1-2. Ginipai si aida boro mangihe mbata fu ni zi bapatiza?

 VURU agu agarã yo bisue susi kusayo, aboro bange yo niima susa mirioni sa zi bapatiza na ki da ni aDezire Yekova. Badungu agi aboro re wakina gu bawiriki naadu rogo bambata sa kama agarã nangia Timoteo, i ayugu rengo fuko mbuko kindi “ni gude.” (2 Tim. 3:14, 15) Agu akurayo awiriki rengo tipa Yekova i kidu ni sosono aboro. Bete agarã kusayo, kura dee sa awiriki Baibiri na aDezire Yekova na ki zi bapatiza ri kidu na garã ri 97!

² Ka singia bawiriki Ziazia Kekeapai nga mo watadu avunguro nasonosa ro nga aDezire Yekova, ya mo mo naberãpa zio bapatiza? Si nga bawene sasa! Ono mbata fu mo zi bapatiza, si nika ida mo kparatiro fu Yekova. Gi kekeapai re nika sakapai tipa gupai si ayugoho ka kpara gamo raka fu Mbori. Si nika undo ro a mo bi ndu gupai si aidanga mo du ti ni na gunde ka kpara gamo raka fu Mbori na ki zi bapatiza ho mo nika du ni regerege ka mangaha wo ya.

GINIHE NGA KPARATISE?

3. Oni funga akpiapai rogo Baibiri yo nga ga agu aboro nakparatiyo fu Yekova.

³ Rogo Baibiri yo, gu boro nanaakpara ti ni fu Yekova, i anaakpara ni tipa kparakpara ndupai watadu kparakpara sunge. AYisaraere angia gu rikaaboro i akpara yo fu Yekova. Ono gu kura bete aboro adu kina dagba gu rikaaboro re naadu ni kparakpara yo fu Yekova ngba kparakpara gene. Ni kpiapai, Arona anaavo kaĩkaĩ rokori auru kpakpuko nangia saani ni dahabu naadu ni​—“kparakpara kpakpari ziazia.” Gu saani naadu ni dahabu re aayugo gupai nga i aima sia ko ko naamangasunge  fu Yekova ngba kparakpara gene​—nga kaa mangasunge ni ga aYisaraere gbiamotumo. (Pa Mot. 8:9) ANazara adu ni kparakpara yo fu Yekova a ngba kparakpara gene. Gu fugo nga “Nazara,” nga gu i adihe ti gu pa-Ebere nga nazirˈ, rogo yo nga “Kparakpara Ni,” watadu “Gu ni Kpara Gani Raka.” Si aaida aNazara naaraka kuti agu andiko i amoihe fuyo rogo ga Moize aNdiko yo.​—Geda 6:2-8.

4. (a) Ngba gini gene agu aboro nakparatiyo fu Yekova adu ni kparakparayo tipa kparakpara ndupai? (b) Ginipai pa “mbú” ani gaani pai ayugoho? (Oni bi sura a.)

⁴ Ho mo akpara tiro ni fu Yekova, mo nasia ka da ni ga Yesu Kristo bawiriki na ki moi manga gupai Mbori akpinyemuhe ni nyanyakipa pai kisusi rogo gamo raka yo. Ginipai pa kpara mo tiro akodaha? Yesu aya: “Gu ni ka akpi nyemu peka re, ni mbú gani apai.” (Mt. 16:24) Gu pa-Giriki i asaha nga “ni mbú gani apai” i ima rengba ka saha a nga “si naida ni ya oó fu ti ni.” Ni gu ga Yekova moyambu niima kpara ti ni fu Yekova, si nika ida mo ya oó tipa ai gupai natagbaga tihe na gupai ko akpinyemuhe. (2 Kor. 5:14, 15) Gure nakoda gupai nga ka ya oó fu “agu apai borose amanga,” ngbatunga agu apai du wa wasiwasi kodaba. (Gara. 5:19-21; 1 Kor. 6:18) Ya mo mangapai kuti agi arugute re rengbe ka sa gamo raka ni kpakarakpakaraha? Si asanga gamo raka si du ni kpakarakpakaraha te ka si du nga, mo ima kpinyemu Yekova na kidu na gu kido nga mangapai kuti gako andiko naye na wenepai foro. (Tam. 119:97; Yes. 48:17, 18) Wirina du rimoko nga Nicholas aya: “Mo ima rengba ka bi ga Yekova arugute wa gu ndugu nga ga bambukiso nga gu naká na mo ti manga mo gupai mo aida ka mangaha watadu ka bihe wa gu ndugu nga ga bahu nga gu nabanda ro be kerepai.”

5. (a) Waigu mo akpara tiro fu Yekova? (b) Gini kparakparapai du dagba kparatise na bapatiza? (Oni bi sura a.)

⁵ Waigu mo akpara gamo raka fu Yekova? Mo nakido ko rogo kparakpee yo nga mo nikaa iriso kina ko sa na mo nika maa manga gupai  ko akpinyemuhe ni bambatapai rogo gamo raka yo. Nirengo, mo nakido Yekova nga mo nikaa ndu kindi kumbatayo kaa kpinyemu ko na “kpotoro yo dunduko, na mbisimoro dũ, na ga berã dũ, na omero dũ.” (Mk. 12:30) Mo namanga gamo kparatise rogo gbuko yo, dagba kina ro na Yekova. Ono bapatiza tigaha kia, mo namangaha ku bangiri aboro; si nayugo gupai fu kura aboro nga mo ima kpara gamo raka fu Yekova. Gamo kparatise nga nyanyakipa kidohe, si naida gamo sasa du nga ka banda gu kidohe re na Yekova naida mo mangihe wo.​—Batu. 5:4, 5.

TIPAGINE SI AIDA MO KPARATIRO TI NI FU YEKOVA?

6. Gini apai nafõngbadu boro yo ni kpara tini fu Yekova?

⁶ Gu bangua ndupai mo akpara tiro ti ni fu Yekova nga mo ima kpinyemuko. Anga mburu gamo nyemuse rii bipai gbua te. Kuba gure, mburuhe dudunguro rii ndikidi ‘inahe’ tipa ko gbiati gako ringbisapai. (Koro. 1:9) Gamo wisigo Ziazia Kekeapai ima fu gu kido foro nga (1) Yekova nga ndikidi boro, (2) Baibiri nga Fugoko gako toro adu kugiihe, na (3) ko namangasunge na gako riigbu ka digiso gupai ko akpinyemuhe.

7. Ginipai si aida ani naamangaha mbata fu ani kpara gaani raka fu Mbori?

⁷ Si naida agu aboro nakpara gayo raka fu Yekova ini gu bangua ayugopai du rogo Fugo Mbori yo, na i naraka ringbisihe kuti gaha arugute. I namanga ome ka pe gupai i nawirikihe fu kura aboro. (Mt. 28:19, 20) Gayo nyemuse tipa Yekova ima sona, na gayo nyemupai nga ka iriso kina ko sa. Anga gipai re nga rengo tipa ro te? Ka singia mo ima kpinyemu Yekova na kpotoro yo dunduko, mo amanganga  kparatise na ki zi bapatiza tipa gupai nga ka sa gamo bayugu Baibiri watadu avunguro i du na ngbarago te, watadu mo amanganga ha mbiko gupai nga si nga gupai abakureamo dunduko amangaha te.

8. Waigu rengbe du na tambuahe ka undo ro mo mangi diaberã ka kparatiro fu Yekova? (Atambuahe 116:12-14)

⁸ Ho mo aberã ni kuriipa agu apai dunduko Yekova namangihe foro, mo nika du na bakere tambuahe fuko na mo kini idi ka kpara gamo raka fuko. (Oni gedi Atambuahe 116:12-14.) Baibiri naya tipa Yekova ko nga Bafu “wene gamahe dunduko, na ziazia ũgamahe dunduko.” (Yak. 1:17) Gu gamahe nyakipaha kisusi agamahe dunduko nga gu gamahe nga ga motumo tumorii nga ga Wiriko nga Yesu. Mo berẽnga kurii wai du gu gamahe re ni bawenehe kisusi! Motumo tumorii ima saha foro taata mo du na mbembedi pagume na Yekova. Na ko ima fu gu maabangirise foro nga ga raka nyeanye kindi. (1 Yo. 4:9, 10, 19) Pa kpara mo gamo raka fu Yekova nga gu bakerepa gene mo ayugo gupai ngbaha nga mo na bakere tambuahe tipa gu bakere mangaapai nga ga nyemuse re, kodihe na agu amaku dunduko Yekova nafuhe foro. (Pa Rug. 16:17; 2 Kor. 5:15) I fura tipa ngbatunga gu du na tambuahe re rogo wirikapai 46, memepai 4, rogo gu buku nga Mo Raki Nyeanye Kindi na Ngbarago! du na gu vidio rogoho du tipa aminiti biata du rihe nga, Fu Gamo Gamahe Fu Mbori.

YA MO MO REGEREGE TIPA KPARATISE NA BAPATIZA?

9. Tipagine si aidanga boro mangi kparatise ti ni mbiko kura aboro namangaha ya?

⁹ Mo ima rengba ka bihe nga mo ata danga regerege tipa kparatise na bapatiza te. Isoke mo naida ka manga aˈariapai kindi rogo gamo raka yo tipa ka pekafuo ga Yekova arugute watadu isoke mo naida na bakere regbo tipa ka nyakasa gamo idapase. (Koro. 2:6, 7) Anga abawiriki Baibiri dunduko namanga sonakumbatayo na kini kpinyemu Yekova kina sa te, na anga paranga aboro dunduko du regerege tipa ka kpara gayo raka fu Yekova na ki zi bapatiza ti kina bangisa garã te. Mo asadi ka rugatiro na pa gini aˈariapai si aida mo mangihe, angianga kaa ringbisa tiro na gu kura boro ya.​—Gara. 6:4, 5.

10. Ginipai rengbe mo ka mangaha ka mo da kuti gu digisopai nga mo ata dunga regerege tipa kparatise na zio bapatiza te? (Oni bi gu sanduki a nga “ Tipa Agu Aboro i Asonosa yo Rogo Rengo Yo.”)

¹⁰ Ka si vura du vurũ nga mo bihe nga mo regerege tipa ka kpara gamo raka fu Yekova te, mo naandu kindi kumbatayo kaa maaha ni gamo sasa. Mo sana Yekova ko undo ro mo mangi ai agu aˈariapai si aidaha rogo gamo raka yo. (Frp. 2:13; 3:16) Mo ima rengba kadu na gu kido nga, ko nika degatuko adega kuti gamo kparakpee na ki karagapai.​—1 Yo. 5:14.

NDU GUPAI DU KURA ABORO TI NI NA KAPA KA MANGA KPARATISE NA KI ZI BAPATIZA

11. Waigu Yekova nika undo rani ani nye ni rururani fuko?

¹¹ Gu kura aboro nga aguyo niima du regerege tipa ka manga kparatise fu Yekova na ki zi bapatiza nidu adu na kapa ka manga gipai re. I ima rengba ka bakabangiriyo nga, ‘Na ka si du nga tingbafuo ho mi nika manga kere ingapai na i ki kusi re kusayo rogo dungurati?’ Ka mo du na gu gunde re, mo du na gu kido nga Yekova nika fu ai guhe foro mo aida ha tipa mo ‘naata ata ki re are na gu pai ko akpi nyemu he.’ (Koro. 1:10) Ko nika fu ome afu foro a mo mangi gupai du ni ruruhe. Ko ima undo kura dungu aboro tipa i mangi gupai du ni ruruhe. (1 Kor. 10:13) Si nga ndupai sa i akusa kina bete aboro ti ni kusayo rogo gu dungurati nga ga aKristano. Yekova naundo gako aboro i nye ni ruruyo.

12. Waigu rengbe ani ka ne manga kere ingapai?

 ¹² Kpakpa aboro dunduko du ni asadiasadi yo ka manga agu apai du ni irairaha. (Yak. 1:14) Ono tie, si nika ida aida mo mangi siapai tipa gupai mo nika mangaha ho mo nika du ni ngba asada. Gu rengo pai duho nga, mo du du na ome kuriipa wai mo nika raka. Gu kura aboro nape gupai nga, ani arengbanga kadu na maapai kurii gaani bipai na gupai ani amangaha te. Ono gipai re nga ziree. Mo ima rengba ka wirika wai kadu du na zatise ti gamo iraira nyemuapai. Sidu, zavura ho gbia mo tiro ni na asada ka manga gbegberẽpai, mo ima rengba ka sia ka zanga mangaha. Gu kura apai kinaho a nika undo ro mo ne manga ingapai. Ni kpiapai, mo naamanga kparakpee fu Yekova na aˈuru dunduko. Mo naawisigo Fugo Mbori ti aregbo dunduko. Mo naandu tipa agu adunguratise nga ga aKristano. Mo pepa gamo idapase fu kura aboro. Ka mo aamanga agi apai re dedede, si nika fu ome foro mo nye niruru ro fu Yekova. Na ka bangiro gonga ti gupai nga Yekova nika undo ro aundo mo mangihe wo ya.​—Gara. 5:16.

13. Gini wene kpiapai Yosefa amoihe furani?

¹³ Si nika du taata gbe mo nye niruru ro fu Yekova ka si du nga mo nika manga diaberã mbu regbo koyo kindi tipa gupai mo nika mangaha ka mo gbiatiro na asada. Baibiri ima pepa dungu agu aboro furani namangipai wa gure, wa si avura du vurũ nga i angia kina kpakpa aboro a. Ni kpiapai, dia Potifaro anaasosoda Yosefa dedede. Ono ko aima ino gupai si aaida ko mangihe. Baibiri nape gupai furani nga, ko “aka,” na ki pe gupai nga: “Waĩ tie ka mi mangi gi bakere gbigbitapai re, ki ingi pai kuti Mbori?” (Bam. P. 39:8-10) Si tie ziazia nga, Yosefa aima ino wai ko nika mangapai zavura mbata fu ri asadi ko. Gipai re nasaha fuko taata gbe ko mangi gupai du ni ruruhe ho ko agbiatiko ni na asada.

14. Waigu rengbe ani ka wirika wai ka ká fu aˈasada?

¹⁴ Waigu rengbe mo ka wirika Yosefa na ki ká aˈasada? Mo ima rengba ka manga diaberã awere tipa gupai mo nika mangaha ho mo nika gbiatiro ni na asada. Si naida mo wiriki wai ka ya oó niipo fu agu apai Yekova asogaha, zavura ki ne gupai nga ka nye kaa berãkuriihe. (Tam. 97:10; 119:165) Ka mo mangi gipai re, mo amanganga ingapai ho mo nika du ni rogo asada te. Mo nika ima ino wai mo nika mangapai ho mo nika gbiatiro ni na asada.

15. Waigu rengbe boro ka yugo gupai nga ni nzunzu “nagbata” Yekova ? (AEbere 11:6)

¹⁵ Isoke, si rengbe kadu nga mo ima ino gupai  nga mo ima gbia rengo na mo naida ka iriso Yekova na kpotoroyo dunduko, ono mo nabihe kindi nga mo regerege tipa ka kparatiro fu Yekova na ki zi bapatiza te. Mo ima rengba ka manga gupai Bakindo Davide amangihe. Mo ima rengba ka zungodi Yekova nga: “Ako Mbori, mo wísigi pa re, ki ini pa kpotore yo! Mo asádi re, ki ini gimi berã pa apai! Mo ki bi he, si ngia gene gbegberẽpai rogo re yo, ki ngbe ku mbata yo fere ngba nyenye gene!” (Tam. 139:23, 24) Yekova nafu maku fu agu aboro “nagbata ko.” Pa manga mo asadatise tipa ka da ti gu sasa nga ga kparatise fu Yekova na zio bapatiza nayugo gupai fuko nga mo namanga kina boro gipai re.​—Oni gedi AEbere 11:6.

MO NAANDU KINDI KUMBATAYO KAA MBEDA NA YEKOVA

16-17. Waigu Yekova agbe agu aboro fuo ko du avungu yo nga aDezire Yekova? (Yoane 6:44)

¹⁶ Yesu ape gupai nga, Yekova du nagbe gako abawiriki. (Oni gedi Yoane 6:44.) Mo berẽnga kurii gupai du gipai re ti ni ni bawenehe na gupai si ayugoho foro. Yekova nabi wenepai ku rogo ai gu boro yo ko agbe ni fuo ko. Ko nabi gu boro re nga ni nga ‘ndikidi gako boro,’ watadu “nyanyakipa ũkumuko.” (Pa Rug. 7:6) Wo du ko abi ro.

¹⁷ Ono tie, si ima rengba kadu nga mo nga paranga boro du avunguro ni aDezire Yekova. Mo ima rengba ka berã gupai nga mo nairiso Yekova gbua mbiko gupai nga avunguro nairisoko angianga mbiko Yekova ima gbe ro fuo ko ya. Ono tie, Baibiri nape gupai nga: “Oni mbédi na Mbori, ko ki mbedi na oni.” (Yak. 4:8; 1 Peka 28:9) Ho mo amanga diandue tipa ka mbeda na Yekova, ko na karagapai ni mbeda ko na mo. Anga Yekova nabi ro nga mo gbua nga papara badona aboro te. Ko nagbe ai boro ni basasa​—kodihe na ai gu boro i asonosa ni rogo rengo yo. Ho ngbatunga gu boro re amanga diandue ni ka mbeda na Yekova, Ko nakaragapai a wa gu ani nibihe rogo Yakoba 4:8.​—Oni ringbisinga ha na 2 ATesaroniko 2:13.

18. Ginipai ani nika sakapai tipaha rogo gu kekeapai ngbefuo gere? (Atambuahe 40:8)

¹⁸ Ho mo akpara tiro ni fu Yekova na ki zi bapatiza, mo nayugo gu sino naadu ti Yesu. Ko afu tiko ni nyemuhe ka manga ai gupai Bako asana ko tipaha. (Oni gedi Atambuahe 40:8; Eb. 10:7) Rogo gu kekeapai ngbefuo gere, ani nika sakapai tipa gupai nika undo ro mo naandu kindi kumbatayo kaa iriso Yekova niruru ro tingbafuo gamo bapatiza.