fu awirinarani furani nga aguyo rengbe ka undo rani. (Tam. 133:1) Ko naundo rani ani du dagba agu aborokporo du na ngbarago. (Ef. 5:33–6:1) Ko nafu gu tatamana furani si aida na ni tipa ani du na diabese na kidu na ngbarago.

2. Ginipai si aida ani mangihe, na tipagine?

² Ono tie, si naida ani mangi ome amanga nyanyaki tipa kaa ndu kumbatayo kindi kaa iriso Yekova ni rururani. Tipagine? Bambiko rago ima rengba ka gberã tirani be gupai gu kura boro namangihe watadu napehe. Rago ima rengba ka gberã tirani a ho ani amanga ingahe ni, gbe ka si du nga ani ima manga gu ingahe re bara dunguhe. Si naida ani kpatagara kuti ngba ga Yekova sunge (1) ho wirinarani idipase naingipai ni kuti rani, (2) ho gaani badiarogatise naba gberãrago ni tirani, na (3) ho du ani ni na gberãrago be gu ingahe ani namangihe. Rogo gi kekeapai re, ani nika bi gupai rengbe ani ka wirikaha ti gu kpiapai nga ga aboro biata rogo Baibiri yo nga aguyo naadu ni ruruyo ho i agbiatiyo ni na apai wa gure.

MO NYE NI RURU RO HO WIRINAMO NAIMISI RO NI

3. Gini kpakarapai ga Yekova aboro agbiatiyo na ni?

³ Gu kpakarapai duho. Gu kura awirinarani aidipase kinaho na agu asino tiyo nga gu naba gberãrago tirani. Agu akurayo ima rengba ka manga gupai nga gu nika ba gberãrago tirani watadu ka imisa rani. Abaakumba ima rengba ka manga aingahe. Agi apai  re ima rengba ka sa kura boro i tona ka kapa singia ga Mbori riigbu du nzunzu. Kuba gupai nga kaa ndu kumbatayo kindi kaa iriso Mbori “ku bani sa” na awirinayo, i ima rengba ka mbu fugo kungba agu aboro ba gberãrago tiyo watadu ki mbu nduge tipa adunguratise. (Zef. 3:9) Ya mo si rengbe kadu ni patatamana? Oni bingo gupai rengbe ani ka wirikaha rogo Baibiri yo be gu boro nagbia ti ni na ngbatunga akpakarapai wa gure.

4. Gini akpakarapai gu mokedi nangia Pauro agbiatiko na ni?

⁴ Gu kpiapai nga ga Baibiri. Gu mokedi nangia Pauro aima ino gupai nga agu awirinako nangia aKristano angia kpakpa aboro. Ni kpiapai, bete aboro rogo gu dungurati nadu Yerusarema yo aidanga kuti gupai nga ko angia bawiriki te. (Amo. 9:26) Kusa, gu kura aboro aapeka gupai nadu ni gbegberẽhe tipa ko tipa ka sa gupai nga ka kura aboro kidongo kuti ko ya. (2 Kor. 10:10) Pauro abi bakumba nga gu ko namangi iraira diaberã nga gu si awiraha wa si aima kotosa kura aboro. (Gara. 2:11, 12) Na gu kura bakurea Pauro nangia Marako, aba bakere gberãrago tiko. (Amo. 15:37, 38) Pauro aima rengba ka mbu gipai re si sako ko tona ka zanga ka dia regbo na agu aboro naaba gberãrago tiko. Wa si avura duwo, Pauro aandu kindi kumbatayo kaa bi awirinako na nyanyakipa yo na kini irisi Yekova ni ruruko. Ginipai naundo Pauro ko naandu kindi kumbatayo kaa iriso Yekova?

5. Ginipai naundo Pauro ko nye mbembedi na awirinako? (AKorosaio 3:13, 14) (Oni bi sura a.)

⁵ Pauro aima kpinyemu awirinako. Gu nyemuse Pauro adu na ni koyo du kura aboro ni aundo ko tipa ka ko moingo berãko kina kuti gayo aingahe ya, ono kuti wene asino yo. Nyemuse aundo Pauro a ko mbupai fu kura aboro, na gere nga gupai ko apehe furani ani mangihe nga gu du ni kekehe rogo AKorosaio 3:13, 14. (Oni gedihe.) Oni bingo wai Pauro amangipai na Marako. Wa si avura du nga Marako ambu Pauro ti gu gayo bambata nunguro nangia ga amokedi, Pauro anyenga kindi na gberãrago te. Kusa, ho Pauro ake waraga ni ni nyemuse fu gu dungurati naadu Korosai yo, ko atambua Marako, na ko abi gu gako badiasunge re na nyanyakipa ko, ni gu boro “nangarãsi” ko. (Koro. 4:10, 11) Ho Pauro adu ni bambukiso yo Roma yo, ko asanahe nga Marako ye ka undo ko. (2 Tim. 4:11) Si tie ziazia nga, Pauro ambupai fu awirinako na ki nye mbembedi na yo. Ginipai rengbe ani ka wirikaha be Pauro?

6-7. Ginipai rengbe ka undo rani ani naandu kindi kumbatayo kaa kpinyemu awirinarani gayo azangarengba ki vura du vurũ? (1 Yoane 4:7)

⁶ Gupai ani awirikaha. Yekova naida gupai berani nga ani naandu kindi kumbatayo kaa yugo  nyemuse fu awirinarani. (Oni gedi 1 Yoane 4:7.) Ho wirinarani amanga furani ni ngba gu gene si aidanga Kristano mangipai ngbaha ya, si naida ani du na gu kido nga ni naaidanga ka ba gberãrago tirani te, ni naˈasada ka manga gupai Yekova aya si du niruru he. (Snz. 12:18) Mbori ima kpinyemu gako amoyambu wa vura duhe nga i namanga aingahe amanga. Wa vura duhe nga ani namanga aingahe amanga, ko nandu kindi kumbatayo kaa du ni bakurearani na ko azinganga na ani te. (Tam. 103:9) Ani na bakere tambuahe nga Yekova nambupai furani na si naida ani wiriki ko a nimbupai fu kura aboro!​—Ef. 4:32–5:1.

⁷ Oni tingidi gupai a nga, wa digido gi zegino re ambeda, si naida ani nye mbembedi na awirinarani. Ani ima rengba kadu na gu maabangirise nga arungosiro nikaa kio kina kumbatayo. I ima rengba ka zio rani ku bambukiso yo tipa gaani idapase. Ka pai wa gure mangi, ani nika ida na awirinarani susi gu nidu mbata. (Snz. 17:17) Oni bingo gupai namangi tipa bakumba du rimoko nga Josep, a du Sepania yo. I aba yo na kura awirina ku bambukiso yo tipa zanga rimiso yo tiyo kurogo agu apai nga ga birĩ-zogarago. Ko aya: “Bambukiso yo, ani aaraka dunduko rogo bangisa ba sa na ti kura aregbo, ani animangi gupai nga gu naani ba gberãrago ti kura boro. Si aaida ani hipai fu akuarani na kini mbupai fuyo. Gipai re aundo rani ani du ni kodikodi rani na ni bandabanda rani. Ani adu bambukiso yo na agu aboro nangianga airisi Yekova ya. Ti kura regbo, bere awo na i ki voho nahe, gene adunga wa ka mi mangipai ni tire te. Ono kura wirina sa aazunda gimi aroko na kini ngerefuo re ngba dungu agene. Mi aima bi gu ndikidi nyemuse mi aaida na ni bakere gbe.” Gere nga gu wene ndupai tipa ka nyasariipa gu kpakarapai kadu dagbarani na wirinarani awere!

ONI NAANDU KINDI KUMBATAYO KAA IRISO YEKOVA HO GAONI BADIAROGATISE ABA GBERÃRAGO NI TIRONI

8. Gini kpakarapai arogotise naagbiatiyo na ni?

⁸ Gu kpakarapai duho. Arogatise dunduko du na akpakarapai. Baibiri ima pe gupai ziazia nga agu aboro mangi rogatise “pai afúda boroyo afuda.” (1 Kor. 7:28) Tipagine? Bambiko rogatise naye na kpakpa aboro ue kurogo bangisa ba sa, nga aguyo du na asinoyo ni bakiakia na agu apai i aida na ni ni bakiakia na agu i aidanga na ni ya. Abadiarogatise ima rengba ka ye rogo gu ngbatunga du kia watadu apai tipa yo ni bakiakia. Tingbafuo bete regbo, i ima rengba ka bi agu asino nga gu i aabingo ho ti gu regbo i mbakadapa rogotise ya. Na agi apai re ima rengba ka ye na kpakarapai. I ima rengba ka bira gayo badiarogatise si ki vura du vurũ nga i dunduko namanga aingahe nga gu si aida i mangipai tipa ka nyasa riipaha. I ima rengba ka tona kaa berã gupai nga si naida i kparaka watadu i mbutiyo. Ono ya mo i ima rengba kadu na ngbarago ka si du nga i kparaka watadu i mbutiyo? b Ani wirikinga pai rogo Baibiri yo be gu dee nga gu ri nanye niruru ri fu Yekova si ki vura du vurũ nga kumbari asa raka furi si du ni kpakarakpakaraha.

9. Gini kpakarapai Abigaira agbia tiri na ni?

⁹ Gu kpiapai nga ga Baibiri. Abigaira adi Nabara nga gu ko Baibiri aya tiko ko adu na gbigbita sino na ni gbegberẽ boro rogo gako mangapai yo. (1 Sam. 25:3) Si aima du tigaha ni kpakarakpakaraha fu Abigaira ka raka na ngbatunga kumba wa gu ko re. Ya mo Abigaira adu na momu beri ka digiso gu rogatise re? Ii. Ri aima gbia ngbatunga gu momu re ti gu regbo Davide nga guko si adu nga ko nika du ni bakindo aYisaraere kumbatayo aye ka imo kumbari tipa senga ko ko  na gako akumba. (1 Sam. 25:9-13) Abigaira aima rengba ka zubo na ki mbu Davide ko imi Nabara. Ri aamanganga ha wo te, kuba gure, ri anye na ki undo Davide ka ko imingo Nabara ya. (1 Sam. 25:23-27) Tipagine ri amangi gipai re ti ni?

10. Tipagine Abigaira anye ti ni rogo gu rogatise naadu ni kpakarakpakaraha?

¹⁰ Abigaira aima kpinyemu Yekova na ri aima du na irisa tipa ga Mbori mbakadapai nga ga rogatise. Si nangera wa ka i ya ri aima ino gupai Mbori apehe ho Ko afu Eva ni fu Adamu ni diako. (Bam. P. 2:24) Abigaira aima ino ga Yekova bipai tipa rogatise nga si ni ziaziaha. Ri aida ka manga gupai nika sa ngbarago ti Mbori, na gere du nga gupai nasa ri ri mangi ai gupai ome ri arengbe na ni ka banda gari aborokporo kodihe na kumbari. Ri amangipai ni kina boro ipo ka sa Davide ka ko imingo Nabara ya. Ri adu a regerege ka hõmbupai tipa gu ingahe ri amanganga ha ya. Si tie ziazia nga, Yekova aima kpinyemu gi dee nga gi ri naadu ngangarã na naaberãnga kina patiri re ya. Ginipai rengbe dereakumba na kumbakuadee ka wirikaha ti gu kpiapai nga ga Abigaira?

11. (a) Ginipai Yekova aidaha be arogotise? (AEfeso 5:33) (b) Ginipai mo awirikaha ti gu gene Carmen amangipai ngbaha ka banda gari rogatise? (Oni bi sura a.)

¹¹ Gupai ani awirikaha. Yekova naida gupai nga kumbakuadee na dereakumba nye kina sa ka si vura du vurũ nga si ima kpakara tipa ka raka na gayo badiarogatise. Nairiwo gu ngbarago du Mbori na ni ho ko abi arogotise ni i nimangi ome tipa ka nyasariipa gu kpakarapai nga ga rogatise kini yugu nyemuse na irisa dagbayo. (Oni gedi AEfeso 5:33.) Oni bingo gu kpiapai nga ga Carmen. Agarã sita tingbafuo Carmen mangi rogatise, ri atona ka wirika Baibiri na aDezire Yekova na kusa ri ki zi bapatiza. Carmen aya: “Rago angbanga ti kumbami na gimi diaberã te. Ngbaduko atona ka ima kuti Yekova. Ko anaasenga re na kini serekpohe tipa ka mbu re.” Wa si avura duwo, Carmen ahipai kindi rogo gari rogatise. Tipa agarã 50, ri amangi ome tipa kaa kpinyemu kumbari na kini irisi ko. Ri aya: “Wa agarã asusa, mi arugutire na wai kumbami adu na mi kini fura fuko ngba wene gene. Pa ino mi gupai nga rogatise ni ziaziaha bangiri Yekova, si asa re mi mangi agu apai dunduko omere arengbe na ni tipa ka bandaha. Mi aˈasadanga ka mbu kumbami te, mbiko mi aima kpinyemu Yekova.” c Ka si du nga akpakarapai kuru rogo gamo rogatise, mo ima rengba kadu na gu kido nga Yekova nika undo ro aundo mo du na hipai.

KA MO MBUNGA IRISO YEKOVA HO MO ABI TIRO NI NGA MO MANGI INGAPAI YA

12. Gini kpakarapai rengbe ani ka gbiatirani na ni ka si du nga ani mangi kere ingapai?

¹² Gu kpakarapai duho. Ani ima rengba kadu na bakere gberãrago ka si du nga ani mangi kere  ingapai. Baibiri nape gupai nga gaani aingapai ima rengba ka sa rani ani “naima be” he. (Tam. 51:17) Wirina du rimoko nga Robert amangisunge nyanyaki tipa ka rẽ kada ni moundo abaakumba. Ono tie, ko amangi kere ingapai na si asako ko bi tiko nga ko ima ba gberãrago ti Yekova. Ko aya: “Ho mi aini gupai ni mi amangihe, sangbakpotoreyo aambusa re nikerehe. Kusa, rago agbere tire nikerehe. Mi akpari ni aume na ki mangi kparakpee fu Yekova. Mi natingida wai atingida mi aberẽ gupai nga Mbori aadunga na nyemu ka gia gupai mi aapehe te. Tipagine ko narengbe ka degatuko ti ni fere? Mi aima ba gberãrago tiko.” Ka ani mangi kere ingapai, ani ima rengba kadu rogo bakere gberãrago, na ki tona ka berã gupai nga Yekova ima mbu rani, sidu, ndupai ho berewe tipa ka iriso ko te. (Tam. 38:4) Ka si du nga mo nabi tiro wa gure, mo berẽnga kuriipa gu boro du pani rogo Baibiri yo nakpatagara kuti iriso Yekova si ki vura du vurũ nga ni aima manga kere ingapai.

13. Gini kere ingapai Petero amangihe, na mbata fu gure, gini kura aingahe ko amangihe?

¹³ Gu kpiapai nga ga Baibiri. Gu yuru naadu mbata fu i imi Yesu, gu mokedi nangia Petero amangi dungu aingahe na mbiko gipai re ko amangi kere ingapai. Ni bambatapai, Petero adu na bakere kido kuti tiko, kini ta ngbaduko nga ko nika nye ni ruruko ka gu kura amokedi vura mbu Yesu vurũ. (Mk. 14:27-29) Fuo gure, ho Petero adu ni ati Getesemane yo, ko arara kindi zanga kaa ngera. (Mk. 14:32, 37-41) Na ho rimbasa aboro aye ni na abaso na asape ka zio Yesu, Petero azubo ki mbu Yesu. (Mk. 14:50) Ni yangaraha, Petero aoro rimo Yesu bara biata, na zavura ki zungahe tipa gi ziree ko apehe re. (Mk. 14:66-71) Waigu Petero amangipai ho ko aini gupai ni nga ko mangi kere ingapai? Ko akpari nikerehe na si nawiraha wa ka i ya ko aima du na bakere gberãrago. (Mk. 14:72) Oni berẽnga pa gu gberãrago Petero adu na ni tingbafuo bete asa kusa ho i aimi bakureako ni nangia Yesu. Petero aima bi tiko tigaha nga sunge tiko te!

14. Ginipai naundo Petero ko kpatagara kutingba iriso Yekova? (Oni bi gu duti kpotoho.)

¹⁴ Petero adu na rengba ka kpatagara kuti iriso Yekova tipa dungu nduapai. Ko aakparanga tiko kusayo ti kura aboro te; ko andu fuo kura abawiriki na i ki fu wasa fuko. (Rk. 24:33) Na tingbafuo zinga Yesu be kpio, ko akuru fuo Petero na si nangera wa ko aaida ka fu wasa fuko. (Rk. 24:34; 1 Kor. 15:5) Kusa, kuba gupai nga Yesu fu zahe fu Petero tipa gako aingahe, Yesu ape gupai fu gi bakureako re nga i nika fu kura atindiro fuko. (Yo. 21:15-17) Petero aima ino gupai nga ko ima manga kere ingapai, ono ko andu kindi kumbatayo kaa asada ka manga gupai du  ni ruruhe. Tipagine? Bambiko ko aima ino gupai nga Yesu aakpinyemuko kindi. Na agu awirina Petero nga ga toro yo aandu kindi kumbatayo kaa songoda ko. Ginipai rengbe ani ka wirikaha ti ga Petero kpiapai?

15. Ginipai Yekova aida ani du na kido tipaha? (Atambuahe 86:5; ARomo 8:38, 39) (Oni bi sura a.)

¹⁵ Gupai ani awirikaha. Yekova naida ani ini gupai nga ko ima kpinyemu rani na ko regerege ka mbupai furani. (Oni gedi Atambuahe 86:5; ARomo 8:38, 39.) Ho ani amanga ingapai ni, ani nadu na gberãrago. Gbegberẽpai ho duti gipai re te. Ono tie, si aidanga ani berẽ gupai nga Yekova akpinga nyemu rani te watadu ka ko mbunga pai furani te te. Kuba gure, si naida ani gbata undo nibasa. Robert, i nifura tipa ko mbata kusayo ape gupai nga: “Mi amangi ingapai bambiko mi aakido kuti gimi ome ka sovura kuti asada.” Ko aye ka ino gupai nga si aaida ko fura na abaakumba. Ko aya: “Ho mi afura ni na abaakumba, i aundo re mi bi gupai nga Yekova ima kpinyemure na mi abi tire nga abaakumba ima kpinyemure. Na i aundo re a mi idi kuti gupai nga Yekova ambunga re te.” Ani ima rengba a ka du na gu kido nga Yekova ima kpinyemu rani ni bakerehe na ko nambupai furani ka ani sa berãrani ti gaani aingapai na ki gbata gu undo si aida na ni, na kini mangi ome ka zanga manga agu aingahe re berewe. (1 Yo. 1:8, 9) Ka ani du na gu kido nga Yekova ima kpinyemu rani na ko na nyemu ka mbupai furani, ani ambunga irisoko tingbafuo ani mangi ingahe te.

16. Tipagine mo nadiberã ti ni tipa kaa ndu kumbatayo kindi kaa iriso Yekova?

¹⁶ Yekova nabi gu ome ani amangaha na nyanyakipaha kaa irisoko rogo gi kpakarakpakara yangara arame re. Mbiko ga Yekova undo, ani ima rengba kaa irisoko ni rururani kindi ho du ani ni na gberãrago tipa gaani aingahe watadu agu aingahe nga ga kura aboro. Ani ima rengba kaa ndu kumbatayo kindi kaa kpinyemu awirinarani zavura ho i naimisi rani ni. Ani ima rengba ka yugo gaani dudunguro nyemuse fu Mbori na irisa tipa gako mbakadapai nga ga rogatise ni manga ani gupai rengbe ani ka mangaha tipa ka nyasariipa gu kpakarapai ka kuru rogo gaani rogatise yo. Na ka ani mangi ingapai, ani ima rengba ka gbata ga Yekova undo na ki gbia gako nyemuse na mbupai, na kini ndu kumbatayo kindi kaa irisoko. Ani ima rengba kadu na gu kido nga ani nika gbia bakere amaku ka ani ‘ambú nga be manga rurupai ya.’​—Gara. 6:9.