1. Tona kinaho rago aenge ni, ginipai Mbori adigi nimangihe tipa gako sunge ndu kumbatayo?

TONA kinaho rago aenge ni, Yekova na Yesu adu ni kodikodi yo. Nidu Wiri Mbori nga tatamana, ko aya: “Mi adu kina pati ko, wa bangbasia boro sunge; rago angba ti ko mbiko re na auru dunduko.” (Snz. 8:30) Ba na Wiri aagia tiyo agia, na i ki kusi gu unga ahe ni bakiakia du a uru kpotosende areme. Mbori anaagia tiko kindi na aboro tipa gako sunge mangi. Ani nabi gipai re nibipa gu sunge mbakada kurungba naadu ti rago Noa; sunge mbakada banye na ka gbandakaha, gbiati ta na ni ngbakungbo yo; ta amanzigo na kini biki abia tipa ka sambuo Yekova na ni yekaru yo. Agi asunge re dunduko anaaida na giatise.—Bam. P. 6:14-16, 22; Geda 4:4-32; 1 Peka 25:1-8.

2. (a) Ginipai nanaamanga tipa agu aKristano naadu mbata? (b) Gini asanahe ani nika wisigopai tipaha?

² Zavura kina agu aKristano naadu mbata, i adu na gu sino nga ga mangaapai kina sa tii gu ngbembatayo nga ga Yesu Kristo. Gu mokedi nangia Pauro asakipai nga, ka si vura du nga mbedimbedi aKristano ni basasa adu na “agamahe na angbatungaha akia” na “mangapase ki du na angbatungaha akia” na “manga sunge ki du sa angbatungaha akia,” i dunduko ‘wa kpotoboro sa.’ (Oni  gedi 1 AKorindo 12:4-6, 12.) Na ginipai du tipa areme? Wai du rengbe ani ka nye ni kodikodi rani wa ani atungusa wene pangbanga? Wai rengbe ani kadu na kodatise rogo dungurati kodihe na gaani aborokporo?

3. Gini yuguyugupai gu mokedi nangia Yoane agbiaha?

³ Bara ti digido bambata sa kama agarã, gu mokedi nangia Yoane abi yuguyugupai nga ga amaraika saba, i dunduko naavudo ambanya. Ho gu bisue maraika avudi gako mbanya ni, Yoane abi “kerekuru” u niti ngbangbaturũ yo kusande no. Gu kerekuru re adu na rifungura beko nga gu ko azaki gu due na ni zanga mburuhe. Bakere ngime ki kuru, na ayere ki kuru yo a. Kuba gupai nga agu ayere re gbarasipa nvuo na angua, ami agbarasipa “kina agu aboro adu nga na gu nogodinogodi he nga ga Mbori ngbanda kpakpuyo ya.” (Yugo. 9:1-4) Zanga kapa, Yoane aima ino wai rengbe ayere ka gbarasapa ahe. Anga ayere nagbarasipa ahe Ezipeta yo ti rago Moize te? (Gate 10:12-15) Agi ayere narukuba gu kurapai Yoane abi ra re, ami nayugopa wai mbedimbedi aKristano atakapande ga Yekova nyanyaki pangbanga nga ga gbarasahe. Amirioni kura aboro du na maabangirise tipa ka raka auru kpotosende ane koditiyo na ami. Si airiwongo te ka bi gupai nga, gaani kodatise ka tungusapai narungburasi gu ome du Satana na ni rogo zegino dunduko rogo gu gako bariwara ngbii nga ga zire pambori re!

4. Gini sunge si aida ga Mbori aboro mangihe, na gini yangada gene rengbe yo ka mangaha ngbaha?

⁴ Ga Yekova aboro na gu bakere sunge beyo nga ka tungusa “wene pangbanga” rogo zegino dunduko mbata fu digido zegino da. (Mt. 24:14; 28:19, 20) Gipai re nakoda yamba “gu ni gomoro ime namanga ni” ni ye ka mbira “ime unga gbua.” (Yugo. 22:17) Wangia ani papara gu dungurati nga ga aKristano, wai du rengbe ani kadu na diabese rogo gipai re yo? Kinagu ka ani ‘azunguda tirani dunduko nzunzu ki du ngungungu.’—Ef. 4:16.

5, 6. Wai du du ani ni kodikodi rani tipa ka tungusa wene pangbanga?

⁵ Tipa ani tungusi gu wene pangbanga nga ga Kindo fu dungu aboro, si naida ani mangi gu gaani sunge tungusapai re kina ti genehe. Si du ani agbia arugapai ti ni. Agi arugute i afuhe fu adungurati rogo zegino dunduko re nambakada rani tipa ani du ni kodikodi rani. Fuo ani gbiatirani tipa ka tungusapai, ani nandu ka takapandepa gu pangbanga nga ga Kindo fu aboro. Ani nagbandaka gi pangbanga re na afugo rani gbiati agu amirioni awaraga du mburuhe rii Ziazia Kekeapai. Ya mo mo naamanga ome tipa ka tungusapai ti regbo atua? Ka mo amangaha wo, gure nga mo nakoda tiro na amirioni kura aboro nagbandaka pangbanga nga ga gu ‘maraika, nagu bebere ngbangbaturũ yo’ i nafura tipa ko rogo Yugoti 14:6.

⁶ Nairiwo gu ngbarago ani nidu na ni ka geda apangbanga gaani sunge tungusapai rogo gu buku nga Yearbook! Oni berẽnga a tipa wai ani nidu ni kodikodi rani tipa ka kparaka waraga yambahe tipa kikindigi adunguratise, gbiati gu kikindigi adunguratise nga ga dungu aringara. Ti regbo agi adunguratise re, ani nadegaturani kuti agu agumbapai du mburuhe rii Ziazia Kekeapai, adrama, gbiati mangimangi akpiapai. Agi apapara adunguratise re dunduko na nyakasapa mangasunge fu Mbori na kpotoraniyo dunduko. Tingida Pakpio Yesu a nakoda rani. Padu ani na tambuahe tipa gu ga Mbori nyemuse arẽnga aboro tipaha re ya gbiati irisa ga Yesu zinahe, ani nadungura tirani rogo agarã dũ tipa gi mbakadapai re rogo bangisa uru sa rogo zegino dunduko  fuo ti uru rogo Nisani ti rameru 14. (1 Kor. 11:23-26) Anga kina agu aDezire Yekova niima zio bapatiza sa ni naaye tipaha te. Rogo agu aposo du mbata fu Tingida Pakpio Yesu, ani nayamba kura aboro rogo gaani dagbarago tipa i ye kadu na ani pati gi nyanyakipa mbakadapai re.

7. Ho ani amangasunge ni sa, ginipai si asa rani ani mangihe?

⁷ Bangisa yere sa arengbanga ka gbarasapa ahe te. Teketeke a, gu ome ani amangaha ni tirani arengbanga kadu ni babakere he te. Ka ani aamangasunge ni kodikodi rani, ani rengbe arengba ka gbeberã amirioni aboro kuti gu ko rẽ tipa i irisiko nga Yekova! Ono tie, anga gere nga gu bangisa gene nasa ga Mbori aboro i du ni kodikodi yo te.

8, 9. (a) Gini kpiapai Pauro amangisunge na ni tipa ka yugo gupai nga si naida aKristano nye ni kodikodi yo? (b) Wai du rengbe ani kadu na kodatise rogo dungurati?

⁸ Rogo ga Pauro waraga ko akehe fu aEfeso, ko afura tipa wai si aida dungurati du ni mbakadimbakadihe na “ki nisono na apai dũ.” (Oni gedi AEfeso 4:15, 16.) Ginihe rengbe ka undo rani ni basasa tipa ani sono ki da ti gu sasa re? Pauro amangisunge na gu kpiapai nga ga kpotoboro na ki fura tipa kodatise tii gu ngbembatayo nga ga Yesu Kristo rogo dungurati. Ko aya kpotoboro ni kodikodihe ti ‘angbazungaha’ dunduko. Wai du rengbe ani dunduko ka fubee sa gu kodatise nga ga dungurati wangia ani sosono aboro na paranga yo, nyanyaki yo gbiati rurungbura yo?

⁹ Gu banguapai rengbe ka undo rani nga giasangba agu aboro Yesu nasiapa fu arugute fuyo nga abaakumba na kini irisiyo. (Eb. 13:7, 17) Si arengbanga kadu furani ti aregbo dunduko taata te. Ono tie, ani rengbe arengba ka sana Mbori tipa ko ngbe furani kumbatayo. Gako zaaza ome mangaapai rengbe arengba ka undo rani ani songodi gu mbakadapai nga ga dungurati na ngbaduraniyo dunduko. Ka si du nga ti kura aregbo si fura ni kpakarapai ka pekafuo agu arugapai re, si naida ani berẽkurii wai rengbe umbasitise ka sarani ani du na kodatise rogo dungurati. Kurigure, kodatise rogo ngbatunga apai wa gure dunduko nika sa gupai nga ani sono kumbatayo rogo nyemuse yo.

10. Wai du amoundo abaakumba aundo dungurati si du na kodatise? (Oni bi gu sura du ti tonatonaha.)

¹⁰ Amoundo abaakumba namanga bakere ome tipa ka banda gu kodatise nga ga dungurati. Ka garã agi awirina re vura du kina wai vurũ, i namanga gu sunge naundo aboro dunduko. Ni kpiapai, i naundo abaakumba tipa ka zingo awaraga mangingo tipa tungusapai ya. Kurigure, i nangerakurii sunge giriso rago, gbiati ngerafuo Bambu Kindo, na kini di gu vovo aboro naye tipa adunguratise kugume. Ka ani aagia tirani na agi awirina re, gure nga ani nafubee tipa apai nindu wenengai rogo dungurati.—Oni ringbisinga ha na Amokedi 6:3-6.

11. Ginipai rengbe paranga aboro ka mangaha tipa undo gayo dungurati si du na kodatise?

¹¹ Dungu agu awirina naima nyaka rogo toro yo ima manga nyanyakipa asunge rogo dungurati tipa dungu agarã. Ono mbikopa nge agarã yo, si ima rengba ka ká nayo ti agu apai i anaamangaha, si kini idi i mangi ariapai. Paranga awirina ima rengba ka undo ni bakerehe. Wa vura duhe nga i na bakere inohe te, ka i rabayo, si rengbe ka undo yo tipa i mangi dungu asunge. Nairiwo wai ngbaha amoundo abaakumba mangi ome tipa kada ni abaakumba! (1 Tim. 3:1, 10) Gu kura awirina nga aparanga ima manga sonakumbatayo na ki rẽ tipa ka mangasunge agu ababiapai nata ata, na kini undo awirinayo rogo dungu adungurati.  Ya mo ani na ngbarago te tipa gu undo gi paranga aboro re afuhe?—Oni gedi Atambuahe 110:3; Batungusipai 12:1.

12, 13. Ginipai rengbe ka undo aboro rogo akporo dunduko i du na kodatise dagbatiyo?

¹² Ani furanga awere tipa wai rengbe ani kadu na kodatise rogo gaani ramukporo. Badungu aboro bihe nga ka manga gu Irisombori Nga ga Aborokporo na aposo dunduko naundo ka nyakasa gu pagume du dagba paranga aboro na sosono yo. Ti gu wene regbo re, ani nagbe berãrani kuti agu apai nga ga toro, si kini sarani ani du ni kodikodi rani. Manga kpia wai ka tungusapai rengbe ka undo aborokporo i mbakaditiyo ka tungusapai wenengai. Si ambunga ka bi gupai nga ho aborokporo afura ni tipa Fugo Mbori, si nasayo i du na wene pagume dagbatiyo te, mbiko i dunduko nakpinyemu bangisa Mbori na kidu na nyemu ka manga gupai ko akpinyemuhe.

¹³ Ginipai rengbe arogotise ka mangaha kadu na kodatise tipa ka fu taarimo fu Yekova? Ho du kumba na diako ni nga ga Yekova ruru amoyambu, i ima rengba kadu na ngbarago mbiko gu kodatise si aye na ni fuyo. Abarayama na Sara, Yisaka na Rebeka, gbiati Erikana na Ana aima yugo gayo nyemuse fu gayo abadiarogatise. Si naida ani saha ni sinorani ka manga kina gu ngisapai re a. (Bam. P. 26:8; 1 Sam. 1:5, 8; 1 Pet. 3:5, 6) Gure nika koda rani na gaani abadiarogatise na ki mbedisi rani na gu Barani du ngbangbaturũ yo.—Oni gedi Batungusipai 4:12.

14. Kangia kumbamo watadu diaro airisongo Yekova te, ginipai rengbe mo ka mangaha tipa ka nyakasa gamo rogatise?

¹⁴ Si aidanga aKristano kpamiatiyo na azanga idapase te. (2 Kor. 6:14) Na ginipai tigaha du tipa agu awirinarani du rogo agu akporo du aboro rogoho rogo apambori ni bakiakia? Agu akurayo nairisombori awere agi rengo i naima manga rogatise, na gayo badiarogatise nga Dezire Yekova te. Wa vura duhe wo, mangapai kuti agu arengo du rogo Ziazia Kekeapai ima rengba ka ye na kodatise dagba aborokporo. Gure nakoda du na bakere kodatise ono zanga na mbupa gani idapase. Gipai re ima rengba kadu ni kpakarakpakaraha, ono oni berẽnga pa gu mosoro si narengbe ka ye na ni. Mangapai kuti gu bangua rengo nga ga Ziazia Kekeapai ima rengba kadu ni mbumbuhe ka si du nga badiarogatise kuru kusayo rogo dungurati. Gipai re amangi gu wirinarani du rimori nga Mary. Ri gbiakuti kumbari nga David aamangasunge fu Yekova kina sa, ono tie, agarã wa 25 kusayo, ko ambu ye tipa agu adunguratise nga ga aKristano. Mary anye niruru ri na kini ndu kindi tipa adunguratise gbiati agu akikindigihe, na ri kini mangi ome kaa mangapai kporo kuti gu bangua arengo nga ga Ziazia Kekeapai, kodihe na yugopai fu awiriyo sita. Ho agu awiriyo sita re asono ni ki guari kporo, Mary aabi tiri nisari. David atona ka geda agu amagazini ri anaambu he fuko. Fuo bete regbo kusa, ko ki tona nduge ku Bambu Kindo yo, yo titako anaazio ba ni fuko. Gu uru David anaayenga ya, gu gude re aniya fuko kusa wẽ, “Tita, mi niima zingo tipa ro areme bakere gbe ba dunguratise yo.” David namangasunge fu Yekova awere na ngbarago, na Mary na ngbarago a mbiko i namangaha kina sa.

15. Wai du rengbe agu arogotise naima manga dungu agarã ka undo gu paranga yo?

¹⁵ Nibi gu zubohe Satana azubo aborokporo na ni areme, si ni nyanyakipa pai fu aboro dunduko i du na kodatise rogo gayo ramukporo yo. Ka si vura du nga mo mangi rogatise tipa agarã wai vurũ, mo asadi ka berã gupai rengbe mo ka gumbaha watadu  ka mangaha tipa ka nyakasa gamo rogatise. Sosono awirina rogo dungurati ima rengba ka undo paranga aboro rogo gi bangiriba re. Mo ima rengba ka yamba paranga arogotise ku kpuro yo i ye oni mangi gu irisombori nga ga aborokporo na gamo badiarogatise. Baraho du gu paranga aboro re ni na oni, i ima rengba ka bipa nyaka nyemuse gbiati kodatise ka si vura du nga oni mangi dungu agarã rogo rogatise vurũ.—Tito 2:3-7.

16, 17. Ginihe ga Mbori amoyambu du ni kodikodi angera tipaha kumbatayo?

¹⁶ Mo bingo kpia aYisaraere berãro wa i asambuo Yekova ti regbo pumbo rogo gu gako yekaru naadu Yerusarema yo. Si nawira wa i aima mbakadatiyo tipa nunguro, kini ngerefuo agu azingo nga ga akurayo gene, na kidu ni kodikodi yo ba irisombori yekaru yo. Agi apai re dunduko anaaida na giatise. (Rk. 2:41-44) Wa ani kaa ndu gaani nunguro koyo du vovo zegino ni, si naida ani du ni kodikodi rani sa na kini gitirani. Gipai re naida na nyanyaki asadatise. Ya mo si aidanga oni berẽkurii gipai re nyanyaki te?

¹⁷ Oni berẽnga kina pa agu amaku napido rani kumbatayo! Ani ima mbu gu zanga kodatise gbiati gu vunduvunduapai du rogo gi zegino re. Ani nabi gupai abi Yesaya na Mika agumbaha nga si aringbisatihe kumbatayo nga ga Mbori aboro nika du ni kodikodi yo wa i ndu kurii “gu bagangara nga ga Yekova” yo. (Yes. 2:2-4; oni gedi Mika 4:2-4.) Nirengo, nairiwo wai du gaani ngbatunga irisombori ni tumbatumbaha kuari “rogo yangara arame.” Nairiwo gu bakere ngbarago ani kadu na ni ho ani ka raka ni ti gu regbo aboro dunduko nika du ni kodikodi yo na kidu na giatise!