1, 2. (a) Oni sakingo gu ndupai du bapatiza ti ni nga nyanyakipa diandue. (b) Ginipai si aida boro inihe wenengai mbata fu ni zi bapatiza na tipagine?

YA MO mo nga gu tooni gude naberãpa bapatiza? Kangia wo du, gupai napido ro re nga gu bakere momu rengbe kadu be boro. Ono tie, a wa ani abihe rogo gu kekeapai ye mbata fu gere, bapatiza nga nyanyakipa diandue. Si nayugopa gamo kparatise fu Mbori, du nga gu nyanyakipa kidohe mo amangihe fu Yekova nga mo nika mangasunge fuko nyeanye kindi ni peresa mo pa gako apai mbatayo fu apai dũ rogo gamo raka yo. Si nirengo nga, si naida mo zi bapatiza kinaho mo naima rẽ ni tipa ka manga gu diaberã re, ho duhe ni nga kina boro gamo nyemupai du, na ho mo naima giarogo guhe ni nga ka manga kparatise.

² Na ka si du nga mo ainongo ho nzunzu singia mo ima rẽ tipa bapatiza te? Na ka si du nga mo naida ka zio bapatiza ono avunguro ki bihe nga si naida mo pidi mbata, isoke daho mo nika gbia inohe ni tipa gu raka nga ga Kristano? Rogo agi apai yo re dũ, ka rago gberẽnga tiro ya. Kuba gure, mo mangisunge na gu momu re tipa ka sonakumbatayo wa ka mo rengbe ka zio bapatiza barambeda.  Na agu asasa re berãro, mo bingo wai rengbe mo ka maa asasa nibipa (1) gamo ida, (2) gamo mangaapai, na (3) gamo tambuahe.

3, 4. Ginipai rengbe paranga rukutu agude ka wirikaha be gu kpiapai nangia ga Timoteo?

³ Mo berẽnga pa wai mo narengbe ka karagapai kuti agi asanahe re: Tipagine du idi mi ti ni kuti gupai nga Mbori kina ti ni? Ginihe nasa re mi idi kuti gupai nga Ziazia Kekeapai nga gu Fugo Mbori gako toro adu kugiipa kehe? Tipagine mi abihe ti ni nga raka kuti ga Mbori arugute ngba kisusi gu raka nga ga zegino? Anga agu asanahe re tipa ka sa ro mo tona ka kapa berãro yo te. Kuba gure, si tipa ka undoro mo pekefuo gu rugute nga ga gu mokedi nangia Pauro naya: ‘Oni kpáriapa guhe nga ga Mbori nyemuhe du ni wenehe, nzunzu, ni ziaziaha.’ (Rom. 12:2) Ono tipagine si aaida agu aKristano naadu Roma yo kpariapa guhe i aima idapaha ti ni?

⁴ Oni bingo gi kpiapai nga ga Ziazia Kekeapai re. Timoteo aima ino Ziazia Kekeapai wenengai. Nako na titako aima yugoho fuko mbuko kindi “ni gude.” Ono wa si avura duwo, Pauro angarasi Timoteo nga: ‘Mo nyé rogo agu apai mo awiriki ki inihe nirengo.’ (2 Tim. 3:14, 15) Timoteo aima sa rengo ni gako. Ko aidanga ha gbua mbiko nako na titako napehe fuko nga ko mangihe wo te, ono mbiko ko aima berãkuriihe nitiko na ki inihe nirengo.—Oni gedi 1 ATesaroniko 5:21.

5, 6. Tipagine duhe ti ni ni nyanyakipa pai mo wiriki ka ‘ásada apai dunduko’ rogo raka yo mbu ro kindi tooni?

⁵ Na ginipai tigaha du tipa ro? Isoke mo ima ino agu arengo nga ga Ziazia Kekeapai tipa gbanga regbo. Kangia wo duhe, tipagine ka mo amaanga ha ti ni ni gamo sasa ka wisigo gu nduapai nasa ro mo idi kuti agu apai re ya? Gure nika nyakasa gamo ida na ki undoro mo ne gu soapai naye be abakure, agu azire nga ga zegino, watadu gamo abipai.

⁶ Ka mo wiriki ka ‘ásada apai dunduko’ rogo raka yo mbu ro kindi tooni, si nika mbakada ro mo fu wene akaragapai fu akuaro ho i asana ngbatunga asanahe ni wa: ‘Wai du ini mo ho nzunzu nga Mbori kina ti ni? Tipagine gu Mbori du na nyemuse ambugene fu gbegberẽ apai ti ni si nimangi? Wai du rengbe yo ka ya Mbori aima du ti ni ti aregbo dũ?’ Ho mo naima mbakadatiro ni, gu ngbatunga asanahe re azeresanga gamo idapase te, ono si nika saro mo mangi bakere wisigopai nisase.

7-9. Oni furanga tipa wai rengbe agu awaraga wisigopai du rogo Internet nga, “What Does the Bible Really Teach?,” narengbe ka undo roni oni nyakasi gaoni ida.

⁷ Fofoi wisigopai nisase rengbe ka undoro mo karagapai kuti asanahe, mo nyasiriipa gamo akapa, na ki nyakasi gamo aida. (Amo. 17:11) Badungu aũsunge duho berani tipa ka undoro mo mangi gipai re. Badungu aboro ima bihe ni wenepai ka wisigo gu burosua nga The Origin of Life—Five Questions Worth Asking gbiati gu buku nga Is There a Creator Who Cares About You? Kurigure, badungu agude ima gbia ngbarago gbiati undo be gupai du rogo Internet nga “What Does the Bible Really Teach?” Agi awirikapai du ti genehe re, si rogo gu gaani bangiriba nga ga Internet nga jw.org. Oni ngere tii gu paparaha nga BIBLE TEACHINGS. Agu awisigopai naabaha du rogo gu tangaratangara kekepai re tipa ka undoro mo nyakasi gamo ida kuti agu apai Ziazia Kekeapai afura tipaha.

⁸ Mo ima inido tiro na Ziazia Kekeapai, sidu, mo ima rengba ka karagapai ni ipo kuti bete agu asanahe du rogo agu awaraga wisigopai re. Ono tipagine adunga mo ti ni na kapa kuti gamo akaragapai ya? Agu awaraga wisigopai re naundo ro mo berẽkurii dungu averesi na ki ke gamo aberãpai tipaha. Si  rengbe ka undoro mo mbakadi tiro tipa wai ka sakapai tipa gamo aida du mburuhe ri Ziazia Kekeapai. Gu kekeapai du rogo Internet nga “What Does the Bible Really Teach” naundo dungu rukutu agude i nyakasi gayo aida. Kangia mo ima rengba ka gbiaha, si adu ni wenepai foro ka mo moihe ni papara gamo wisigopai nisase.

⁹ Ho mo anyakasa gamo aida ni, gure nga mo ima manga nyanyakipa diandue tipa bapatiza. Tooni wirinarani sa ni degude aya: “Mbata fu mi diberã ka zio bapatiza, mi awisigi Ziazia Kekeapai ki bihe nga ndikidi pambori du re. Na wa mi araka na auru dũ, gu gimi ida re nanyaka kina kumbatayo.”

10. Tipagine ruhe aru ti ni ka maabangirise nga gu Kristano naima zio bapatiza rengbe ka mangapai ringbisihe kuti gani idapase?

¹⁰ Ziazia Kekeapai naya: “Idapase, ka si adu nga na mangaapai ti ni ya, si ni kpikpi he ni sa ha.” (Yak. 2:17) Ka mo du na nyanyaki ida, si ruaru tie mo du na gu maabangirise ka yugoho rogo gamo mangaapai yo. Gini ngbatunga mangaapai? Ziazia Kekeapai nafura tipa “manga ziazia apai na sinombori.”—Oni gedi 2 Petero 3:11.

11. Oni sakingo rogo gu fugo yo nga ka “manga ziazia apai.”

¹¹ Tipa ka yugo “manga ziazia apai,” si naida mo du ni gigiri ro rogo gamo mangaapai yo. Wai du du gamo mangaapai nibipa gipai re? Ni kpiapai, mo berẽnga pa agu adiwi sita susi kusayo re. Wai du mo nayuguhe nga mo ima raba gamo “berã na wisiga pa” apai tipa ka kpara rurupai ti irairaha? (Eb. 5:14) Ya mo mo rengbe ka tingidapa gu regbo mo aka asada watadu soapai be akuaro? Ya mo gamo mangapai nafura wenengai tipa gamo idapase? Ya mo mo naafura tipa gamo idapase kuba gupai nga ka onga aonga mbiko akuaro sukuru yo rengbe ka sawia ro? (1 Pet. 4:3, 4) Nirengo, boro ho du ni rengberengbe ni te. Zavura gu ga Yekova amoyambu niima mangasunge fuko tipa gbanga regbo, i nidu adu ti gu kura aregbo na gunde tipa ka fura gbayaga tipa gayo idapase. Ono tie, gu boro niima kpara tiní fu Yekova, ni na ngbarago kadu na rimo Mbori rini, na ni nayugoho rogo gani mangaapai yo.

12. Gini mangaapai du nga ga “sinombori,” na wai du si aida mo nibihe?

¹² Na ginipai tigaha du tipa manga agu apai nga ga “sinombori”? Gere nakoda agu apai mo amangaha rogo dungurati, wagu nga ye tipa adunguratise gbiati mangasunge tungusapai. Si nakoda gu kura apai a nga ga toro nga gu aboro abingo ro na ni ya, wagu nga kparakpee nisaro gbiati wisigopai nisase. Gu boro niima kpara gani raka fu Yekova abingo gi mangaapai re ni tindiro kurini te. Kuba gure, ni nayugo gu bipai Bakindo Davide adu na ni ho ko ayani wẽ: “Ako gi Mbori, rago ngba ti re ka amanga gu pai ngba angba ti ro; ii, ga rugute du kpotore yo.”—Tam. 40:8.

13, 14. Ginihe rengbe ka undoro mo mangi agu apai nga ga “sinombori,” na wai du kura agude nagbia undo ti ni?

¹³ Tipa ka undoro mo moi asasa, asanduki gu du rogo gu buku nga Questions Young People Ask—Answers That Work, Volume 2 ti kpewaraga 308 na 309, si naundo ro mo keke gamo aberãpai. Agi asanduki re naundo ro mo keke gamo akaragapai kuti ngbatunga asanahe wa, “Gini apai mo naakparakpee tipaha, na ginipai si ayugoho tipa gamo nyemuse fu Yekova?” “Gini apai mo naakoda ha ku rogo gamo wisigopai nisase?” “Ya mo mo naatungusapai zavura ho avunguro amanganga ha ni ya?” Ba kina rogo gu sanduki re a tipa mo keke gamo asasa nga gu rengbe mo ka maaha nibipa gamo akparakpee, wisigopai nisase, na sunge tungusapai.

¹⁴ Badungu rukutu agude nga aguyo naberãpa zio bapatiza ima bi gi sanduki re ni  wene ũsunge. Tooni wirinarani du rimori nga Tilda aya: “Mi amangisunge na gu sanduki re tipa ka maa gimi asasa. Mi atona kada ti agu asasa re ni basasa dũ, na tingbafuo garã sa mi ki rẽ tipa ka zio bapatiza.” Tooni wirinarani du rimoko nga Patrick aima gbia undo wakina gure a. Ko aya, “Mi aima ino gimi asasa, ono pa ke mi he sande naaundo re mi mangisunge nyanyaki tipa ka da ti ni.”

15. Oni sakingo gu ndupai si aida kina boro nitini diberã ka kpara gani raka fu Mbori ti ni.

¹⁵ Sanahe sa nga gu nasa boro ni berẽkuriipai du rogo gu sanduki re nga: “Ya mo mo rengbe ka mangasunge fu Yekova ka si du nga avunguro watadu abakureamo ima mbu mangaha?” Mo tingidi gupai nga, wangia mo gu Kristano naima kpara tiní fu Mbori na ki zi bapatiza, mo nitiro nika manga ome ka iriso Yekova. Si aidanga mo mangisunge fuko mbiko kura aboro watadu avunguro te. Gamo ziazia mangaapai na gu gamo mangaapai nga ga sinombori nafu gopai nga mo ima sa rengo ni gamo na mo nasona kumbatayo tipa ka zio bapatiza.

16, 17. (a) Ginihe si aida si fõngbadu boro yo nida ni Kristano? (b) Ani rengbe ka ringbisa padu na tambuahe tipa ga Yesu motumo kuti gine?

¹⁶ Kumba naaima ino ga Moize aNdiko wenengai asana Yesu nga: “Dagba arugute dunduko gini gu susi?” Yesu akaragapai fuko nga: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ.” (Mt. 22:35-37) Yo nga ni re, Yesu ayugu gu ndupai si aida Kristano mangiapai dunduko ti ni, kodihe na zio bapatiza, nga ka kpinyemu Yekova na ngbaduniyo dũ. Gene sa rengbe mo ka kiiso gamo nyemuse tipa Yekova ngbaha nga ka berãkurii gu bakere gamahe ko afuhe nga ka tumo na Wiriko. (Oni gedi 2 AKorindo 5:14, 15; 1 Yoane 4:9, 19.) Berãkurii pa ga Yesu motumo na wai si narengbe ka undoro nika fõngbaduroyo mo karagapai na tambuahe.

¹⁷ Ni kpiapai, gamo karagapai kuti ga Yesu motumo rengbe kadu wa gere: Ani yanga mo narindo ku ime yo boro ki batasi ro. Ya mo mo kuru yo ka ga kina ku kporo yo kindi, ki ugusi tiro, na bangiro ki go ti gupai nimangi foro re? Wagusa te! Mo rengbe kadu na bakere tambuahe fu gu boro nibatasi ro re. Gu rengo duho nga, gu boro re nabatasi ungaro! Yekova na Yesu aima undo rani kisusi gure. Zanga na ga Yesu motumo, ani dunduko ka rindo ku rogo ingapai na kpio. Ono mbiko gi bakere mangaapai nga ga nyemuse re, ani awere na maabangirise ka raka nyeanye kindi auru kpotosende rogo paradizo!

18, 19. (a) Tipagine si aidanga mo gunde ti ni ti kpara gamo raka fu Yekova ya? (b) Wai du mangasunge fu Yekova asa gamo raka ni bawenehe?

 ¹⁸ Ya mo mo na tambuahe tipa gupai Yekova namangihe foro? Kangia wodu tie, si rẽarẽ mo kpara gamo raka fu Yekova na ki zi bapatiza. Mo tingidi gupai nga, kparatise nakoda manga nyanyakipa kidohe fu Yekova ka manga gupai ko akpinyemuhe nyeanye kindi ka kina gine vura manga amanga vurũ. Ya mo si naida mo gunde ti manga ngbatunga gu kidohe re? Wagusa te! Mo tingidi gupai nga Yekova naida wenepai tipa ro, na ko “nafu mosoro fu agu yo nagbata ko.” (Eb. 11:6) Ka mo kpara gamo raka fu Yekova na ki zi bapatiza, si agbarasanga pa gamo raka te. Kuba gure, mangasunge fu Yekova nika sa raka ro ni bawenehe. Wirina sa du garã nga 24 nazi bapatiza ho garã ko adu ni kindi tooni aya: “Mi aima rengba kadu na dudunguro inohe ka garã re agbisi berewe kuari, ono pa manga mi diaberã ka kpara tire fu Yekova aima banda re ti merafuo agu apai nga ga zegino.”

¹⁹ Nairiwo wai du Yekova kia ti Satana nga gu boro naberã kina patiko! Nyenye mosoro ho Satana afuhe fu agu aboro nangbe na ko te. Na nirengo, gini gene du beko! Wene pangbanga ho tipa Satana nga gu ka ko berẽkuriihe te, maabangirise ho tipa ko a te. Wai du rengbe ko ka fu guhe foro adunga beko ya? Satana rengbe ka fu kina gbegberẽ maabangirise foro kumbatayo, wa ngbatunga gu du tipa ko!—Yugo. 20:10.

20. Ginipai rengbe paranga gude ka mangaha tipa ka sonakumbatayo ka manga kparatise na ki zi bapatiza? (Oni bi gu sanduki a nga “ Tipa ka Undoro Mo Sono Rogo Toro Yo.”)

²⁰ Si tie ziazia nga, kpara gamo raka fu Yekova nga gu rurupai si aida mo mangihe. Ya mo mo ima rẽ ka manga gu diandue re? Kangia wo duhe, ka mo gundenga ya. Ono ka si du nga, si naida mo ima mbata tooni, mo mangisunge na agu aberãpai du rogo gi kekepai re tipa kaa nduandu kindi ku mbatayo. Gu mokedi nangia Pauro akepai fu agu awirina naadu Firipoi yo nga: “Ono ani tá ni kina gu rugute da ani ti ni.” (Frp. 3:16) Ka mo pekefuo gu rugute re, si nika fõngbaduroyo ni ipo mo idi ka kpara gamo raka fu Yekova na ki zi bapatiza.