1. Ginipai kura bete ruru airisi Yekova naima rengba kaa bakabangiriyo na ni?

 NAIRIWO wai duhe nipa ngarasaro ka ino gupai nga Yekova na ngbarago na gako aboro wadu yo ni badona! Baibiri naya: “Rago nangba ti Yekova tipa gako aboro.” (Tam. 149:4) Ono ti kura aregbo, gu kura aboro natona kadu na bakere gberãrago na ki tona kaa bakabangiriyo nga, ‘Ya mo Yekova nzunzu na ngbarago na mi?’ Dungu kura ruru airisi Yekova kinaho du payo rogo Baibiri yo naasota asota na ngbatunga agu aberã re ti kura aregbo.​—1 Sam. 1:6-10; Eyo. 29:2, 4; Tam. 51:11.

2. Ada nasa ngbarago ti Yekova?

² Baibiri nayugo gupai ayugo ziazia nga kpakpa aboro ima rengba ka sa ngbarago ti Yekova. Ngba gini gene? Ani du wa ka ani du na idapase kuti Yesu Kristo na ki zi bapatiza. (Yo. 3:16) Rogo gi gene re, ani nayugoho gbaiga nga ani ima sa berãrani ti gaani aingapai na ki mangi kidohe fu Mbori ka manga gupai ko akpinyemuhe. (Amo. 2:38; 3:19) Yekova na ngbarago ho ani amanga agi adiandue re ni ka sonosa gaani pagume na ko. Ka ani aandu kindi kumbatayo kaa raka ringbisihe kuti gu kidohe nga ga kparatise ani amangihe, rago nangba ti Yekova na ani na ko kini bi rani nga ani nga mbembedi abakureako.​—Tam. 25:14.

3. Ginipai ani nika sakapai awere tipaha?

³ Tipagine tie kura aboro abihe tini ti kura aregbo nga rago angbanga ti Yekova na yo te? Waigu Yekova ayugoho nga ko na ngbarago na ani? Na waigu rengbe Kristano ka nyakasa gu gani kido nga Yekova na ngbarago na ni?

NDU GUPAI RENGBE KURA ABORO KAA BIHE TI NI NGA YEKOVA NA NGBARAGO NA YO TE

4-5. Ka ani vura kaa bi tirani nga sunge tirani te, ginipai rengbe ani kadu na kido tipaha?

⁴ Naatona kina tigu regbo ani adu ni agude, dungu rani naima sota na gu bipai nga nyakingo parani te. (Tam. 88:15) Wirina du  rimoko nga Adrián aya: “Mi naabi tire ti aregbo dũ nga sunge tire te. Ho mi adu ni ni gude, mi natingida gupai nga mi amangi kparakpee nga gimi aborokporo rakinga araka rogo paradizo wa vura duhe vurũ nga mi aabihe nga mi arẽnga ka raka yo te.” Tony, nga gu ko naasona nga rogo gu kporo nga ga aKristano ya aya: “Avungure aagumbanga gupai fere nga i kpinyemu re watadu i na ngbarago na mi te. Gipai re asa re mi naabihe nga he ho ka mi mangihe ka sa ngbarago tiyo te.”

⁵ Ka si dunga ti kura aregbo ani nasota asota na gu bipai nga sunge tirani te, ani ima rengba ka tingida gupai nga Yekova nitiko nagbe rani koyo du ko ni. (Yo. 6:44) Ko nabi gu wene asino du rogo rani yo nga gu ani arengbanga ka bihe nitirani ya na ko ima ino kpotorani yo wenengai. (1 Sam. 16:7; 2 Peka 6:30) Sidu, ani ima rengba kadu na kido kutiko ho ko aya ni furani ani na nyanyakipa rani.​—1 Yo. 3:19, 20.

6. Gini bipai gu mokedi nangia Pauro adu na ni tipa agu aingapai ko amangihe kusayo?

⁶ Mbata fu ani wiriki rengo, dungu rani kinaho naima manga agu apai ani abira tirani kindi ti ni. (1 Pet. 4:3) Zavura agu aKristano naima iriso Yekova tipa dungu aregbo ima rengba kaa sota kindi na gayo arungbura. Ya mo kpotoroyo nakita ngbanga ro? Kangia wo duhe, mo gbia wasa mbiko ino mo gupai nga ga Yekova ruru amoyambu nasota asota na kina ngbatunga agu abipai re. Ni kpiapai, rago aima gberã ti gu mokedi nangia Pauro ho ko aaberã ni kurii gako azangarengba. (Rom. 7:24) Rengo ngaha nga, Pauro aima sa berãko ti gako aingapai na ki zi bapatiza. Wa si avura duwo, ko aafura kindi tipa tiko nga “mi nga gu umba ni dagba amokedi yo dunduko” na “mi nga barumbatayo” dagba aboro ingapai yo.​—1 Kor. 15:9; 1 Tim. 1:15.

7. Ginipai si aida ani tingidihe nibipa agu aingapai ani amangihe kusayo?

⁷ Gu Barani du ngbangbaturũ yo ima kidohe tipa ka mbupai furani ti gaani aingapai ka ani mangi saberã. (Tam. 86:5) Ka rago gberã tirani nzunzu tipa agu aingapai ani namangihe, ani ima rengba ka ida kuti gupai Yekova apehe nga ko ima mbupai furani.​—Koro. 2:13.

8-9. Waigu rengbe ani ka diabe gu bipai nga ani arengbanga ka manga bakere apai ka sa ngbarago ti Yekova te?

⁸ Ani dunduko naida ka manga ai gupai rengbe omerani na ni tipa ka iriso Yekova. Ono tie, gu kura aboro nabihe nga ka i mangingo bakere apai tipa ka sa ngbarago tiko te. Wirina du rimori nga Amanda aya: “Mi anaaberã gupai nga fu guhe fu Yekova ngba gbe nga mi mangi bakere apai kisusi. Mi anaˈasada dedede ka manga agu apai adunga mi na rengba ka mangaha ya. ‘Ho mi anaadunga ni na rengba ka manga agu apai du mi na nyemuhe ya,’ mi aabihe nga rago nagberã ti Yekova na mi kina wai rago agbera tire.”

⁹ Waigu rengbe ani ka diabe gu bipai nga ga, ani arengbanga ka manga ome ni bakerehe tipa ka sa ngbarago ti Yekova te? Mo tingidi gupai nga Yekova aidanga kina bakere apai berani te. Ko aidanga ani mangi bakere apai nga gu naima fu rii omerani te. Ko na tambuahe tipa ai gupai ani amangaha fuko ho duhe ni nga ani namanga gupai ngba gbe. Kurii gure, oni berẽkurii agu akpiapai nga ga Baibiri du tipa agu aboro nairisi Yekova na kpotoyo yo dũ. Oni berẽnga pa Pauro. Ko afutiko zaaza tipa dungu agarã, kini ndu nunguro tipa akutu amairo kini kusi dungu vovo adungurati. Ono tie, ho apai aˈariatihe ni rogo gako raka yo ka ko adunga berewe na rengba ka tungusapai wa gu ko aakpinyemuhe ya, ya mo gure aayugo gupai nga rago aangbanga ti Yekova na ko te? Oó. Ko aandu kindi kumbatayo kaa manga gupai ome ko arengbe na ni na Yekova aima fu maku fuko. (Amo. 28:30, 31) Wakina gure a, ti kura aregbo, ani ima rengba ka fu ahe fu Yekova ni bakiakia. Ono gupai du na nyanyakipaha fuko nga gu ndupai ani airisoko ti ni. Ani  wisigingo gu bete agene awere Yekova ayugoho ngbaha nga ko na ngbarago na ani.

WAIGU YEKOVA AYUGOHO NGA KO NA NGBARAGO NA ANI?

10. Waigu rengbe ani ka “gia” Yekova ko ni pe gupai furani nga ko na ngbarago na ani? (Yoane 16:27)

¹⁰ Ko fu Baibiri furani. Yekova nangera tipa agene ka yugoho ngbaha fu gako aboro nga ko ima kpinyemuyo na ko na ngbarago na yo. Ziazia Kekeapai fura tipa aregbo ue nga gu Yekova agumba gupai fu Yesu ti ni nga ko nga gu Wiriko ko nakpinyemuko gbe na ko ima ngba tiko. (Mt. 3:17; 17:5) Ya mo mo nakpinyemu Yekova gumba gupai foro nga ko na ngbarago na mo? Yekova afuranga areme furani ngbangbaturũ yo te, ono ko nafura furani rogo Fugoko yo nga Baibiri. Ani ima rengba ka gia agu afugo nga gu nayugoho nga Yekova na ngbarago na ani ho ani ageda agu afugo Yesu ni du rogo Akitabu Wene Pangbanga. (Oni gedi Yoane 16:27.) Yesu awiriki asino Bako teketeke. Sidu, ho ani ageda gupai ni nga Yesu aya ko na ngbarago na gu ruru apefuoko nangia aboro zangarengba, ani ima rengba ka maa gupai ku berãrani yo nga Yekova nape kina gu bangisa afugo re furani a.​—Yo. 15:9, 15.

11. Tipagine pa gbia ani tirani na akpakarapai ayugongo gupai ti ni nga Yekova aidanga na ani berewe ya te te? (Yakoba 1:12)

¹¹ Ko nafu agu ahe furani ani aidaha. Yekova na bakere nyemu ka undo rani nifu ko agu aũborose furani ani zingo tipaha. Ono ti kura aregbo, Yekova ima rengba ka mbu gene gbegberẽ apai mangi rani a wa si adu tipa gu ruru kumba nangia Eyobo. (Eyo. 1:8-11) Aasada ayugongo gupai nga Mbori aidanga na ani berewe te te. Kuba gure, si nafu momu furani ani yugu bakio gaani nyemuse tipa Mbori na wai ani nakido kuti ko. (Oni gedi Yakoba 1:12.) Na ti regbo gaani aasada, ani nika bi bakio wai ko nakpinyemu rani wa ko nikaa undo rani ani hipai.

12. Ginipai rengbe ani ka wirikaha ti gu kpiapai nga ga Dmitrii?

¹² Oni berẽnga kurii gupai namangi wirina du Asia yo du rimoko nga Dmitrii. Ko azanga gako sunge na ka ko agbianga sunge ya tipa dungu adiwi. Sidu, ko adiberã ka yugo gako kido kuti Yekova ni kiiso ko gako sunge tungusapai. Dungu adiwi atona ka susa ka ko agbianga sunge ya. Fuoho, kere kaza aziko ka gene adunga wa ka ko guari rii ba ya. Ko atona ka berã gupai nga ko berewe nga wene kumbakudee watadu baagude te, na ko kini tona ka bakabangiriko singia rago gberẽ agberã ti Yekova na ko. Rogo  kura nyemu sa, wiriko ni degude ake agu afugo ti kpewaraga du rogo Yesaya 30:15 nga gu naya: “Rogo du zezeredi na du zukazuka si oni ka du ti ni na ome.” Ri aye na ni kupati gako ba kaza ki ya, “Buba ho rago agberã ni tiro, mo berẽpa gi veresi re.” Mbiko ga Yekova undo, Dmitrii aye ka ino gupai nga gako aborokporo adu kindi na riahe beyo rengbe arengba, aroko, gbiati gu ba ka i araka rogoho. Ko aya: “Gupai si aaida mi mangihe angia kadu zezeredi na kini ndu kindi kumbatayo kaa kido kuti gimi Mbori.” Ka mo aagbia tiro na kina gu ngbatunga asada re, mo ima rengba kadu na gu kido nga Yekova nika ngera angera fuo ro na kini undo ro mo hipai.

13. Ada rengbe Yekova ka mangasunge na yo ka yugoho furani nga ko ima kpinyemu rani na rogo gini gene?

¹³ Ko nafu awirina furani. Yekova namangasunge na awirinarani tipa ka yugoho furani nga ko na ngbarago na ani. Ni kpiapai, ko ima rengba ka mangasunge na gu kura aboro i pe afugo ngarasaro furani tigu regbo ani aida na ni. Gipai re amangi fu kura wirina ni dee du Asia yo tigu regbo ri adu rogo bakere gberãrago. Ri azanga gari sunge na ri ki ti na kere kaza. Fuoho, kumbari amangi kere ingapai na i ki zogo ko ti sunge abaakumba. Ri aya: “Mi aainongo ndu gupai agi apai re aamanga ti ni te isoke mi ima manga gupai du ni gbegberẽhe na rago angbanga ti Yekova berewe na mi te.” Gu wirina re azungodi Yekova ko fu gu kido furi nga ko na ngbarago kindi na ri. Waigu Yekova amangi gipai re? Ri aya, “Abaakumba rogo dungurati afura na mi na ki fu gu kido fere nga Yekova ima kpinyemu re.” Kusa, ri asana Yekova berewe tipa ko undo ri. Ri aya, “Rogo kina gu bangisa uru re, mi agbia awaraga nga gu naye be badona nga ga awirina rogo dungurati, ho mi aageda gayo afugo wasa ni, mi abihe nga Yekova ima gia gimi kparakpee.” Nirengo, Yekova dedede nayugoho nga ko na ngbarago na ani vurube gu wene afugo nga ga kura aboro.​—Tam. 10:17.

14. Gini kura gene Yekova ayugoho ngbaha nga ko na ngbarago na ani?

 ¹⁴ Yekova nayugoho a nga ko na ngbarago na ani ni mangako sunge na akuarani aidipase i fu rugute furani ho ani aidaha ni. Ni kpiapai, rogo bambata sa kama agarã, Yekova amangisunge na gu mokedi nangia Pauro ko ke awaraga 14 nga gu ga Mbori toro adu kugiipa kehe fu akurako aidipase. Rogo agu awaraga yo re, Pauro afu nyanyaki arugute fu awirinako ono ngba wene gene. Tipagine Yekova arugu Pauro ti ni ko rimisi agu arugute re ku rogo Baibiri yo? Yekova nga wene Baagude, na ko naruga agu awiriko ‘ngba tiko.’ (Snz. 3:11, 12) Sidu, ho ani agbia agu arugute ni du mburuhe rii Baibiri, si naida ani bihe ni gu gopai nayugoho nga Yekova ima ida na ani angianga kaa bihe nga ko aidanga na ani ya te te. (Eb. 12:6) Gini kuraapai duho nayugoho nga Yekova na ngbarago na ani?

GU KURA AGOPAI NAYUGOHO NGA YEKOVA NA NGBARAGO NA ANI

15. Ada Yekova afu gako ziazia toro fuyo na tipagine rengbe ani kadu ti ni na kido tipa gipai re?

¹⁵ Yekova nafu gako ziazia toro fu agu aboro du ko na ngbarago na yo. (Mt. 12:18) Ani rengbe ka sana tirani nga, ‘Ya mo mi nayugo bete agu asino nga gu ga Mbori ziazia toro akusaha rogo gimi raka yo?’ Ya mo mo bingo gupai nga mo na bakere zerangbaduse awere kisusi wai mo adu na ni mbata fu mo ye ka ino Yekova? Nirengo, ka mo aandu kindi kumbatayo kaa sonosa agu asino nga gu ga Mbori ziazia toro akusaha, mo nika du na gu kido nga Yekova na ngbarago na mo!​—Oni bi gu sanduki nga, “ Zuzu Ziazia Toro Nga . . .”

16. Ada Yekova amangasunge na yo i tungusi wene pangbanga na gipai re nasa ro mo du wai? (1 ATesaroniko 2:4)

¹⁶ Yekova na ngbarago ka fu gu sunge nga ga tungusa wene pangbanga fu agu aboro du ko na ngbarago na yo. (Oni gedi 1 ATesaroniko 2:4.) Oni bingo wai wirina du rimori nga Jocelyn agbia undo ti tungusa ri wene pangbanga fu kura aboro. Rogo kura uru sa, Jocelyn azingi rame yo kidu na bakere gberãrago. Ri aya, “Mi aabitire nga ome tire te na ka sunge adunga tire ya. Ono mi aamangasunge anazakigene na gure nangia gimi uru tungusapai. Sidu, mi amangi kparakpee na ki ndu ku gene tungusapai yo.” Rogo gu wiso re, Jocelyn agbia Mary nga gu wene sino dee naidi ka wirika Baibiri. Fuo bete adiwi kusa, Mary agumba gupai nga ri aima digo ni kpari fu Mbori tipa undo tigu regbo Jocelyn  aye ka ngoka gari ngbadimo. Ho Jocelyn aberẽ ni kurii gi kpiapai re, ri aya, “Mi aabihe wa ka i ya Yekova naya fere wẽ ‘Mi na ngbarago na mo.’” Rengo ngaha nga, anga aboro dunduko nika mangapai ngba wene gene kuti gaani sunge tungusapai te. Ono ani ima rengba ka du na gu kido nga Yekova na ngbarago na ani ho ani amanga ome ni wa rengbe omerani na ni ka tungusa wene pangbanga fu kura aboro.

17. Ginipai mo nawirikihe be Vicky nibipa motumo tumorii? (Atambuahe 5:12)

¹⁷ Yekova nasa gupai nga motumo tumorii du na nyanyakipaha fu agu aboro du ko na ngbarago na yo. (1 Tim. 2:5, 6) Ono na ka si du nga kpotoraniyo naká gupai kindi nga Yekova ima ida na ani si ki vura du vurũ nga ani na idapase kuti motumo tumorii na ani ki ima zio bapatiza? Oni tingidi gupai nga, ani arengbanga ka kido kuti gaani bipai ti aregbo dunduko te, ono ani ima rengba ka kido kuti Yekova. Ko nabi agu aboro du na idapase kuti motumo tumorii nga i nga ruru aboro bangiriko na ko ima kidohe ka fu maku fuyo. (Oni gedi Atambuahe 5:12; Rom. 3:26) Pa berãkuriipa motumo tumorii aundo Vicky. Rogo kura uru sa tingbafuo ri berẽ dudunguro kuriipa motumo tumorii, ri ape gupai nga: “Yekova aima digo ni yugu zerangbaduse fere tipa gbanga regbo. . . . Wa vura duhe wo, si adu wa ka i ya, mi naya fu Yekova wẽ: ‘Mo arengbanga ka kpinyemu ngbatunga boro wa mi were te. Ga wiro motumo tumorii arengbanga ka dada gimi aingapai te.’” Ho ri aberẽ ni kuriipa gi gamahe nga motumo tumorii re, ri atona kaa bihe nga Yekova ima kpinyemu ri. Ani ima rengba a kaa bihe nga Yekova na ngbarago na ani na ko ima kpinyemu rani ka ani berẽkuriipa motumo tumorii.

18. Gini kido rengbe ani kadu na ni ka ani aandu kindi kumbatayo kaa kpinyemu gu Barani du ngbangbaturũ yo?

¹⁸ Wa vura duhe nga ani ima rengba ka manga ome nyanyaki ka mangapai kuti agu apai ani nawirikihe rogo gi kekeapai re, ani ima rengba ti kura aregbo kadu na gberãrago na kini bakibangirani singia Yekova na ngbarago na ani. Ka pai mangi wagu re, oni tingidi gupai nga ko na ngbarago na aguyo “nakpi nyemu ko.” (Yak. 1:12) Sidu, oni nindu kindi kumbatayo kaa mbeda na Yekova na kini bi agu agene ko ayugoho ngbaha nga ko na ngbarago na oni. Oni moi gupai ku berãroni yo ti aregbo dũ nga Yekova “aturã nga na ani wa sa te.”​—Amo. 17:27.