1. Ginipai ani awirikihe ti regbo gu dunguratise ninaamanga na agarã dũ nangia ga 2023?

 TI REGBO gu dunguratise ninaamanga na agarã dũ nga ga 2023, a ani agbia vovo giarogopai yo tipa kura gaani aida na ani agi bawene atingidapai tipa gaani sunge tungusapai. Ni kpiapai, ani awiriki gupai nga bete gu kura aboro kinaho ima rengba kadu na momu ka ngbe na ga Yekova aboro zavura tingbafuo i gbarasi Babera Duna Bakere Ome Ti Ni. Ani awiriki gupai a nga tona rogo Ngbangba 2023, si aidanga abatungusipa Kindo nafu agu asa berewe i adiaha ku gene tungusapai yo te. Ya mo gu ngbatunga aˈariapai re nasa gaani sunge tungusapai ka si du nga na nyanyakipaha na ni ipiipihe wa gu si anidu mbata ya? Wa gu sa te!

2. Tipagine gaani sunge tungusapai ada ti ni ni gupai si aida ani mangihe niipo wa aˈuru asusa? (Marako 13:10)

² Wa aˈuru asusa ni basasa, gaani sunge tungusapai nada ni gupai si aida ani mangihe niipo gbe. Tipagine? Bambiko gu regbo nye koyo si ni kina wiri guruhe. Oni bingo gupai Yesu aima pehe tipa sunge tungusapai ti yangara arame. (Oni gedi Marako 13:10.) Ringbisihe kuti gu pangbanga Matayo akehe, Yesu ape gupai nga i nika tungusa gi wene pangbanga re rogo zegino dunduko ‘ragoho ki digi adiga.’ (Mt. 24:14) Gu fugo re nayugo gupai nga da ti digido gi ga Satana gbegberẽ zegino re. Yekova ima sia gu “uru na gu saa” tipa agu apai nika manga barambeda.  (Mt. 24:36; 25:13; Amo. 1:7) Aˈuru dunduko ni basasa ani ambeda na gu regbo re. (Rom. 13:11) Da kinaho gu uru re nika da ni, si naida ani naatungusapai kindi.

3. Ginipai nafõngbaduraniyo ani tungusipai?

³ Wa ani kaa berãkuriipa gaani sunge tungusapai, si naida ani berẽkurii gi nyanyakipa sanahe re: Tipagine si aida ani tungusipai ti ni? Bambiko, nyemuse nafõ rani ani tungusipai. Gupai ani amangaha gene tungusapai yo nayugo pa gaani nyemuse​—gaani nyemuse tipa wene pangbanga, gaani nyemuse tipa aboro, na gu nyakipaha anyaka gbe nga, gaani nyemuse tipa Yekova na rimoko. Ani sakingo pai tipa agi pai re nibasasa.

ANI NATUNGUSAPAI BAMBIKO ANI IMA KPINYEMU WENE PANGBANGA

4. Wai gu ani ninaamangapai ho ani agia wene pangbanga ni?

⁴ Mo berẽnga kuriipa wai mo adu ho mo agi wene pangbanga ni​—si rengbe kadu nga boro dagba gamo aborokporo yo avungu gude watadu boro afu sunge marã foro nga gu mo aaidaha na omero dunduko. Zanga kapa, mo adu regerege ka pe gi pangbanga re fu gamo aborokporo na abakureamo. Ya mo pai wa gure amangingo ro ho mo agi bawene pangbanga ni​—gu wene pangbanga nga ga ga Mbori Kindo?

5. Waigu mo adu ho mo awiriki gu rengo ni du rogo Fugo Mbori yo ti bambata regbo? (Oni bi asura a.)

⁵ Mo berẽnga kusayo ka bingo wai mo adu ho mo awiriki gu rengo ni du rogo Fugo Mbori yo. Mo awiriki gupai nga gu Bamo du ngbangbaturũ yo ima kpinyemu ro, na ko naida mo du ni papara gu gako aborokporo nairisoko, na ko kidohe nga ko nika nyasariipa aigirã na arungo, na mo ima rengba kadu na maabangirise ka bi gu gamo aboro nakpiki i nazingisiyo kurogo vovo zegino​—na gu kura dungu apai. (Mk. 10:29, 30; Yo. 5:28, 29; Rom. 8:38, 39; Yugo. 21:3, 4) Agi arengo mo awirikihe re aima sa ro mo du na ngbarago. (Rk. 24:32) Mo aima kpinyemu gupai mo aawirikaha, na  mo adu na nyemu ka pehe fu aboro dũ!​—Oni ringbisinga ha na Yeremaya 20:9.

6. Ginipai oni awirikaha ti gu kpiapai nga ga Ernest na Rose?

⁶ Oni bingo gi kpiapai re. Garã gu wirina du rimoko nga Ernest b adu wa bawe ho bako akpi ni. Ernest ape gupai nga: “Mi abaki bangire nga: ‘Ya mo ko ima ga ku ngbangbaturũ yo? Watadu wa ko nakpi ko ni ka nye koyo nyeanye kindi?’ Mi aakpi agu agude akpi naadu na abayo kindi ti ni.” Ernest anaandu dedede kurii murö bako yo kini kuku sande na kini kpari nga: “Ako Mbori, mi naida ka ino wari du buba ni.” Tingbafuo agarã wa 17 tingbafuo kpio bako, i asana Ernest, tipa wisigo Ziazia Kekeapai na ko aidihe na nyemuhe. Ko adu na ngbarago ka ino gupai nga kpikpi aboro ainongo pai te, i wakina agu aboro du rogo dudunguro rame, na Baibiri nakido pa zingabekpio kumbatayo. (Batu. 9:5, 10; Amo. 24:15) Ni yangaraha, ko agbia karagapai kuti gu sanahe naafuda ko tipa gbanga regbo! Ernest adu na bakere ngbarago tipa agu arengo nga ga Baibiri ko aawirikaha. Diako nga Rose, atona wisigo Baibiri a wa sa na ko, na ri aimi kpinyemu gupai ri aawirikaha. Rogo 1978 i azi bapatiza. I atungusapai zaaza fu agumeyo, abakureayo, na fu gu kura aboro tipa gu nyanyakipa arengo i awirikihe. Ni sangbana gipai re, Ernest na Rose ima undo aboro bangeyo naima susa 70 i mangi sonakumbatayo na ki zi bapatiza.

7. Ginipai na manga ho tara rengo nga ga Baibiri azio ngbadurani yo ni? (Rk. 6:45)

⁷ Ho ani akpinyemu gupai ni ani nawirikihe rogo Baibiri yo, ani nabihe nga si naida ani pehe fu aboro dũ. (Oni gedi Ruka 6:45.) Ani nadu wakina gu ga Yesu abawiriki naadu rogo bambata sa kama agarã naya: “Gaani nga kina gumba agu apai ani abi nigi he.” (Amo. 4:20) Ani ima kpinyemu rengo ni bakerehe gbe na si nasarani ani du na nyemu ka pehe fu dungu aboro wa rengbe omerani na ni.

ANI NATUNGUSAPAI BAMBIKO ANI IMA KPINYEMU ABORO

8. Ginihe nafõngbadurani yo ani tungusi wene pangbanga fu kura aboro? (Oni bi gu sanduki nga, “ Oni Kpinyemu Aboro​—Oni Sa Aboro ni Abawiriki.”) (Oni bi sura a.)

⁸ Wakina Yekova na Wiriko, ani ima kpinyemu aboro. (Snz. 8:31; Yo. 3:16) Ani na bakere nunga tipa agu aboro “zanga Mbori” na ‘adu nga na maabangirise ya.’ (Ef. 2:12) I na dungu akpakarapai, na ani na gu he berani i aidaha nga: gu wene pangbanga nga ga ga Mbori Kindo. Gaani nyemuse na nunga tipa gi ngbatunga aboro re nafõ rani ani mangi bakere ome tipa ka tungusa wene pangbanga fuyo. Gi nyanyakipa pangbanga re ima rengba ka  hiiso kpotoyo yo na maabangirise, ki undo yo i raki wene raka awere, na ki fu gu maabangirise fuyo nga ga “ndikidi unga”​—nga nyenye unga​—rogo ga Mbori vovo zegino.​—1 Tim. 6:19.

9. Gini zahe ani afuhe fu aboro tipa gupai nika manga kumbatayo, na tipagine? (Yezekere 33:7, 8)

⁹ Gaani nyemuse tipa aboro a nasarani ani pe gupai fuyo nga digido gi gbegberẽ zegino re ima mbeda ka da. (Oni gedi Yezekere 33:7, 8.) Ani na nunga koyo du aboro ni dunduko, kodihe na agu aboro nga gaani aborokporo nga aguyo airisongo Yekova ya. Dungu aboro naraka gayo raka zanga ino gupai naye kumbatayo​—nga “bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.” (Mt. 24:21) Ani naida i ini ginipai nika manga ti gu regbo sarangbanga re​—i nika dia ziree pambori kusayo na tingbafuo, i ki gbarasi gi gbegberẽ zegino re ti regbo Aramegido. (Yugo. 16:14, 16; 17:16, 17; 19:11, 19, 20) Gaani kparakpee nga, dungu aboro degenga tuyo adega kuti gupai ani apehe fuyo na ki diberã tipa ka iriso Yekova wa sa na ani. Na ginipai tigaha nika manga tipa agu aboro adeganga tuyo awere kuti gu zahe re ya kodihe na kura gaani aborokporo?

10. Tipagine duhe ti ni ni nyanyakipa pai kaa pe gupai fu aboro nika manga kumbatayo barambeda?

¹⁰ A wa i asakihe rogo gu kekeapai nasusi, si ima rengba kadu ni ga Mbori nyemupai tipa ka batasa agu aboro nga aguyo nika tona maa idapase kutiko ho i nika bi Babera Duna Bakere Ome Ti Ni ni i nigbarasihe. Kangia wo duhe, si ni nyanyakipa pai tie ani naandu kumbatayo kindi kaa tungusapai fu agu aboro adeganga tuyo awere furani ya. Oni berẽnga kurii gipai re: Gupai ani apehe awere fuyo ima rengba kadu ni gupai i nika tingidaha ti gu regbo re. (Oni ringbisinga ha na Yezekere 33:33.) Si ima rengba kadu nga i nika berãkurii gu zahe i agihe ngbarani na si ki sa yo i tona ka iriso Yekova na ani mbata fu si da nga gene berewe te. Wakina gu babanda bambukiso naadu Firipoi yo na aria berãko ho “bakere bazigizo” amangi ni, si ima rengba kadu nga bete agu aboro adeganga tuyo awere ya nika aria berãyo ho i nika bi Babera Duna Bakere Ome Ti Ni ni i ni gbarasihe.​—Amo. 16:25-34.

ANI NATUNGUSAPAI BAMBIKO ANI IMA KPINYEMU YEKOVA NA RIMOKO

11. Waigu ani afu taarimo, irisa, gbiati gaani ome fu Yekova? (Yugoti 4:11) (Oni bi asura a.)

¹¹ Gu nyanyaki ndupai ani atungusapai ti ni nga, ani ima kpinyemu Yekova Mbori na ziazia rimoko. Ani nabi gaani sunge tungusapai nga gu gene si aida ani taasi gu Mbori ngbaha ani nakpinyemu ko. (Oni gedi Yugoti 4:11.) Ani  dunduko idi kuti gupai nga: “Mo gaani Gbia nga gaani Mbori, re mo are na dia taarimo na irisa na tandu.” Ani nafu taarimo na iriso fuko ho ani ayugo gupai ni fu aboro nga gu ani naidi kuti ni nga ko “nafu ahe dunduko” na ani ni unga rani bambiko ko nafu unga furani. Ani nafu gaani ome fuko​—ho ani amangasunge ni na gaani regbo, ome, na agu ahe du berani ka tungusapai a wa rengbe omerani na ni. (Mt. 6:33; Rk. 13:24; Koro. 3:23) Ka pehe ngba taata gene, ani ima kpinyemu kaa fura tipa gu Mbori ani nakpinyemu ko. Ani nabihe nga si naida ani pe pa rimoko fu kura aboro na gu ngbatunga Mbori nga ko. Tipagine?

12. Waigu ani aziasi rimo Yekova gene gaani sunge tungusapai yo?

¹² Gaani nyemuse tipa Yekova nasa rani ani ziasi rimoko. (Mt. 6:9) Ani naida ka fubee kuti ziasi rimo Yekova be gu gbegberẽ aziree Satana naye na ni kuti rimoko. (Bam. P. 3:1-5; Eyo. 2:4; Yo. 8:44) Ho ani atungusapai ni, ani na bakere nyemu ka pepa gu ngbatunga boro nga Yekova fu agu aboro nadegatuyo furani. Ani naida aboro dunduko ini gupai nga bangua sino ko nga nyemuse, na gako gene zogarago niruru he, na gako Kindo nika nyasariipa arungo dunduko, na ki ye na zereda na ngbarago fu aboro dunduko. (Tam. 37:10, 11, 29; 1 Yo. 4:8) Ho ani ape gipai re ni fu aboro tipa Yekova, gure nga ani na ziasi rimoko. Ani na ngbarago a bambiko ani namanga gupai si aida ani mangihe wangia ani aDezire Yekova. Ngba gini gene?

13. Tipagine ani abihe ti ni nipa irisa i niyambu rani nga aDezire Yekova? (Yesaya 43:10-12)

¹³ Yekova ima sia rani ani du ni gako “adezire.” (Oni gedi Yesaya 43:10-12.) Bete agarã kusayo, waraga Riigbu Bipasunge akehe ape gupai nga: “Gu bakerepa irisa rengbe boro kadu na ni nga i naayamba ni nga boro sa dagba  aDezire Yekova yo. c Tipagine duhe ti ni wo? Oni bingo gi kpiapai re. Ka si du nga mo naida boro du ni dezire kuba ro ngbanga yo, mo rengbe ka sia gu boro nga guni mo naima ino ni na kidu na kido kuti ni, na gu boro du rimo ni wenengai aboro narengbe ka kido kuti gupai ni apehe. Wa Yekova nasia rani tipa ani du ni gako aDezire, ko nayugo gupai nga ko ima ino rani wenengai na ko na gu kido nga ani nika pe gupai ape fu kura aboro nga ko nga gu yangara ndikidi Mbori. Si nipa irisa furani tipa ani du ni gako aDezire, na ani namangasunge na agu amamu dunduko ani agbiaha tipa ku yugo rimoko fu kura boro, na ki yuguhe nga agu aziree dunduko aboro apehe tipa ko rengo nga ha te. Ni manga ani he wo, ani naraka kuti gu rimo du kurirani nga aDezire Yekova!​—Tam. 83:18; Rom. 10:13-15.

ANI NIKAA NDU KUMBATAYO KINDI KAA TUNGUSAPAI DA TI DIGIDO ZEGINO

14. Gini bawene apai nasungudo rani kumbatayo?

¹⁴ Ani na bakere ngbarago ka bi gupai rengbe ka manga barambeda kumbatayo! Mbiko ga Yekova amaku, ani nangera kumbatayo tipa ka bi dungu aboro i ni koditiyo na ani mbata fu bakere gberãngbi tona. Berewe a, ani na bakere ngbarago nga zavura ti gu kere regbo rogo ga aboro raka yo nika ngia​—regbo bakere gberãngbi​—ani ima rengba ka bi dungu aboro i nimbu gi ga Satana ngbi re na ki koditiyo kuti rani tipa ani taasi rimo Yekova!​—Amo. 13:48.

15-16. Ginipai ani nikaa ndu kindi kumbatayo kaa mangaha na dakuti gini regbo?

¹⁵ Wa du rago tie re, ani na sunge berani ka mangaha. Ani na gu mamu berani nga ka takapande gupai i nikaa taka nga pandehe berewe ya​—nga tungusa gu wene pangbanga nga ga ga Mbori Kindo rogo zegino dũ. Na kina ti gu bangisa regbo re a, si naida ani naafu zahe kindi fu aboro tipa gupai nika manga barambeda. Si naida aboro ini gupai nga digido gi gbegberẽ sino raka re ima mbeda kada. Na ho gu regbo sapangbanga re nika da ni, i ainoho aino nga gu pangbanga ani aatungusaha re aye be Yekova Mbori.​—Yeze. 38:23.

¹⁶ Ginipai tie ani nadiberã ka mangaha? Nyemuse​—nyemuse tipa wene pangbanga, nyemuse tipa aboro, na gu nyakipaha gbe nga nyemuse tipa Yekova Mbori na rimoko​—nika sarani ani naandu kindi kumbatayo kaa tungusapai na nyemuhe, na kidu zaaza da kinaho Yekova nika ya ni wẽ, “Sunge tungusapai ima digo!”