1, 2. (a) Ginihe nasa ngbarago ti ga Mbori aboro areme? (b) Wai du rengbe agu avunguagude nga aKristano gbiati abaakumba ka undo rukutu agude i girogo bapatiza yo?

BAKUMBA sa ni Kristano aya fu kumbagude nga Christopher garãko adu nga 12 nga, “mi aima ino ro tona kina ti gu regbo i avunguro, na mi na ngbarago ka giaha nga mo naida ka zio bapatiza. Mi naida ka sananga ro nga, ‘Tipagine du mo aida ka manga gu diandue re ti ni?’” Ga gu bakumba sanahe re aruaru. Rengo ngaha nga, ani dunduko nidu na ngbarago ka bi badungu akutu agude i ni zi bapatiza na agarã dunduko rogo zegino dũ. (Batu. 12:1) Ti kina gu ngisa regbo re, agu avunguagude nga aKristano gbiati abaakumba rogo dungurati naida gu ngbatunga rukutu agude re  mangi gu diaberã ayengo kina ngbaduyo yo sa ya ono du na wene nduhe ti ni.

² Fugo Mbori nayugoho nga agu adiandue nga ga kparatise gbiati bapatiza re nga tonatona gu raka Kristano agbia amaku be Yekova ti ni ono gbiati sogote be Satana a. (Snz. 10:22; 1 Pet. 5:8) Sidu tie, agu avunguagude nga aKristano nadia regbo ka yugo gupai fu awiriyo si akodaha kadu ni ga Kristo bawiriki. Tipa agu agude adunga avunguyo ni aKristano ya, abaakumba rogo dungurati naundo yo i ini gupai si aidaha be ga Kristo bawiriki. (Oni gedi Ruka 14:27-30.) Kina wai si aida mbakadatise tipa ka nyasa sunge dua bambu, kinawo a si aida mbakadatise tipa ka mangasunge fu Yekova ni ruruse daho zegino ka “diga ni.” (Mt. 24:13) Ono ginipai rengbe rukutu agude ka mangaha nitiyo tipa ka diaberã ka mangasunge fu Yekova rogo gayo raka yo naabaha? Ani bingoho.

3. (a) Ginipai afugo Yesu na Petero ayugoho furani tipa pa nyaka bapatiza? (Mt. 28:19, 20; 1 Pet. 3:21) (b) Gini asanahe ani nika wisigoho, na tipagine?

³ Ya mo mo nga gu gude naberãpa zio bapatiza? Kangia wodu, si rẽarẽ i fu tambuahe foro! Bakere momu du ngaha ka zio bapatiza na ki da ni Dezire Yekova. Kurigure, bapatiza nga guhe si aidaha aida be aKristano, na si nga nyanyakipa diandue tipa ka gbia bata. (Mt. 28:19, 20; 1 Pet. 3:21) Mbiko gupai nga gamo nyemupai nga ka banda gu kidohe mo nika mangaha fu Yekova re, mo naida aida ka mbakadatiro tipa gi nyanyakipa diandue re. Sidu tie, si adu ni wenepai mo wisigi agi asanahe du biata re nga gu rengbe ka undo ro mo ini singia mo ima rẽ tipa bapatiza. Agi asanahe re nga (1) Ya mo mi ima nyaka tipa ka manga gu diaberã re? (2) Ya mo gimi nyemupai du nga ka mangaha wo? (3) Ya mo mi girogo gupai yo pa kpara gimi raka fu Yekova ayugoho? Ani wisigingo agu asanahe re.

4, 5. (a) Tipagine du adunga bapatiza ti ni tipa kina sosono aboro sa ya? (b) Gine nga ka nyaka? Oni funga kpiapai.

⁴ Ziazia Kekeapai apenga gupai nga kina agu aboro naima sona si aida i mangi gu diandue  nga ga bapatiza te watadu kina agu aboro naima dati agu agarã i naima rengba ka idapa kura apai fuyo a te. Ani nageda gupai rogo Asanza 20:11 nga: “Gude nayugo pa tini nzunzu ni kina gani mangapai, watadu gani sunge zanga biriki ki du ni ruru he.” Gu boro du wiri garãni kindi tooni rengbe arengbe ka ino gupai manga rurupai akodaha na ki kpara gani raka fu Bakusi ni. Rogo gi gene re, bapatiza nga gu diandue du na nyanyakipaha na ki rẽarẽ fu gu tooni gude niima yugo na ni nga u ima nyaka na u ima kpara tiru fu Yekova.—Snz. 20:7.

⁵ Gine nga ka nyaka? Ka nyaka nakoda dungu apai angianga kina sona ti kpotose sa ya. Ziazia Kekeapai naya agu aboro naima nyaka “nga agu yo rengbe gayo berã na wisiga pa wenepai na gbegberẽpai.” (Eb. 5:14) Rogo gi gene re, agu aboro naima nyaka ima ino gupai du ni ruruhe bangiri Yekova na i ima diaberã kpotoyo tipa ka kakuti ni. Ni sangbanaha, si taata tipa i sosodi yo i mangi gupai du ni gbegberẽhe te; i asosodanga yo asosoda a kindi i mangi gupai du ni ruruhe te. Nirengo, si ruaru tie ani du na gu maabangirise nga, gu tooni gude zi bapatiza u nika kakuti ga Mbori arugute zavura ho adunga avunguru ni watadu gu kura sosono aboro ya.—Oni ringbisinga ha na AFiripoio 2:12.

6, 7. (a) Oni furanga tipa agu akpakarapai Daniere agbiatiko na ni Babera yo. (b) Wai du Daniere ayuguhe nga ko aima nyaka?

⁶ Ya mo rukutu agude rengbe ka yugo gu ngbatunga nyaka re? Ani bingo gu kpiapai nga ga Daniere du rogo Ziazia Kekeapai yo. Si nawira wa ko adu tooni ho i adiko ni be avunguko ngbaome ki ga na ko ku Babera yo. Wakina ikpirogumba, Daniere abi tiko ko ni raki dagba agu aboro gayo bipai tipa gupai du ni ruruhe watadu gbegberẽhe adu kia. Kurigure, gu kura kpakarapai Daniere aagbiatiko na ni angia: I anaamangapai fuko Babera yo wa kparakpara boro. Nirengo, Daniere adu dagba gu paranga aboro yo i asiayo na rubangirise tipa i niru barangba Bakindo! (Dan. 1:3-5, 13) Si nangera wa Daniere agbia agu amomu Babera yo nga gu ka ko aarengbanga ka gbiaha Yisaraere yo ya.

⁷ Wai du gi paranga gude nga Daniere re amangipai kuti agi apai re dũ? Ya mo gu weneapai nga ga Babera anangi bangiriko? Ya mo ko ambu gu vovo aboro ko adu dagbayo i ariako watadu ka gbarasapa gako idapase? Wagusa te! Ziazia Kekeapai nape gupai nga ho Daniere adu ni Babera yo, ko ‘aberẽhe kpotokoyo ya ko abirikosi nga tiko’ na guhe nakoda kungbo irisombori te. (Dan. 1:8) Daniere aima yugoho ni bakerehe nga ko ima nyaka!

8. Ginipai rengbe mo ka wirikaha ti ga Daniere kpiapai?

⁸ Ginipai rengbe mo ka wirikaha ti ga Daniere kpiapai? Bambatapai nga, gu tooni gude naima nyaka naru nyanyaki kuti gupai ni naidi kuti ni. Anga ni wa nvua na aria arangi ru tipa si du sa na gu rago du u rogoho te. Ni amanganga pai wa bakurea Mbori Bambu Kindo yo ono kidu wa bakurea zegino sukuru yo te. Kuba gupai nga ni ni wo awo ho ni agbia tiní na asada kuti gani idapase, ni naru nyanyaki.—Oni gedi AEfeso 4:14, 15.

9, 10. (a) Wai du rengbe tooni gude ka gbia undo ti berãkuriipa wai ni namangipai kuti agu apai asadi gani idapase kusayo? (b) Ginipai bapatiza ayugoho?

⁹ Rengo ngaha nga, boro ho du ni rengberengbe ni te; rukutu agude gbiati sosono aboro namanga aingahe amanga ti kura aregbo. (Batu. 7:20) Ono wa vura duhe wo, wa mo nikaa berãpa zio bapatiza, si adu ni patatamana mo wisigipa wai mo nadiberã kpotoroyo ka kakuti ga Yekova arugute. Wai du rengbe mo ka inopa nyaka gamo diaberã? Mo sananga tiro nga, ‘Vuru agu aregbo susi kusayo, gimi mangaapai nidu wai kuti ga  Yekova arugute?’ Mo berẽ wenengai kuti wai mo amangipai kuti gupai naasadi gamo idapase. Ya mo mo yuguhe nga mo na gu rugatinapai si aidaha tipa ka kpara rurupai ti irairaha? Na ka si du nga wa kina Daniere, kura aboro rogo ga Satana zegino nabi ro na nyanyakipa ro? Ya mo mo rengbe ‘naruga tiro na gu he Gbia akpinyemuhe’ zavura ho duhe ni na tagbagapai na gupai du mo ni asadi asadi ro ka mangaha?—Ef. 5:17.

¹⁰ Tipagine du sana ani gi sanahe re ti ni? Si tipa ka undo ro mo du na ruru bipai tipa bapatiza. A wa ani ni gumbaha mbata, bapatiza nayugoho nga mo ima manga nyanyakipa kidohe fu Yekova. Mo nakido ko nga mo nika kpinyemuko na ki mangisunge fuko nyeanye kindi na ngbaduroyo dũ. (Mk. 12:30) Agu aboro dunduko nazio bapatiza si aida i diberã ka kakuti gayo kidohe.—Oni gedi Batungusipai 5:4, 5.

11, 12. (a) Si naida gu boro naberãpa zio bapatiza ini ginipai? (b) Ginipai nika undoro mo du na ruru bipai tipa gu ga Yekova mbakadapai nga ga bapatiza?

¹¹ Ziazia Kekeapai nagumba gupai nga ga Yekova aboro kodihe na rukutu agude, ‘afú tiyo fuko zaza’ tipa gako sunge. (Tam. 110:3) Sidu, si naida gu boro naberãpa zio bapatiza ini gupai nga kina boro gani nyemupai du. Gure tie naida mo wisigi tiro wenengai. Tipagine? Mbiko gupai du tipa ro ima rengba kadu kia. Ni kpiapai, si rengbe kadu nga i asonosi ro rogo rengo yo.

¹² Vuru agu agarã yo susi, si nangera wa mo ima bi dungu aboro i ni zi bapatiza kodihe na aguyo du garãyo sa wa gamo isoke zavura awirinamo a. Kangia gure nga gupai du tipa ro, ginipai si aida mo du na rubangirise na ni? Si naida mo du na rubangirise ki zanga bi bapatiza wa gupai rukutu agude amangaha ho da yo ni na kura ngbatunga garã. Ginipai rengbe mo ka mangaha tipa kadu kindi na ruru bipai tipa gu ga Yekova mbakadapai nga ga bapatiza? Dedede, mo di regbo ka ru ka berãkurii gu nduapai du pa zio bapatiza ti ni na nyanyakipaha. Nirengo, mo rengbe ka gbia badungu wene nduapai rogo gi kekeapai re gbiati gu ngbefuoho.

13. Wai du rengbe mo ka inoho singia gamo diaberã ka zio bapatiza naye kina boro ngbaduroyo?

¹³ Agene kinaho rengbe mo ka ino ngbaha singia gamo diaberã nga ga bapatiza naye kina boro ngbaduroyo. Ni kpiapai, gamo nyemupai ka mangasunge fu Yekova nika du ni yuguyuguhe rogo gamo akparakpee yo. Ka mo akparakpee dedede na kini peke kina boro gamo apai fu Yekova, si nika yugoho nga gamo pagume na ko ni mbembedi he. (Tam. 25:4) Nyanyakipa gene sa Yekova akaragapai kuti gaani akparakpee ngbaha nga ka gbeberã rani kuti Fugoko. Rogo gi gene re, gu ome ani amangaha ka wisigo Ziazia Kekeapai nga gu kurapai nayugoho nga ani naida ka mbeda na Yekova nzunzu na ka mangasunge fuko kina boro ngbaduraniyo. (Yos. 1:8) Sidu, mo sananga tiro nga: ‘Gini apai mi naakpara tipaha? Ya mo mi naawisigo Ziazia Kekeapai nisare dedede?’ Na ka si du nga gamo aborokporo nga aKristano na i kidu na gu mbakadapai nga ga Gu Irisombori Nga ga Aborokporo, mo sana tiro nga: ‘Ya mo mi naasongoda gu mbakadapai re na ngbadureyo dũ?’ Gamo akaragapai kuti agi asanahe re nika undoro tipa mo ini singia gamo diaberã ka zio bapatiza nga kina boro gamo nyemupai.

14. Oni penga gu kparakparapai du dagba kparatise fu Mbori na zio bapatiza.

¹⁴ Kura aboro arengbanga ka ino gu kparakparapai du dagba kparatise fu Mbori na zio bapatiza te. Ni kpiapai, kura rukutu agude naya i ima kparatiyo fu Yekova ono i ata rẽnga tipa bapatiza te. Ya mo rogo gupai re yo  ti ni? Kparatise fu Mbori nayugoho nga mo ima pe gupai fu Yekova nga mo nika mangasunge fuko nyeanye kindi. Na boro nayugoho fu kura aboro ti regbo bapatiza nga ni ima kpara tiní fu Mbori. Sidu tie, bapatiza nga gupai boro ayugo na ni gbayaga nga ni aima kpara tiní fu Mbori rogo gani kparakpee yo. Mbata fu mo zi bapatiza, si naida mo ini gupai kparatise ayugoho.

15. Ginihe nga kparatise fu Mbori?

¹⁵ Ka pepai taata, ho mo akpara gamo raka ni fu Yekova, mo na pagbia berewe kurii gamo raka te. Mo nakido Yekova nga mo nika peresapa manga gupai ko akpinyemuhe mbata fu apai dũ rogo gamo raka yo. (Oni gedi Matayo 16:24.) Akidohe dunduko si aida boro bihe na nyanyakipaha, gu susi asusa gbe nga gu kidohe boro amangaha fu Yekova Mbori! (Mt. 5:33) Ono tie, wai du rengbe mo ka yugoho nga mo arakanga berewe fu tiro te na Yekova awere nga baira ro?—Rom. 14:8.

16, 17. (a) Oni funga kpiapai tipa ka yugo gupai zanga raka fu tise ayugoho. (b) Ginipai gu boro namanga kparatise fu Mbori agumbaha nzunzu?

¹⁶ Ni kpiapai, ani yanga bakureamo fu tarambiri foro ni gamahe. Ni ki fu awaraga ha foro dunduko na ki ya: “Ga mo tarambiri du re.” Ono na ka gu bakureamo re pe kurapai nga: “Mi nikaa banda wiri rifungura ha na kina re. Na mi du nikaa gbehe angianga mo ya.” Wai du ka mo bi gu “gamahe” re? Mo bi gu boro fuhe re wai?

¹⁷ Awere tie, mo berẽnga pa gupai Yekova aidaha be gu boro nakpara gani raka fuko, nga guni naya fuko: “Mi nafu gimi raka foro. Mo nga baira re.” Na ginipai ka mangi ka gu boro re tona ka raka raka biriki, isoke wagu nga ka mbakadapa rogatise ni gbuko na gu boro angianga idipase ya? Na ka ni idipa gu sunge marã nagbarasapa gani sunge tungusapai watadu ye tipa adunguratise nga ga aKristano? Ya mo gure du nga wa banda rifungura tarambiri te? Gu boro nakpara gani raka fu Yekova, si wa ka ni aya: “Mo nga baira gimi raka kisusi re. Ka tagbagapai kuru dagba gupai mo aidaha na gupai mi aberã ka aidaha, kina gupai mo aidaha nimangi ti aregbo dũ.” Gure nayugo gu berã nangia ga Yesu, ho ko adu ni auru kpotosende, ko aya: “Mi aye nga ngbangbaturũ yo ka manga wa mi akpi nyemu he te, ono wa kina gu ko akpi nyemu he nakedi re.”—Yo. 6:38.

18, 19. (a) Wai du afugo Rose na Christopher ayugoho nga zio bapatiza nga gu momu nandu sa amaku? (b) Wai du mo abi gu momu nga ga zio bapatiza?

¹⁸ Si tie ziazia nga, zio bapatiza nga gu nyanyakipa diandue si aidanga mo watadu gu kura boro bihe na taatapaha ya. Ti kina gu bangisa regbo re, si nga bakere momu ka kparatise fu Mbori na ki zi bapatiza. Gu rukutu agude nakpinyemu Yekova na niima giarogo gupai yo kparatise ayugoho agundenga ti zio bapatiza te; i abiranga tiyo a tipa gayo diaberã te. Tooni degude nga Rose naima zio bapatiza aya, “mi ima kpinyemu Yekova, na pai ho ka sa ngbarago tire wa mangasunge fuko te. Pai ho du mi na bakere kido kutini wa gu diaberã mi amangihe nga ga bapatiza te.”

¹⁹ Na ginipai tigaha du tipa Christopher i nifura tipa ko ti tonatona gi kekeapai re? Ya mo gako diaberã ka zio bapatiza na garãko 12 adu na wene ndue ti ni? Christopher na bakere tambuahe tipa gu kparatise ko amangihe fu Mbori na ki zi bapatiza. Ko atona ka mangasunge ni bazakigene ho garãko adu ni 17, na ko ki da ni moundo abaakumba ho garãko adani nga 18. Areme, ko namangasunge Betere yo. Ko aya: “Ruru diaberã du mi amangihe nga ka zio bapatiza. Raka re ima hi be wene sunge fu Yekova na gako riigbu.” Ka mo aberãpa bapatiza, wai du rengbe mo ka mbakadatiro tipaha? Gu kekeapai naye fuo gere, nika sakapai tipa gu sanahe re.